الصافي... طارق اللبيب

الحلقة الثامن و العشرون

زوبة بتتكلم مع الصافي بي يديها وعيونها .. غايتو الزولة دي شكلها بتحب لينة صحبتها شديد .. حكت ليهو كل الحصل .. وقالت ليهو اصلا انا وصاني ليها مؤيد .. وفي نفس اللحظة وصى تسابيح .. ولينه كان ردها نفس الرد .. الزولة دي رفضتو رفض شديد .. وكلو عشانك .. قال ليها كيف عشاني..؟ انتي ماعارفة الزول ده عمل فيها شنو؟ وقاعد يأذيها كيف؟قالت ليهو عارفة ..لكن لينة قالت الصافي مسخ علي الرجال كلهم .. وقالت حتى لو الصافي ما حصل لي معاهاهو قسمة .. ماعايزة غيرو .. ح يكون عايش جواي لمن اموت .. الصافي سكت مسافة كدا .. وقال ليها .. لكن الكلام الزي ده بدري عليهو يا زينب .. لانو نحن مازلنا طلبة .. تعليق الامال على حاجات زي دي .. بكون عندو عواقب ما محمودة .. افرضي هسي اهلها ماقبلوني .. او اهلي ماقبلوها .. بعدين البحصل شنو؟ قالت ليهو يا الصافي انت مادام مقتنع بيها .. اهلك تاني مالهم ومالا؟ .. قال ليها انتي بتقولي كدا يا زينب؟ وانا حاسبك انسانة واعية .. العلاقات يازينب .. مابتنبني بين الراجل وزوجتو وبس.. علاقات الزواج مترامية الاطراف .. ولابد انها تكون ناجحة بكل الوجوه .. يعني مثلا.. انا ح اكون زوجها .. امي بتكون ام زوجها .. اختي بتكون حماتها .. ابوي بكون نسيبها ابو راجلا .. صح ؟ كيف طيب كيف تقدر تعيش وسط ناس تربطها بيهم علاقات زي .. دي .. وهم اصلا ماقابلنها؟؟ .. حتي لو سكنت بعيد منهم .. بجي اليوم البحصل الاحتكاك .. لان العلاقة مستديمة .. تجيب مني ولد .. وحبوبتو ام ابوهو عايزة تشوفو .. لكن ماعايزة امو .. تتألم الام والحبوبة .. وينشأ الطفل في جوء مشحون بالكراهية وو.. انتي فهمتي؟ وعشان نحن نطرح الفكرة من اساسها للاسرة .. لازم نكون في جاهزية تامة .. انا ماعايز انساق في تيار الشباب عديمي المسؤلية .. الواحد يربط ليهو بت من الجامعة .. اول من يتخرج اهلو يعرسو ليهو .. ويقعد يتهرب من الانسانة الوعدها .. الزول البقول ليهو كلمة .. ويوعد وعد يكون قدرو .. او ما يوعد من اساسو ..قالت ليهو انا ماقلت ليك امشي عرسها هسي .. انا قلت ليك انت باقي عليها؟ قال ليها كونو اقول ليك باقي عليها .. دي برضو وعد .. وهي لو عرفت انو انا باقي عليها .. تاني ح ترفض اي عرض زواج .. وتقعد حابسة نفسها لانسان لايملك قراره .. ولايعرف مستقبله .. قالت ليهو .. هي مخيرة تحبس نفسها ماتحبسها ده موضوع بخصك .. بس انت بتتمناها انها تكون ليك ولالا؟؟ يعني ما تتلايق وتلف وتدور ..قال ليها والله لو خيروني .. من كل بنات الدنيا بختار لينة .. لاني عرفتها من جواها زولة نضيفة .. ومابتشيل على الناس الا الخير .. قالت ليهو خلاص .. انا غير كدي مادايرة منك كلام .. انت ماعارف يالصافي .. والله انا متأكدة المرض الحصل ليها ده .. بي سبب انك حرمتها من ملاقاتك .. والله قالت جات الجامعة مخصوص عان تشوفك من بعيد وترجع اهلها .. اها زوبا كملت كلامها مع الصافي وقامت فاتت من جنبو . مشت مسافة كدا وجاتو راجعة .. قالت ليهو انا ماعارفاك العاجبك في البت الزي العصفورة دي شنو؟ نحن لينا الله .. واخدت ليها ضحكة ومشت ..قالت ليهو جاو بهظر ماتصدق .. اخدت ليهو ضحكة خفيفة كدا .. وقال ليها والله انتي عندك محن بتعرفي ليها براك .. وسرح بي تفكيرو في لينه .. وعمق محبتها .. وتعلقها الصادق لكن كان مقلق من المستقبل .. زوبا المحبوبة بي دورا ومحبتها لي لينة .. مشت البيت العصرية كدا .. دخلت غرفتها براها كدا ورقدت .. ودقت تلفون لي لينة .. بعد سلمت عليها وسألتها من صحتها .. قالت ليها .. عارفة انا اتكلمت مع الصافي . واتكلمنا عنك كتير .. وحكيت ليهو قصة مرسأل مؤيد ليك وردك عليهو .. وقال لي كلام عجيب امسكي عندك وسجلي في مخك .. قال لي والله لو خيروني من كل بنات الدنيا بختار لينة .. لاني عرفتها من جواها زولة نضيفة .. ومابتشيل على الناس الا الخير .. والله ده كلامو بالنص .. قالت ليها اوووعك تكذبي .. مستحيل الصافي يقول كدا .. قالت لها والله قال .. لينة قالت ليها يافرحتي يا زوبا .. زوبا قالت ليها ماتفرحي .. لانو الزول ده ماعارف لو بتكوني من قسمتو ولاالا .. لانو لاهسي قال مابملك قرارو .. قال كدا غايتو ...لينة قالت ليها .. ده كلام مفهوم .. وانا ذاتي مابملك قراري .. نحن نخلي الامور على الله ..وما معروف البحصل شنو .. انا ذاتي لايمكن اتم زواج .. مايوافقو عليهو اهلي .. لانو الزواج رباط اجتماعي .. مابخص نفرين فقط .. بخص اسرتين .. زوبا قالت ليها سبحان الله ..والله التقول متفقين ده نفس الكلام .. القالو لي ..لينة قالت ليها لازم يكون ده رايو.. لانو انسان ناضج وعندو فهم .. ما دلاهة ساي زي فلان ديك ال بتعرفيهم وانا بعرفهم ..ولينة بقت امالها كبيرة جدا .. انو الصافي يكون من قسمتها .. ومرت كم يوم كدا .. ولينة بقت كويسة .. وملكت الصحة .. جات الجامعة .. بس مابينها وبين الصافي تواصل .. كل واحد عامل تقيل على التاني .. وكل واحد بعاين للتاني من بعيد .. خايفين من شلة مؤيد ..طبعا" مؤيد مغيوظ شديد خلاص على لينة .. وبعد ماكان ماعايزها .. بعد رفضتو بقى داير باي اسلوب يشوف طريقة يلوي ليها راسا.. لكن قبل لينة هو زعلان على تسابيح .. لانها سمعتو كلام زي السم .. يعني عندو هدفين .. داير ينتقم من تسابيح وداير يجع حب لينة ليهو .. وبدا يخطط اول في موضوع تسابيح ..المهم يازول .في واحد من اصحابو اسمو سالم .. قال ليهو ياسالم والله بس انا عايز انتقم في تسابيح دي .. واخلي ليك وشها في الواطة .. قال ليهو بسيطة ..عليك بالمسلطة صاحبتك . قالو المسلطة منو اوعى يكون سحر شمارات؟ قاليهو ياها .. بس راس مالها عشرين جنيه والله تظبط ليك اي حاجة .. قال ليهو خلاص .. لو لاقتك قوليها مؤيد عايزك .. وفعلا لاقتو .. وكلمها وجات لي مؤيد .. قال ليها يا سحر انا الليلة عازمك بيرقر جامبو .. قالت ليهو واااو بطني قعدت تكورك .. طلعت معاهو ماشين على الكافتيريا .. مؤيد انسان ردئ بمعني الكلمة .. قاعد في تالتة ليهو تلاتة سنين .. واظنو كدا تامي في الجامعة خمسة سنة .. ودايما داكي المحاضرات وممسح شعرو .. مامخلي ليهو كريم ماعاملو في شعرو .. تلقاهو يلمع وكل يوم بنطلون جديد .. وتشيرت جديد .. وجزمو ديل ذاتهن اشكالهن غريبة .. وبحب الناطلين الضيقة .. وكل مرة يطلع الكيس ويدردم ليهو سفة .. ويرفع شفتو الفوق .. ويحشرها بالجمبة .. اهلو ناس اغنياء لكن .. ماعرفو يربو الولد .. وشكلو مدلع جدا ..