الصافي... طارق اللبيب

الحلقة الثامنة

اول من وصلو عطية وعبدالمنعم .. لي دكان الامين .. الامين شافهم .
عرف انو عبدالمنعم كلم عطية باي حاجة .. وبقى يبلع في ريقو ..
الامين بحترم عطيه شديد .. وماعارف يقابلو كيف .. زمنو ده كلو ماعايز عطية يعرف عنو حاجة ..
عطية قعد برة الدكان .. كان في كرسيين كدا قعد في واحد .. والامين جا سلم عليهو .. وقعد في الكرسي التاني .. وعبدالمنعم قعد فوق حجر
.. عطية قال ليهو ده كلام شنو يا الامين القالو لي عبدالمنعم ده؟
قال ليهو والله ياهو الحاصل والله يا عطيه ..
قال ليهو انت متين شلت حيلك عشان تسوي لك موضوع عرس؟؟ وتباري البنات الملقطات .. ياخي انت راجل واعي ..ده شنو البتسوي فيهو ده؟.. عليك الله هسع انت محتاج لي عرس ؟بعدين صح بقيت تقعد في القمار ؟
الامين ده سكت ساي .. بعد مسافة قال ليهو والله بس ابليس غايتو .. لكن عاين يا عطية والله انا من البارح قررت تاني ما اقعد في طربيزة قمار .. والله الناس ديل تاني مابقبل على جيهتهم ..
عبدالمنعم قال ليهو بعد شنو؟؟ بعد خميت القروش .. والله عمليتك اصلو ود ناس مابعملا ..
الامين قال ليهو يا عبدالمنعم .. احترم نفسك .. والله انا سكت لك كتير .. انت مابتعرفني ..
عطية قال ليهو الموضوع بتاع البت ده يا الامين من الليلة يقيف .. بعدين انت لو عايز حاجة زي دي لازم تكون زول صادق ..وتخلي مرتك في الصورة .. وتكلم البت انك متزوج وعندك ولد ..
قال ليهو ايوة .. انا كنت داير أكلمها .. بس شوية كدا ..
قال ليهو يا الامين .. انت الموضوع ده مامحتاج ليهو اساسا".. كدي اسس نفسك .. واشتري ليك بيت لاولادك .. انت يازول الحاصل عليك شنو؟ . مالك داير تطرطش على كبرك ..
قال ليهو انت اخبارك شنو ياعطية؟ .. ومالك قاطعتنا؟ .. وناس البيت بٍسألو منك ..
عطية عرفو داير يزوغ من الموضوع .
قال ليهو خير يا الامين .. انت ماداير تشتغل بي .. لكن مافي مشكلة بتفوت فيني ساكت موش كدي؟ .. ودعتك الله وكان حيين بنتلاقى .. ومشى .
عبدالمنعم قام اتنفض ولحق عطية .. قال ليهو اها ياعطية .. لقيتني بكضب؟؟ ..
قاليهو انت ياعبدالمنعم راس الشر .. ده كلو طالع من راسك ..انا من يومي الجيت لقيتك تتونس مع الامين قدام الدكان .. عرفتك ماجاي لي خير ..
عبدالمنعم قال ليهو يازول .. انا اصلا ناوي اصلح الغلط ده .. من الاول ..يلا انا بكلم البت بي حقيقة الامين .. وانت ماتنسى تحكي لي مرتو .. انا بس مابعرفها .. ولابعرفـه ساكن وين .. والله كنت امشي ليها عند اهلها وحكيت ليها ..
قال ليهو للاسف يا عبدالمنعم .. انت ماقصدك خير .. انت قصدك الفتنة .. ونيتك تدمر الامين .. لكن انا مابخليك تدمرو .. امشي كلم البت موضوع زوجة الامين ده خليهو علي ..
اها يازول عبدالمنعم وكت مشى من عطية فكر .. قال انا كان كلمت ندى انو الامين متزوج .. ح تهيج وتزعل .. وتخليهو .. وهو يموت بالقروش .. ويصلح بيها حالو .. وممكن يعرس اي واحدة غير ندى ..وانا بكون ماكسبت اي حاجة .. انا لازم العبها لعبة بي فهم ..
