الصافي... طارق اللبيب

الحلقة الحادي و الثﻻثون

في الجامعة كانت الحتة فايرة في نهاية اليوم .. والناس كلها بتتكلم .. بي موضوع ناس الامن الساقو مؤيد وسحر .. وبقو الناس يطلقو في الاتهامات الغير مرشدة .. واي زول بقى يألف براهو .. واحدين قالو ناس الامن قبضوهم متلبسين .. واحدين قالو اكتشفو انهم مروجين مخدرات .. واي زول بقى يتكلم على هواهو ..
تسابيح تتكلم مع لينة .. قالت ليها انتي ليه امبارح ماكلمتيني بانك مسحتي الفيديو؟ .. والله لو قلتي لي كدا ماكان كلمت اخوي ..
قالت ليها احسن شي انك كلمتيهو .. لانو مؤيد بكرة ممكن يعملا في واحدة تاني بواسطة سحر .. قالت ليها لكن الحمد لله انك مسحتيهو يا لينه ..
هسي كان عبدالسلام اخوي والضابط وكلهم يشوفوني برقص بالصورة ديك.. تاني مابقدر اعاين لي عبدالسلام في عينو لمن اموت ..
انا ماعارفة اجازيك كيف ..
قالت ليها لكن ياتسابيح انتي والله غلطانة غلط كبير .. كيف يعني بترقصي بي لبس زي ده قدام البنات .. وكيف تتعرن قدام بعض .. اعوذ بالله .. والله انا ماقدرت اعاين للفيديو .. قالت ليها انا عارفة نفسي غلطانة.. والله كانت لحظة طيش بس.. وربنا عاقبني عليها عقاب نفسي قاسي .. عشت في الايام الفاتت دي اسوء ايام حياتي . الحمد لله ..
لكن عارفة يالينة.. هسي الناس بتكلمو كلام شين عن مؤيد وسحر..
وكلام ماصح .. قالو كيت كيت .. وانا ماقادرة اتكلم بالحقيقة.. ساكتة ساي .. قالت ليها لكن ياتسابيح كدا والله ماصح مننا.. يعني الحاجة المابترضاها لي نفسك.. ماترضاها للناس .. تسابيح قالت ليها ..اها رايك شنو نمشي نطرح الموضوع ده لي صافي؟؟..
قالت ليها امشي اطرحيهو براك .. تسابيح قالت ليها عليك الله ارح معاي .. يعني شنو انتي بتتعاوري كدا؟؟
ماخلاص الموضوع ده انتهى .. خلينا ذاتو نكلمو ونبشرو انوالفيديو اتمسح .. يفرح بالموضوع ..
المهم اقنعتها ومشن الاتنين كايسات للصافي .. والصافي مشغول والله مافاضي كلو كلو للحاجات دي .. لكن طبعتو كدا وكت يشوف ليهو زول محتاج مساعدة.. برمي الفي يدو ويمدليهو يد العون ..
... لاقنو الاتنين .. تسابيح قالت ليهو ياصافي طبعا" ماحكينا ليك الحصل .. انا مشيت كلمت اخوي.. وحصل كيت كيت كيت .. وهنا الحمد لله لينة اتوفقت انها مسحت الفيديو .. قاليها طيب الحمد لله مشكورة شديد يا لينة .. لكن كيف قدرت للموضوع ده؟ .. انا والله ما كنت متخيل تقدري عليهو .. تسابيح ردت وقالت ليهو زي ما حكيت ليك انا .. انو لينة مشت مثلت ليهو انها بتحبو .. وووو المهم حكت ليهو الخطة النفذتها لينة .. قال ليها والله يا لينة كل يوم بتثبتي لي انك بت رجال ومعدنك اصيل .. وانتي ياتسابيح تاني امشي اتعاوري تاني واعملي ليك عملية عبيطة زي دي ..
ضحكت قالت ليهو انا؟؟ تاني التوبة بعد الشوفتو ده ..
لكن يا صافي في مشكلة .. قال ليها تاااااااني ياصافي ..؟
قالت ليهو اسفة اسفة يا الصافي .. المشكلة انو الناس بتكلمو في مؤيد وسحر كلام ماكويس ..وبقولو كيت كيت .. قال ليها الكلام طالع من ياتو ناس؟ قالت ليهو نفس شلة مؤيد الكانو عاملين فيها اصحابو ..
