الصافي... طارق اللبيب

الحلقة الرابعة

  الامين قال ليها يا ايمان .. انا بسألك سؤال .. انتي عرفتي كيف انو عطية عندو مشكلة؟ .. كنتي بتتلبدي ؟
قالت ليهو استغفر الله العظيم يا الامين .. معقول انت تقول عني كدي؟ انت معناها لسع ماعرفتني .. الله يسامحك ..
قال ليها ماجاوبتيني .. عرفتي من وين ؟
قالت ليهو من ولدك البلفح الكلام ده .. قال ليها الصافي؟ .. مالو قال ليك شنو؟
قالت ليهو قال لي عطية قال لي ابوي انا في درك ..
الامين نادى الصافي .. قال ليهو يا الصافي تاني اوعك تنقل الكلام من زول لي زول .. كدا حرام بتدخل النار .. قال ليهو كيف انقل الكلام ؟
قال ليهو يعني ماتكلم زول بي كلام الناس .. مثلا هسي انت سمعت عطية قال انا في درك .. جيت كلمت امك بي كلام عطية .. كدا عيب .. قال ليهو انا سألت امي سؤال .. سؤال .. قلت ليها يعني شنو الدرك .. هي قالت لي سمعتها وين .. انا عارف يا ابوي الزول مايكون قوال .. عااارف .. عارف ..
ايمان قالت ليهو دي حقيقة يا الامين .. هو كان بسأل .. بس انا استغربت سمع الكلمة وين .. استفسرت هو قال لي كدا .. ماتتشدد في الموضوع كدا يا الامين ..
قال ليها يا ايمان لو انتي اديتي زول كلام سر .. بتقبلي يكلمو بيهو الناس ؟ قالت ليهو مابقبل .. قاليها طيب ده كلام سر بيني وبين عطية .. انتي ماتدخلي في الموضوع .. بعدين ده موضوع رجال ماحريم ..
قومي اديني الشاي ده النمشي للزول ده .. المغرب على الابواب
..ايمان جابت ليهو الشاي شالو وطلع ... وهي داخلة على المطبخ .. لفت نظرها الصافي قاعد فوق السرير .. مطرم ومادي قدومو .. وبهز في رجليهو .. جاتو راجعة .. قالت ليهو مالك يا الصافي؟ .. زعلان ليه؟
انا موش قلت ليك .. الزول امو ابوهو مابزعل منهم لمن يوصوهو ؟ ابوك ماعمل حاجة وصاك وبس .. يعني هسي عمل شنو؟ .. هو اتكلم معاك براحة ..
قال ليها انا مازعلان من ابوي .. انا زعلان من الصافي .. عشان بقى قوال .. وابوهو زعل منو ..انا ماداير ابوي يكون زعلان ..
قالت ليهو لالا الصافي شاطر .. ولاقوال ولاشي .. الصافي سمع كلمة .. وبسأل من معناها .. حبيبي ابوك مازعلان .. انا متأكدة بس انت ماتزعل من الصافي .. يلا قوم اتوضا عشان المغرب جا ..
وبكرة انا بوديك المدرسة .. جبنا ليك التحويل معانا .. قال ليها كان المدرسة يكون فيها الاولاد الكتلو الكديسة .. مابمشي ليها ..
قالت ليهو حتي لو فيها .. انت مالك ومالهم .. هم ربنا بحاسبهم براهم ..
انت بس تكون زول مؤدب وشاطر .. والعيب البعملوهو .. انت تكون بعيد منهم .. ولا تقعد جمبهم .. بتلقى اولاد بشبهو الصافي .. وطيبين وشطار .. بس ديل ح يكونو اصحابك .. قال ليها كويس ..
قالت ليهو انت عشان شاطر .. انا عندي ليك هدية سمحة .. بديك ليها بعدين بعد تصلي العشاء .. قال ليها خلاس كلميني بيها ..
قالت ليهو لالا بس بعدين ..
وبي غادي طول الليل ده وعطية والامين قاعدين بتشاورو في الموضوع بتاع قروش موسى ..
وايمان ماعارفة الحاصل على عطية شنو؟
الحاجة المهمه في ونسة ناس عطية .. انو عطية قال للامين .. انا في الوكت ده ماعايزك تفتش لاي شغل .. عايزك تشتغل معاي في الدكان .. اول حاجة لي اسباب .. انا اليومين ديل نفسي مارقة من الشغل .. وطول الوكت دكاني مقفول .. والحكاية دي مافي مصلحة المحل التجاري ..
الشي التاني بلقا فرصة اتحرك .. واجاسف ان شاء الله اقدر اطلع جزء من المبلغ ..
بعدين الدكان مكفينا انا وانت .. اصلا ماعندنا مصاريف كتيرة .. اكلنا وشرابنا ..
الامين قال ليهو وانا معاي قروش مابطالة .. ممكن نزيد البضاعة .. عشان الفايدة رايك شنو؟ .. قال ليهو تمام كلام جميل مافي مشكلة .. انا اصلا يا الامين حياتي ادمرت .. وتاني مافي لي امل .. والبت الوعدتها بالعرس .. قريب شكلي ح اواجه اهلها باني قدامي كتير ..
