الصافي... طارق اللبيب

الحلقة الواحد و عشرون

حمودي اتكيف انو سرو ح يكون محفوظ .. والرشيد ما ح يتكلم .. بس الرشيد سرح مسافة .. قال ليهو لكن هم قالو الحرامي الصافي اخوي .. وعشان هم ح يشاكلوهو بدون سبب .. نحن لازم نكون شجعان ونتكلم الحقيقة .. انت ماتخاف من الدق .. انا بكلم خالتو ماتدقك .. انا مابرضى الصافي يشاكلوهو.. وممكن ابوي يضربو .. لانو ابوي زعلان من قبيل .. وطردني من الصالون لمن بكيت ..
قال ليهو لالا مابشاكلوهو ماتكلمهم .. الرشيد سكت ساي وهو ماقبلان الموضوع ده جواهو .. انو يمون الصافي مظلوم وماعارف يعمل شنو ؟
شوية كدا وحمودي غير ليهو الموضوع .. قال ليهو انا عندي بلي استيشن بتعرف تلعب ؟
قال ليهو ايوة بعرف عندي واحدة في البيت .. امي بتطلعها لي في الاجازة بس .. وساعتين في اليوم كلو .. والله ولا مستمتع بيها ..
قال ليهو طيب بتعرف ياتو قيم وريني ..
قال ليهو بس بحب الدوري الانجليزي.. المهم كانت الونسة الباقية خارج اطار الموضوع الذهبي ..
بعد شوية قامو جارين الاتنين .. ودخلو جوة .. وامجد اصلا ماقعد معاهم .. مشى يلعب مع بسمة .. وبسمة بس مدخلة اصبعها في خشمها وتعاين .. مابتتكلم نهائي .. كلامها شوية .. ومعجنة ومدلعة ..وامجد خاتي اللعبات قدامو يقول ليها .. دايرة دي؟ طيب دايرة دي؟
طيب اجيب واحدة تانية ؟ وهي بس تعاين للعبات وساكتة .. والامات هناك بتكلمن ..
لسع في نفس الموضوع لاكوهو لواكة .. بعد رقية ما استلمت السلسل برضو ما سكتت .. قالت لها والله انا يا ايمان اصلا" ما كنت بتوقع انو الصافي يعمل كدا..
لكن خيب ظني .. غايتو الحمد لله .. كتير من الناس بخونو الثقة .. الصافي ما اول زول يعمل كدا ..
وايمان تقول ليها عاد يارقية .. ما ممكن تقتنعي بي كلامي.. اعمل ليك شنو؟ مع اني متأكدة من براءة ولدي.. لكن بس نقول حسبنا الله ونعم الوكيل ..
الصافي بي غادي مع ابوهو كملو كلامهم ..
في النهاية ابوهو قال ليهو .. المراة دي انا طبعا" مابخليها .. الا توريني اتهمتك ليه.. وشافت عليك شنو؟
قال ليهو بس ياهو ديل السببين .. معتقدة اني بنتقم فيها لانها فتحت دولابي .. والسبب التاني لمن الحاجات اتفقدت.. انا الوحيد الفي البيت.. قال ليهو ده كلام ماكافي يا الصافي .. انا لازم اناديها اتكلم معاها ..
الصافي قال ليهو دقيقة يا ابوي.. خليني اتصل على خالد واحمد.. عشان مايقولو الامين جا بي ورانا.. وشاكل الحريم ..
ابوهو قال ليهو صاح كلامك.. اتصل عليهم .. اصلا لازم يجو يسمعو اختهم بتقول في شنو؟
الصافي مسك موبايلو.. واتصل على خالد اول .. خالد انت وين؟ ناس الوالد والوالدة وصلو.. في البيت.. وعايزين يسلمو عليك.. عليك الله لازم تجي .. خالد قال ليهو انا اساسا جاي على البيت.. ماعندي حاجة .. مسافة السكة ..
الصافي قاليهو بالسلامة ..
,,
اتصل على احمد .. احمد خالي ..السلام عليكم ..
