الصافي... طارق اللبيب

الحلقة السابع و العشرون

  طبعا من الصباح الصافي كان كايس لي لينة .. بس عشان يشوف صحتها ويكفر ليها .. عاين ليها من هناك .. وشكلها ماكويسة .. واقفة مع البنات .. اول من شافتو جاي ماشي عليها .. فاتت ابت تنتظره .. البنات استغربن الزول جاي ماشي علينا .. البت دي مالا انسحبت براحة كدا فاتت ..
الصافي جا سلم على البنات .. وقال ليهم كيف ياجماعة لينة ؟.. ان شاء الله كويسة ؟؟ زوبة قالت ليهو والله ما بقت كويسة .. مابعرف الجابها شنو. انت يا الصافي لينة دي زعلانة منك؟ .. قال ليها شكلها كدا.. لكن خليها بى راحتها ماتسأليها ..
الصافي عارف انو لينة مشت من جنب البنات ..عشان تنفذ تعليماتو .. لانو قال ليها ماعايزك تقابليني .. لكن طبعا الصافي اعتبر حكاية يقول كفارة ويحمد الله على السلامة .. ده موضوع ماعندو علاقة .يعني اي واحد فيهم الاتنين .. فاهم الحاصل بي طريقة مختلفة ..
قال ليها يازوبة .. طيب هي ليه جات ؟.. قالت ليهو والله ماعارفة ..
هي كانت بتحكي لينا قالت .. عندي ارتفاع في الدم الابيض.. واتهموني بي تايفويد .. لكن ماظهر في الفحص.
قال ليها ارتفاع الم الابيض .. ممكن يحصل من مجرد الالتهاب .. ما بالضرورة يكون تايفويد ..
قالت ليهو غايتو هي ماقادرة تقيف .. راسها لافي ..
خليني امشي احصلها .. والصافي مشى لكن بقى مقلق ..وبقى مامركز نهائي ..
زوبة مشت حصلت لينة.. قالت ليها .. انتي مالك يابت؟؟ كدي فهميني ..
انتي بينك وبين الصافي في مشكلة ؟.. قالت ليها بحكي ليك هسي دايرة اخد لي قعدة شوية.. واجر نفسي ..
قالت ليها لو الصافي عندو معاك اشكال.. خليهو ولا يأثر عليك.. لانو في خبر بي ملايين .. عايزة اقولو ليك .. قالت ليها قولي يازوبة ..
قالت ليها لاقاني مؤيد طبعا".. وندمان وسافي التراب .. ويتكلم وتخنقو العبرة .. قال لي انا عايز لينة على كتاب الله وسنة رسوله .. وقال لي نفسي بس تتكلم معاي .. عشان اعتذر ليها واتاسف ليها ..
بختك يا لينة ..
لينا قالت ليها عليك الله يا زوبة.. ماتزيدي لي مرضي العلي.. مؤيد شنو تاني البقبل عليهو .. ؟؟ انا سامحتو وعافية ليهو.. لكن تاني مابينو وبينو لاخير لاشر .. دي صفحة وانا طويتها ..
انا الصافي يازوبا مسخ علي الرجال لاحدهم .. الصافي لو خلاني ما مشكلة .. ح يفضل جواي لغاية ما اموت .. اما مؤيد ولا غيرو تاني ديل ماعندي ليهم شي .. قولي ليهو عافية ليك .. ومسامحاك لكن مابيني وبينك شي ..
زوبة قالت ليها .. لكن هسي الصافي اداك كلام كدا بدل على انو باقي عليك ؟.. قالت ليها ابدا بالعكس .. قال لي نقطع علاقتنا ..
زوبا قالت ليها .. يا لينة انتي كدا ح تدفقي مويتك على الرهاب..
قالو جرادة في الكف ولا الف طايرة .. يابت ما معروف الخير وين.. والقسمة وين .. انتي جربيهو للمرة التانية .. ماخسرانة حاجة .. قالت ليها يازوبة ممكن تفضي مني السيرة دي.. لاني اتضايقت شديد.. الزول الاسمو مؤيد ده انا بقيت مابطيق اسمو حتى ..
انتي عارفة انا جيت الجامعة بي تعبي دا ليه؟؟ .. قالت ليها اها ليه؟
قالت ليها لاني حاسة بدون اشوف الصافي ماببقى كويسة .. قلت اجي اشوفو من بعيد .. وارجع.. احتمال اكون كويسة ..
وهسي شوفتو وخلاص برجع البيت .. عشان كدا كلامك ده اقصريهو مني .. بلا مؤيد بلا علة ..
