الصافي... طارق اللبيب

الحلقة الرابع و عشرون

طبعا هناك الصافي مطمئن .. انو بهية ح تظبط المواضيع .. وتقنع رقية براحة .. وترجعها لي بيتها .. بس طولت.. ايمكن اسبوع ما اتصلت عليهو .. قام اتصل عليها .. قال ليها يابهية خالتي.. الحاصل شنو؟ انا كل مرة معتصم بتصل علي .. وبقول لي عملت لي شنو في الموضوع؟؟
بقول ليهو المحادات جارية .. يعني امكن اتصل تلاتة مرات .. الزول ده متجرس على اولادو شديد ..
بهية قالت ليهو انا شغالة في الموضوع.. لكن يا الصافي رقية مقوية راسها .. وقالت الزول الدايرني اخسرو .. يتكلم معاي في الموضوع ده ..
وقالت انتو يعني كارهني .. ودايرني ارجع للخاين ده تاني ؟
عشان كدا يا الصافي.. والله انا في راي .. الموضوع ده تقنع منو؟
قال ليها كيفن اقنع ؟؟.. وانا بشرت معتصم.. واديتو كلمة رجال .. قالت ليهو لكن يا الصافي.. تديهو كلمة رجال كيف .. هي رقية في يدك؟
قال ليها انا كنت واثق.. انها زهجت من قعدة البيت.. وقلت يمكن توافق ..لكن يابهية انا ماعايز ايأس من الموضوع ده.. لو انتي ماقادرة عليهو.. خليني اجي يوم خميس وجمعة .. بجيب ليها راسها ..
بهية قالت ليهو لالا .. مافي داعي.. انا بحاول تاني ..لكن انت كان جيت.. ورقية عرفتك اتدخلت.. يادوب الموضوع باظ .. عايزاك توعدني لاتجي ولاتتصل عليها .. لانها بتكرهك موت.. خليني انا بتصرف ..
الصافي هنا قنع من حكاية يتدخل.. طبعا" صدق بهية طوالي .. على حسب الزولة خالتو .. وحتما" بتكون دايرة مصلحة اختها ..
يوم يا زول معتصم.. على حسب ماهو عارف .. انو في محادثات صلح جارية.. بينو وبين طليقتو من طرف الصافي ..
مشى البيت شايل .. معاهو هدايا للاولاد.. وشايل معاهو فستان وتوب وعطور في كيس هدية لي رقية ..
وطبعا دايما حمودي وامجد بلاقو ابوهم في الصالون.. يسلمو عليهو يتونسو معاهو شوية ويمشي .. ومعتصم في اللحظات دي كان عندو احاسيس وشجون طيبة .. وكان متفائل .. وبدأ يأمل ويخطط في راسو.. انو يلم اولادو .. واخيرا ح يتلم على حب حياتو ..
اها هنا لمن جوهو اولادو .. واداهم الهداية وكدا .. قال ليهم هاكم شيلو الكيس ده.. ودوهو لي امكم .. ياحمودي شيلو انت وقوليها دي هدية من ابوي ليك ..
اول حمودي ماجا داخل لامه .. وفرحان قال ليها امي امي .. شوفي ابوي جاب ليك شنو؟ ابوي بقى يحبك زينا .. جاب ليك هديه شوفي الكيس ..
طبعا بهية من هناك خافت انها تتكشف .. وفي نفس اللحظة اتغاظت من الهدية دي ..
رقية عاينت للكيس كدا وقالت ليهو .. امشي رجعو ليهو.. وقول ليهو امي قالت ليك .. شكرا ليك .. انا ماعايزة منك هدية.. يكفي الكلام القلتو فيني للصافي .. انت قايل الصافي راجل سترة.. ولابسكت ..وقالت كلام كتير كدا .. حمودي ماقدر يستوعبو او يحفظو ..
مشى طوالي رجع لابوهو شايل الكيس.. وحمودي ذاتو محرج .. وماكان رضيان امو ترفض الهدية حقة ابوهو ..
وجاء قال لي ابوهو .. امي قالت ليك مادايرة هديتك.. انت اتكلمت فيني كلام كعب .. والصافي كلمني بيو . انت انت قلت فيها شنو يا ابوي؟؟ هي زعلانة منك؟؟ ..
قال ليهو والله ياولدي ماقلت فيها الا الخير .. امك ماعايزة تصالحني ..
الصافي مستحيل يكذب .. انا بعرف الرجال ..
