الصافي... طارق اللبيب

الحلقة السادسة و العشرون

اها باكر الصافي وكت لاقى لينة .. قال ليها لينة .. انا عايز اقول ليك كلام.. بس ماتسأليني من السبب ..
قالت ليهو قول .. يا الصافي .. انا من زمن راجياك تقول لي الكلام ده .. قال ليها نحن صح اخوان وزملاء واصدقاء جدا".. بس مابيناتنا علاقة خاصة .. ولا حاجات عاطفية صح؟؟
ولا انا غلطان ؟قالت ليهو ماغلطان .. بس الكلام ده لزومو شنويا الصافي؟؟ ..
قال ليها انا ماعايزك تلاقيني ولا الاقيك.. ولا نقعد نتكلم مع بعض..
لكن الفي قلوبنا .. يبقى في قلوبنا .. كل الاحترام والصداقة ..
قالت ليهو حرام عليك يا الصافي.. انا كدا بموت .. انت ماعارف انا يوم ما الاقيك .. وما اتكلم معاك البحصل علي شنو؟ لكن مادام ده اختيارك.. انا ما ح اجبرك على حاجة .. انا ماعايزة اسألك من السبب .. لكن بس انا غلطت فيك بي حاجة؟؟ .. قال ليها لالا .. ابدا والله حاشاك .. انتي لو بنات الجامعة ديل زيك.. كانت البلد دي مشت زي الساعة .. وانتي ليك مكان خاص في قلبي.. غير عن كل الاصدقاء والصديقات .. بس ماح اقدر اتكلم معاك تاني واقابلك .. قالت ليهو بس ده كلو لشنو يعني .؟ .. قال ليها انتي مصرة تسألي من السبب وانا ح أوريك ..
في زول كلمني.. قال لي الشباب بتكلمو عن علاقتك مع لينة .. وقالو علاقة ماتمام .. وانا عشان ما اجيب ليك الكلام .. قررت ابعد منك ..
قالت ليهو لو عشاني انا .. انا ماشغالة بي كلام الناس .. وعارفاهو ده بكون مؤيد .. لانو كل مايلاقيني بحدر لي كدا.. يقرب يخفسني الواطة .. وخليهم يقولو انا ما عندي مانع .. تاني عندك شي ؟
مادام معاي انت .. الباقين كلهم مابهموني .. قال ليها يالينه الله يخليك ..
بس خليهم ينسو موضوعنا يومين تلاتة .. لو عندك اي موضوع وحابة تتناقشي معاي فيهو .. التلفون معاك ..
قالت ليهو خير يا الصافي.. راحتك انا مابجبرك على حاجة.. لكن اتأكد انك بتحرمني عن اقل حقوق الخوة والصداقة.. لو انت بتسميها كدا ..
قال ليها انتي موش قلتي لي .. الكلام البتقولو لي انا بعمل بيهو ..
قالت ليهو ايوة .. قال ليها بس تعال ننفذ الموضوع ده ..
ومرت يومين تلاتة .. والصافي ولينة كل واحد في حتة ..
الصافي حسه انو في حاجة في حياتو ناقصة .. وكل يوم يمشي البيت يحس بي كلام لينة في عقلو الباطن .. وصوتا تتكلم بي كلامها السريع داك .. وبتاكل الحروف الفي النص . يعني كان دايرة تسلم على زول بتقول ليهو ..سامعيكم .. شلا كويسين .. كيصحه..
وتتكلم 300 كلمة في الدقيقة عادي .. المهم .. حس انو افتقدها جدا .. لكن على اساس انو الطلب جا منو هو .. ماقادر يمشي حتى يصبح عليها .. من الصباح لمن تجي ولا قادر يلاقيها ..
يوم جا وقف في حتة بعيدة كيدا من الناس .. ولينة واقفة مع صاحباتها .. بتتونس معاهم هو بعاين ليها من بعيد .. واقف في كوع كدا ومربع ايديهو ..
اول ماهي اتجهت على جيهتو طوالي اتضارا . عشان هي ماتشوفو ..
اتاري الود الاسمو مؤيد متابع المنظر ده .. مؤيد بقى ينقر في سنو القدام بي ضفرو كدا ..
