الصافي... طارق اللبيب

الحلقة السابعة عشر

بعد عشر سنوات.. بالتحديد في نوفمبر 2006 .. الصافي طالع من شمبات الصباحية .. وشايل معاهو شنطتو السوداء .. فيها الكتب والمراجع بتاعة الجامعة .. وجراب كدا طويل فيهو مسطرة .. وانا عرفت ليك الزول ده بقرا في هندسة .. وبقرا في جامعة السودان .. بس جاي من شمبات من وين ياربي .؟
الصافي بعد المدة دي كلها شكلو.. سبحان الله نفس الملامح الطفولية ..
والنظرات البريئة .. بس تحس في عيونو ذكاء خارق .. وشايل مسؤولية .. وشكلو منشغل ومستعجل .. وكل مرة يعاين لي ساعتو .. البيضاء .. لامن جات الحافلة وركب.. لابس بنطلون اسود قميص ابيض .. نضيف نضافة عجيبة .. الكرسي الفاضي في الحافلة بس كرسي النص .. وعن يمينو رجل وعن شمالو بت ..
الصافي قعد منصر ومتكرفس.. وحاضن شنطتو.. ولامي رجليهو زي البت .. والبت الراكبة جمبو.. قاعدة متفرجخة ومتجدعة زي سيد الليمون .. وشغالة تطبز في تلفونها .. وتطق في اللبان ..
وكل بعد شوية الصافي يمشي زاحي على الراجل .. عشان مايلاصق الحرمة ..
وليمتين الحافلة دي تصل عشان ينطلق من الكرفيسة دي .. بس شوية كدا والراجل الفي يمينو نزل محطتو.. قبل ما يطلع كويس الصافي انزقه في كرسيهو.. واتلصق على الشباك.. وبقى يعاين برة ..
الصافي عمرو الان عشرين سنة بالتمام والكمال .. وبقرا في تالتة ..في جامعة السودان في الجنوبي ..
وطبعا المشوار ده يسل الروح.. عشان كدا الصافي بطلع بدري ..
المهم وصل هناك .. واندمج في مواضيعو محاضرات.. وبرامج ووو وجو الجامعة المعروف .
في نهاية اليوم كانت (لينة) منتظراهو.. لينة واحدة من بنات تانية..
والليلة المفروض تلاقيهو .. علاقتهم بدت كيف ماعارف .. بس المهم هو كان حريص مايفوت مواعيدو معاها ..
لينة بت من بنات سوبا الحلة.. وانسانة ممتازة شديد .. انيقة وقراية ..
فيها حول بسيط في عينها الشمال .. نحيفة وقصيرة .. قليلونة مافايتة ليها 50 كيلو ..
بتلبس نظارات من سنوات.. لازالة اثار الحول ولم تجدي نفعا" ..
جا .. قعدو الاتنين مع بعض .. والبت بتعاين ليهو .. وهو مدنقر كدا في الارض .. ومرة مرة يرفع عينو يعاين هناااااك .. وتاني يعاين جاي وجاي .. يعني طيلة القعدة ماعاين ليها كدا في وشها دقق فيها كويس ..
قالت ليهو انت يا الصافي.. انا شينة للدرجة دي ؟؟انك ماقادر تعاين لي ؟
قال ليها ابدا والله العفو .. انا بس بستحي شوية كدا لمن اعاين لانسانة جميلة ..
بعدين انا منتبه ليك بي كل حواسي والله ..
قالت ليهو يا الصافي انا بس عايزاك تحكي لي عنك .. وعن اسرتك بالجد انت شخصية مثيرة للانتباه .. البنات كلهن بتكلمن عنك ..
بس طبعا في بنات رايهم فيك سلبي شديد ..
قال ليها اي زول طبعا بنظر من وجهة نظرو.. وزاويه حقو براهو ..
قالت ليهو ماعايز تعرف الراي السلبي عنك شنو؟
قال ليها لالا .. ماعايز ازحم راسي بي حاجات مزعجة.. انتي كيف احوالك؟ ..
