الصافي... طارق اللبيب

الحلقة الثالثة عشر

الصافي كان قاعد جمب ابوهو.. وبعاين لابوهو كدا في وشو .. قال ليهو ابوي جيب اضانك .. ابوهو دنقر بي اضانو عليهو كدا .. الصافي قاليهو .. انت يا ابوي شكلك فرحان.. يومك السافرت وشك زي الداير تبكي .. ابوهو رفع راسو كدا .. ومسكو من اضانو .. وبضحك ..
وقال ليهو والله انت المسلط .. والصافي بتزاوغ من قرصة الاضان ومغمض عيونو وبضحك .. ملاحظة رهيبة طبعا " من الصافي ..
قال ليهو انت يا ابوي.. امي بقت كويسة من وجع الراس ؟.. قال ليهو ايوة كويسة شديد.. ماشايفها هسي من جيت انت .. هي بقت تمام ..
اليوم داك كلو كان ونسة مع الصافي .. وناس البيت كلهم حبوهو.. اصلا البيت مافيهو طفل .. والصافي دخل على البيت ده بهجة عجيبة ..
العصرية كدا.. جو اولاد الجيران اتنين في البيت .. اظنهم سمعو بالولد الجاي من عطبرة ده.. دايرين يشوفوهو .. ويسلمو عليهو اتنين في عمرو كدا ..
الملكة قالت ليهو.. امشي يا الصافي.. العب معاهم .. قال ليها انا ماعايز العب هسي.. هم لو عايزين ونسه ممكن.. لكن لعب ده مافي ليهو وكت هسي ..
الملكة قعدت تضحك .. قالت ليهو غايتو انت جنس قلاصة عليك!!
.. خلاص انت امشي معاهم .. بعدين شوفهم.. ديل ضيوفك انت ماضيف هنا .. فاهم؟
قال ليها فاهم والله ..
المهم الصافي مشى للاولاد بي غادي .. لقى اولاد شمبات كلماتهم مختلفة .. عن اولاد عطبرة.. وعن اولاد البلد .. وطريقة تعاملهم ذاتها مازي ديك .. واحد فيهم قال ليهو انت من عطبرة ؟ قال ليهو لالا نحن ساكنين في عطبرة ساكنين .. لكن اهلنا في البلد ..
قال ليهو صحيح عطبرة فيها حديد كتير ؟
الصافي قال ليهو اي والله انا سمعت هناك بقولو.. بلد الحديد والنار .. يمكن عشان السكة حديد .. والقطاره الكتيرات .. هناك في قطارة كتيرات.. والقطارة البتبوظ بصلحوها في عطبرة ..
الولد قال ليهو انت شفتها ؟.. الحتة البصلحو فيها القطارة دي ؟ قال ليهو ايوة مشيت مرتين مع ابوي .. قال ليهو طيب النار دي شنو؟ موش قلت الحديد والنار ؟
الصافي قال ليهو والله النار دي مابعرفها.. الا أسال ابوي ..
الولد قاليهو ودراستكم هناك زي دراستنا؟؟ .. الصافي قال ليهو بس انا ماعارف دراستكم كيف.. واخد ليهو ضحكة كدا بتاعة معلمين كبار هه ..
الونسة كانت حلوة .. والقعدة معاهم ذاتها الزول يستمتع بيها .. لكن
نحن بكرة عندنا مشوار مصيري.. مع ايمان للدكتور ..
اها بكرة اصبحت ايمان كويسة شديد.. بالمقارنة مع امس الاحد .. والصداع كان ضعيف.. لدرجة انو قد لايذكر .. وهي كل مرة بتهز راسها كدا .. عشان تشوف في صداع ولا مافي .. والامين يكورك فيها.. يا ايمان ماتهزي راسك كدا .. ياخ انتي مالك دايرة تجيبي لي جلطة .. اصبري النمشي الدكتور نشوف ..
//
المهم المساء مشو المقابلة.. والدكتور لمن دخلت ليهو ايمان والامين وعشه امها .. الدكتور عاين لي ايمان كدا .. قال ليها دي انتي المريضة..؟؟ قالت ليهو نعم ..
قال ليها .. مستحيل !!!.. بي صراحة انا متوقع يجيبوك لي فوق كرسي او نقالة .. لكن الحصل شنو .. ؟؟؟
قالت ليهو والله كمان يادكتور وقفت المسكنات .. بس مواصلة في الحبوب البيضا الاديتني ليها .. والحمد لله الصداع خف شديد .. لدرجة اني هسي ماحاسة بيهو .. الدكتور خت القلم واتمحن .. وقال ليها سبحانك ربي .. لا اله الا الله .. والله ده تدخل الهي وبس ..
قالت ليهو كيف يادكتور فهمنا ..