الامين قال ليهو .. يازول اصلو .. الحالة واحدة .. ونحن الدكان لو اتقدم .. والامور مشت كويس بنفكو بي حالو .. في ساعة الصفر ..
المهم كل مرة الامين بحس انو موضوع عطية بخصو .. وعطية بحس انو الامين واولادو مسؤليتو .. ودي ياجماعة طبيعة الناس الاصيلين ..
الناس الماعندهم بلاء الانانية ..
اها يازول بعد صلو العشاء .. والامين مشى على اولادو بي غادي ..
ولاقدر ياكل ليهو لقمة .. وعطية قال ماداير عشا.
والصافي امو طلعت ليهو الهدية .. وهي الباسطة الكان بتمناها من الصباح .. ومعاها كباية لبن.. وقالت ليهو دي الباسطة يا الصافي ..
فتحت ليهو الصندوق .. بقى يعمل احممم احممم .. يعني عايز ياكل بي مزاج .. واتصلح ليها في الارض .. فوق سجاجة نص كدا .. وقعد ياكل بي مزاج .. وامو تعاين ليهو وتتبسم ..
قال ليها حلللوة .. دي ليه ماعندنا في الحلة .. قالت ليهو انا موش قلت ليك ماتتكلم واللقمة في خشمك؟ .. قال ليها لكن دي باسطة .. باسطة ما اكل ..
قالت ليهو اي اكل ماتتكلم فيهو .. سكت ساي .. وبقى ياكل اها لمن خلص وقام على حيلو .. قال ليها طيب انتي لمن تكوني بتاكلي في اللبانة بتتكلمي ليه ؟
قالت ليهو يالطييييف منك يا الصافي .. اللبانة دي ما اكل .. انا بتكلم عن الاكل الببلعوهو ..
يعني الصافي ماممكن يتستلم لي موضوع من دون يقتنع ..
اليوم ده انتهى والناس نامو ..
اها برنامج باكر الصباح .. الامين وعطية طلعو على السوق .. خلا ليها المصاريف . وساقت الصافي وودتو المدرسة القريبة ..
والحمد لله قبلوهو طوالي .. في نفس اليوم نزل دراستو .. في اولى اساس .. اصلا هو قرا سنة اولى في مدرسة الحلة شهرين بس تقريبا ...اتفاجأ الصافي بي اولاد المدرسة .. مابشبهو اولاد الحلة .. ديل نضيفين وممسحين وجزمهم ملمعة .. وحالتهم طيبة .. والطلبة الفي الحلة غبش وايديهم خشنات .. والواحد قميصة من ورا يكون مكرفس وحالتو تحنن ..
المهم الصافي كان قريب لاولاد عطبرة في الشكل .. نسبة لاهتمام ايمان بالنضافة ..
وهو ولدها الوحيد .. ولسع صغير وكدا يعني ..
المهم اسمو سجلتو ودخلتو الفصل .. واخدت مواعيد تجي راجعة تاخدو ..
المدرسة قريبة يمكن مسافة عشرة دقايق بالارجل ..
يازول الاستاذ لاحظ انو نظرات الولد مختلفة .. بعاين بي وعي .. وهادي .. ومابتحرك زي اولاد سنة اولى .. ولابيعمل فوضى زيهم .. بس قاعد يعاين بعيونو .. وتركيزو في الحصة تركيز زول كبير .. وفي نص الحصة برفع يدو يسأل اسئلة محيرة .. في نفس اليوم داك سأل الاستاذ .. قال ليهو يا استاذ
المدرسة دي حقة منو؟
قاليهو المدرسة دي حقة الحكومة ..
قال ليهو والمدرسة الفي حلتنا ؟؟ قال ليهو برضها حقة الحكومة ..
قاليهو طيب نحن ليه مدرستنا بالبروش والفرناغة .. وانتو مدرستكم بالطوب والبلاط . ؟
الاستاذ قال ليهو والله الا نسأل الحكومة من الموضوع ده يا الصافي .. واحد من الطلبة رفع يدو .. قال ليهو يا استاذ الفرناغة دي شنو؟
قال ليهو يعني الترابة الناعمة ..
والكتير الكتير من الاسئلة الواعية .. من الصافي في المدرسة ..
الصافي لونو فاتح .. وشعرو سبيبي مايل للحمرة .. وعيونو عسليه .. عليه ملامح العروبه واضحة جدا .. لمن يزعل عيونو بتحمر .. وتتملي بالدموع .. وبسكت ..
قدر ماتسألو هو زعلان مابتكلم .. بس بتبوم ويقعد يعاين لي يديهو ويدعك فيهن بي بعض ..
اها يازول النمشي كدي على السوق .. نشوف خبر الجماعة ديك ..