قالت ليهو اها شفت الغرابة الفي شخصيتك ؟.. اي زول تقول ليهو الناس بقولو عنك كلام .. بحب يعرف الكلام القالوهو الناس عنو ..
انت ولاعايز تعرف ..
قال ليها عارفة يالينة .. مرات الكلام السلبي مايكون موجود عندك ..
بس كلام الناس يخلي عندك استعداد للسلبية .. ويعكس عليك احساس ما حلو .. فاحسن الزول ما يسمعو .. انا شخصيا" لو سمعت راي سلبي في زول وهو غايب .. مابوصلو ليهو .. لانها المسألة بالنسبة ليهو بتكون مؤذية .. نحن المفروض نوصل ليهو الاراء الايجابية .. عشان تكون ليهو تحفيز .. ودافع ..
قالت ليهو كويس يا بتاع التنمية البشريه .. وريني عليك الله ..
احكي لي عنك ..
قال ليها يمكن يالينة السؤال ما وضح لي .. احكي ليك شنو مثلا" ؟؟
قالت ليهو يعني مثلا".. انا اسمي لينة عبدالرحيم الهادي.. اصلا اهلي من الجزيرة .. عندي تلاتة اخوات واربعة اخوان وامي وابوي ساكنين في سوبا . ابوي شغال في البنك العقاري . وامي موجهة تربوية .. دخلت في علاقة فاشلة قبل سنة وانتهت قبل اسبوع ويوم نهاية علاقتي لاقيتك ههه ..
دي انا باختصار .. بس انا عايزة اعرف عنك انت.. لكن بالتفصيل ..
قال ليها طيب .. انا الصافي الامين .طبعا دي عارفاها الاسم . اساسا نحن من ولاية نهر النيل.. اسرتي ساكنة في عطبرة الامتداد الشمالي .. عندي اخو واحد اسمو الرشيد .عمره 9 سنوات تقريبا..
واخت واحدة اسمها بسمة عمرها 4 سنوات ..
ابوي شغال تاجر محاصيل في سوق عطبرة . وانا هسي ساكن مع ناس حبوبتي خالة امي في شمبات .. من انا كنت ممتحن الشهادة .. حبوبتي الملكة.. قالت لي اولادها انا امنيتي الوحيدة يجي الصافي ود ايمان يقرا في الخرطوم.. ويسكن معاي في البيت ده .. وانا لمن قبلوني هنا .. طوالي اولادها جونا في عطبرة .. وطلبو من ابوي طلب انو يسمح ليهم .. انا اسكن معاهم في البيت ..
وابوي وافق.. وبقو لي زي ناس بيتنا .. عديت معاهم اولى كلها ونص تانية .. بس السنة الفاتت حبوبتي خالة امي اسمها الملكة دي ذاتها .. اتوفت الله يرحمها ..
وعندها بناتها خالاتي بنات خالة امي .. حسيت بيهم ماعايزني معاهم في البيت .. وعندهم معاي معاملة ماقادر اوصفها ليك ..
فقررت اني امشي منهم اسكن مع اصحابي في سكن داخلي.. بس عندي خالي اسمو احمد حلف انو انا ما اطلع من البيت الا اكمل سنواتي الدراسية.. وقال دي وصية امو .. ةاتصل كلم ابوي .. وابوي قال لي ماتطلع منهم الا تكمل .. وامي ده نفس رايها .. بس هم ماعارفين الحاصل وانا ماقادر احكي .. والله انا اليومين ديل عايش نفسيات بس خليها ساي ..
قدر ما فتشت لي اني الناس ديل عملت ليهم شنو؟ ما لقيت نفسي غلطان في حاجة ..
لينة قالت ليهو ماحكيت لي امك البحصل ده ؟
قال ليها لالا ابدا .. هم بنات خالتها وبتحبهم جدا.. وانا ماعايز اخيب ليها ظنها فيهم .. هم كويسات وطيبات .. بس مابحبوني انا .. وكونو زول مايحبك دي ما معناها هو سئ .