احمد قال ليهو عليكم السلام الصافي ..
الصافي قاليو كيف اصبحت ياخال.. ونهارك سعيد ..
اتصلت عليك لانو ناس ابوي وصلو البيت هنا في شمبات .. .ودايرين يسلمو عليك ..
احمد قال ليهو ان شاء الله عافية ؟
قال ليهو لالا الحمد لله عافية تب .. الله يجزيك خير ياخال ..
قال ليهو جدا يا الصافي.. انا هسي بتحرك عليكم ..
في الوقت ده رقية .. جات تسلم على الامين .. يادووب والساعة 12 وشوية .. سلم عليها بي نفس مريضة وبعاين ليها عشرة عشرة ..
ولسه الفطور ماجهز .. بعد عشرة دقايق جا خالد .. وسلم على الامين .. ودخل جوة سلم على ايمان .. وجاب الفطور وجا ..
وقعدو يفطرو في صمت غريب .. خالد حاسي بانو الوضع ماطبيعي..
وبعاين للامين بي طرف عينو .. والامين شكلو متضايق .. والصافي عادي بياكل .. وكل مرة يعاين لي خالد وياخد لي ابتسامة ..
خالد غمز لي الصافي .. واشر بي عيونو على الامين.. يعني ابوك ده مالو؟
قبل مايتصرف الصافي .. ويوصل معلومة بي عيونو لي خالد .. الامين بدا يتكلم .. قال ليهو انت يا خالد ماعندك اي خبر بالحاصل ده؟ انت موش قاعد في البيت مع الصافي ؟
خالد قال ليهو في شنو؟ ماعارف حاجة والله .. في شنو يا الصافي؟ ..
الامين قال ليهو يا الصافي انت ماكلمت خالد؟
الصافي قال ليهو .والله ماكلمتو يا ابوي.. ماكنت عايز اضخم المشكلة .. قلت يمكن المشكلة تتحلا والبتاع دي يتلقي.. مافي داعي اوسع دايرة المشكلة .. وكنت متوقع رقية تكلمو ..
خالد قال ليهم ياجماعة في شنو؟.. فهموني حاجة.. الصافي في شنو؟
الامين استلم التقرير .. قال ليهو رقية اختك يا استاذ عندها دهب رايح .. ومتهمة الصافي يكون سرقو .. وفتحت فيهو بلاغ في الشرطة.. وضربت لينا تلفون في عطبرة .. عشان نجي .. ده كلو انت ماعارفو؟
قال ليهو ابدا" ماعارفو .. الصافي ليه ماقلت لي؟؟ ..
اكيد المراة دي مخها ما صاحي .. كيف يعني الصافي يسرق دهب خالتو؟؟ .. هي كل الفترة دي ماعرفت الصافي شنو؟
الصافي قال ليهو الكلام ده كان امس.. والبيت كان فاضي بعد انت طلعت .. والظاهر الاولاد مشو الجيران برضو .. وهي لمن جات لقتني براي.. وكان في موضوع قبل يوم .. وحكا ليهو قصة الورق وقال ليهو يعني خالتي خاتة في راسه انو انا لازم اتسدا الحكاية دي يعني باختصار يا خالد التهمة كانت بي سببها .. انا بقول هي معذورة في الوقت الراهن .. وفي النهاية دي حرمة ..انت اصبر لمن تسمع وجة نظرها ..
خالد قال ليهو وجهة نظرها شنو يا الصافي؟؟ انت مسكنتك دي مابتخليها؟؟ .. ماتخلي الحريم يطلعن ليك في راسك..
الامين زعل من كلام الصافي.. لانو قال هي معذورة .. وعاين للصافي معاينة كدا بتاعة غيظ ..
والصافي ياكل ساي .. وديك الاتنين متوترين ومنفعلين.. الصافي بالله التقول الكلام مابهمو ولابخصو ..غايتو الزول ده عندو جنس برود غريب ..