قالت ليها خلاص سكتا .. زوبة كلمتا في خشمها .. شافت تسابيح جاية عليهم .. والمحاضرة فاضل ليها 5 دقايق ..
تسابيح قالت ليها يا لينة سلامتك.. قالو كنت عيانة وشكلك فعلا عيانة .. انتي قبل اربعة يوم ما كنتي كويسة.. ده شنو التقول عيانة ليك سنة..
انا يا لينة عندي معاك كلام ضروري ومهم جدا ..
عن اذنك يا زوبة بس خمسة دقايق ..
ولينا ماسكة راسها ومكشرة كدا.. شكلها متألمة .. زوبة مشت وقالت ليها نتلاقى يا لينه ..
تسابيح استفردت بي لينه وبدت الكلام.. وحكت ليها مشاعر مؤيد .. وقالت ليها الزول ده وصاني ليك عديل.. وقالت عايزك تكوني ليهو ..
يعني يابت ده كلم شكلو رسمي .. ياريتني لو كنت في محلك ..
لينة قالت ليها ياتسابيح .. لا اله الا الله .. قالت ليها.. محمد رسول الله .. قالت ليها مؤيد ده لو بقى اخر راجل في الكرة الارضية.. انا تاني ماعندي ليهو شي .. وصلي ليهو الكلام ده .. وقولي ليهو قالت ليك لينة .. (حل عن افكاري وطلعني من تركيزك) ..
تسابيح عاينت ليها كدا .وقالت ليها .. بسم الله الرحم الرحيم دي هسي مالا؟؟ ..طيب ما تتكلمي براحة وبي اسلوب ..
قالت ليها اسفة والله ياتسابيح.. انا تعبانة والزول ده اسمو بوترني..
قالت ليها خير في امان الله .. لينة حست انها ما ح تقدر تواصل مشت البيت .
زوبة مع لينة في نفس القاعة .. المحاضرة كلها زوبة تتلفت .. عشان تشوف لينة جاية.. ولا ماجات ولا الحاصل شنو لغاية المحاضرة انتهت.. لينة ماجات .. وهنا البت اتاكدت انو لينة رجعت البيت .. في نهاية اليوم زوبة مشت حايمة بي غادي .. كايسة للصافي ....
وتسابيح مشت حايمة كايسة لي مؤيد .. تسابيح لاقت مؤيد قبل ما زوبا تلاقى الصافي ههه .. جنس فتاشة وحال غايتو..
تسابيح قالت لي مؤيد اسمع ياخوي .. والله الزولة دي تفضل الموت وماتسمع سيرتك .. ياخي دي بتكرهك كراهية عمى ..
وقدر ما اتكلمت معاها .. في النهاية قالت لي قفلي الزول ده سيرتو بتوترني .. وبكرهو ..
طبعا" مؤيد المغرور .. ماكان متوقع الرد من لينه .. وبالاحرى مامصدق تسابيح ..
قال ليها ياتسابيح.. انتي بالجد مشيتي وصلتي كلامي لي لينة ؟ قالت ليهو الله؟ .. كمان بتشك فيني يامؤيد؟؟ ..
قال ليها انا عارف الغيرة البين البنات.. وعارفك انتي مكسرة في حاجة اسمها مؤيد .. عشان كدا انتي بتكوني متخوفة تمشي ليها .. وانا اقوم اتعلق بيها تاني ..
قالت ليهو والله انت بتبالغ.. وبتحكم كمان .. انت ماتفتكر انو البنات كلهن مكسرات فيك.. اصحى ياهوي .. المهم هديك لينة امشي اٍسألها .. لو انا كلمتها ولا لا ..
وعاينت كدا شافت زوبة من هناك .. كوركت ليها زوبا تعالي .. قالت ليها عليك الله يازوبة.. انا موش قبيل ناديت لينة .. وانتي كنت واقفة معاها.. وانا قلت ليها عايزاك في كلام؟؟ صاح ولا ماصاح ..
زوبا عاينت لي مؤيد كدا .. وقالت ليهو انت برضو يعني موصي تسابيح؟.. ليه انا ما مكفياك .. وما مصدقني براي؟؟ ..
اها يا استاذ .. لينة قالت ماعايزاك .. ولو بقيت اخر راجل في الدنيا.. هي ما حتقبل عليك .. وقالت مجرد ذكر اسمك بزيد ليها المرض ..
هنا تسابيح بقت تعاين لي مؤيد بي طرف عينها .. وقالت ليهو ان شاء الله تكون كدا اقتنعت.. انو انا ما كذابة ..