يعني انا مافي داعي اخرب علاقة الناس بي بعض عشان هم مابحبوني ..
قالت ليهو لكن يا الصافي هم مادام بتعاملو معاك كدا .. معناها ماعندهم حساب لي امك .. ومن المفروض تكلمها عشان ماتكون مخدوعة فيهم ..
قال ليها لالا .. انا مابقدر اتاكد انهم ماعندهم ليها حساب دي .. الا تحصل معاملة مباشرة بينهم وبين امي.. بعداك الزول بتقدر يحكم على الوقايع بعد تحصل .. على كل الموضوع ماخطير يا لينه .. وانا قادر اتعامل مع الحاجة دي.. بس حاسي بي نفسي شوية مامرتاح نفسيا .
قالت ليهو طيب انسى سؤال تاني .. حصل دخلت في اي علاقة مع واحدة من الجامعة ولا غير الجامعة ؟.. قال ليها والله انا شخصيا" العلاقات بيني وبين البنات كلهن على حد السواء .. علاقة زمالة واخوه ..
قالت ليهو لالا انا بتكلم عن علاقة عاطفية .. يعني حسيت بانك بتميل لي واحدة ميول قلبي ..
قال ليها ماحصل فكرت في الحكاية دي كدا .. يعني طبعا اي رجل .. فيهو من الغريزه البشرية .. انو يميل الى الانثى البستلطفها .. لكن
انا حتي لو في واحدة حركت جواي مشاعر معينة.. بحاول ابعد منها بقدر ما استطيع .. لانو بناء العلاقات عديمة المستقبل متعبة للطرفين ..
قالت ليهو ليه انت يعني بتختلف عن باقي الاولاد؟؟ .. اهو كل واحد عندو واحدة .. بتونسو مع بعض .. وعندهم خصوصيات .. وبتبادلو المشاعر وو ..
قال ليها بس في حاجات كتيرة بتتخلل العلاقة دي .. البت بتدسها من اولياء امورها .. واهلها .. وكذلك الولد .. مابقدر يصل بالعلاقة قدام اهل البت الا لحدود معينة ..
انا طبعا" راي.. انو المفروض الولد العندو علاقة مع بت وبحبها .. وعندو امل يتزوجها ويبني معاها اسرة كريمة ..
اولا عليهو انو يحترمها .. ويخاف عليها .. زي اختو بالضبط .. لانها حتكون زوجته وام اولادو .. اما اذا كانت علاقة ميئوس من مستقبلها .. فالمفروض ينظر ليها كانها حاجة غالية لانها امانة وكرامة رجال اخرين .. ولازم يكون خايف عليها وحاميها من اي شر ..
وعموما اي راجل عندو كرامة وعزة نفس ..المفروض ينظر للبنات على انهم بالنسبة ليهو شرف واعراض .. وبي كدا ربنا ربنا بحفظ ليهو عرضو وشرفو وهو غايب ..
قالت ليهو يعني معناها انت هسي .. علاقات البنات مع الاولاد الشايفها دي مامريحاك؟؟ ..
اخد ليهو بسمة كدا وقال ليها .. تفكري لو اي بت اخوها معاها ممكن تتصرف كدا؟
تتخيلي ممكن الولد ذاتو يتصرف معاها كدا قدام ابوها ؟؟ .. انتي ماشايفاهم قاعدين متلصقين على بعض كيف ؟ غايتو دي حكاية انا بعتبرها انسلاخ من الشيم والرجولة.. قبل انها تكون معصية لرب العالمين..
هسي الواحدة كان اخوها او ابوها ظهر فجأة قدامها.. وهي في الوضع ده بتعمل شنو؟.. وهو يعمل شنو؟
عارفة يالينة اي زول بحترم نفسو .. المفروض يحترم الاخرين ..