خالد قال ليهو وانت يا الصافي متهمنك باتهام زي ده.. لغاية ما اهلك يجو.. وقاعد عادي ولا هماك؟؟
الصافي قال ليهو يعني اعمل لشنو؟؟ امشي اضارب خالتي؟؟ ولا اعمل شنو؟؟ قدر ما حلفت ليها.. واتجرمت ماصدقتني ...
قالت لي بتخذ الاجراءات القانونية قلت ليها على كيفك .. تاني مافي حاجة في يدي اعملا .. حتى ولا كلمتك انت المفروض تكلمك هي صاحبة التهمة ودهبها ضايع .. انا بالمناسبة اتهامها ده ما مؤثر معاي بي شي ..
موش بقولو العارف عزو مستريح؟ انا مستريح ومكمل الاستراحة ..قلت الم حاجاتي واطلع من البيت اتذكرت انو ابوي مانعني من الرحول الا باذنه.. كنت مفكر اتصل استاذن منو في الرحول اتفاجأت انهم في الشارع جايين ..
خالد قال ليهو طيب طيب انت كيف تقول رقيه معذورة ..
الصافي قال ليهو طيب لو انت خليت زول في بيتك .. والزول الوحيد الغريب .. وطلعت وجيت لقيتو قاعد في البيت براهو .. وعندك حاجة مفقودة .. بتتهمو ولالا؟.. بغض النظر عن انو هو منو ؟ المهم ياجماعة انا ماغلطان في حاجة.. ومافي حاجة بتخليني احس باحساس سلبي ابدا " ..
بدل ما تتكلمو معاي انا هديك رقية امشو اتكلمو معاها ..
اها حصة الفطور المتأخر دي انتهت.. وخالد شال الصينية .. ودخل بيها جوة .. وطوالي بدا يهاجم في رقية .. انتي واحدة مخك ده مركب بالقلبة .. كيف يعني تتهمي الصافي بي دهبك؟؟ .. دهب شنو البشيلو الصافي؟؟ انتي هبلة ولاشنو؟؟ ..
امشي قلبي الدولاب بتاعك كويس.. ولا اتذكري ختيتيهو وين؟ .. قبل ماتتهمي الزول ساي .. قالت ليهو هوي ياهوي .. ماتنسى انو انا اختك الكبيرة .. بعدين يا استاذ انا فتشت .. ماخليت حاجة في البيت ده .. الدهب ده اتسرق .. وانا بحلف مافي زول غريب دخل بيتي ..
قال ليها ايمكن شفعك ديل شالوهو جدعوهو في حتة .. قالت ليهو مستحيل.. انا اولادي اصلا مابقربو من دولابي .. وعشان اريحك.. انا سألت حمودي.. وحلف لي .. انت عارف حمودي مابكذب ..
قال ليها لو فرضنا.. انتي المفروض ماتتهمي زول بدون دليل ..
قالت ليهو ياخوي.. ماتتنوفش فوقي انا هسي بضرب لي احمد.. اخوي .. يجي يوقفك في حدك .. مادام انت واقف معاهم ضدي ..
قال ليها ارتاحي احمد ضربو ليهو وجاي في السكة شيلي شيلتك معاهو ..
والله داك انتي عارفاهو مابتفاهم طوالي بقع فيك خبط بالباسطونة ..
قالت ليهو ليه ياخوي انا سويت شنو؟
قاليها كمان بتفتحي بلاغ؟
قالت ليهو لو سمحت شيل الشاي وامشي .. خلي لمن يجي احمد ..
ايمان جوة .. سمعت جزء من نقاش خالد مع رقية ..
جاتها طالعة .. قالت ليها مالكم صوتكم مرتفع يارقية ؟؟ .. قالت ليها اخوي يا ايمان واقف مع ولدك ضدي .. دي موش اخر زمن؟
ايمان قالت ليها ولدي يا رقية .. ياهو ولدك .. واخوك ياهو خالو .. نحن ماناس غربا يارقية .. نحن لحم ودم ..