لكن طبعا معتصم بقى متشكك .. وشال الكيس ختاهو جنبو في السرير .. وبقى يتكلم بي سرو .. ياربي هل ممكن يكون الصافي نقل الكلام مغلوط .. يعني ممكن يكذب بي كلام انا ما قلتو ؟؟ .. والله مش معروف.. ياخي ناس الدنيا ديل بقو غريبين.. البتحس انو ده موسى تجي تلقاهو ده فرعون .. يعني مابعيد انو الصافي
عندو مشكلة مع رقية.. وده سبب كافي يخليهو ينقل ليها كلام مني انا ويفرق بدل مايجمع ..
قام قال لي حمودي.. يا حمودي انا عايز اسألك سؤال ..
الصافي وامك بتشاكلو؟
قال ليهو ايوة .. طوااالي امي بتشاكلو.. لكن هو بس بقول ليها حاضر ياخالتي .. حاضر ياخالتي .. هو ما بشاكلها .. امي هي بتشاكلو شفتا ؟
ابوهو قال ليهو ايوة شفتا .. وهسي الصافي مشى رحل من البيت ليه ياحمودي ؟
قال ليهو مشى زعلان.. مشى مع امه وابوهو .. عشان امي قالت ليهو ياحرامي ياسراق الدهب ..
معتصم قال ايواااا .. وبقى يتكلم براحه.. يقول عشان كدا الصافي داير ينتقم منها .. كويس يا الصافي انا كشفتك ..
لكن انا ماح أسألك.. ولا ح اتكلم معاك بس بسيبك كدي .. ربنا براهو قادر على انو يعاقبك على خيانتي .. رقية مادام بتصدق فيني كلام الناس مابتنفع معاي .. وشال كيسو وطلع ..
معتصم ابومحمد.. من منطقة رفاعة . وزول اصلي لي درجة قف تأمل .. وراجل ود رجال .. واحتمل رقية دي كتير جدا .. وفوت ليها .. وسامحها .. وعاملها احسن معاملة.. احتراما" لاخوانها وامها الملكة الله يرحمها .. حتي ماكان عندو نية يرحل من جنب امو واخواتو ..
لكن امو مراة فاضلة .. وكت شافت المشاكل كترت مع رقية .. قالت ليهو انا بامرك.. تأجر ليها وتسكنها في بيت براها ..
وفعلا معتصم سمع كلام والدتو .. واجر ليها بيت براها .. بس طبعا" ذي ماذكر.. بدت ترميهو بالخيانة وتشك فيهو ..
وهو برضو محتمل.. لغاية ماطلبت الطلاق.. واصرت عليهو .. واتصلت على اخوانها .. وطلبت منهم يطلقوها منو.. ومعتصم لمن حسه انو المراة كرهتو.. وعايزة تنفصل.. طلقها على كره ومضض ..
والصافي عارف انو معتصم راجل كلس واخو اخوان .. عشان كدا داير يقيف معاهو .. لكن بهية طبعا" لخبطت اي حاجة ..
اها معتصم بطل يتصل على الصافي.. وخلاص قنع من قصة انو يرجع زوجتو دي .. لانو بعتقد انو الصافي الاداهو الامل .. هو الصافي الخلق الفتنه ..
وطبعا" الصافي وقف اتصالاتو على رقية.. لانو بهية قالت ليهو ماتتصل على رقية .. ماعايزاك تتصل ..وهو وعدها .. وقالت كدا مخصوص .. لانو الصافي لو اتصل على رقية .. او جاها في البيت بتسأله طوالي من كلام معتصم .. وبي كدا بهية بتتكشف ..
ومرت الايام .. مرة من المرات
اتصلت ايمان على ولدها اللهو الصافي الحبيب.. واتونست معاهو وحكا ليها كم نكتة كدا من نكات ناس الجامعة ..
ـــــــــــــــ
المهم في معرض الونسة كدا .. سألته قالت ليهو ان شاء الله متواصل مع خالاتك وبتسأل منهم .. قال ليها والله مرات مرات بتصل على بهية .. لكن رقية طبعا" ماعايزاني اتصل عليها .. عشان كدا وقفت منها .. ولمن اتصل على بهية .. بسألا من صحة رقية ..
قالت ليهو مستحيل تكون ماعايزاك تتصل.. لانو انا مرة اتصلت عليها .. وشكرتك لي .. قالت لي الصافي الله يديهو العافية .. بتصل علي صباح ومساء.. ويسأل من صحتي.. اكتر من احمد اخوي ..
قال ليها والله ماعارف.. احتمال كلام بتقولو ليك ساي ..
