الصافي... طارق اللبيب

الحلقة الثلاثون

عبدالسلام اخو تسابيح زول عاقل وفاهم .. حوالي 37 سنة تاجر اكترونات في السوق العربي .. وكيل لشركة عالمية معروفة .. متزوج وعندو ولد .. ساكن في الطابق التاني.. في نفس العمارة حقة ابوهو.. وناس امو ساكنين تحت .. واختو الاصغر منو متزوجة .. وساكنة معاهو في نفس الطابق في الشقة المقابلاهو .. اها علاقتو بي اخته تسابيح علاقة طيبة . طلعت ليهو فوق .. ومعاها كلام يشيب الراس .. قالت ليهو عبدالسلام اخوي.. انت موش اخوي وبس.. انت صاحبي .. واي مشكلة قبل ما اقولها لابوي .. واخوي عبد الملك انت عارفو متهور .. بجي بحكي ليك انت .. انا واقعة في مشكلة بي سبب اني غلطت غلط كبير .. وانت ولي امري.. وانت الوحيد البحق ليهو يعاقبني .. ويحل لي مشكلتي ..
قال ليها في شنو ياتسابيح ؟ رفعتي لي السكري .. قولي وخلصيني النشوف ..
قالت ليهو قبل ايام عزمتنا واحدة صاحبتنا .. وطالبة معانا اهلها في السعودية ..عزمتنا في محل السكن الساكنة فيهو داخلية معاها بنات خالاتها وبنات اهلها.. المهم مشينا ليها.. وقعدنا واخدنا راحتنا .. وقلعنا هدوم الجامعة .. وقعدنا بهدوم البيت .. لالا بصراحة ملابس داخلية .. وبعد شوية قعدنا نغني ونرقص ..
قال ليها موش براكم؟.. قالت ليهو ايوة .. قال ليها طيب المشكلة وين؟
قالت ليهو اصبر .. اها صاحبتي المشت معاي.. قعدت تصور فينا ونحن ما ملاحظين .. المشكلة انو تلفونها سرقوه.. واحد من اولاد الجامعة الما مربيين .. وبقى يهدد فيني انا بالذات .. ويهدد انو حينشر الفيديو في النت .. ويطلب مني حاجات لاترضي ربنا .مساومة يعني .. وانا موش لونشر صورتي لو جابني في قناة الجزيرة .. ما ممكن ادوس على سمعة اهلي .. اها طبعا" بقيت متوترة .. وماعارفة اعمل شنو؟
قلت انت اولى زول الجأ ليهو.. لانك انت الوحيد البتفهمني .
قال ليها تعالي .. تعالي هنا قريب .. طبعا" خافت وقلبها داير يطلع بي حلقها .. وخلاص حست بالهلاك اوشك .. بقت مترددة .. قال ليها قلت ليك تعالي ..
جات وقفت قدامو.. وهو قاعد في كرسي .. وبقت تبلع في ريقها ..
قال ليها انتي خايفة كدا مالك ؟ .. اقعدي قدامي هنا ..
بركت قدامو في الواطة.. مسك راسها وسلم ليها فوق راسها .. وقال ليها انتي اختي فعلا ياتسابيح .. قومي اقعدي في الكرسي ده ..
انتي عارفة دي لو واحدة تانية .. كانت انجرت مع الضغوط والمساومة .. لكن انت بت ناس حاج العمدة مستحيل تخيبي .. ماتشيلي اي هم من الموضوع ده.. اعتبري الموضوع انتهى .. واديني اسم الولد وامشي على قرايتك ..
ورتو اسم مؤيد بالكامل .. وقالت ليهو انا اسفه ياعبدالسلام .. قال ليها يابت انتي عويرة امشي .. خلاص انسي الموضوع ده ..