عطية والامين في الدكان .. وبفهم فيهو في طريقة الشغل واسعار البضايع .. والحمد لله .. من اول يوم الشغل مشى كويس .. ونص النهار كدا عطية طلع .. وبقى الامين في الدكان براهو .. والزباين البجو بسألو الامين .. انت يازول عطية مالو .. بقى يقفل الدكان كتير كدي ؟؟ .. عطية ده اكتر من شهر وشوية .. وضعو ماتمام وبقفل الدكان كتير .. وبقى يعامل الناس كعب ..
الامين فهم انو عليهو كسب ثقة الناس وقلوبهم من جديد .. التجارة اصلا اخلاق وتعامل .. وفرة وشي وابتسامة لاتكلف شي ..
اي نوع من انواع الاستكبار والاستعلاء وسوؤ الاخلاق في التجارة بكون سبب في الدمار والخسارة ..
على كل حال مرت ايام كتيرة على المنوال ده ..
وعطية سوا ليهو جرجرة بتاعة سمسرة .. والامين دخل قروشو في الدكان .. بس الحاجة الملاحظة .. عطية بقى يكرر .. لا اله الا انت سبحانك اني كنت من الظالمين .. كتير كتير
وبحاول يساعد الناس على قدر مايقدر وهدفو انو ربنا يمرقو من الورطة دي .
وربنا كريم والله .. اصلا مابخلف وعدو ولابخل عباده
يوم من الايام الامين شاف في النوم حلمة غريبة انو عطية لابس ليهو بدلة وحالتو كويسة .. وقال ليهو انا مسافر حلفا اجيب قروش موسى .. الامين قام من النوم وبقى يتلفت .. وعاين للساعة لقاها الساعة 3 صباحا .. عرف انها دي رؤيا حقيقية فيها بشارة ..
قام طوالي مشى بي غادي .. صحاهو من النوم الساعة 3 صباحا" قال ليهو عطية جهز نفسك عشان تسافر حلفا ..
قال ليهو في شنو يا الامين؟ .. قال ليهو انا حاسي انو لو مشيت حلفا بتلقى راس خيت .. واحتمال ربنا اير يفرا علينا .. وحكا ليهو الحلم ..
عطية قال ليهو يا الامين حلم شنو؟؟ ياخي بس ده عشان انت مشغول بالموضوع ..
قال ليهو انت من حكيت لي الموضوع ده مشغول لي تلاتة اسابيع .. ليه احلم بيهو الليلة .. انا مصر انك تسافر لو ماسافرت انا مارضيان منك ..
قال ليهو حاضر يا الامين .. انا بسافر مافي اي مشكلة ..
وفعلا عطية جهز نفسه .. وشال ليهو مصاريف .. والصباح الساعة 8 ركب مشى حلفا الجديدة .. وطوالي على اهل الزول الميت ..
المهم طبعا" الناس ديل عرفوهو لانه قبل كدا جاهم .. وما اتكلم ..
الزول الميت ده اسمو ابجلابية .. عندو اخوهو اكبر منو .. قعد مع عطية وقال ليهو انت قبل كدا جيتنا وما اتعرفنا عليك ..
قال ليهو والله الحقيقة انا عايز قروش من المرحوم .. والقروش امانة والله وانا والله في حرج لايعلم به الا الله .. والله انا لابنوم الليل لا النهار وماقادر اكل لا اشرب .. ووضعي بقى صعب شديد والله ..
وطلع ليهو الشيك الراجع وراهو ليهو .. داك قال ليهو دقيقة ..
بس اليجو الجماعة ..
الجماعة ديل اخوانو التانين ..
اها يازول جو قعدو مع عطية .. وحكا ليهم الحاصل قالو ليهو والله الحقيقة المرحوم زول مابخاف من الله ربنا يرحمو وشايل قروش كتيرة من الناس .. وهو اصلا ما محتاج عندو هنا في حلفا عمارتين .. وكل مرة يشيل قروش الناس وينسجن والناس يعملو تسوية .. ويقبلو جزء ويفكوهو .. ودي شغلتو سنين .. وهسي مرتو واولادو .. عرفو بالقروش الزايغ بيها من الناس
وحلفو ما يقسمو التركة الا يرجعو للناس حقوقها .. ونحن هسي بنسأل اي زول عندو اثبات يجينا .. وسددنا لناس كتيرين ..
وابشر الليلة بنسلمك قروشك على داير المليم ..
والحمد لله اتغدا معاهم واكرموهو .. واحترمو فيهو قصة انو جا للعزاء واستحى يطلب قروشو ..
وجابو ليهو شنطه وحسبو ليهو قروشو على داير المليم .. وعطية من الفرحة قعد يبكي زي الشافع .. لامن اهل اب جلابية قعدو يبكو معاهو ..
ده جزاك ياعطية زي ماساعدت ناس الامين وغيرم ربنا ساعدك
وديل ناس حلفا الجديدة .. اهل الكرم والشهامة .. حتى لو فيهم ابجلابية الطماع .. فيهم رجال كرمهم يخجل العين ام سحابن شايل .. وعطية شال قريشاتو وسافر عطبرة
والنشووووف ..
..