ويقول ياربي في شنو ؟ ياربي في شنو ؟ ياربي في شنو ؟
الناس ديل شكلهم اتفرقو .. لينه شكلها قطعتو مع الود .. لانو شكلو معذب شديد .. انا لازم اتشمشم .. واعرف الموضوع ..
مشى قعد مع الشلة .. قال ليهو اها عشان ماتقولو مؤيد كذاب .. فعلا الصافي طلع حقير .. واتكلم مع لينه كلام فاضي .. ولينة قطعتو معاهو .. وكشحت ليهو زي المافي شي ..
ولو ما مصدقني تابعو الوضع .. وشوفو البحصل شنو ..
في احدة اسمها تسابيح .. قالت ليهو والله كلامك صح يامؤيد .. تصدقو انا مع لينا يومين .. ماقالت لي انا ماشة للصافي زمان كل دقيقتين .. الصافي وينو؟ الصافي ماشفتوه؟ .. الصافي ده الليلة ماجاء؟؟ الصافي الصافي.. هسي ليها يومين .. بس قاعدة مهمومة ومغمومة .. وماعندها ليهو اي حاجة معنااها كلامك صح..
المعم علاقتهم اتقطعت دي متأكده منها لكن التفاصيل شنو ماعارفة ..
مؤيد قال ليهم اها شفتو .. اها شفتو .. انا اصلو كلامي مابقع واطة .. لكن في ناس وهم كدا .. ماصدقوني .. وعاين لمحمد بي طرف عينو ..
مؤيد قال لي تسابيح .. عليك الله ياتسابيح تعالي .. عايزك في موضوع ضروري شديد .. ساقها قعدو بعيد الاتنين ..
عايزك تمشي لي لينة .. وتقولي ليها كلامي ده بالنص .. قولي ليها عارفة يا لينة .. مؤيد ندمان شديد .. انو اتخلا عنك .. وغاير شديد من خلطك لي الصافي .. والبارح صرح لي بي كلام خطير .. قال لي ..
انا والله لينه كنت دايرها شريكة حياتي للمستقبل ..
وعلاقتي بي (لمى) .. كانت علاقة عابرة .. علاقة بتاعة استلطاف .. اصلا هي ما مناسبة لي .. لكن لينة احرجتني قدام الناس .. عشان كدا انا فقدت اعصابي .. وقلت ليها كلام مالايق .. وضربتها .. وهسي والله بدعي في صلاتي .. انو ربنا يرجع لي لينة .. حب حياتي ..
بس انتي قولي ليها الكلام ده بالنص .. كدي كرريهو لي تاني ياتسابيح ..
قالت ليهو الله يا مؤيد حفظتو .. خلاص .. قاليها قلت ليك كرريهو لي .. ماتقفليها معاي .. كررتو ليهو كلمة كلمة .. طبعا نوعية البنات ديل .. في حفظ الشمارات الذي دي .. ماشاء الله مابفوتو كلمة .. هي تكرر ليهو في الكلام .. وهو يعاين ليها ويتبسم .. قال ليها والله انا ماحافظو زيك كدا .. يلا امشي ربنا يوفقك ..
قالت ليهو لكن عايزة اسألك .. انت جادي في الكلام ده .. والله انا براي هسي صدقتو .. قال ليها جادي بتاعة قلبك؟؟.. امشي امشي كلميها .. بس وتعالي وريني بتقول ليك شنو ؟
..
ومشى كايس ليهو لي واحدة اسمها زوبة .. اسمها الحقيقي زينب .. لكن مافي زول بقول ليها زينب .. كويس؟ .. وزوبة دي صديقة لينة شديد ..
المهم مشى كايس ليها .. ولمه فيها قال ليها انتي صاحبة لينة .. وانتي عارفاني لينة دي عندي بيها علاقة من متين .. وانا معذب شديد من فراقها .. ووو قال ليها نفس الكلام القالو لي تسابيح .. بالنص .. لكن ماقال ليها امشي قوليهو ليها .. بس قال ليها عليك الله حاولي اصلحي بينا يا زوبة ..
