الصافي... طارق اللبيب

الحلقة التاسع و العشرون

طبعا تسابيح بقت زي المجنونة من الخوف .. واكتر شي خايفة منو انو التلفون يقع في يد اب قفايس .. مؤيد .. عشان هي عارفة انو مرات بفتش شنط البنات .. اول ما الواحدة تغفل من شنطتها بدخل ايدو فيها .. ويشيل الدايرو شيكولاته او لبان .. ياخي ده بشيل المراية حقت البت عشان يظبط بيها شعرو .. فاحتمال انو يكون شالو من شنطة سحر.. ده احتمال وارد في راس تسابيح .. وهي طبعا قلبها مقطوع.. لو الكلام ده طلع صح زي ماهي بتتخيل .. لانو هددها كم مرة .. وقال ليها انا بنتقم منك ..
بعد يومين بس من الموضوع ده .. جات سحر لي تسابيح .. قالت ليها ..
تعالي ياتسابيح شوفي الكارثة .. والغريبة سحر كانت بتبكي .. وبتدمع دموع حقيقية .. هههه دموع التماسيح ..
قالت ليها سجمي مالك بتبكي كدي يابت ؟
قالت ليها انا لقيت تلفوني .. قالت ليها طيب الزول البلقى تلفونو بقعد يتعولق زيك كدي؟ .. قالت ليها لكن انتي ماعارفة الكارثة؟؟ التلفون اتلقى عند مؤيد..
تسابيح قالت ليها لالا .. لالا .. انت اكيد بتهظري معاي.. !! ودايرة تخوفيني ..!! قالت ليها والله جابو لي مؤيد.. قال لي تعالي شوفي التلفون ده حقك؟ ..
قلت ليهو ايوة حقي .. انت لقيتو وين ؟؟ قال لي لقيتو وين دي.. ما مهمة .. المهم لقيتي تلفونك الضايع .. وقال لي معليش ياسحر.. لقيت لي كم فيديو كدا .. عجبوني وحولتهم عندي ..
يازول تسابيح دي بقت تسكل زي الميت ليها زول .. الليلة وافضيحتي .. الليلة وانبيشتي .. الليلة ووووب عليك ياتسابيح بت هدي ..
المهم تسابيح حصل الكانت خايفة منو .. وقالت لي سحر والله انا كنت حاسة .. انو تلفونك شالو مؤيد.. لانو كتير بدخل يدو في شنط البنات ..
ومرت يومين .. ومؤيد ما اتكلم مع تسابيح .. وتسابيح خايفة دايرة تموت من الخوف.. وسحر كلمت مؤيد .. قالت ليهو تسابيح عرفت انو الفيديو معاك .. قال ليها حلو حلو شديد ..
اها بقى كل مايلاقيها .. يقعد يتبسم معاها من بعيد .. وهي طبعا" قلبها يقرب يمرق من محلو .. وفكرت كتير تمشي تعتذر ليهو وتطلب منو العفو.. وتقع ليهو في عرضو لكن ماقدرت .. بس هو ما داير يبدا الهجوم ليه؟؟؟نشوف
لانه عايز يضرب ضربة مزدوجة.. داير يضرب لينة وتسابيح في ضربة واحدة ..
بعد كم يوم لاقى سحر تاني قال ليها .. انتي طبعا عارفاني انا شغلي في المليان.. والمرة الفاتت سلمتك قروشك على دير المليم .. هسي يا الغالية انا عندي شغل تاني .. وده ياستي بي تلتمية جنيه ..
سحر اتصلحت في القعدة .. واتنحنحت وبقت تتمطق.. وتفرك في ديها .. وقالت ليهو بي 300 لو داير راس غردون بجيبو ليك ..
قال ليها بس عايز منك تعملي نفس العملية في لينة ..
قالت ليهو لالالا لينة ؟؟ معقوول.. ؟؟ ياخي دي راسها قوي .. ومابتحب الحاجات دي .. عاملة فيها جادة وبتاعة مذاكرة و كدا ..