عبدالسلام اتصل على صاحبو وود خالة مرتو .. ضابط في المباحث ولا في الامن ماعارف .. المهم زي مابقولو بوليس سري .. اسمو ياسر.. بقولو ليهو ياسر فلفل .. لانو زول كارثة في التحقيق .. عبدالسلام اتصل عليهو.. وحكى ليهو الحاصل .. قال ليهو جدا" باكر الموضوع ده بنتهي .. وياسر كون التيم بتاعو .. وقال ليهم الولد ده لمسنا في اللحم الحي .. والناس ديل نسابة ياشباب .. يعني اي دقسة منكم بت خالتي زوجة عبدالسلام ذاتها بتضرر ..
انا باكر بمشي معاكم .. وبركب مع عبدالسلام في عربيتو.. وانتو تتصرفو ..وتسلمونا الجهاز .. وبعدين تشوفو شغلكم مع الولد ..
من دون عبدالسلام مايعرف .. دايريكم تفسحوهو فسحة ظريفة كدا.. عشان تاني مايكرر عملية زي دي مع بنات الناس ..
ــ
اما الحاصل بين ..لينة ومؤيد .. كانت قصة عجيبة وغريبة ..
شوفو عجايب الاقدار .. اول لينة جات مؤيد من بعيد بقى يعاين ليها ويتبسم.. فجأة ابتسمت معاهو .. اندهش وطوالي قام جاء ماشي عليها ..
قال ليها الجميل يعني سامحني ولا له ؟؟ قالت ليهو اصلو الجميل طبعو السماح .. قعد يضحك قال ليها.. اصلو الجميل طبعو الخجل ..
قال ليها ياخي ماتحرفي الكلام.. قالو اصلو الجميل طبعو الخجل ..
قالت ليهو خير .. كلو عن العرب صابون ..
قال ليها والله انا ندمت على تصرفي اليوم داك ندامة عجيبة .. قالت ليهو خلاص يا غالي.. انا رجعت ليك بعد ما عرفت قيمتك .. قالو الزول مابعرف قيمة الشي العندو.. الا لمن يفقدو ..
طيلة الفترة الفاتت دي.. انا اتعرفت بي كم نفر.. اول كان الصافي الاكتشفت شخصيتو من اول ايام وفارقتو ..
وتاني بعدو نفرين برضو ما سدو لي خانتك ولابقدرو ..
قال ليها انا شخصيا قلت يوم من الايام ح ترجعي لي .. وانا والله جادي عايزك لي مستقبل حياتي .. حتى لو اهلي وقفو ضدي ..
قالت ليهو حلك لليوم داك.. نحن هسي اهم حاجة مانتفارق تاني .. عليك الله يا مؤيد عشان خاطري ماتخليني تاني .. وبعدين لمن نبقى على قصه العرس.. البسويهو ربنا نحن نرضي بيهو..
قال ليها ياسلام عليك نفس كلامي .. وده ياهو كلام العقل .. المهم طبعا مؤيد فرحان فرح شديد خلاص برجوع لينا.. وحس بي نفسو انتصر .. كونها تخلي الكل وتجيهو راجعة ..
وماعارف الراجيهو ..
اها يازول اليوم داك لينة قفلت تلفونها .. بعد ما اطمأنت انو الزول ده صدقها خلاص .. قالت ليهو نحن بعدين جايين منتزه المقرن .. معاي اخواتي اتنين .. وبنات خالاتي.. انا ماكنت ماشة معاهم .. لكن لو انت بتجي هناك . انا بجي ..
قال ليها اقول ليك حاجة؟؟ انا من هسي بمشي هناك بنتظرك ..
مشت يازول من العصر تلبس وتتظبط .. وتسأل في ربنا انها تتوفق في الموضوع الدايراهو .. ويتحقق هدفها.. وفعلا مشت لقتو قاعد فوق صبة من صبات الممشى البكون بين النجايل في المنتزه .. ومنظرها قريب المدخل.. اول من جات معاها اختها الاكبر وواحدة بت خالتها .. قالت ليهم يهوداك الخنزير.. القاعد في الصبة داك .. انتظروني بس ربع ساعة انفذ المهمة واجيكم ..