زوبة طبعا" زي ماهو ظاهر .. مامن الشلة الموبوءة بتاعة مؤيد ..
لكن هي صاحبة لينة شديد .. وبتهمها مصلحتها .. وبتعرف الصافي معرفة سطحية .. لانو علاقة الصافي بي لينة ماطولت .. لكن بتعرف مؤيد معرفة عميقة .. ومستحيل مؤيد يبكي ليهو في بت قدرده ..
قالت في سرها .. يا اما مؤيد ده كذاب .. وعندو هدف يفرق البت دي من الصافي .. يا اما فعلا" مؤثر فيهو الفراق ..
والاتنين تسابيح وزوبة بقن كايسات لي لينة في نفس اليوم .. ومالقوها .. وانتظروها بكرة ماجات الجامعة . قالو احتمال تجي في نص اليوم .. في محاضرة مهمة .. ماجات ..
والمشكلة شنو .. انو بكرة الخميس كان في اجازة .. وبعدو الجمعة ويوم السبت مافي .. وغايتو القصة لسع ماوصلت لي لينة ..
الصافي عرف انو لينة ماجات الجامعة .. وضرب ليها تلفون .. قالت ليهو انا عايانة يا الصافي .. قال ليها مالك؟ قالت ليهو مشيت فحصت قالو عندي تايفويد .. ودمي ضعيف ..
قال ليها لكن انتي اصلا مابتاكلي .. يعملو ليك شنو؟؟ ربع السندويتش مابتكمليهو .. ياخي في زول بفضل في كيس التسالي؟؟ .. انتي بتاكل سبع حبات تسالي .. وتاني مابتقدري تهبشيهو .. بتختي باقي الكيس في شنطتك يتاكلي منو اسبوع ..
قالت ليهو الصافي انا تعبانة شديد.. ماقادرة اتكلم ولاقادرة اشيل التلفون في يدي مع السلامة ..
الصافي قال معناها البت دي فعلا تعبانة .. البت دي لو دايرة تموت لايمكن يغلبها تتكلم معاي .. مشى اتلكم مع صااحباتها تلاتة .. وقال ليهم انتو ليه ماسألتو من لينة؟ .. لينة عيانة .. وعندها تايفويد لازم تمشو ليها في البيت .. انا والله لو كنت بقدر امشي ليها في البيت .. كنت مشيت .. لكن طبعا ح اجيب ليها كلام مع اهلها .. عليكم الله بكرة امشو ليها في البيت .. وسلمو عليها وكفرو ليها .. وقولو ليها الصافي يتمنى ليك الشفاء .. وشال تلفون واحدة من البنات عشان يتصل عليها بعد ترجع من لينة ..
وفعلا الصافي بقى مهموم وشفقان على لينة .. وكل مرة يجي يدور يتصل عليها يتذكر .. انها قالت ليهو تعبانة .. ماقادرة تشيل التلفون ..
ولمتين يجي الخميس والبنات ديل يمشو لي لينة .. وهو يتصل على البت يسألها منها ..
المهم باكر الخميس الصافي اتصل على البنات .. قال ليهن ماشات متين؟
قالو ليهو بنتلاقى الساعة 11 ونمشي ليها كلنا مع بعض ..
قال ليهن خلاص لمن تجو راجعين كلموني ..
ولغاية المساء ماضربو ليهو .. قام اتصل هو براهو .. وقال لي البت اها لقيتو لينة كيف؟
قالت ليهو والله لينة عيانة شديد يا الصافي .. لكن نحن كلمناها انك بتتمنى ليها الشفاء ..
ولغاية هنا مشية البنات ماخففت على الصافي التوتر والخوف الخايفو على لينة ..
وباكر الجمعة مواعيدو انو يمشي شمبات عشان معتصم جاي يفطر في البيت ويسوق اولادو .. ورقية طالبة منو طلب .. انو لازم يحضر ..
وهو كان بحسب لي يوم الجمعة ده بالذات .. من بداية الاسبوع ده ..
صبحت الواطا .. والصافي قام لبس هدومو وقشر وركب مشى على بحري ثم شمبات .. وصل هناك زي الساعة 9 ونص صباحا ..
