Paikot-ikot, Patingin-tingin [isang Tulaserye]

TULA 11: Pinaglaban-laban, Binitaw-bitawan

Isang araw

kami ay nagpasya

na kalimutan muna

ang aming problema

Pumunta kami sa parke

Nagkuwentuhan

Mga simpleng bagay

ay pinagtawanan

Doon ay nanatili kami

hanggang gabi

Humiga kami sa damuhan

Hawak-kamay naming

pinagmasdan

ang mga bituin

Binilang isa-isa

na para bang mga sira

Sino ba ang nakakaalam

kung ilan

ang eksaktong bilang

ng mga kumikislap na tala

na kapag sa malapitan

ay hindi naman talaga

parang Christmas lights

na kumukuti-kutitap?

Tulad ng pag-ibig namin

Na ipinaglaban ko

Na ipinaglaban niya

Pero sa huli

siya

ay susuko rin pala

Sumama siya

sa mga magulang niya

patungo sa ibang bansa

Sinira ko

ang pangako ko

na hindi hahayaang

kami ay maghihiwalay

Sinira din niya

ang pangako niya

na hindi bibitaw

sa aking kamay

Huli na

nang malaman ko

Kaya

wala

akong

nagawa

Iniwan niya ako

Nag-iisa

Lumuluha

Hanggang sa

muli ko siyang nakita

noong isang taon

sa bahagi ng mall

na kinaroroonan ko ngayon

Hindi niya alam noon

na sa pangalawang pagkakataon

muli niya akong iniwan

Nag-iisa

Lumuluha