الصافي... طارق اللبيب

الحلقة الرابعة و الثﻻثون

بعد الكلام الزي الصاقعة النزلت فوق قلب الصافي .. قال لي امو طيب عن اذنك يا امي.. ماشي استحم عشان انا طالع ماشي الغرب ..
قالت ليهو ماشي الغرب لشنو؟ قال ليها عندي صاحبا لي في ام الطيور .. بقرا معانا في الجامعة.. ليهو اسبوع بدقدق لي ... لازم امشي واحتمال اتاخر.. واحتمال تاني ابيت معاهو .. عارفة ليه؟
عشان اديك فرصة تكلمي ابوي بي راي ده.. لانو لو انا قعدت.. اولا ح يطرح لي الموضوع انا .. وانا ماعايزو يسألني .. عايزك انتي تستغلي الفرصة في المصالحة الوطنية هه..
قالت ليهو ليه يعني.. ؟ انت قايل انا غالبني اعمل معاهو مصالحة.. ؟ لكن بالجد ممغوسة من الكلام ده .. قال ليها بس انتي خليهو يحس انك انتي ما معاكساهو .. اصلا الرجل لمن يحس بانو المراة بتفرض رايها عليهو.. يادوب راسو بقوى وبعاند .. اها هسع لمن يحس بانك انت ساعية لي تنفيذ كلامو.. براهو بتراجع ان شاء الله.. وبشكرك .. وفعلا الصافي طلع مشى الغرب .. منطقة ام الطيورغرب عطرة مباشرة.. فقط يفصلهما النيل ..
المساء جاء الامين سأل من الصافي.. قالت ليهو مشى لي زميلة .. قال ليها خلاص مليتي ليهو راسو وزاغ مني؟
قالت ليهو دايما مستعجل ياالامين.. وماعندك صبر .. انا ريحتك واتكلمت مع الصافي.. والصافي قال مادام ابوي اده الرجال كلمة .. انا ما بكسر كلامو ..
قال ليها يعني وافق؟ .. قالت ليهو ايوة وافق.. موش انت داير كدا ؟
قال ليها وحكيتي ليهو الكلام الفارغ السمعتيهو بتاع الحريم القالنو في البت ؟
قالت ليهو ايوة حكيت ليهو .. وقال انا مايهمني.. المهم ابوي لو قال لي اقع في النار بقع .. وكدا يا الامين اي مشكلة تواجه الولد في الموضوع ده .. بقت مسؤوليتك يا الامين وده اختيارك .. في النهاية انت عارف لو الصافي لقى البت عليها اي سلوكيات ما كويسة .. ح نخش في برنامج طلاق ومشاكل مع اهل البت .. وتخسر علاقتك بالراجل.. بي سبب انك زول راسك قوي.. ومصر على الغلط ..
قال ليها يازولة ان شاء الله مايحصل الا الخير.. انا ظني في ربنا ظن الحسن .. انتي بس قولي يالطيف .. وخلي الامور على الله.. انا متأكد انو البت كويسة.. وماعندها اي مشكلة.. البت انا شفتها وعبدالرحيم بعرفو وبعرف تربيتو ..
قالت ليهو خير .. بس انا طالبة منك طلب .. خلي الولد يكمل دراستو بعدين يحلها الله .. قال ليها انا اصلا ناوي على كدا .. لغاية مايتخرج .. بس هسي ح نمشي نطلب البت من ابوها .. انا وانتي والصافي طلب رسمي .. وبعدين تاني على مهلتهم .. مافي استعجال البت ذاتها صغيرة .. ماكملت ال18 .. قالت ليهو مافي مشكلة خير .. ربنا يسوي الفيها خير .. وبي كدا الامور هدأت بين الامين وايمان .. والامين داير يعتذر لايمان وماقادر .. بس بقى يتكلم معاها كتير ..
ويحكي ليها في حاجات .. كدا عشان يرضيها من الزعلة الفاتت دي ..
وهي اساسا" جواها صفت خلاص .. المهم ..
..الصافي في الطريق جاهو تلفون من لينة ..
اول من شاف في شاشة تلفونو رقمها.. الدنيا ضاقت عليهو .. بس قال حسبي الله وكفى .. وفتح ليها الخط .. وسلمت بي طيبتها المعهودة ..
وبدت تتكلم .. كلام كتير ورا بعض ..
عارف ياالصافي.. انا حاسة بالبلد دي هنا غريبة.. وموحشة.. لانك انت مافي .. انا حاسة باني مابنتمي لى اي زول في الدنيا غيرك ..
