#مئةجلدة25
#النهاية
Shahd Alsalman
جنت كلش فرحان لاختي وبنفس الوقت لان خلص اخذت قرار اصالح غزل ونرجع سوة وننسى كل شي فات نبدي بداية جديدة ..
اجة يوم الحفلة ووديت اختي للصالون ورجعتها للبيت بعدين رحنا للقاعة اخذت امي ولجين ورحت شفت شنو اكو نقص وجيكت الوضع الحمدلله كلة تمام وبدو المعازيم يجون كلهم نسوان ودا انتظر برة اني وعيوني على بيت عمي شوكت يجون واشوف غزل اريد افرحها وافرح وياها
شوية واجو ريمة وامها بس غزل ماكو وياهم فاتو من يمي سلمو علية وكتلها لريم بلة بس دقيقة ريمة وفاتت امها للقاعة
- ريمة شوكت تجي غزل
- متجي
- ليش
- متقبل تجي تخاف منك
- تخاف مني !
- اي امير تخاف لا تفشلها صار كم يوم احنا هنا تقريبا 8 ايام وانت حتى سؤال مسالت عنها
- اعرف بس والله ملتهي صدكيني
- باوع امير اني احبك بس هي اختي اذا ناوي تبقى بكلبك الاسود فاتركها تعيش حياتها
- بس اني كلبي مو اسود
- لا اسود 3 سنوات زعل وسكتة شنو معناها
وهي طلعت علمودك و عافت كل شي علمود انت ترتاح ليش دسوي هيج
- ريمة
- لحظة امير خليني اكمل ترة غزل تعبت بغيابك كلبي اتكطع عليها من وراك ما يمر يوم اذا متحجي بيك بس انت وينك تركتها وقسيت عليها واني وياك غلطت وغلطها صعب بس حتى الله يسامح ويغفر وانت اكثر واحد يعرف شكد هي حنونة وطيبة وما تقصد تقهر احد
- صحيح و الله ريمة ولهذا السبب اني دا اسالج عنها اريدها ومشتاقلها وتخيلت حشوفها جاية وبقيت واكف هنا علمودها
- صدك !
- والله صدكيني اني احبها وخلص بعد ما اكدر على فراكها اريد نكمل سوة
- ياااا الله والله فرحتني
- اطلب منج طلب
- اي كول
- اريد مفتاح البيت هي خما طالعة
- لا بالبيت معتكفة هههه
هسة اجيبة من امي واجيك
- اوكي
- بس مو تكوليلها
- لا لا خليها تتفاجئ
- اي عفية يلة بيباي
- الله وياك
رحت طاير للبيت كلت بعد احسن ما اجتي حتى اكدر احضنها براحتي
اخذت وياية ورد حتى اصالحها بي وجبتة احمر مثل ما هي تحبة
وصلت للبيت فتحت الباب وسمعت صوت التلفزيون عالي خفت لا تفز لان اكيد متعرف منو اجة
جانت الاغنية انذليت وانت ماكو شكد كرهت نفسي اكيد هي ميتة قهر هسة وهالاغنية كلش جانت حزينة
بس مجانت موجودة بالهول كلت يجوز بغرفتها دورتها هم ماكو تقريبا افتريت بكل البيت ماكو هي رجعت للهول كلت انصي بلكت تجي وتشوف ليش نصة الصوت نصيتة وشفت شعر من ورة القنفة ع الكاع جان شعر غزل مديت راسي اشوفها
لكيتها واكعة وفاقدة الوعي
كومتها اضرب على وجهها و مو يمها اصلا ولا حاسة جسمها يرجف وهي مغمضة
اخذتها بسرعة للمستشفى نوب من خبصتي نسيت البسها شي الجو بارد جان نزعت سترتي وغطيتها بيها كل ما اباوعلها وجهها يصفر بالزايد وترجف اكثر
لحد ما وصلت للطوارىء اني متشاهد
اخذوها مني يفحصوها وطلع الدكتور
- شتصير من المريضة
- زوجها
طمني دكتور شبيها
- لا تخاف بس هي تعاني من شي مزمن او مرض معين مثل ضغط او سكر
- لا
- خوش لعد لا يظل بالك الموضوع عرضي وهذا جان هبوط بالسكر مسببلها رجفة وقلة توازن
- اكيد دكتور ما بيها شي غيرة يعني
- اي طبعا هسة بعد ميخلص السيروم وترتاح تكدر تاخذها
- ان شاء الله اشكرك دكتور
- عليها العافية لا تزعلها بعد الظاهر من الزعل هيج صارلها هههه
- هههه ان شاء الله