اها من محلتو ديك .. مشى لي ناس نبيهة في الحي .. ورسل ليهو ولد ينادي ليهو نبيهة في الدكان .. نبيهة جاتو لافحة توبا ..
خايفة وقلبها مقطوع . مالك ياعبدو؟؟ ان شاء الله مافي كارثة ..
قال ليها في نعمة ح تكسبنا دهب .. بس تشوفي لي ندى هسع .. في النهار ده .. الكلام ده كلو يوم السبت ..
قالت ليهو خلاص امشي بجيبها ونتلاقا بعدين .. امشي امشي مايشوفك الصادق اخوي .. والله يخرب بيتنا .. ...
اها يا زول بالليل نبيهة جابت ندى وجاتو .. اتلاقو في الحديقة برضو ..عبدالمنعم قال ليها اسمعي ياندى .. الامين ده جاتو قروش ,, وفكرتي نجحت مية في المية .. عشان تعرفي انو انا قلبي عليك .. وشغال لي مصلحتك .. وعشان الزول ده مايضيع القروش .. حاولي شيليها منو .. اشتري ليك بيها قطعة بي اسمك ..وانا بساعدك ف يالموضوع ده عندي اصحابي تجار اراضي .. وتاني هو يبنيها بي مزاجو ..
قالت ليهو مستحيل .. انا مابقدر اقولو كلام زي ده .. يقول عني شنو؟ غير طماعة وبتاعة ماديات ..وفي النهاية افقدو .. هو مادام نوى يشتري لي بيت ملك.. انا تاني مالي ؟ القروش العندو بتكون حقتي انا .. لانو اصلا ح يكون زوجي اذا ربنا جعل القسمه ..
عبدالمنعم بقى يحنس فيها .. وهي حست من كلامو انو ناوي على شي ..
قالت ليهو الموضوع ده .. تاني ماتناقشني فيهو ياعبدالمنعم .. لاني مستحيل اعمل كدا ..
قال ليها طيب اسمعي في حاجة انتي ماجايبة ليها خبر .. الزول ده عندو مراة قبالك وبي ولدها ...
قالت ليهو قلت شنو؟ منو؟ الامين؟؟ اكيد انت بتهرطق وداير تغيظني ..
قال ليها طيب لاقيهو واسأليهو .. ولو نكر ناديني ..ولا اقول ليك امشي لي واحد اسمو عطية ود عمو .. وببقى لي مرتو .. دكانو نمرة تلاتة في بعد محلات (.... .......) عرفتي الوصف ده ؟
قالت ليهو ايوة بعرفو الدكان بتاع العدة ده؟
قال ليها بس ياهو ..
قالت ليهو انا باكر الصباح قبل ما امشي لي الامين .. بمشي ليهو هو .. وبعرف اشيل منو المعلومة كيف.. والله الامين يكون فعلا متزوج .. وداسي علي .. الله قال بي قولو ..
اليوم ده السبت وانتهى ..
والاحد كان الامين متوقع ندى تجيهو في الدكان .. ماجات ..
الزولة دي يازول بي اختصار مشت طوااالي لي عطية ..
وقفت ليهو كدا .. وعطية كان بقرا ليهو في جريدة .. وقاعد في نص الدكان قصاد المروحة .. لابس ليهو عراقي وطاقية .. وجلابيتو معلقة جوة الدكان .. وقفت .. وقعدت تتلفت جاي وجاي ..
وهو بس قاعد بعاين ليها .. في نوعية بنات زي ديل .. بتجي الواحدة تعاين للبضاعة كدا .. وتهبش الحاجات وتمشي .. ولابتقول ده بي كم .. ديل طبعا" بجيبن كثافة التاجر ..
وفي واحدات .. يقولن ليك دي بي كم ياهناي ؟ ههه هناي منو ؟يعني حنك داير اجيب اسمك وناسية ..
