الحلقه 33
هبه : هو انا ممكن اطلب منك طلب ؟
فريد : تحت امرك خير ؟
هبه : ممكن نتغدا انهاردا مع بعض
فريد : انا اسف بس انا عندى شغل كتير مش فاضى
هبه : طب مش مشكله نخليها عشا
فريد : اصل بكره الخميس وانا بصوم اتنين وخميس فا اليوم اللى بصوم فيه مش بتعشى بتسحر قبل الفجر كده
هبه : اوك نتسحر سوى ايه المشكله
فريد : بس انا بتسحر مع ولدتى فى البيت
هبه : طب ايه المشكله برضو ممكن اجى لحضرتك البيت
فريد : تجيلى البيت ازاى
بصى بقى فى حاجه مهمه كلمينى مفيش يبقى مش تدوشينى
وبعد ازنك بقى عشان مش فاضى
( وقفل فى وشها )
هبه : ايه قلت الزوق دى الله ما كان معايا زوق اوى امبارح هو فى ايه طب اكلمو تانى
**** ( بقلم هند محمد @isis Mohamed ) ****
عمر : مالك يا قمر اديكى ماله
قمر : مستر ايمن وهو بياخد منى المفتاح بالعفيا ضغط على صوباعى طقطق
عمر : دا ازرق اوى طب حطى عليه تلج
قمر : حطية بس بردو مفيش فايده هو هياخد كام يوم وخلاص وجع العظام بيطول الحمد لله انها ايدى الشمال مش اليمين
عمر : طب هتعملى ايه مع شغل البيت وانتى كده
قمر : لا عادى انا واخده على كده تعرف غريب مره ضربنى علقة موت وكسرلى صوباعى الصغير فى ايدى الشمال برضو ولا جبستو ولا حاجه جبت عصايه بتاعت الجيلاتى ورابطو والحمد لله وكنت بساعد امى فى شغل البيت وكنت بعمل كل حاجه
عمر : غريب مين اللى ضربك ده وضربك ليه اصلا
قمر : دا اخويا وضربنى عشان كان شاعرى باين حته منو من تحت الطرحه
عمر : يا نهار اسود يهون عليه اختو
قمر : هو كده غبى والحمد لله انا كويسه وبحرك صباعى اهو
عمر : طب الحمد لله بس هو ايه عصاية الجولاتى ده يعنى ايه
قمر : الجلاتى متعرفوش الساقع ده اللى هو دولسى وكيمو كونو حاجات كده
عمر : اه ايس كريم
قمر : اه ايس كريم احنا فى البلد بنسميه جلاتى فى بقى بامنجى والشكولاته والفراوله
عمر : متجبيش سيرة الفراوله كفايا الى حصلى منها
قمر : ههههههههه خلاص مش هجيب سيرتا
انا هروح بقى اشوف البيت محتاج ايه ونهال واعمل الاكل لو عوزة حاجه اندهلى
عمر :طب افتاحيلى التلفزيون
قمر : حاضر اجبلك ايه ؟
عمر : اى مسلسل حلو
قمر : اسبلك حريم السلطان الله دا الجزء الاول احلى جزء
عمر : بجد طب سبيه
قمر : دا فى البدايا كمان حلو اتفرج عليه هيعجبك
عمر : ماشى حلوه اوى الممثله دى هى دى هويام بقى
قمر : اه ودى ناهد دوران بص اتفرج هيعجبك هروح المطبخ بقى
عمر : ماشى
**** ( بقلم هند محمد @isis Mohamed ) ****
ام ايمن : ارتاحى بقى يابنتى شويه انتى حامل ارتاحى
عفاف : الشقه كلها تراب يا ماما وانا الحمد لله مش تعبانه هسبها كده
ام ايمن : طب ما تجيبى واحده تنظف ولااستنى سهر لما تيجى من المدرسه
عفاف : يا ماما هى اول مره ادعيلى انتى بس ويا رب تبقى بنت
ام ايمن : ان شاء الله ربنا يديكى اللى انتى عوزاه ارتاحى بس طيب
عفاف : طب هعمل بالمكنسه وخلاص
ام ايمن : انا عاوزه اقولك حاجه بس خايفه تفهمى غلط
عفاف : خير يا ماما ؟
ام ايمن : ايه رئيك نقعد فى شقه واحده ناكل ونشرب ونقعد فى شقه واحده وانتو تروحو شقتكم على النوم بدل ما تطبخى هنا وهناك وتنظفى هنا وهناك وانا بنتى معندهاش دم