قالت ليهو لالا يا الصافي.. ياولدي رقية مابتعرف تدس وتكضب.. انت عارف طبعا" بنات خالتي ديل انا بعرفهم كويس ..
رقية زولة طيبة من جوة.. لكن شكاكة وظنانة.. وعندها وسوسة .. لكن ما بتكذب ولابتخون ..
لكن بهية ممكن تقول ليك ناس القبور وقفو طابور .. يعني اصلك ماتصدق بهية .. من هي شافعة كضابة وغدارة ..
لكن ماسكة لسانا .. ومسالمة وما بتغلط على زول بالساهل.. وبتمرق من اي مشكلة زي السبيبة من العجين .. انت لازم تكون فاهم الناس ديل كويس ..
كدي لحظة يا الصافي انا برجع ليك .. وطبعا لغاية الان الصافي ماحكا لي امو.. مساعيهو القايم بيها .. عشان يجمع شمل الاسرة الصغيرة دي..
اها ايمان اتصلت على رقية ..
كيفك يا رقية ان شاء الله كويسة وصحتك؟
قالت ليها والله بخير الحمد لله.. في امن وامان .. انتي كيف والامين كيف ..
ان شاء الله يا ايمان الامين مايكون شايل مني لاهسي .. قالت ليها الامين بفور وبزعل في وقتو.. لكن بعد ساعة بكون طبيعي .. وبنسى اي حاجة .. جابد الصافي ولدو .. لكن انا كان زعلت تاني سنة بكون ماطبيعية ..
قالت ليها انتي الزيك منو؟؟ يا ايمان بت خالتي.. ربنا يخليك .. والله معاملتك معاي قاعدة تخجلني ..
ايمان قالت ليها بالمناسبة دي الصافي قعد يجيكم؟
قالت ليها والله من ما مشى تاني ماجانا نهائي .. وانا والله ماكلة في خاطري.. ومحرجة منو احراج ماطبيعي .. كان بتصل علي كتير .. ياخالتي اصبحتي كيف؟ .. ياخالتي امسيتي كيف؟ .. لكن فجأة كدا قطع مني من دون اي مقدمات.. من ما لاقى الراجل الشوم ده .. واتكلم ليهو فيني .. الصافي قطع مني تلفوناتو ..
ايمان قالت ليها الراجل الشوم منو؟ .. قالت ليها معتصم طليقي .. لاقى الصافي ونبذني ليهو .. وشتمني ليهو .. وقال ليهو اسوء كلام عني ..
والصافي من اليوم داك اتغير مني ..
ايمان قالت ليها .. وانتي الكلمك منو؟ انو معتصم لاقى الصافي ..
رقية قالت ليها الصافي حكى لي بهية.. وبهية كلمتني بي كل حاجة ..
تتخيلي يا ايمان.. الاهبل يوم جاب لي هدايا هنا .. بعد كلامو الزفت ده ..
ورجعتها ليهو زي الكلب .. كمان يمشي ينبذني للصافي ؟؟؟
ايمان قالت لالالا مستحيل يا رقية .. الصافي ولدي انا مستحيل يوصل كلام زي ده.. حتى لو حصل .. كدي خليني اتأكد وارجع ليك ..
وتااااااااااني ايمان ضربت للصافي .. الساعة عشرة بالليل .. قالت ليهو يا الصافي.. انت معتصم لاقاك؟؟ واتكلم معاك عن رقية؟؟ ..
قال ليها ايوة.. والله كنت عايز اكلمك .. لكن لمن الموضوع يكتمل .. عشان تكون ليك مفاجأة .. معتصم طبعا"لاقاني .. وقال لي انا ماعندي مانع ارجع زوجتي واولادي .. وانا اصلا رقية ما غابت عن قلبي ولا لحظة .. وقال لي انا ما قدرت افكر في اي مراة غيرها ..
وانا يا امي طبعا" .. فكرت طوالي اني اوصل الكلاام ده لرقية .. ومتأكد انها ح تتراجع وترجع لبيتها ..
لكن طبعا بهية ورتني انو رقية ماعايزة معاي اي تواصل .. وانا وصيت رقية تقوم بالمهمة دي .. وهسي منتظر منها تلفون ..
ايمان قالت لاااا اله الا الله محمد رسول الله .. الصافي قال ليها صلى الله عليه وسلم .. مالك يا امي ؟
قالت ليهو انت غلطان يا الصافي .. غلطان ثم غلطان ..