وطبعا" الليلة عندي ليك بشارة ماتتخيلا ابدا" .. قال ليها قولي لي.. ان شاء الله خير قالت ليهو .. انا كلمت امي بالموضوع .. وحكيت ليها عن علاقتنا .. وكلمتها باي حاجة عنك.. وماخليت ليها حاجة ..
وقلت ليها ياامي الزول ده حياتي.. وماعندي حياة من دونو ..وامي اتكيفت شديد.. وقالت لي ده اختيارك.. ولا انا ولا ابوك مافي زول بعترضك .. بس المهم تدينا فرصة نسأل من الولد .. قلت ليها يعني موافقة يا امي؟؟ .. قالت لي موافقة ومبروك مقدما يالينة ..
المهم يا الصافي.. انا فرحانة شديد.. والليلة من الصباح قاعدة انطط .. ومنتظرة لمتين القى فرصة عشان اتصل اقول ليك .. الصافي سكت سااااي .. وقدرما داير يتكلم في كماشة ماسكة خشمة ..
قالت ليهو الصافي ؟؟ الوووو.. الصافي .. قال ليها نعم يالينة ..
قالت ليهو انت سمعت كلامي ؟
قال ليها ايوة سمعتو.. قالت ليهو ماعلقت .. ولا حصلت عليك ردت فعل ..
متوقعة تحسسني بانك فرحان بالموضوع .. شنو يا الصافي ؟
لو في اي حاجة صارحني .. قال ليها لالا.. بس لانك انتي سبقتيني .. وكلمتي امك .. انا لسع مالقيت لي طريقة احكي لي امي عنك.. ولا كلمة .. قالت ليهو طيب المانع شنو؟ احكي ليها يا الصافي .. خلينا نفرح شوية .. قال ليها ان شاء الله.. بس انتي اصبري.. لمن اجي الخرطوم انا جاي قريب ان شاء الله.. اسبوعين ما اكتر ..
قالت ليهو تمام يازول.. الفيهو خير ربنا يسويهو .. انت بس لو في اي مشكلة احكي لي .. انا حاسة من خلال كلامك.. انو في حاجة انت ماعايز تقولا لي .. قال ليها نحن موش قلنا نخليها على الله.. الفيها خير ربنا بسويها .. قالت ليهو نعم اتفقنا على كدا.. قال ليها بس اصبري ..
انتهت المكالمة ولينة حست انو الصافي كلم اهلو واهلو رفضتو.. والموضوع ده ظاهر من كلامو.. بس ماعايز يقول ليها كدا .. عشان ما يحطم فرحتها.. حست بالكلام ده احساس حقيقي.. وواضح ما داير ليهو كلام ..
الصافي خلص زيارتو .. ورجع البيت بالليل زي الساعة 9 مساء .. ولقى ابوهو صاحي بحضر في الاخبار .. وايمان قاعدة معاهو.. وناس الرشيد نايمين بي غادي ..
الصافي سلم . السلام عليكم كيف الحال يابوي .. امي امسيتي طيبة .. الحمد لله الحمد لله ..
المهم الصافي حس.. انو المياه رجعت الى مجاريها والموضوع طبيعي بين الامين وايمان .. وكدا الصافي ارتاح نفسيا" .. ايمان حست انوالامين عايز يتكلم مع الصافي .. طلعت مشت لي غرفة ناس الرشيد ..
وفعلا الامين قفل التلفزيون.. و بدا يتكلم مع الصافي .. قال ليهو طبعا" امك استعجلت وحكت ليك صح؟..
الصافي قال ليهو ايوة صح .. قالت لي انت خطبت لي عديل ..
قال ليهو والله الناس الخطبت ليك منهم ديل رجال ..و البت زولة كويسة وجميلة .. وصغيرة ح تنتظرك لامن تتخرج .. وابوها زول صاحبي شديد .. وانت عارف الخطوبة دي.. والله في الاول كانت هظار ساي .. لكن انا رميت لي كلمة والجماعة مسكوني بيها ..
لكن ابوك ما بنط من كلمتو .. وكت لقيتهم جادين اناذاتي بقيت جاد .. الصافي قال ليهو ثلاث .. جدهن جد وهزلهن جد..
النكاح والطلاق والعتاق . لازم تكون جد من الاول .. انت خليك ثابت في وعدك .. وانا يا ابوي ما عندي اي مانع من كلمة تقولها انت .. واعتبر الموضوع ماضي تب .. انت وثقت مني وانا غايب .. اني ما ممكن ارفض حاجة ربطت فيها لسانك .. وانا مابخيب ثقتك ابدأ" ..