كلهم طلعو بتاعين شمارات وكلام فاضي الله يأذاهم ..
الصافي قال ليها الزول بتاع الشمارات .. بكون عندو فايدة لو انتي حاولت تتعاملي معاهو بي ذكاء .. قالت ليهو ده لغز ولا شنو؟ كيف يعني زول بتاع شمارات وفيهو فايدة؟ ..
قال ليها خلي بالك معاي .. لو عندك زول بكرهك.. وعايزة تزيلي الكراهية من جواهو .. او عايزة تتقربي من صديقة معينة بينك وبينها في جفوة .. ..
تشوفي زول بتاع شمارات ولد ولا بت مافرقت .. وتقومي تحكي ليهو حكايات جميلة عن الزول البكرهك ده.. وتتكلمي ليهو عنو كلام جميل .. وتكسري ليهو تلج بالطريقة الصاح ..
يلا بتاع الشمارات بمشي ينقل كلامك لي داك.. عشان يتكيف منو .. انتي هنا بتكوني استفدتي من الشماري ولالا؟
قالت ليهو اكيد بكون وصل لي الكلام .. الانا ماقادرة اوصلو ..
قال ليهو انا هسي مافاضي.. لكن عايزكم تمشو تقعدو مع الشلة .. وتقولو ليهم نحن عرفنا السبب القبضو فيهو مؤيد وسحر ..
انو في بت بلغت فيهم .. عندهم فيلم ماكويس في تلفوناتم . وسحر رسلت الفيلم لي مؤيد والبت بلغت .. وجو قبضوهم ..
انا يتخيلي دي اخف من الكلام في الشرف والعرض .. والتهمة الباطلة ..
ودي الحقيقة طبعا" وممكن تحلفو .. لانكم صادقين .. والاحسن كل واحدة فيكم .. تجيهم في وقت براها .. وكلامكم يكون مطابق ..
لينة بقت تعاين لي الصافي وتتبسم بدون ماتشعر .. والصافي عامل رايح .. لكن قلبو من جوة شغال التف التف التف .. وداير يسرق نظره ومستحي .. المهم تسابيح قالت ليهو والله دي احسن فكرة ..
على الاقل نحفظ ليهم سمعتهم مع انو مابستاهلو ..
قال ليها نحن عارفين الحق.. ما صاح نسكت .. الساكت عن الحق شيطان اخرص ..
بعدين ياتسابيح .. الرسول عليه الصلاة والسلام قال .. من ستر مسلما ستره الله في الدنيا والاخرة .. انتو استروهم عسى الله يستر عيوبنا نحن كلنا عيوب .. يلا في امان الله انا اتاخرت ..
وفعلا البنات الاتنين مشن نفذن كلام الصافي بالخرطه والحمد لله اتلاشت الاتهامات الفاضية ..
مرت تلاتة ايام والاوضاع طبيعية.. ومؤيد ماجا الجامعة .. وسحر طبعا" ماجات الجامعة .. في اليوم التالت جا والد سحر لادارة الجامعة.. وحكي كل الحاصل .. وقدم شكوى في مؤيد ..
وفي نفس اليوم جاء تقرير من الشرطة.. عن مؤيد لي ناس الادارة..
وقررت ادارة الجامعة فصل مؤيد من الجامعة ..
لكن طبعا" بقى يجي الجامعة ويطمش مع اصحابو بي برة بي برة ..
لغاية ما اهلو دخلوهو في جامعة خاصة .. لكن لغاية هسي ما معروف الفسحة الفسحوه ليها ناس الامن هه .. المهم اكلها في حنانو وسكت لانه بستاهل كل الحصل ..
واستمرت الاوضاع طبيعية في الجامعة.. والتواصل بين لينة والصافي اتعمق .. والصافي بقى يشوفها انسانة عظيمة ومن النبلاء ..
مع ان اللقاءات بينهم قليلة بالمقارنة مع بداية السنة.. لكن التواصل الوجداني يزداد .. والاتفاق في المبادي والتفكير ..
ومرت الايام وانتهت السنة بي خيرا وشرها.. الناس فرتكت واي زول مشى على اهلو .. وفي اخر يوم كانت في جلسة صفاء بين لينة والصافي .. والمرة دي الصافي كان ماسك الجلسة وبحكي عن نفسه وعن اسرته ..