انت انا موش وصيتك .. قلت ليك ماتظلم زول بي كلام زول قبل ماتتأكد؟؟.. انت ليه تصدق بهية.. ؟ انو رقية ماعايزاك تتواصل معاها؟؟ انت سألت رقية في ذات نفسها ؟ ...
قال ليها لالا ماسألتها ..
قالت ليهو الان انت ظلمت رقية .. لانها هي مبسوطة انك كنت بتتصل عليهم صباح ومساء .. ومتمنية انك تجيهم زيارة في البيت .. وندمانة على مروقك من البيت .. فاهم؟؟ وده كلام اسمعو مني انا قبل دقايق كنت بتكلم مع رقية ..
ومرة طارق اللبيب .. قال...........
اوعك تظلم انسان بي كلام ناقلنو..
اطرد شك فؤادك .. ولا أكد ظنو ..
ابقى تقربو .. ويأذاكا قربك منو..
وامكن تنظلم.. بي ابتعادك عنو..
بعدين يا الصافي اوريك غلطك ده .. اتطور كيف .. وعمل كم كارثة ..
مساعيك الكلمت بيها بهية دي .. بهية مشت عكست الكلام لي رقية اختها .. وقالت ليها طليقك معتصم .. شتمك .. ونبذك للصافي .. والصافي كلمني .. طبعا الصافي اندهش .. وراسو ده بقى قدر الحيطة من الحكاية دي ..
والكارثة الاكبر من كدا يا الصافي .. انو معتصم بناء على وعودك .. مشى يسلم على اولادو .. وشايل معاهو هدايا لرقية .. رقية رجعت ليهو الهداية .. وقالت ليهو انت شتمتني للصافي .. ومعتصم طلع زعلان .. سألك؟ .. لاقاك؟ .. اتصل عليك؟
قال ليها لالا .. ليهو كم يوم ما اتصل علي .. وانا ذاتي مستغرب .. قالت ليهو ماتستغرب ده الحاصل ..
لكن انا امك انت .. الغلبك تسويهو في الخرطوم .. انا بسويهو وانا قاعدة في عطبرة ..
قال ليها انتي المقدرة يابت الحاج ههه تسلمي ..
قفلت ايمان التلفون من الصافي .. واتصلت على رقية .. قالت ليها اسمعي يارقية .. انا تكلمت مع الصافي هسي .. وقال فعلا قابل معتصم ابو اولادك .. ومعتصم قال للصافي عنك .. كيت كيت كيت .. كلو خير ومحبة واخلاص ووفاء .. والصافي لمن داير يكلمك .. بهية اختك قالت ليهو رقية ماعايزاك تتصل عليها ..
ووصلت ليك الكلام معكوس .. انتي يارقية مابتعرفي بهية ؟؟
بهية بتتصدق يارقية ؟ بهية قبل كدا ما كضبت ليك في عمر خطيبك الاول .. وانت فركشتي خطوبتك؟ .. في النهاية اكتشفتي انها بتكضب بعد ما عمر عرس؟؟ .. تاااااني تقعي في نفس الغلط؟
ليه ما اتصلتي على الصافي واتاكدتي بي نفسك؟ ليه ما ضربت لي ابو ولادك وسألتيهو ؟
دايما الواحد فيكم يستعجل .. يصدق الكلام الكعب المنقول بدون مايتأكد ..
وبعد يخرب الدنيا .. في النهاية يجي يندم .. والندم ماينفع ..
او عك تسألي بهية .. تسببي ليها كراهية مع ولدي .. بس لو دايرة تغيظيها .. وتنتقمي فيها .. اضربي لي ابو اولادك .. وقولي ليهو جيب الهدية انا اسفة .. واعتذري ليهو .. وهو براهو برجعك .. منتظرك على احر من الجمر .. ده الكلام القالو للصافي .. يلا يا بهية اسعديني برجوعك .. وفشيني في بهية .. الله يديك العافية ..
رقية قالت ليها سبحان الله .. الناس الاذيتهم واتهمتهم .. واقفين معاي .. واختي شقيتي لدغتني في ضهري .. سبحان الله يا ايمان ..
حقيقة الناس ماواحد .. انابتصل علي الصافي براي يا ايمان .. ماتشيلي هم .. بس قبل ما اتصل على الصافي .. دايرة اتصل على معتصم .. واعتذر ليهوواقول ليهو تعال لي وجيب لي الهداياا..
قفلت منها التلفون .. واتصلت على معتصم ابو اولادها .. لكين اتفاجأت بما لم يكن متوقع
الى اللقاء ..