قال ليها انتي حاولي .. ال300 ماهينة تستحق المحاولة ولاشنو؟
قالت ليهو بري يايمة.. كل شي ولا لينة .. والله دي انا بخاف منها عديل ..
قال تخافي منها شنو دي الصغيرونة دي؟؟ .. قالت ليهو هوي والله صعبة خلاص .. ماتعاين ليها كدي.. وذكية ممكن تكشفني من اول دقيقة ..
قال ليها كويس سيبك انا بتصرف .. 300 وضاعت عليك ..
وقام مشى .. يازول بالليل نزل ليهو برنامج بتاع تسجيل مكالمات خاص .. بيبدا التسجيل مع المكالمة اتوماتيك .. واتصل علي لينة الحنينة هه ..
اول من الجرس دق ليها.. عاينت للرقم .. عرفتو ده رقم مؤيد ابت ترد ..
دق ليها تاني ابت ترد ..
في المرة الاخرة فتحت ليهو الخط .. قالت ليهو الو؟
قال ليها الو يا لينة .. يالينة ياخي والله انا اسف وبعتذر .. وانا ندمان على كل شي ..
قالت ليهو ما دام الاسف وعذرك مقبول ..
قال ليها.. اها؟
قالت ليهو اها في شنو؟ خلاص قبلت عذرك ..
قال ليها ماممكن نرجع زي زمان؟ .. قالت ليهو انا اسفة مابقدر .. انا تاني مستحيل استوعب خيالك ..
قال ليها حرام عليك ياعسلي .. انتي نسيتي ايام الحب والهيام .. نسيتي لمن بتقولي لي بموت فيك ؟
قالت ليهو ما اظن حصل كلام زي ده.. وحتى لو حصل انا بكون كنت غبيانة ومقفلة وماعندي مخ ..
لو سمحت انا تعبانة ودايرة انوم.. تصبح على خير.. ولو سمحت تاني ماتضرب لي.. لانو ما عندي رغبة في التواصل معاك ..
وتوت ..توت ..توت قفلت الخط في وشو ..
وفتح التسجيل السجلو .. وبقى يسمع في المهزلة الاتعرض ليها.. وكل مايسمع حتة يكرج سنون بالمغصة .. جمع كل شياطينو عشان يشوف ليهو خطة ينتقم بيها من لينه .. والطرق كلها بقت مسدودة في وشو ..
فكر في حاجة ..
باكر مشى قال لي سحر .. كلمي تسابيح تجيب لي فيديومن لينة.. وانا بديها الفيديو العندي ..
سحر قالت ليهو لكن كدا بتكشفني يامؤيد.. ح تعرف اني صورتها بالقصد.. قال ليها انسي بتصرف معاها براي ..
وفعلا مشى لاقاها.. قال ليها تسابيح انا عايزك ..
قالت ليهو جدا" .. ماصدقت قامت جارية ليهو بي كل خوف وفزع ..
وهو طبعا" مبسوط يتبسم ..
قال ليها اقعدي .. مايسمعنا زول .. لانو الكلام ده صعب شديد..
اولا انا سرقت تلفون سحر .. ولقيت فيهو فيديو فظيييييييع .. وانتي ترقصي بدوووون ملابس .. وانا حالف الا ارفعو في اليوتيوب ..
واخلي الدنيا كلها تتفرج فيهو ..
قالت ليهو اليوتيوب ده شنو؟ قال ليها ده اكبر موقع بتاع فيديوهات في النت ..
فعلا الوكت داك كان اليوتيوب يادوب .. مما اطلق ليهو سنة ونص .. وكان مشتهر شهرة ماطبيعية ..
اها قالت ليهو عليك الله يامؤيد ماتعمل كدا .. حرام عليك اتذكر اخواتك اتذكر امك .. قال ليها بلا امي بلا اخواتي بلا كلام فاضي.. ده قوليهو لي واحد اهبل ..
انا عندي تلاتة حاجات طالبهم منك لو نفذتيها .. يبقى مابنشرو
.. ولو ما نفذتيها يبقى بس بجي بوريك عنوان الفيديو والرابط ..