الدكتور سكت مسافة .. ومسك التلفون الثابت بتاعو .. وجراهو عليهو كدا .. ورفع السماعة وبقى يضغط في الارقام . تيت توت تات تيت هه ..
وقعد يتكلم مع زول بالانجليزي قريب الخمس دقايق ..
..
قال ليهو اسمع يا استاذ انت قلت لي اسمك منو؟ قال ليهو اسمي الامين يادكتور ..
قال ليهو عارف يا الامين .. نحن طبعا قبل مانقول اي كلام.. انا عايزك تمشي هسي.. تعمل لي الصور.. العملتهن المرة الفاتت.. تاني ..
قال ليهو كيف يادكتور؟ ..يهوديل الصور قاعدات معاي ..
الدكتور قال ليهو عااااااارف ..امشي اعمل لي صور جديدة .. لو فعلا كانت الحاجة الخاتيها في راسي دي طلعت صاح .. انت زول محظوظ .. والمدام دي ربنا بريدها .. بس الصور مهمة مهمة ..
الامين ساق ايمان.. تاني وعملو الصور.. وباااااااكر رجعو ليهو تاني ..
بالتالي مواعيد العملية ح تتأجل ..
الدكتور عاين للصور .. وقال ليهو.. الله اكبر يا استاذ الامين .. احمد ربك واعمل كرامة ..
دقيقة بس دقيقة .. شال حاجة كدا زي المسطرة وبقى يقيس في الصورة الكبيرة ..
وقال للامين اسمعني كويس انت والمدام ..
اولا انا اول مما شفت الصورة الاولى.. وشفت الورم الفي الراس .. شفت شكلو ورم سرطاني .. وحتى نوعو عرفتو .. لكن انا قلت قبل ما استعجل اعمل العملية .. احتمال تكون حالة التهابية.. انا اديها مضادات واشوف النتيجة.. لكن بيني وبينك .. كنت قنعان من النتيجة .. بس لكن المدام ربنا بحبها .. وكت قالت لي الالم خف .. طوالي عرفت انو المضادات الحيوية اثرت .. معناها الموضوع ما كانسر ,,
طبعا الورم في الصورة الاولى كان مقياسو 2.2 سم متر .. وهسي نقص .. الان فقط (بوينت اربعة) يعني اقل من نص سنت ..
فالحاصل كالاتي .. الزولة دي عندها احتقان صديدي .. يعني عندها خراج في المخ .. والحمد لله هو من النوع الخفيف.. الممكن تفيد معاهو العقاقير.. من دون التدخل الجراحي ..
يعني الحمد لله .. مافي عملية ولاشي .. بس انا ح أديها نوع اقوى من الحبوب دي .. وح تكون حقن .. وان شاء الله كلها اسبوعين .. والموضوع ده يتلاشى بأذن الله .. لانو برضو الخراج في المنطقة دي خطر جدا .. ممكن يعمل شلل او صرع او موت .. الدكتور ده فرح فرح .. بالله التقول ايمان دي بتو ..
لحظة ــــــــ،،معلومة طبيبة .......
طيب للفائدة انقل لكم كلام الطب في الموضوع ده
..تقول الدكتورة شيماء على ..
ومع خطورة خراج المخ, .. إلا أن نتائجه السيئة من ناحية الاعتلال.. والوفيات قد انخفضت بسبب التقدم بوسائل التشخيص.. والمضادات الحيوية والتدخلات الجراحية, وأيضا مع التقدم في علم الأوبئة.. بما في ذلك من فهم أكبر لأسباب المرض, والعوامل المهيئة له كل ذلك كان له أثر في تحسين طرق تشخيصه وعلاجه. وهو يحدث عند الرجال ضعف حدوثه عند النساء
وتبلغ معدلات الإصابة بخراج المخ أقصاها في العقد الثالث والرابع من العمر بينما انخفضت نسبة الإصابة في الأطفال, ويرجع هذا الانخفاض إلى التغييرات في ممارسات التطعيم, وعلاج الأمراض المعدية في الأطفال, ومواجهة وباء نقص المناعة المكتسب (الإيدز)
ومعدل الوفيات من خراج المخ يبلغ حاليا حوالي 10%, وقد يبلغ حوالي 80% عند انفجار الخراج داخل بطينات المخ, أما الأحياء الذين يتأثرون بالمرض, فيكون تأثرهم راجع إلى وجود خلل عصبي متبقي من أثر الخراج, أو حدوث تشنجات بسبب وجود بؤر متصلبة بنسيج المخ من أثر الخراج, أو التغيرات العصبية النفسية.
ــــــــــــــــــ انتهت المعلووومة ـــــــــــــ
الجماعة ديل طلعو من الدكتور فرحانين.. لي درحة انو الامين قعد يبكي .. وايمان منططة عيونا.. تعاين للامين .. اول مرة تشوفو يجوعر بالطريقة .. وبتقول ليهو ياراجل هوي.. نحن في الشارع ..
