Poems of Lilaurcas

Nalibang

Maganda ang bawat araw na dumaraan
Kung positibong bagay ang iyong titignan
Humihinga ka pa hanggang ngayon
Oh di ba, blessing iyon?

Para saan ba itong tulang aking isinulat?
Para saan ba ang bawat letrang dito nakatatak
Wala lang, oo para sa wala lang
Naisulat lang ito para malibang

Ang daming taong puro reklamo
Ang hirap raw ng buhay sa mundo
Sa bansang ito, di ka raw aasenso
Wala raw kasing ginagawa ang gobyerno

Pero makikita mo sila, sunod-sunod ang anak
Ang mga buto'y ayaw mabanat
Patambay tambay lang sa kanto
Nakiki-chismis kung kani-kanino

May ilan namang nakakakita ng pag-asa
Sila yung mga taong puro gawa hindi salita
Nagtatatrabaho ng maayos
Para pagpapaaral sa anak ay may pangtustos

Masaya na kahit tuyo ang nasa lamesa
Maalat naman, mayroon pa ring lasa
Hati-hati sa isang pinggang kanin ang buong pamilya
Bitin pero reklamo'y di maririnig sa kanila

Kung sino pang gipit ang siyang positibo
Habang ay maykaya sa buhay napaka-negatibo
Tao nga naman, oo
Iba't-iba ang tingin sa mundo

Imbes na magreklamo, kumilos ka
Maghanap ng trabaho para masuportahan ang pamilya
Salitang batugan kalimutan na
Kilos na habang maaga pa

Kabataan raw ang pag-asa ng bayan
Pero pwede naman lahat ng mamamayan
Maging responsable at maghanda para sa kinabukasan
Kasi baka ang bukas mo'y di mo na pala masisilayan

O, may napulot ka ba sa nabasa?
Wala? Sabi na sayo wala tong kwenta
Pero salamat sa pagbabasa kaibigan
Nitong tulang bunga ng aking paglilibang