ده غير الشباب الصايعين البرسل ليهم الفيديو بالبلوتوث ..
قالت ليهو يازول بس انت قول اي حاجة عايزها انا بنفذا ليك ..
قال ليها اول حاجة عايزك تجيبي لي فيديو زي ده بالذات من لينه ..
قالت ليهو شنووو؟.. قسما" بالله موش لو نشرت الفيديو.. والله لو ضبحوني انا مابفضح بت الناس .. واعريها قدام اليسوى والمايسوى ..
حرام عليك انت ليه بتسوي كدا؟ ..
قال ليها يابت احسن ليك والله.. قالت ليهو عليك الله يامؤيد بس شوف ليك حاجة غير دي .. قال ليها طيب في حاجة تانية ..
وسكت واتنحنح واتبسم وعاين ليها قال ليها .. كلمي اهلك بكرة قولي ليهم انا بتاخر مع صحبتي .. طبعا عرفتو داير يقول شنو؟
قبل مايتم كلامو قالت ليهو مستحيل .. مستحيل .. عاين عاين.. يامؤيد .. انا بدفع ليك قروش انت داير كم ؟؟..
قال ليها انتي قايلاني انا فلسان؟ .. لو دايرة خمسة مليون بديك ليهن هسي ..
قالت ليهو طيب طيب .. خلي بالك معاي .. مافي مشكلة بس خليني ارتب اموري واقول ليك .. بكلم اهلي .. بس انت اصبر لي كويس .. قال ليها اخدي راحتك على الاخر ..
وانا منتظرك ..
طوالي البت مشت لي لينة .. قالت ليها تعالي تعالي .. مافي زول يشوفنا .. اسمعي اعملي حسابك شديد.. اوعك تدقسي تتصوري
او تعملي حركة تبقى ليك فضيحة ..
لينة قالت ليها دقيقة دقيقة.. في شنو هو بالضبط كدا؟ .. انتي هسي مالك منزعجة كدا؟ وتصوير شنو؟ وحركة شنو .؟
قالت ليها مؤيد عايز ينتقم منك زي ما انتقم مني انا .. مؤيد ضيعني يا لينه .. الله يضيعو شحدت ربي عليهو ..
قالت ليها اهدي اهدي يا تسابيح .. واحكي لي في شنو ؟
حكت ليها الحاصل من من الاول .. وانو هسي بضغط عليها بالفيديو المعاهو .. قالت ليها بسيطة .. نحن بنخارجك من الموضوع ده ..
قالت ليها لالا انا خايفة الزول ده يحس بي حاجة.. ويقوم يرفع الفيديو في موقع نشر كدا في النت.. ماعارفة اسمو شنو كدا .. وتاني ماعارفة انا اعمل شنو ..
قالت ليها ولايهمك موش هسي هو منتظر ردك ؟.. لازم نتصرف وبي سرعة .. وقعدن يخططن بمكر عجيب ..
لينة قالت ليها الله اكبر .. جاتني فكرة مجنونة جن .. انا لازم ارجع لي مؤيد .. رجوع مؤقت .. واحبو ليك حب مزور بي فهم .. وبقدر ازيل ليك الفيديو ده من الدنيا .. انتو مسحتوه من تلفون سحر اتسابيح ؟ قالت ليها ايوة مسحناهو ..
قالت ليها حلو .. جدا بس انا عايزة منك حاجة .. امشي احكي الكلام ده للصافي ..
وقولي ليهو . انا عايزة لينة ترجع لي مؤيد.. لفترة بسيطة عشان كيت كيت ولينة تقدر تتصرف .. عشان الصافي مايفتكر اني رجعت لي مؤيد .. بصحي ونصاحي ..
قالت ليها كويس .. بكلمو لكن انتي حتعملي شنو ؟ .. قالت ليها ماشغلك ..
بس انتي اعملي البقولك عليهو ..
مشت تسابيح على الصافي .. ومشت لينة على مؤيد ..
