#مئةجلدة3
Shahd Alsalman
حياتي الخاصة يمكن ما بيها شي يستحق انه ينذكر
مثلا علاقات عاطفية او مشكلة او اصدقاء سوء او شغلة مهمة لان اغلب وقتي بين البيت والشغل و ما عندي وقت لهيج امور حتى ما عشت علاقة صداقة او حب او اي نوع من العلاقات ويا اي بنية
والسبب الاقوى هو حبي لبنت عمي حب الطفولة والمراهقة وبقت بداخلي ما اكدر اشوف وحدة غيرها يمكن هو خبال مني لان ما كتلها بحبي ولا حتى هي كالتلي شي لهذا سكتت و استحيت من عمي وامها شوية امها صعبة
اقرب وحدة الي هي متفاهمين هواية ونحب نفس الاشياء اللي يشوفنا من كرايبنا يكول انتو لاكين واحد للاخ من جنت صغير اكيف من يكلولي هاي مرتك او يكلولها روحي صيحي امير زوجج
تمنيتها مرتي من صدك وتمنيت نكبر ونتزوج
ونعيش حياتنا مثل ما هسة عايشين احسها ميالة الي بس هذا ما يعني انه هي تحبني او تتمناني زوج الها او حتى حبيب
امي اكثر من مرة حجت ويا عمي علمودها لان هي تدري بية احبها كلش واريدها بس جانو يرفضون بالبداية كالو بعدها صغيرة وبعدها كالو تكمل دراستها يالا و باخر مرة كالت امها انه البنية ما تريدني
ضجت بصراحة وانقهرت حقها هي وين واني وين حقها تختار شخص احسن مني ومكمل وواصل و ما عندة اي التزام اكيد هي مثلها مثل كل البنات وتدور على اللي يملي العين
امي حاولت تخفف علية برغم شكد جنت احاول ما ابين الها شكد مقهور بس كلب الام يحس
ومع هذا تتصرف وياية طبيعي وتضحك وتتشاقةولا كانو رافضتني او جرحتني بعدين اصفن ليش جرحتني اني طلبتها وحقها ترفض او تقبل يعني ماكو شي مهم اني اللي احبها مو هي و حتة مكالت عني شي مو زين
اتقبلت الموضوع وسكتت بس بقيت هيج وما اريد اتزوج او احب اكدر اتناساها لكن ما اكدر انساها صعب التهيت بعد بحياتي وشغلي وبيتنا وخواتي
خليت كل شي بيد الله وكلت هو يختارلي الزين اذا هي هذا المطلوب والمنى واذا غيرها ما تفرق اي وحدة وانطيها حقها مراح اظلمها اكيد
جنت مقرر لو صارت خطبتنا راح ابوح الها باللي بداخلي واعترفلها بحبي واكلها اخذتج عن حب مو مثل مجانت تكول امي اني اولى من الغريب او منلكى احسن من بنت عمي
امنيتي جانت اعرف ليش رفضتني وشنو السبب اللي يخليها ما تقبل بية كزوج الها برغم امي وهي كلش متفاهمين وكلش مقربين من بعض وتعرف عني كل شي ما عندي شي ينضم او اخجل منة
دا اتخيل لو هي انخطبت لغيري او اتزوجت او حتى حبت شون حيكون موقفي ذيج الساعة وقررت لازم اسحب نفسي من وهم الحب هذا اللي ما لكيت بي اي مقابل بس مدا اكدر صعب علية كلش وماكو شي يشجع حتى انساها
اكول ما اشوفها وتطلع كبالي لو نتلاكى ببيت جدو
اكول انسى كل شي يخصها واغمض الكى ضحكتها ولمعة عيونها
اكول خلص ابعد نفسي والتهي بالشغل عنها فجاة اسمع صوت اغنية هي تحبها او نحبها سوة وتذكرني بالموقف
شكد صعب هالحب والاصعب تعيشة لوحدك ومتعرف لوين راح توصل او وين يوديك
تعلمنا اني وهي نكتب كل شي منكدر نكولة بدفتر او مفكرة
وهسة صار عندي تقريبا 4 مفكرات ودفتر صغير
كاتب كل شي احب اسوي وياها او شعر اسمعة واتذكرها بي او مقولة او سبب لضحكة ضحكتها هي هواية شغلات اعرف مراح تقراها
بس مو عدل هم متقراها وهم ابقى حابسها بداخلي
شكد ردت اخذ اللي تكتبة هي واشوف هم اكو شي يخصني لو بس اني لوحدي اكتب ..