عشان كا بتلقى التاجر دمو فاير من النوعية دي ..
المهم عطية افتكر ندى من الانواع الاستكشافية دي ..
قال ليها نعم ؟ اي خدمة ..
قالت ليهو شكرا" .. الامين ود عمك موش كدا؟ قال ليها نعم ماود عمي لزم لكن ود حلتي ..
قالت ليهو انا صديقة زوجتو..
قال ليها زوجة منو؟؟
قالت ليهو الامين ده ذاتو ..
قال ليها حبابك والله لكن انتي بتعرفي ايمان من وين ؟
قالت ليهو ايمان منو؟ ..
قال ليها ايمان مراة الامين .. امال انت صاحبة منو؟
ندى طوالي فاتت منو .. خلت باقي كلامو في خشمو ..
هو خت الجريدة فوق كرعيهو .. وبقى يصفق في يديهو ويقلب فيهن جاي وجاي .. ويقول والله سبحان الله .. غايتو زي ماقالو تعيش كتير تشوف كتير ..
هو طبعا" كان مفتكرها من ناس الشمالي.. لكن بعد مافاتت بي دقيقة بس انتبه .. انو دي احتمال تكون البت بتاعة الامين السمع بيها البارح ..
طلع في اخر الشارع وكورك ليها .. يا اخت يا اخت ..
جاتو راجعة .. لقاها عيونها محمرات من البكا ..
قال ليها انتي بتعرفي الامين من وين .. ؟ انتي زولة الامين الاتكلم معاك في موضوع زواج وكدا ؟؟
هزت ليهو راسها كدا يعني ايوة ..
قال ليها انتي ماعارفة الامين متزوج؟ طيب بتكضبي علي مالك؟ شنو الانا صاحبة مراتو .. لو عايزة معلومة ماتسأليني عديل .. الامين متزوج ياختي .. ومرتو اسمها ايمان .. وعندو ولد عمرو 8 سنه بقرا في تانية .. اسمو الصافي .. خليك في المعلوم .. واصحي من النوم ..
قالت ليهو الامين بتاعك ده واحد كذاب .. وخداع الله ينتقم منو ..
ومن محلها داك طوااالي على الامين في دكانو .. لقت مزحوم ..
قالت ليهو بمشي وبجيك .. وما مشت .. وقفت بعيد بالجيهة التانية من الشارع .. واقفة تحت شجرة مربعة يديها .. واقفة زي التمثال .. اظن قريب نص ساعة .. ما اتحركت من وقفتها .. ولاحست بالتعب ولا الوقفة ولا السخانة ..
بعد ما الناس خلصو منو جاتو .. قالت ليهو للاسف يا الامين .. طلعت انسان كذاب وحقير.. وانا ندمت على لحظة قضيتها معاك .. انا للاسف لمن شفتك قلت انت انسان عاقل .. ومستحيل اتخدع فيك .. لكن زي ماقالو التحسبو موسى يطلع فرعون ..
قال ليها دقيقة ياندو وريني في شنو ؟
قالت ليهو ندو في عينك .. تاني اوعا لي بالك تجيب اسمي فوق خشمك .. امشي اتلمه على مرتك ايمان وولدك الصافي .. وخليني في حالي وحقي ان شاء الله يلاقيك .. ربنا ينتقم منك ان شاء الله ..
هه مافي داعي تداعيهو .. الزول اصلا اتدمر من يوم دخل عليهو حق الحرام ..
غايتو يازول سمعتو ليك كلام زي السم .. وفاتت ..
وهو يكورك ليها .. كدي دقيقة ياندى اصبري .. اتكلم معاك .. وهي ماشة ولا اتلفتت عليهو فو فو فو .. والله كشت كش .. الامين بقى مستغرب .. البت عرفت اسم ايمان والصافي من وين؟ عبدالمنعم مابعرف اسم مرتي .. ولا اسم ولدي .. ياربي دي الكلمها منو .. معقول عطية؟ طيب عطية لم فيها وين؟ ..
المهم غايتو الامين ده انهار انهيار غريب ..