تسابيح من بعيد كوركت للصافي .. ياصافي ياصافي ..
اتلفت عليها .. دي منو البتكورك لي بالصوت البتعرجن دي .. تسابيح زولة جميلة .. طبعا اجمل من لينة بمراحل .. وماعندها اي كلام مع الصافي.. بس هسي جاياهو مرسال .. عشان كدا هسي هو استغرب استغراب شديد .. وبقى بعاين بي دهشة ياربي دي مالا كمان ؟؟..
وقفت قدامو تناهد زي التقول جاية جارية من عد حسين .. قالت ليهو انا مرسلة ليك من لينه .. قال ليها لينة؟؟ مرسلة لي انا؟؟ قالت ليهو ايوة مالك مستغرب؟ ..
طيب انا احكي لي الحكاية حاصل حاصل .. وهسي الزول ده قاعد يضغط علي بالموضوع ده .. وهسي لينة قالت لي لازم ارجع علاقتي معاهو بالخداع .. عشان اقدر اتصرف ..
قال ليها بس في موضوع اسهل من كدا .. انتي المفروض طوالي تمشي تكلمي ابوك واخوانك بالموضوع .. وهم يجو يتصرفو معاهو ..
قالت ليهو كيف يعني؟ .. ابوي واخواني يعرفو انا كنت في الداخلية وبرقص بالملابس الداخلية ..؟؟ خصوصا" لو شافو الفيديو انا تاني ادخل وين؟
قال ليها انتي احسن تكلميهم .. لانو العملتيهو ده مع انو غلط .. بس ماجريمة يعني .. وكونو يشوفو الفيديو مامشكلة كبيرة .. احسن يشوفوهو اخوانك .. من يشوفوهو ناس الموبايلات والانترنت ..
قالت ليهو لالا مابقدر والله ..
كدي بس النصبر نشوف لينة بتعمل شنو؟
قال ليها لينة مابتقر تعمل اي شي .. الموضوع ده انا هسي بحلو ليك .. انا بمشي بلطشو وبشيل منو التلفون وبمسح الفيديو وخلاص .. ده ود لين ساي مابقدر يعمل اي حاجة معاي ..
والله اديهو كف عطبراوي يفقد الذاكرة ..
قالت ليهو لالا .. عليك الله يا الصافي ماتعمل لي مشكلة وفضيحة .. نحن عايزين المسألة تتحلا براحة .. بدون شوشرة وااااي انا والله ماعارفة اعمل شنو؟
قال ليها هسي لينة وينها؟؟ .. قالت ليهو مشت تفتش ليهو عشان تقول ليهو انا عايزة ارجع ليك ..
قال ليها خلاص قولي ليها الصافي قال ليك خليك معانا كونكشن.. (على اتصال) عشان لو الزول ده عمل معاها اي حركة كدا ولا كدا نتدخل في الوقت المناسب ..
لكن انا مازلت بقول ليك خلي اهلك يكونو في الصورة.. الظروف مامعروفة .. حتى لو نحن شلنا منو الفيديو.. احتمال ناسخو في مكان تاني .. اسمعي كلامي وكلمي اهلك يا تسابيح ..
تسابيح سكتت مسااافة .. وبقت تدور في كلام الصافي في راسها ..
انتبهت.. وقالت ليهو خير صافي .. انا بسمع كلامك وبمشي بكلم اخوي الكبير ..واليحصل يحصل ..
انت لو قابلت لينه كلمها .. قوليها انا مشيت اكلم اهلي ..
وشوفها بتقول شنو؟ قال ليها جدا .. بس ملاحظة ..انا ما أسمي صافي .. اسمي الصااااافي بالالف واللام .. قالت ليهو حاضر حاضر .. يلا باي ..
تسابيح مشت البيت .. والصافي قدر ماكاس لي لينه مالقاها .
وضرب في تلفونها لقاهو مقفول .. وتسابيح وصلت البيت وبدت تحكي لاخوها الكبير .. وتعال شوف الحصل ..
الى اللقاء ..