وهو بقول ليها ماقادر اسكت .. والله ماقادر اسكت.. وصلو البيت وناس الملكة وعشة والبنات لمن عرفو الخبر.. قعدن يزغردن وناس الجيران اتلمو وبسألو في شنو؟
الامين قال ليهم عندنا مراة كانت عيانة.. وربنا شفاها وانتو بكرة غداكم معانا .. وطلعو الامين واحمد مشو جابو الحقن بتاعة .. المضادات الحيوية ..وكلفو دكتورة جارتهم كدا تجي تديها الحقن.. في مواعيدها .. الدكتورة دي مع انها ضغيرة في السن.. لكن شاطرة خلاص .. ياخي دي قبل ماتشوف الصور .. وقبل ماتعرف اي حاجة .. قالت ليهم مافي حاجة اسمها سرطان ممكن المو يخف .... ده ماسرطان ولاشي .. امشو افحصو تاني وتعالو ورورني ..
وكانت فرحانة .. والتزمت انها تواصل الحقن لي ايمان.. طيلة الايام ..
وباكر الصباح الامين واحمد مشو يجيبو خروف.. من جمب السوق المركزي .. عشان يعملو كرامة ..
ولمن بضبحو في الخروف .. الصافي جا وقف .. قال لي ابوهو انت يا ابوي؟؟ .. هسي مافي عيد .. ولافي اي مناسبة الضبيحة دي لشنو؟
قال ليهو دي شكر لله .. لانو شفى امك .. الصافي قال ليهو انا ذاتي عايز اعمل ليهو هدية .. لانو شفا امي اعمل شنو ..
قال ليهو يعني ممكن تدي صدقة للمساكين.. او اي حاجة زي دي بتكفي ..
الصافي قال ليهو طيب هسي الخروف ده الح ياكلو منو؟
قال ليهو بياكلوهو الجيران .. ونحن زاتو بناكل معاهم ..
الصافي قال ليهو كدا ماعملنا حاجة بحبها ربنا لكن .. المفروض يأكلوهو المساكين الماقاعدين ياكلو لحمة .. نحن والجيران يوميا بناكل في اللحمة .. عشان يكون هدية لربنا.. نديهو للمساكين ولا رايك شنو؟ كلامي صاح؟؟
الامين بعد ماكان قاعد على كرعيهو .. قعد اتفرجخ في الواطه.. وبقى يعاين للصافي .. قال ليهو والله ياولدي .. فكرتك دي عند الكبار مافي .. وكلامك ده صح مية المية .. المفروض ياكلوهو الفقراء ..
عشان يكون كرامة لله وصدقة بالجد .. لكن انت عارف المشكلة وين؟
المشكلة انو نحن كلمنا الجيران.. يجو يتغدو معانا .. لكن انا بوعدك .. واوعد ربنا .. اني ح اشتري خروف تاني.. ونمشي انا واحمد بالعربية.. نقسمو للمساكين كلو ..
الصافي قال ليهو خلاص انت اديني قروش.. عشان ادي المساكين برضو .. انا كل يوم بقول لي ربنا يروح من امي وجع الراس .. وهسي لمن وجع الراس راح داير اعمل ليهو الهدية.. كويس يا ابوي ؟
قال ليهو حاضر دخل ايدو في جيبو واداهو قروش.. الصافي ختاها في جيبو.. وقال ليهو انت لمن تجي تشتري الخروف حق المساكين وريني .. عشان عايز اشترك معاك بي قروشي دي .. ابوهو قال ليهو حاااضر.. هسي انت امشي خش جوة .. ماتتوسخ بالدم ده ..
الصافي خش جوة .. ولقى امو راقدة قبل شوية ادوها الحقنة بتاعة المضاد . والحمد لله الليلة نفسيات ساي وشها منور وكل الحاجات ماشة زي ماهي ..
النهارية كدا زي الساعة 11 الحريم بدن يتلملمن.. ويجن ويحمدلو في السلامة .. والفرحة دي ما اقل من فرحة عفو عن محكوم ..
والحمد لله..
اها في واحدة من بنات شمبات زولة راقية كدا من الجيران ..جات ماشة زي السحابة.. جات داخلة بالباب الكبير وماشة على مكان الحريم .. الامين عاين ليها كدا قال لاااااا اله الا الله ..
احمد بعاين ليهو قال ليهو ياراجل؟؟ ده انت ولدك بقى راجل.. سيب الخفة والبهدلة بتاعة الاولاد الماناضجين ..
قال ليهو انت سمعتني ؟ قال ليهو سمعتك ومراقبك .. بتعاين للبت من دخلت من الباب لامن غابت من عينك ..
قال لي بس انت ماعارف حاجة .. انت ماعارفني انا اتشهدت ليه ؟
قال ليهو اها اتشهدت ليه؟
الى اللقاء..