100 جلدة

مقدمة

#مئةجلدة
مقدمة

كل بنية من هي وصغيرة تشتري بدلة عرس بيضة وحذاء ابيض وطرحة صغيرة تتصرف كأنما فعلا عروس بس بدون عريس حتى الولد يلبس قاط ويمثل دور العريس

من يكبرون يكبر هالشي بداخلهم يحلمون بالحب والعرس وفرحة الزواج وينتظرون هاليوم بفارغ الصبر يمكن الاحلام تتغير بمرور الوقت وبحكم العمر بس يبقى حلم البدلة البيضة يم العريس اللي يكون الحبيب .. هو الحلم الاساس حتى وان ما كلنا عنة ..

اليوم القصة تحجي عن واقع يمر بي اغلب الشباب والشابات
واقع مليان دمار وخراب و استغلال للعواطف و حب كذب وخيانة
صحيح اكو بعد ناس طيبة بس الناس الداخلهة قذر اكثر

يكولون كما تدين تدان بس محد يفكر بينا شنو معنى هالجملة وشنو الغاية منها
الدين مو بس بالمال
العرض دين
والشرف دين
والروح دين
والحب دين
والسعادة اللي تمنحها للمقابل دين
والستر دين
كل شي بالدنيا دين حتى دمع العين مثل ميكولون اهلنا ..

اللوم نذبة ع الاهل او على الاولاد او ع البنات او على الزمن مو هو هذا المهم
المهم نوكف هالشي اللي صار مثل افة تنخر بينا وببيوتنا

استغلينا الحرية بابشع استغلال وكلنا على الغلط صح باعتبار انه حرية شخصية و احنا كبار ونفتهم والخ من هالشعارات الكذابة اللي نقنع نفسنا بيها في سبيل نبرر اخطاءنا ونزين معاصينا ونحلل الحرام الوكعنا نفسنا بي ...

اغلبنا راح يفز ويثور لما يشوف كلمة " الجنس "
او " الرغبة الجنسية " حيكول شنو هالجرأة اللي تخلي الواحد يحجي بهذي الكلمة وشنو هالتحريض لشبابنا وشاباتنا على مجمل معنى الجنس اللي يبلش ببوسة وينتهي بحمل او تخليص رغبة

لحد يستغرب من هالكلمة ولا يكول عيب
الكلمة ما محرمة ولا عيب ولا حتى شي يخجل
لان الله خلق هالرغبة وحطها بينا حتى نتكاثر و حتى ما يبقى شي حرام خلق الزواج اللي يحلل الجنس
ايات وسور كاملة تحجي عن خلق الانسان وعن الزوجين وعن كيفية تكاثر الجنس البشري
لهذا لحد يجفل من هالكلمة او يخجل

اللي يخجل اكثر من هالكلمة هي الزنا بكل انواعة
الحرام عصيان الله هو اللي لازم يخلي الانسان يفكر و يتدبر و يتأمل ليش الله حرمة

اكيد كلكم دتشوفون حالات الاطفال اللقيطين او دور الايتام وبالواقع هم محد يعرف اهلهم مو اهلهم ميتين مو الكل طبعا

او حالات قتل انتقاما للشرف او انحراف للبنات وطبعا الولد همين لان هم واحد يكمل الثاني البنية ما تنحرف من دون وجود الرجل والرجل كذلك
احنا بالواقع فتنة واحد للثاني و ماكو شي اسمة هو ولد ما علي شي
لا علي ومثل ما الها عقاب لازم الة هم عقاب وهالشي مو اني اكولة هالشي رب العالمين يكولة

بس لانه هالكلمة هي اللي خلت الرجال يتمادون ويجرون وراهم كل الاغلاط بحجة احنا ما يعيبنا شي كامو ميخافون حتى من الله وطبيعي البنات ينجرون بسبب عاطفتهم او نكدر نكول قلة عقلهم
و صارو حرفيا يطبقون مقولة

           " من امن العقاب اساء الادب "
Shahd Alsalman