جاتو زعلانه شكلها ووشها متغير.. وسلمت عليهو سلام كدا ماياهو .. قال ليها مالك يا لينة ؟
قالت ليهو غايتو انا.. اصلا ماعندي حظ والدنيا .. قدر ما افرح واحس بالسعادة في حياتي .. تجي حاجة تعكس لي حياتي.. وتقلب الطاولة في وشي .. قال ليها في شنو يا لينة.. قولي لي انا منتظرك ..
قالت ليهو اتصلت علي واحدة كدا وماتسالني هي منو.. كويس ؟ قال ليها كويس .. قالت ليهو اتصلت وقالت لي ابعدي من
مؤيد .. لانو انسان غدار وخاين.. وغدر بي تسابيح العاملاهو زي اخوها ..
وهسي قاعد يضغط عليها بي فيديو قاعد في تلفونو ..انا يامؤيد قلت ليها انتي كذابة .. مابعمل كدا.. قالت لي خليهو يديك التلفون .. وفتشي لو مالقيتي فيديو فيهو تسابيح بترقص بالملابس الداخلية .. انا اكون كذابة ..
صحي يا مؤيد الكلام ده ؟
قال ليها والله الحقيقة صح .. انا تاني مابكذب عليك اصلو .. لكن والله ماقصدي حاجة شينة ..
وانا اساسا كنت عايز امسحو والله .. قالت ليهو كدي اديني تلفونك ده يامؤيد .. لو سمحت .. مدا ليها التلفون .. فتحت الفيديوها.. ولقت الفيديو الفيهو تسابيح بترقص .. اول واحد .. وكت شافتو لينة دي شعر راسها وقف سبيبة سبيبة .. وقالت ليهو حرام عليك يامؤيد.. تخلي في تلفونك فيديو زي ده .. قال ليها والله كلامك صح .. والله انا خجلان من نفسي .. لكن بوعدك تاني فيديو زي ده مايقعد في تلفوني .. قالت ليهو لازم امسحو قال ليها امسحيهو طوالي لكن .. عليك توعديني بحاجة .. قالت ليهو اها شنو؟؟ ...
قال ليها تسابيح ماعارفة الفيديو عندي .. عليك الله ماتكلميها ..
قالت ليهو انت قايلني بتاعة شمارات زي سحورة ؟ سرك في بير
(طبعا مؤيد الحاقد عايز تسابيح تكون عايشة في نفس الخوف) عشان كرت الضغط يكون فعال .. وشغال ويحقق اهدافو ..
المهم لينة مسحت الفيديو بكل سهولة .. وصيعت ليك مؤيد زي الماحصل شي .. بعد شوية يمكن بعد سبعة دقايق بعد مسحت الفيديو .. رسلت رسالة من تلفونها لي اختها القاعده في طرف المنتزه ..
وقالت ليها اتخارجو على الباب تمت المهمة .. وهي بتتونس معاهو بي اندماج وبترسل في الرساله .. اخواتها الاتنين مرقن على الباب .. وكوركن ليها ارح يالينة ..
قالت ليهو مؤيد يا عمري انا خلاص اتاخرت.. وشكلهن زعلن مني.. لاني ماقعدت معاهن .. يهديك مرقن.. يلا نتلاقا بكرة في الجامعة ..
والمشكلة انو لينة لا اتصلت على الصافي.. ولا اتصلت على تسابيح عشان توريهم عملت شنو ..
قالت لي بكرة الاقيهم واكلمهم.. مافي داعي للاستعجال بالليل ده ..
لكن لانو مؤيد ربنا غضبان عليهو.. واستجابت فيهو دعوة الصافي .. يوموالاتهمو بالزور في علاقتو مع لينة .. والصافي قال خليتو لي الله .. شكلها الدعوة بدت تتنفذ .. بالاضافة لي دعوة لينة قالت الله ينتقم منو .. بالاضافة لي دعوة تسابيح .. غايتو دعوة المظلوم حاوطتو ليك تب المجرم ..
باكر من الصباح ناس المباحث جو الجامعة.. سايقين بوكسي والضابط راكب مع عبد السلام اخو تسابيح في برادو 2005 مظللة
وسألو ليهم واحد .. عن مؤيد اشر ليهم قال ليهو يهوداك .. الكلام ده تقريبا 8 صباح .