انا لو بقيتي انتي غريبة .. ماكان اديتك سلسلي الداخراهو لي حياتي ..
عاجبني اكتر من عيوني .. اديتك ليهو موش لانك اتهمتي الصافي .. انا ممكن اصل معاك القانون .. لكن انتي بت خالتي .. والصافي بقول ليك ياخالتي .. الناس يقولو فينا شنو؟ لو وقفنا في المحاكم ..
ولانك انتي زي اختي بت امي .. السلسل ماكتير عليك .. ممكن اديك ليهو ساي..
انتو افضالكم علي كتيرة .. قبال كدي جيتكم عيانة بين الموت والحياة .. امك الله يرحمها شالتني فوق كفوف الراحة .. لامن اتعالجت ورجعت اهلي ..
انا مابنسى جميلكم .. واهودا هسي انتو مقعدين الصافي معاكم في البيت سنتين ونص .. ماحصل يوم شكى منكم والله ..
انتي قايلاني انا ناكرة جميلكم .. بس كل الدايراهو منك .. انسى موضوع الدهب الراح ده .. وطيبي خاطر الصافي بي كلمتين .. والسلسل اللقيتيهو ده .. والله تستاهليهو ...
رقية قالت ليها مافي مشكلة يا ايمان .. خلاص سكتنا الله يصبرني ..
بعد شوية احمد جا وقف عربيتو برة .. ودخل سلم على الجماعة .. ودخل سلم علي ايمان .. وجا راجع الصالون .. وقبل مايجر نفسو ..
الامين قال ليهو اسمع يا احمد .. نحن ماقاعدين .. نحن منتظرنك بس ..
عندنا مشكلة والله جابتنا من عطبرة ..
قال ليهو مشكلة شنو؟
قال ليهو حاصل كيت كيت .. يازول احمد ده زعل زعل .. وكورك لي رقية لبست توبها وجات .. وايمان لبست توبها وجات .. بهية ماجات لكن بتسمع الكلام من وراء الكواليس ..
اقعدي هنا يارقية .. شنو الحاصل؟ .. رقية بقت تحكي في نفس اكاذيبها واتهاماتها .. والصافي ساكت ..
قام احمد قال للصافي .. انا عايز اسألك سؤال يا الصافي .. انت وكت قاعد هنا براك .. ماشفت زول جا داخل على البيت ؟؟
قال ليهو ابدا والله ..
احمد قال ليهو.. والله دي مشكلة كبيرة .. لكن يارقية بحكم معرفتك للصافي .. ما مفروض تتهميهو ..
الامين قال ليهو والماحكيناهو ليك .. انها مشت فتحت فيهو بلاغ ..
يازول احمد ده اتنفض .. وقام داير يضرب رقية .. الامين ثبتو قال ليهو .. نحن ما ح نسفيد من ضربها شي .. بس نحن دايرين نثبت براءة الصافي .. رقية قالت للامين تثبتها كيف؟؟ قول لي .. والاصوات ارتفعت ..
في اللحظة دخل حمودي معاهو الرشيد .. سايقو من يدو .. والرشيد قال لي رقية .. ياخالتو .. حمودي عايز يعترف ليك بي حاجة ..
قالت ليهو يعترف لي بشنو؟ .. الرشيد اتلفت على حمودي .. قال ليهو قول قول ياحمودي .. ماتخاف .. هسي انت موش وعدتني ح تقول الحقيقة ؟؟
حمودي شكلو الرشيد اقنعو يعترف بالحقيقة.. طوالي هنا في اللحظة دي الصافي انتبه .. وفهم الحاصل .. طوالي قام مسك حمودي من يدو ..
قال ليهو حمودي موش نحن اصحاب؟؟ .. قول في شنو؟ .. والله ما اخلي زول يهبشك .. وتاني بشتري ليك هدية ..
حمودي قال ليهو لكن ياعمو امي قالت لي بكتلك .. وطبعا الناس دي كلهم قاعدين وساكتين صنننن .. منظرين الولد يفتح خشمو ..
الى اللقاء..