وساقت زوبا من يدها.. وقالت ليها يلا نمشي من هنا .. هي ماشة كدا مؤيد قال ليها بنظمك ياتسابيح .. انا عارف بنظمك كيف؟
بعد فاتن منو شوية.. قالت ليها ده واحد مغرور.. وضاحك في روحو .. غبي..
زوبا قالت ليها عليك الله يا تسابيح .. انتي برضو رسلك؟؟
قالت ليها يا ايوة والله .. لكن طبعا" الزول ده ماعايز لينة يازوبا ..عايز يمطوحها وينتقم منها.. ويلعب عليها وبس.. انسان مريض ..
قالت ليها ياتسابيح خلينا منو عليك الله .. شفتي الصافي ؟.. قالت ليها ابدا والله .. ماشايفاهو الصافي يازوبا فارق الشلة من السنة الفاتت ..قالو كدا الملاقيف ديل ..
لكن تاني انا بقعد معاهم؟ .. والله اي حتة فيها الحيوان ده .. انا تاني ماجي بي عندها ..
وزوبا بقت كايسة للصافي .. دايرة توصل ليهو كلام لينة بالتفصيل..
لانو الكلام ده مهم الصافي يسمعو ..
.. شافت ليك الصافي هنااااك.. واقف ليه في ركن نقاش ..
وكان في جماعة كدا عندهم ركن مسخن شديد .. وشغالين كلام عجيب وغريب .. والغريبة انهم جماعة رافعين شعار الدين.. لكن دين لايشبه دين الاسلام المبني على التسامح وطيب الاخلاق ..
دايما بتكلمو عن التكفير والتفسيق .. وبهاجمو الناس مهاجمه غير حكيمة ..
المهم الصافي واقف بسمع .. على اساس انو الناس ديل بقولو نحن وحدنا اهل الجنة.. والباقي كلو في النار .. باعتبار انهم الفرقة الناجية وكدا يعني ..
وفعلا الناس ديل بجيبو ايات واحاديث.. لكن في حاجة غريبة مامفهومة . في طريقة الاستدلال ..
فتحو باب النقاش .. والحوار .. في واحد قال ليهم .. انتو موش في حديث بقول من كفر مسلما فقد كفر؟ .. انا بعتقد انو المفروض الناس ماتلجأ للتكفير.. يعني الدين واضح .. ومامحتاج لي كل التعنت والمشاكل الحاصلة دي وشكرا" ..
مسك المتحدث قال ليهو .. اولا" القال ليك منو نحن بنكفر المسلمين؟ ؟ البنكفر فيهم ديل طواغيت .. يعبدون الهة غير الله .. الشرك والكفر منتشر في الامة .. فلان الفلاني شيخ الطريقة الفلانية كافر .. دجال مجرم عليه لعنة الله .. وشيخ فلان على نفس شاكلته ..
لانة قال كيت وكيت . وكل اتباعو على مثله كفرة .. وكل من لم يكفر الكافر .. فهو كافر ..
قام رفيقو مسك الكلام بعدو.. قال ابدأ نحن نكفر الافعال وليس الفاعل ..
وهنالك العذر بالجهل والعذر بالاكراه وو ..
والصافي يسمع .. لكن الشي الظاهر.. انو المتحدين الاتنين في الجماعة دي مختلفين فكريا" .. ماعارف اتلمو كيف؟ .. او احتمال واحد بجامل ويداهن شوية .. والتاني بسلخ بدون رحمة هه ..
فتحو باب النقاش.. الصافي استاذن يعمل مداخلة..
قال ليهم السلام عليكم ورحمة الله .. انا شخصيا اعتقادي الجازم انو الجماعات دي كلها باطلة .. لانو التفرق والتحزب.. محرم في الاسلام .. بنص الاية البتقول (ان الذين فرقو دينهم وكانوا شيعا" لست منهم في شيء) وفي اية تانية بتقول .. (ولاتكونوا من المشركين من الذين فرقوا دينهم وكانوا شيعا" كل حزب بما لديهم فرحون)
وان كنتم تزعمون انتم انكم على منهج رسول الله.. صلى الله عليه وسلم .. فلم نسمع في عهد الرسول الكريم.. عليه الصلاة والسلام .. ان هنالك جماعة كذا .. وجماعة كذا .. باختلاف في المنهج .. بل كانت وصية الله لهم كانت .. (ولاتكونوا كالذين تفرقو واختلفو) .. الاية ..
ونحن درسونا من الاساس .. تابى الرماح اذا اجتمعن تكسرا".. واذا افترقن تكسرت احادا" ..