مشو عليهو اربعة افراد كف كف ختفو ليك.. ومرقو بيهو .. وركبوه في البوكسي ودورو .. تحت ذهول الطلبة وعلى عينك ياتاجر .. اول حاجة قلعو منو التلفون .. وادوهو لي الضابط ياسر ودورو بيهو مشو بيهو وين الله اعلم .. المهم راجياهو فسحة ظريفة كدا ..
الضابط مسك التلفون .. وبقى يفتش في الفيديوهات .. مالقى شي
كلها افلام اباحية اجنبية .. ولقطات عارضات ازياء .. واجنيات متعريات وكدا يعني.. مافي حاجة من المذكور .. اها الضابط قال لي عبد السلام مافي حاجة من القلتو هنا ياعبد السلام ..
قال ليهو امشي وراهم .. خلينا نفهم منو حاجة .. مشو طوالي الموقع المركز .. وهناك الضابط سأل مؤيد .. ومريد اصلا ماعارف رفعوه لشنو .. وكان في الغربية بسأل في الافراد .. ياخوانا في شنو؟ انا مالي؟ .. قالو ليهو اوعك تفتح خشمك ده .. لمن تصل بتعرف كل حاجة ..
اها لمن وصلو وعبد السلام والضابط جو.. الضابط سأله قال ليهو ..
في حاجة واحد بتمرقك مننا .. لكن لو كذبت ولا لفيت ودويت .. نحن بنوريك النجوم في الوقت ده .. فاهم؟؟ ..
قال ليهو والله ياجنابو مافاهم اي حاجة انا.. في شنو بالضبط ياجماعة .؟
قال ليهو انت عندك فيديو مصورة فيهو تسابيح . الطالبة معاك في الجامعة وين الفيديو ده؟
قال ليهو والله مسحناهو.... الضابط صررررررررر لصق فيهو كف ..
كمان بتحلف؟؟ .. انا بسألك .. الشكوى جاتنا امبارح بالليل.. يعني مستحتو متين؟ .. قال ليهو والله كمان مامسحتو انا.. مسحتو لينة جيبوها واسألوها.. وصررررررررر لصق ليهو كف تاني..
قال ليهو كمان تقول لينة ؟؟ لينة بتاعة شنو البتمسح فيديو زي ده من تلفونك لينة دي منو؟
عبد السلام قال ليهو دقيقة ياجنابو ؟
اتصل عبد السلام على تسابيح في الجامعة.. لقاها في المحاضرة ..
وتلفونها صامت .. شغال هزاز .. شعرت بيهو .. طلعتو عاينت .. وكت شافت تلفون اخوها استأذنت وطلعت من نص المحاضرة ..
قال ليها انتو معاكم بت اسمها لينة؟؟ قالت ليهو ايوة .. قال ليها الزول ده قال الفيديو مسحتو لينة ..
قالت ليهو بس المشكلة هسي نحن في المحاضرة الا تنتهي المحاضرة وتطلع لينة واسألها ..
قال ليها خير انا منتظرك ..
في لحظة الانتظار دي .. الضابط لسه بحقق معاهو .. قال ليهو انت الفيديو جاك من وين؟؟ .. مؤيد بقى يتمتم .. غالبو يقول سرقتو .. وغالبو يقول جابتو لي سحر بي 200 جنيه ..
قال ليهو لقيت تلفونها واقع .. وشلتووفتحتو وشفت الفيديو .. وحولتو عندي .. ياسر فلفل ضابط ذكي .. عاين ليهو كدا في وشو .. عرفو بكذب ..
قال للعسكري المعاهو اسمع يا منعم امشي جيب الفرنيب من جوه ده كذاب ده .. مؤيد طير عينيو .. وما عارف الفرنيب ده شنو؟ (الفرنيب شرك من خشب بنصبوهو للصبرة) وباللغة العربية (فخ للثعالب) ..