بعد ما الحمامة خلاص طارت .. قعد في نص الدكان واتمحن .. وبقى اي زول يجيهو من الزباين يقول ليهو انا عيان هه ..
زي الساعة 3 قفل الدكان وماشى لي عطية .. ماشي يتنضم براهو متنوفش .. وقال والله الليلة عطية يكون كلم البت دي .. اصوطا ليك معاهو لامن يفهم حاجة ..
اها وكت وصل ليهو في الدكان .. قال ليهو انت ياعطية لاقيت ندى .. ؟؟
قال ليهو ندى شنو؟؟ ياها البت الجاتني قبيل دي؟؟؟ ايوة جاتني هنا .. وسألتني من مرتك قالت صاحبتها .. انا عرفتها انها ياها زولتك .. ودايرة تتخبر وتتأكد .. وانا وريتها الحقيقة ..
قال ليهو ياعطية والله بتبالغ .. انت ماتصبر .. انا ماقلت ليك بكلمها براي بي طريقتي .. والله طلعت زول عجيب وغريب ..
عطية قال ليهو كلمتها وانتهينا .. عجيب ولا طحنية .. خلاص انتهينا .. احمد ربك انو ايمان ماعندها خبر ..
طبعا الامين بقى ماقادر يقول اي حاجة .. الزول الوحيد المابقدر يشد معاهو عطية .. وعطية اصلا مابعمل ليهو اي حساب .. ولا بخاف منو لكن بهتم لي مصلحتو ..
بس الكارثة انو عطية ماخت بالو .. انو الزول ده دخل عليهو قروش حرام من القمار .. ومفتكر بالطريقة انو انقذو من ندي ومن ناس القمار .. لكن منو البينقذ الامين من الثعبان القاعد في الدكان مربوط في شكل قروش .. نسأل الله السلامة ..
اها طبعا الامين قنع من ندى .. وقنع من قطعة الارض .. وحيدخل القروش في التجارة .. طيب من هناك ركب ومشى لي للبيت ..
لقى ايمان قاعدة متحننة ..الكلام ده العصرية كدا .. وخاتة السرير برة في ضل البيت .. متحننة وشها يضاوي زي بدر التمام .. وابتسامتها تجبر الخاطر الكسير .. والصافي قاعد جوة مفرش كراساتو شغال يكتب في الواجب ..
الامين عاين لي ايمان كدا جوة في عيونها ..
وقال عليك الله سبحان الله .. انا ذاتي كان ما موهوم .. هسي ايمان دي بتتبدل ؟ والله ايمان من يوم اتزوجتها ماحصل ذلتني ولا داعتني .. شوف بالله ندى الكلبة .. داعتني وقالت لي ربنا ينتقم منك .. والله ايمان لو طعنتني شوكة هي ماتقدر تنوم ..
قام جا قعد جمبها .. وخت يدو فوق كتفها .. كدا وقال ليها كيفك يا ايمان الليلة؟ ..
عاينت ليهو كدا مستغربة .. لانو طول ماظهرت منو مشاعر زي دي .. قالت ليهو الامين ؟
قال ليها ايوة ..
قالت ليهو مرحب بيك من جديد ياخوي هه .. انا يا الامين انت ماعارف .. انا معذبة كيف من طريقة تعاملك لي .. انت حتكون معاي كدا طوالي حنين .. ولا بتغير تاني ؟
قال ليها لالا تاني مابتغير .. انتي نعمة يا ايمان ..
ايمان قعدت تبكي ..
قال ليها بتبكي مالك ؟ ..
قالت ليهو ماعارفة والله يا الامين بالرغم من انو كلامك ده المفروض يسعدني وافرح ..
لكن حاسة بي نفسي حزينة .. وقلبي مقبوض ..
قال ليها اووووف .. قلبي مقبوض .. قلبي مقبوض .. انتي النغمة دي مادايرة تفكيها؟؟ ..
قالت ليهو انا يا الامين بوريك احساسي الحقيقي .. لاني مابعرف ازور ..
الى اللقاء