وحكى ليها عن اعمامو.. وعن خالو الوحيد الفي البلد .. وعن خالتو ثريا خالتو البحبها .. قال ليها ثريا خالتي اخت امي الوحيدة متزوجة وساكنة في السعودية .. متزوجها واحد من بلدنا وصديق ابوي الوحيد في الدنيا دي .. اسمه عطية .. (ااو بالله ؟ سبحان الله ياربي ثريا اتزوجت عطية متين ؟انا لو ما الصافي بحكي لي لينة ماكنت عارف المعلومة دي الا هسي في خشمو ده) kiki emoticon ..
وحكى ليها عن خالتو بت خالة امو رقية وخالو احمد وخالد وبهية
وعن الرشيد وماخلا ليها حاجة واداها خلفية كاملة عن الاسرة ..
وقال ليها انتي في الاجازة دي.. احكي لي امك عن الصافي ووانا بحكي لي امي عن لينة .. يعني نكلم وزارات الداخلية.. وهم براهم بظبطو الامور لو ممكن ولالا ..
وقولي ربنا يسوي الفيها خير.. يلا يلا واتوادعو ولينا رمت ليها دمعتين وطلعت النضارة .. وقشت دميعاتها ومشت ..
الصافي مشى اول حاجة لي ناس خالو احمد في الصبابي .. وطبعا هناك موجودة بهية وخالد.. وبهية ساكنة في بيت احمد ومتضايقة ضيق شديد .. ومراة احمد مورياها ليك نجوم الضحى ..
اول من الصافي جاء نادتو .. قالت ليهو تعالي احكي ليك الحاصل تتذكر اليوم داك لمن جيتني على حسب مواعيدك .. ومشينا لي رقية
في بيتا انا وانت وخالد وفطرنا معاها .. واتغدينا وخلاص اتعافينا .. وجينا منها العصر متذكر ؟
قال ليها اها اي متذكر .. قالت تتخيل من اليوم داك تاني ماضربت لي تلفون .. وكت اضرب ليها مابترد .. من اليوم داك تاني ما قدرت اتكلم معاها ..
قال ليها والله رقية دي صعبة شديد.. دي يحلوها معاها كيفن .؟
قالت ليهو انا زوجة احمد مشغلاني خدامه .. وبتزلني ذلة الكلاب ..
تبيتني القوا .. وتقلع كوز الموية من خشمي ..
وماقادرة احكي لي احمد لاني خايفة اخرب بيتو واشتت وليداتو ..
ومالاقية رقية اختي عشان احكي ليها عمايل المراة معاي.. قول لي اعمل شنو؟
قال ليها امشي اسكني مع رقية في البيت .. قالت ليهو انت بتفهم بي وين ؟ انا اقول ليك هي اساسا ماعايزة تتكلم معاي .. اسكن معاها كيف ؟
قال ليها تمشي ليها وشايلة شنطتك وهدومك .. وتقعدي تبكي ليها وتشكي ليها ..ماتتصلي بيها .. تمشي ليها عديل.. انتي غلطتي على رقية غلط كبير .. وماقادرة تنسى.. ومابتنسى الا تكوني معاها وتعامليها معاملة كريمة .. وتحسني احسان ينسيها اللدغة القاتلة ديك .. امشي لي اختك وسيبي التكبر .. احسن تذلك اختك .. وما تزلك الزولة دي .. حتى لو اختك دقتك عديل .. مافي مشكلة لكن الاهانة من زوجة اخوك حارة شديد .. ده راي انا وشوفي بعدين ح تعملي شنو .؟
قالت ليهو حتى لو انا سلمت بي كلامك ده .. اقول لي احمد اخوي شنو؟ قال ليها قولي ليهو انا ماشة اقعد مع رقية اختي ..
قالت ليهو مابقبل انا اقعد مع معتصم راجل اختي الغريب .. واخلي بيت اخوي انت ماعارف خالك .. بعدين ممكن يقول لي رقية ماعايزاك .. لانو عارف رقية بتكرهني موت .. وما قاعدة تتكلم معاي ..