فبغض النظر عن منهجكم المفتقد للحكمة والموعظة الحسنة .. انا اعتقد مجرد الاعداد والتنظيم.. لجماعة ما داخل منظومة الامة الاسلامية.. يعتبر تشقيق للامة .. التي منهجها واحد.. وكتابها واحد .. ورسولها واحد .. حتى ولو سلمنا ان هنالك من الامة من ضل عن سواء السبيل.. واتخد منهجا مختلفا .. فعلى الامة ان ترده الى دينه بالحكمة والموعظة الحسنة .. او يبعد هو من بين المسلمين .. على قدر خطورة منهجة باحكام التغريب ..
لا ان نكون جماعة تختلف عن الامة .. وتخالفها في كل كبيرة وصغيرة ..
ومادام المسلمون يصلون الى قبلة واحدة ويعبدون الها واحد ويطيعون رسولا واحد .. ويصومون شهرا واحدا.. وينحرون في يوم واحد .. وبنفس الكيفية .. فلا ينبغي ان يكفر احد منهم الاخر .. وهذا المفهوم في الحديث الذي رواه البخاري عن انس قال رسول الله صلى الله عليه وسلم .. من صلى صلاتنا واستقبل قبلتنا واكل ذبيحتنا .. فذالكم المسلم له مالنا وعليه ماعلينا ..
انا داير رد شافي على كلامي ... والسلام عليكم ورحمة الله ..
ـــ
الزول ده بعد قال كلامو ده بي كل هداوة وبرود.. في ناس قعدو يعاينو ليهو .. وفي ناس كانو وقفين قعدو .. لانو الناس ديل لاول مرة .. زول يديهم كلام بهذا العمق .. وبنفس النهج الهم بتكلمو عنو.. ..
الود العايز يرد.. ارتبك جدا .. من علمية المداخلة ودسامتها .. ومافيها من القول السديد والحجج المنطقية .. وبدا يقول في كلام ماعندو اي علاقة بالتساؤلات ..
من ضمن كلامو قال .. اذا عم الفساد في مكان ما .. فعليك بمفارقة اهله ..
والزمن النحن فيهو ده مازي زمن الرسول صلى الله عليه وسلم ..
لانو الان الامة انتشر فيها الشرك والكفر بطرق عديدة .. وانواع كثيرة فوجب على اهل الحق ان يفصلو انفسهم ..
وقد قال رسول الله صلى الله عليه وسلم افترقت اليهود الى واحد وسبعين فرقة .. وافترقت النصارى الى انتين وسبعين فرقة .. وستفترق هذه الامة الى ثلاث وسبعين فرقة كلها في النار.. الا واحدة .. قالو من هي يارسول الله
قال هي ماعليه انا واصحابي اليوم .. فهولاء هم الفرقة الناجية .. والبقية في جهنم ..
ارجو ان يكون وضح ..
الصافي قال ليهو لو سمحت يا غالي ..
الان اثبت تهمة انكم تكفرون الامة جميعا".. وتحكمون عليها بالنار ماعداكم ..
السؤال التاني المحيرني جدا" .. انتو نفسكم الان افترقتم على كذا جماعة.. فياتها الفرقة الناجية فيكم؟؟ .. وياتها الهالكة معانا ؟؟
داك قال اصبح النقاش عقيما .. الان نفتح فرصـــة لزول تاني .. هه
ـــــــــــ
.. الصافي مشى من مكانو .. عاين هناك.. لقى زوبة واقفة منتظراهو ..
مشى معاها .. الجماعة ديل بي هنا بعد خلصو ركن النقاش.. ماعندهم موضوع غير موضوع ود هندسة الشعرو سبيبي.. الراسو ملان علم ..
واحد قال ليهم والله الزول حرام يكون حايم طلق كدي مع العوام .. نحن لازم نستقطبو .. الزول ده حتى كلامو يشبه كلام العلماء الزمان ديك .. نحن لازم نجتهد .. لئن يهدي الله بك رجلا" واحدا خير لك من حمر النعم ..
شوفو زول قريب ليهو يدردقو لينا جاي ..
ودي مرحلة بتجينا في حياة الصافي . الصافي والجماعة الاسلامية ..
زوبة قالت للصافي .. بالك فاااضي.. مشيت وقفت مع ديل.. ولا هامي بالزولة الجات من اهلها عيانة .. جات لشنو ؟؟ وهسي مشت وين؟ ماهماك ..
قال ليها انتو طلعتو متين؟؟ .. انا كنت جاي الاقيها هسي والله ..
اها كيف هي والحصل شنو ؟
قالت ليهو هدي روحك.. انا عايزة احكي ليك بالتفصيل.. واشوف ردك شنو.. ح يكون رد رجال؟؟ .. ولا تطلع لي زول جبان .. وتخيب ظني فيك ..
الى اللقاء