ولقى الجماعة كلهم موجودين .. احمد وخالد ومعتصم واخوهو ..
وناس سيداحمد جيرانهم راجل مدينة وخمسة انفار كدا بي اسرهم .. وصديق المأذون ..
وبعد الفطور الحمد لله .. عقدو لي معتصم على رقية .. عقد جديد .. لانو العدة منتهية ..
طبعا" لمن يكون الطلاق رجعي (الاول أو التاني) .. والمراة كملت العدة .. مابترجع لي زوجها طوالي .. الا بي عقد جديد..
لكن اذا داير يرجعها في شهور العدة .. مابتحتاج لي عقد.. بس يقول ليها مرجوعة .. زي ماقال ليها طلقانة .. والموضوع انتهى وبتتحسب ليهو طلقة .. لكن طبعا اذا طلقها تلاتة طلقات .. تاني ماينفع يرجع ليها لا بي عقد ولا غيرو .. الا تتزوج رجل .. ويدخل بها .. فاذا طلقها الثاني حلت للاول .. والله اعلم ..
دي معلومة مهمة للفايدة يعني ..
طيب بعد ماعقدو .. وباركو .. مبارك مبارك .. يعني ماكانو اكتر من 11 نفر وجوة حبة حريم كدا .. ورقية يازول متحننة ومتزينة ولابسة توب خطير وشايلة شنطتها .. وتتقدل وتتبسم .. والصافي يعاين ليها مبسوط .. وفرحان ليها فرحة .. والاولاد الاتنين ديل ينططو .. مامصدقين انو ابوهم حيسوقهم معاهم امهم .. احساس جميل ومبكي في نفس اللحظة .. لو الزوجين بعرفو النفسيات البتنعكس على الاطفال من فراقهم .. ماكانو فكروا في الطلاق والفراق ..
الصافي شال امجد وسلم عليهو .. وقال ليهو الجمعة الجاية فطوري معاكم .. سامعة ياخالتي؟؟ جهزي التقلية ..
ورقية فرحانة بي جية الصافي فرحة .. ما اقل من فرحة رجوعها ..
وبعد ركبو في العربية حقة احمد ..
وخالد واقف يرفع في الشنط والحاجات .. وبهية واقفة جمب الباب عيونا حمر من البكاء ..
ورقية ولا ودعتها .. غايتو رقية دي كعبة كعوبية .. ياخي انتي ربنا
انعم عليك بالرجوع .. مالك مادايرة تسامحيها .. احمد قال ليهم انا طبعا" قررت اسوق خالد وبهية يسكنو معاي .. والبيت ده بنأجره يجيب لينا دخل ثابت ان شاء الله .. وودعوهم وساقهم احمد موديهم بيتهم في ام بدة ..
الصافي رجع وقعد مع بهية وخالد .. بتونسو .. بهية قالت ليهو انت مسامحني يا الصافي ؟ قال ليها طبعا" مسامحك .. هو في زول عوير بزعل من خالتو .. انتي دايرة اختك تقعد معاك .. عشان كدا هسي بتبكي .. وعملتي المستحيل لكن اها ربنا حكم قدرو ورقية رجعت لبيتها انتي تصبري .. تسوي شنو؟
قالت ليهو عارفاك قلبك كبير .. ومسامح لكن رقية ابت تسامحني ..
قال ليها الجمعة الجاية نمشي نفطر معاهم انا وانتي وخالد ..
والباقي خليهو علي .. اتفقنا؟؟
قالت ليهو انا موافقة .. خالد قال ليهم خير ان شاء الله ..
والصافي ودعهم وفات ..
ومرت الجمعة .. ويوم السبت بالليل غلبو يصبر .. قام اتصل علي لينة ..
قالت ليهو الحمد لله كويسة .. وباكر جاية الجامعة ..
وطبعا باكر في الجامعة .. راجيها عرض مغري من صاحباتها .. وهو بشارة رجوع حبيبها الاول .. مؤيد وربما يكون كلام رسمي ....موش رجوع ساي .. البحصل شنو ياربي ..
الى اللقاء ..
للنسخ