قال ليها الكلمو منو ؟ قالت ليهو مرتو كمان بتسكت ؟؟ اي كبيرة وصغيرة بتديهو ليها بالتفاصيل .. والله انا لو صحيت متأخرة تكلمو تقول ليهو اختك الخملة دي .. بتنوم لي نص النهار .. اها عندك لي حل؟ .. قال ليها ايوة عندي ليك حل .. انا بمشي لي رقية واتكلم معاها بي نفسي واكلم معتصم .. واشوف البحصل شنو؟
بعد الصافي ما اخد يومو داك مع خالو احمد.. مشى امبدة السبيل لي رقية بالمساء وصلهم زي الساعة 9 .. ولقى معتصم قاعد ومعتصم ده فرح شديد بي جية الصافي .. ورقية دايرة تطير من الفرح .. لكن الصافي ظاهر مهموم شديد ..
رقية قالت ليهو انت يا الصافي مالك؟
قال ليها والله متأثر على خالتي بهية .. عايشة عيشة اخير منها الموت ؟ قالوو ليهو بصوت واحد مالها بهية يا الصافي؟؟ .. قال ليهم شكت لي من زوجة احمد.. قالت بتعاملها معاملة الخدامية .. وبتخليها تنوم جيعانة.. ولو لقتها شايلة كوز الموية بتشرب تقلعو من خشمها .. وتقول ليها امشي غسلي الهدوم حتى تجي تشربي ..
وبهية ماقادرة تتكلم مع احمد .. لانها خايفة من خراب بيتو ..
رقية يازول زعلت زعل شديد.. ومعتصم ذاتو زعل .. قالت ليهو بس بهية اصلا كعبة.. متين بقت مسكينة قدر ده .. بهية هوايتها خراب البيوت ..
الصافي قا ليها بهية اتعدلت ياخالتي رقية.. وبقت زولة هادية والله
وانا من راي تمشي تلمي اختك.. ربنا يجزيك خير ..
قالت ليهو هسي بجيبها هنا.. وتقعد تفتن بيني وبين معتصم .. الصافي قال ليها ابدا .. انتو لو علاقتكم صادقة .. مافي زول بقدر يفرق بينكم .. وبهية مستحيل تعمل كدا تاني .. وده على مسؤوليتي انا ..
قالت ليهو طيب ليه ماحكت لي ؟ قال ليها انتي اصلا مابتفتحي ليها الخط .. رقية سكتت ساي ..
معتصم قال ليهو خلاص يا الصافي.. ماتشيل هم.. انا بمشي وبسوق معاي رقية .. ونمشي نتكلم مع احمد يأذن ليها .. نحن بنقول ليهو تعدي معانا اسبوعين تلاتة.. وتاني مابنخليها ترجع .. انت ماتشيل هم .. طبعا رقية خلاص اخدها العطف بتاع الاخوات .. سبحان الله الاشقاء قدر مايبقو كعبين مع بعض.. مافي واحد برضى اخوهو يتحقر من الغرباء.
عشان كدا المفروض الزول يربط علاقتو بي اخوانو .. اكتر من الاصدقاء .. ويفوت ليهم الاخطاء .. ويغفر ليهم الهنات .. لانهم هم ديل الباقين ليك .. الصديق ممكن يبيعك في اي ملف .. الا من رحم الله .. لكن شقيقك نااااادر يعملا .. وياما لدغنا من صديق مقرب ..
وفي النهاية نجد عزاءنا في اشقائنا.. اللهم احفظهم لنا.. المهم ..
رقية وافقت انها تمشي مع معتصم يجيبو بهية بكرة ..
الصافي لمن شاف رقية اتجرست من حالة اختها .. وحقارة المرة ليها دموعو جرن ..
يعني فعلا مشهد مؤثر .. سبحان الله رقية نست في لحظة واحدة كل الزعل داك ..
الصافي ارتاح شديد من قرار معتصم ورقية .. وكان مشتاق يشوف حمودي وامجد لكن لقاهم نايمين ..
قال ليها ياخالتي انا كنت عايز اسافر عطبرة بكرة الصباح .. لكن لازم اقعد معاكم يوم باكر.. عشان القى فرصتي مع حمودي وامجد ..
قالت ليهو انا ذاتي مابخليك تسافر بكرة طوالي .
قال ليها خير انتو بكرة لمن تمشو تجيبو بهية .. انا بكون قاعد منتظركم مع الاولاد لمن ترجعو .. واشوف نتيجة مشواركم شنو؟
والى اللقاء ..