لانو احترام الاخرين بجيب ليك الاحترام .. والاستهتار بالاخرين بجيب ليك الاهانة والذلة .. ده شي انا عندي بيهو قناعة ..
المهم ياجماعة في القعدة القعدتها معاهو لينة دي.. اداها دروس مجانية تحير المابحتار .. والغريبة انها كلها دروس منطقية ..
وطيلة القعدة دي .. ماعاين ليها في وشها.. ولابسم معاها ولا هبش يدها .. ولاقرب عليها في القعدة .. كانت قاعدة قدامو وبينو بينها قريب المترين ..
خيم على الجلسة سكوت كدا رهيب.. والبت ازداد احترامها لي الصافي.. كل مايتكلم هي بتكون بتعاين ليهو.. ومعجبة بيهو اعجاب ظاهر فوق وشيها ..
قال ليها ماقلتي لي يا لينة.. انتي اصلا مشكلتك مع مؤيد شنو؟..
قالت ليهو انت وكتك اللقيتني ببكي داك.. كان اخر يوم لينا في علاقتي معاهو ..
الزول ده انا كنت بعشقو لدرجة الجنون .. ومما جيت اولى هو استلمني.. وانا اصلا ماقاومت حبو في البداية .. وافتكرتو فعلا بحبني .. وكانت بناتنا الرسايل والمكالمات لغاية نص الليل .. وخلاص حسيت نفسي اتعلقت بيهو ..
هسي في بداية السنة دي .. حسيت بي برود في علاقتو معاي .. ويتكلم معاي بالجلالة .. وارسل ليهو مابرد لي .. واضرب ليهو مابرد علي لمن الجرس يقطع ..
وهنا لمن الاقيهو .. يتعلل انو مشغول بالدراسة.. لانو خريج وكدا .. وبقت القصة ظاهرة .. بس اليوم داك عندي صاحبتي.. قالت لي تعالي شوفي زولك ..
جيت لقيتو قاعد مع صديقتي التانية بتقرا في سنة اولى يادوب برلومة عمرها ما فايت ال16 سنة .. وماسكها من يدها وبأكل فيها في اسكريم ..
جيت وقفت قدامو كدا قلت ليهو ده شنو يا مؤيد ؟
قال لي انتي منو ماعرفتك؟.. قلت ليهو ماعرفتني ياحقير .. كان شايل ليهو كتاب.. ضربني بالكتاب في وشي .. وقال ليهو امشي ياحوصا يامغفلة .. ونظاراتي طارت هناك..
وانا بس مشيت جبت نظارتي .. وقعدت ابكي وهو ساقها فات مني .. انت جيت لقيتني ببكي وياهو ده الحصل ..
قال ليها اها يالينة .. عليك الله ماندمتي على انك بنيتي امال طويلة وعريضة.. في انسان وانت ماعندك عنو سابق معرفة؟
دي المشكلة العندكن انتن يابنات.. الواحدة تبدا علاقة مع واحد وهي ماعارفة عنو اي حاجة.. لادينو ولا اخلاقو ولا صفاتو ولا اهلو ولا اي شي .. اول شي تبدا تحبو وتقع في غرامو.. وتقول ليهو انت حياتي وانت عمري ومابقدر اعيش بدونك .. بس بعد شوية تبدا الحقايق تظهر .. والمسألة تبقى صعبة عليها .. وكيف تتخارج .. واحتمال الصدمة تسبب ليها اذية نفسية طول العمر ..
انتو قايلين العلاقات دي فلاحة ولا شطارة ولا موضة يعني؟؟ .. ليه يعني لازم اي بت يكون عندها حبيب ؟ القال كدا منو؟
المهم انتي هسي ربنا نجاك من العترة دي.. واتمنى تاني ماتقعي في نفس الغلط .. خلي بالك في دراستك .. وما تنشغلي بي علاقات حدها يوم التخريج .. دي وصيتي ليك ..
الى اللقاء ..