اها اول ما وصلو الكافتيريا اشترى ليها بيرقر جامبو .. وقال ليها انا عندي ليك شغل .. حقك فيهو ميتين جنيه .. قالت ليهو قول .. انا جاهزة ..خصوصا" اليومين ديل مفلسة وحالتي بالبلا.. ؟..قال ليها عايزك بس تحاولي المستحيل .. تجيبي صور فاضحة من تسابيح .. قالت ليهو لو داير فيديو بجيبو ليك .. لكن فاضحة كيف؟؟ انا ما فاهمة .. قال ليها تكون بالملابس الداخلية .. تكون ماخدة راحتها على الاخر .. وتشيلي منها صور .. قالت ليهو ماتخاف .. ده موضوع مقدور عليهو .. بس انت بعدين ماتدخلني في مشكلة .. انا مافاضية والله كمان اهلي يسمعو بي .. الضبح بس .. قال ليها والله سرك في بير .. وانا بتصرف تصرف .. انتي ماح يكون عليك اي مشكلة .. بس انتي اعملي البقول لك عليهو..سحر المغفلة مشت دردقت البت المسكينة .. واتفقت مع صاحبتهم شهادة عربية اسمها امنية تقريبا".. ساكنة في سكن خاص .. معاها اربعة بنات وهي الخامسة .. وكلهن بنات جامعات واحدات معاهم .. واحدات في جامعات تانية .. قالت ليها نحن جاينكم زيارة في السكن يا امنية .. انا وتسابيح .. بكرة العصر ح نطلع معاك من هنا .. البت قالت ليها المناسبة شنو؟؟ قالت ليها والله بس زهجانين .. وعايزين نتونس ونهيص شوية .. كسر للروتين ..قالت يازولة مرحب .. في اي لحظة .. انا نفسي زهجانة وخلقي ضايق ..وفعلا سحر مشت كلمت تسابيح .. قالت ليها امنيه عازمانا في السكن ..نشيل لينا حاجات ونمشي باكر نهيص معاها ونجي ..ونجحت سحر في انها استدرجت تسابيح .. ومشن الاتنين للسكن وشايلات معاهن حلويات وشيكولاتات وعوارات كدا .. المهم هناك فعلا قعدت يتونسن ويضحكن .. بعد شوية سحر قلبتا ليهن غنا ورقيص .. وقالت ليهن الليلة الرقيص خواجات في الشاطي .. وقلعت ملابسها .. وبقت ترقص بطريقة عبيطة .. والاتنين التانيات ..امنية وتسابيح .. قلعن ملابسن ووقعدن يرقصن وبقن التلاتة يرقصن بخلاعة ومجون غريب وبالملابس الداخليه .. بعد شوية جوهم بتني تاني من الساكنات مع امنية .. ودخلو في البرنامج طوالي .. وفي واحدة تدق وتغني .. وتسابيح ترقص وماخدة راحتها على الاخر .. وسحر خلتن مشغولات كد وشالت التلفون .. زي البتقرا ليها في حاجة من التلفون .. وبقت تصور بالدس .. في النهايه شغلت تسجيل الفيديو .. واخفت التلفون بورا ضلفة الشباك .. والبنات يتعاورن ويعملن في حركات .. لانهم براهم .. والتسجيل شغال وهن ماعارفات .. بس تسابيح لاحظت انو سحر قاعدة تصور .. ما اشتغلت بالموضوع كتير .. وبعد شوية سحر شالت التلفون .. وحفظت التسجيل .. وبي كدا نجحت الخطة .. وضمنت القريشات ..اخدن ونستهم ومشن .. قامت في الشارع تسابيح سألت سحر .. قالت ليها .. انتي ياسحر صورتي القعدة دي ؟؟ قالت ليها ايوة صورتها انتي لاحظتي لي ؟ قالت ليها ايوة لاحظت ليك لكن ليه ؟؟ .. قالت ليها بس والله انا عاجبني جسم امنية .. وخايفة لو شافتني اصور تمنعني .. قالت ليها عادي ياخ .. نحن بينا الثقة .. بس اعملي حاسبك التلفون ده مايقع يد واحد من اخوانك .. يشوفوك بالشكل ده .. وتسابيح العويرة ماعارفة انو سحر ماظهرت في التسجيل نهائي .. اها باكر الصباح .. سحر لاقت ليك مؤيد .. قالت ليهو ياخوي القروش حاضرة ؟ .. قال ليها اها يهدي.. طلع ليها القريشات .. وراهن ليها .. ودخلن راجعات .. قالت ليهو والله صورت ليك شغل عجيب .. شتات وحتيت نبق.. بس انت تتفرج من بعيد .. انا مابحول ليك الفيديو .. الا تدفع لي اول حاجة .. انت مامضمون ياخوي .. قرقرقر قعد يضحك .. قال ليها والله طلعتي مجرمة درجة اولى ياسحر شمارات .. ياجزمة ..اها وريني .. مشو قعدو الاتنين براهم .. وفتحت ليهو التسجيل وبدا يتفرج .. ومنطط عيونو .. ومندهش دهشة غريبة .. وفاتح خشمو لامن ريالتو سالت الغبي .. وبقى يسوي يالطيف .. عان كمان امنية واااو.؟ والله تصوير واضح وضوح .. قال ليها اول حاجة ترسلي لي الفيديو ده الان ؟؟ طبعا ماكان متوقع انو ممكن سحر تعمل العملية دي .. عشان كدا ماداير يديها القروش ..قالت ليهو تدفع اول .. طلع ليها القروش اداهن ليها .. قالت ليهو لكن في مشكلة .. تسابيح عارفاني صورتها .. ولو شافت الفيديو ده عندك بتدخلني انا في مشكلة ..قال ليها لالا اصلك ماتشيلي هم انا بتصرف .. انتي رسلي لي الفيديو ودسي تلفونك .. وقولي تلفوني اتسرق .. بعد يومين قولي تلفوني اتلقى ولقاهو لي مؤيد .. انتهى الموضوع .. يعني كدا انتي ماعليك ذنب قالت ليهو كدا تمام .. استلمت القروش .. وحولت ليهو الفيديو .. واخر اليوم بعد المحاضرات انتهت .. سحر لاقت تسابيح .. قالت ليها اوووب علي ياتسابيح .. اوووب علينا كلنا .. قالت ليها في شنو ياسحر ؟؟؟ قالت ليها تلفوني اتسرق.. من الصباح كالاقياهو ياتسابيح .. والمشكلة ما في التلفون التلفون يطير .. المشكلة في صوري .. والفيديو الصورناهو البارح .. ونحن مالابسين حاجة .. تسابيح شهقت كدا لامن دايره تموت .. وختت ايديها فوق راسها وقعدت في الواطة .. قالت ليها سجمي سجمي.. الليلة الفيديو ده لو انتاقلوهو الناس .. في البلوتوث والانترنت .. واخواني شافوهو .. انا خلاص بكون في خبر كان... اووووب علي انا الوداني معاك شنو؟؟ يا الغبية يا المغفلة ؟؟الليلة بكتلك انا .. قالت ليها ياتسابيح عليك اكتليني .. فرطي روحي ..اعملي اي حاجة بس طلعيني من الورطة دي .. ده نحن كلنا المصورين رحنا فيها ياتسابيح ... المهم يازول سحر مثلت تمثيل .. غريب .. وهي ماكلة الميتين .. ومؤيد شال الفيديو ومشى .. مساهر فوقو الليل كلو .. اظنو اتفرج فيهو اكتر من خمسين مرة .. ماقدر نام للصباح .. وكل مرة يقول والله دي غنيمة .. تستاهل سحر يدوها مليون عليها .. لكن ياتسابيح ماوقعتي معاي .. والله اخليك خاتم في يدي .. والله اخليك بارياني زي الكلبة يا حقيرة .. اصبري ساي ..الزول ده ناوي على شنو؟ الله يكفيها شرو ويوقيها منو ده ....
الى اللقاء ..