اها مؤيد عرف انو الشي ده آلة تعذيب .. وبقى يتلفت .. والله خايف خوف .. قال ليهو دقيقة ياجنابو .. انت داير تسأل من شنو؟
قال ليهو قول لي الحقيقة الفيديو جبتو من وين ؟
قال ليهو والله رسلته لي البت الكانت معاهم ..
الضابط قال ليهو والبت الجابتو ليك كانت ظاهرة في الفيديو المصور ده؟
قال ليهو لالا هي الكانت بتصور .. قال ليهو اذن .. كانت بتصور مع سبق الاصرار على توزيع الفيديو .. دي اسمها منو وبتقرا وين؟
قال ليهو عليك الله ياجنابو .. ما تجرجر البت .. انا اهو اعترفت ليك ..والعايز تعملو معاي اعملو .. كدا المشكلة بتكبر ..
ياسر قال ليهو خليها تكبر.. نحن قاعدين هنا بنصرف قروش من الحكومة عشان شنو؟ عشان حماية الناس من اشكالك دي ..
اسمع يا عسكري.. اركبو امشو الجامعة جيبو البت الاسمها سحر عثمان دي سريع .. وانتو هناك شيلو منها تلفون ولي امرها .. اضربو ليهو يجينا هنا .. طبعا ياسر الضابط عرف بالحس الامني انو في اتفاق مسبق .. بين مؤيد وبين سحر على الفيديو .. وعلى فضيحة تسابيح .. في الوكت ده تسابيح اتصلت من الجامعة في تلفون اخوها عبدالسلام .. وقالت ليهو انا قابلت لينة .. ولينة قالت مسحت الفيديو من تلفون مؤيد ..
ياعبدالسلام اخوي عليك الله الموضوع ده اطفوهو.. بقوم يجيب لينا فضايح .. قال ليها انت تسكتي بس ..
وسحر جابوها الموقع .. وابوها وصل واخوانها تلاتة وامها ..
وحكت كل التفاصيل انو مؤيد اداها 200 عشان تجيب ليهو الفيديو وهي دبرت القصة وشالت القروش .. وابوها قعد يبكي .. و حرمها من الجامعة .. وحلف طلاق قدام امها.. تاني ماتشوف الجامعة بي عينها ..
وعبد السلام طلب من ياسر انو يخلي سبيلها .. ياسر قال ليهو .. الحصل قدام اهلها ده اكبر عقاب ليها .. وقال لي ابوها خلاص يا حاج سوق بتك وامشو .. الراجل ده ودناس وعفا حق اختو .. تاني ماعايزنكم هنا امشو .. امشو خلو لينا الولد ده عندنا معاهو لعبة حلوة كدا ..
وسحر طبعا" دخلت اهلها في اسوء كابوس.. نسأل الله السلامة .. اها استفدتي شنو من فضيحة الناس ياسحر ؟؟؟؟..
انتي ماعارفة من ستر مسلما ستره الله في الدنيا والاخرة؟؟ .. وبالتالي من فضح مسلما" .. فضحة الله في الدنيا والاخرة ..
والرسول صلى الله عليه ولم. قال من تتبع عورة امرئ مسلم ليفضحه .. تتبع الله عورته حتي يفضحه وهو في عقر داره ..
ومرة قال طارق اللبيب ..
نقال الخبر .. في مجلس البغتابو .
مديون ليهو يوم. نفس الكلام الجابو..
زي ما شال كلام في غيرو واتسلابو.
بكره يقولو فوقو . ويستغلو غيابو..
.. وقال ..
الببرا الفضايح شان يشيللو شمار ..
تأكد فوقو يوم تتناقل الاخبار ..
اتعلم تصون لي غيرك الاسرار..
تكون محفوظ على مرالزمان الدار .
وده الحصل لي سحر .. دايرة تفضح تسابيح ربنا ستر تسابيح .. وفضحها هي .. سبحان الله العظيم .. المهم ربنا عندو قوانين في الكون اصلا ما بتبطل .. ربنا يحفظنا واياكم ..
الى اللقاء ..