انت عارف يا ابوي انا عايز احكي ليك حاجة .. ماكلمت بيها امي .. ياريت تكون سر بيني وبينك .. انا اتعرفت بي انسانة ممتازة شديد في الجامعة .. ونشأت بيني وبينها علاقة طيبة .. كنت بتمنى انها تكون لي .. لكن لاني عارف اني مابملك امري .. لانو ابوي على قيد الحياة .. ولازم اخد رايو ومشورتو .. عشان كدا ما اديتها اي وعد .. ولا اديتها كلمة.. بس كانت رغبة جواي..
وصرحت ليها بي اعجابي بس.. ما اتكلمت معاها كلام رسمي .. قلت اي اشاورك اول حاجة .. اها لمن جيت هنا لقيتك انت مضيت في موضوع تاني .. خلاص صرفت النظر عنها ..
الامين بعد ما كان متكئ قعد على حيلو وقال ليهو .. طيب هسي كلمتها بالحصل ده؟ .. قال ليهو والله ماقدرت اكلمها .. وماعارف تتقبل الموضوع كيف ..
قال ليهو انت اصبر ما تكلمها .. مامعروف احتمال الموضوع ده مايتم ..
والله ياولدي غايتو ماعارف انا براي حاسي اني استعجلت .. المفروض اكلمك واشاورك .. وكل مرة بيني وبين نفسي بقول كلام امك صاح .. لكن انا ماداير انط من كلمتي قدام الرجال ..
الصافي قال ليهو يا ابوي ولايهمك.. انت خلي الامور على الله.. احتمال ربنا قاسم لي خير في بت عم عبدالرحيم .. مامعروف الخير وين ..
بس هسي انا علي الاستخارة .. وربنا براهو بختار لي ..
الصافي قام طوالي طلع برة.. صلي العشاء .. وقبل الشفع والوتر صلى ركعتين.. وبعد سلم وقال .. اللّهمّ إنّي أستخيرك بعلمك، وأستقدرك بقدرتك، وأسألك من فضلك العظيم فإنّك تقدر ولا أقدر، وتعلم ولا أعلم، وأنت علّام الغيوب، اللّهمّ إن كنت تعلم أنّ هذا الأمر وهو زواجي من ربيعة عبدالرحيم . خيرٌ لي في ديني ومعاشي وعاقبة عاجل أمري وآجله، فاقدره لي ويسّره لي ثمّ بارك لي فيه، اللّهمّ وإن كنت تعلم أنّ هذا الأمر وهو زواجي بربيعة عبدالرحيم .. شرٌّ لي في ديني ومعاشي وعاقبة أمري وآجله، فاصرفه عنّي واصرفني عنه.. واقدر لي الخير حيث كان ثمّ ارضني به.. وقام على حيلو مطمئن طمأنينة غريبة ..
ومشى قال لي ابوهو .. خلاص يا ابوي.. رفعنا الأستفتاء لي رب العالمين .. وانا متأكد ربنا ح يصرف عننا الشر .. ويكتب لنا الخير كان هنا كان هناك .. بس السر يفضل سر .. ابوهو قال ليهو اكيد يا الصافي ..
ومشى لي امو قال ليها ابشري يا امي .. انا رفعت التقرير لي ربنا سبحانه وتعالي .. ومنتظر القرار النهائي منو هو .. سبحانه وتعالي .. هو العارف المستقبل لي حياتنا وهو البدبر الامور.. تاني البحصل انا بعرفو ده الخير.. والبنصرف مني بعرفو ده الشر .. اتفقنا يا امي ؟ قالت ليهو اكيد اتفقنا .. بس هسي انت ماتشغل بالك بموضوع زي ده خلي بالك في دراستك .. قال ليها اهو ده الحاصل ..
مابشغل بالي باي حاجة .. ومرت الايام بعد اسبوع من الكلام ده .. الصافي لاحظ انو لينة تاني ما اتصلت عليهو .. اتصل عليها لقى تلفونها مقفول .. وكان طول تلاتة يوم بحاول مافي اي رد .. وماعرف يتصل على منو يسأل منها وبقى مقلق ماعارف يعمل شنو؟ .. ومخو ضارب وراجي ربنا بس ..
ابوهو المساء لمن جاء من الشغل قال ليهو يا الصافي نحن بعد بكرة ان شاء الله ح نمشي لي ناس عمك عبدالرحيم في البيت .. ونطلب البت طلب رسمي .. وتشوف البت والبت تشوفك وكدا .. اها جاهز قال ليهو جاااهز يا ابوي .. واليوم جاء والامين وايمان جاهزين والصافي قاشر ولابس كويس وخلاص طالعين..
الى اللقاء