عفاف : طب يا ريت ماشى بس سهر هتوافق
ام ايمن : وهى مالها اصلا وكمان عشان نكون قدامها دى مش بتفتح كتاب من ساعت ما جابت التابلت دى وهى تقعد قدامو وانا مش قادره عليها
عفاف : طب ما قولتيش لايمن ليه وهو يتصرف
ام ايمن : خايفه يتخنقو
عفاف : لا ايمن عاقل هو عمرو مد ايدو عليها هو فى احن من ايمن بس هو اللى شخصيتو كده تقيل
ام ايمن : اه تقيل زى ابوه الله يرحمو الله يرحمك يا ابو ايمن
عفاف : كنتى بتحبيه يا ماما
ام ايمن : اه الله يرحمو كان ياخودنى وانا حامل فى ايمن ونلف مطروح كلها وتعرفى وانا بولد محستش بحاجه من كتر المشى
عشت معاه احلى سنين الله يرحمو
عفاف : الله يرحمو
انتو عوزين اطبخلكم ايه انهاردا ؟
ام ايمن : اللى انتو عوزينو انا باكل كل حاجه مش اتفقنا ناكل سوى
عفاف : من اول انهاردا ؟
ام ايمن : اه ادخلى يلا المطبخ وانا جايه وراكى اساعدك
**** ( بقلم هند محمد @isis Mohamed ) ****
هبه : فى ايه يا وفاء نزله رن رن رن مالك
وفاء : ماجتيش ليه ؟
هبه : انا مش فاضيه الشركه مشيها انتى وايمن انتى مش معاكى توكيل
وفاء : ايوه بس برضو لازم تيجى وبعدين مشغوله فى ايه ؟
هبه : موضوع كده ادعيلى يتم بقولك انتى متعرفيش حد فى مدينة الانتاج الاعلامى ؟
وفاء : هههههههه طبعه انتى ناسيه ان حسام شغلو كلو هناك
هبه : طب ممكن تجبيلى عنوان مكان قناة ازهرى فين ؟
وفاء : اشمعنى يعنى ؟
هبه :كده وخلاص اسئلى حسام وقوليلى
وفاء : طيب ماشى حاضر بس الشغل
هبه : انسى الشغل انا مش فاضيه
كلمى حسام بسرعه وقوليلى ولو عرف يجبلى مواعيد برامج القناه يبقى ياريت
وفاء : هو فى ايه يا هبه
هبه : ادعيلى انتى بس وكلمى حسام وكلمينى
**** ( بقلم هند محمد @isis Mohamed ) ****
ايمن : ايه مش هتيجى ؟
وفاء : لا وبتقولى مشغوله مشغوله فى ايه مش عارفه ؟
ايمن : ربنا يستر
وفاء : انا هقولك حاجه بس خايفه منك اصراحه
ايمن : انتى زى اختى يا وفاء فى ايه ؟
وفاء : ايه رئيك تتجوز هبه كا محلل ؟
ايمن : وفاء تقباليها على جوزك ؟
وفاء : لا
ايمن : خلاص اللى ماترضهوش على نفسك مترضهوش على حد
وفاء : بس كده هبه هتضر نفسها دى مش بتفكر غير انها تلاقى محلل فى اسرع وقت
ايمن : والله هى مش صغيره هى حره انا ليه شغلى وبس غير كده لا
وفاء : طيب يا ايمن برحتك انا هروح اكلم حسام
ايمن : طب ومشروع التجمع الخامس ؟
وفاء : ادرسو انته ولو حلو اعمل بلان للمشروع ونشوف
ايمن : انتو كده بترمو شغل الشركه كلو عليا
وفاء : انته قدها وقدود الله اكبر عليك انا هروح مكتبى بقى بس هجيلك تانى
ايمن : بقولك ايه انا هخلص وهروح لانى عندى مشوار كده مش هستناكى هبقى ابعتلك البلان على الميل
وفاء : هتروح فين ؟
ايمن : مشوار كده ماشى هبعتهملك على الميل
**** ( بقلم هند محمد @isis Mohamed ) ****
أنت تقرأ
ملك يمينى ( قمر و عمر )
Romanceقصه اجتماعيه رومانسيه دراميه تناقش كل المشاكل التى تقابل اى زوج وزوجه فى حياتهم الزوجيه من غيره وشك ومصروف البيت والاولاد مشاكل موجوده فى كل بيت مصرى وعربيى فى قالب درامى رومانسى بقلمى انا هند محمد isis.mohamed@yahoo.com انا بدأت كتابت هذه القص...
