#مئةجلدة10
Shahd Alsalman
فتحت فيس جنت ملان لكيت طلب صداقة من بنية ودازتلي رسالة ما ادري اول مرة اسوي هيج وقبلت الطلب وردت عليها
- مرحبا شلونك
- اهلا الحمدلله
ورة دقايق
- خما ازعجك اذا اراسلك
- لا هلا بيج بس منو حضرتج يعني اعرفج
- لا بس شفت تعليق الك بوحدة من البيجات وعجبني ندردش شكلك واعي
- شكرا شسمج
- رشا
- عاشت الاسامي
- شكد عمرك
- 29 وداخل ع 30
- ما شاء الله ممبين عليك
- ههههه شو بالعكس اني اشوف نفسي اكبر
اخذتنا السوالف والحجي وغيرت جو وياها هي كلش محترمة صحيح اني ما اعرف منو ديحجي وياية حتة مطلبت اشوفها هي رادت ندردش وحسب ما افتهمت هي متخرجة وكاعدة بالبيت لهذا هي تحس بملل وتحب تفوت على كروبات وبيجات بس حسب كلامها كالت اول مرة اتجرأ واحجي ويا رجال
وبالنسبة الي مو من هالنوع يعني ما راح اخذ فكرة مو زينة عنها او اكول شي يمسها هو النت للتسلية ومو اكثر
طورت علاقتنا وصرنا كل يوم واحد يسال عن اللاخ ونسولف مر شهر او اكثر بس برغم مدا اشوفها احسها مكسورة او مقهورة من شي واخاف اسالها يجوز متتقبل سؤالي بس صار العكس وهي اللي سالتني
- امير
- نعم
- اسالك سؤال بس جاوبني بصراحة
- اي اكيد
- هم حبيت ؟
- اي
- لعد وينها
- موجودة
- يعني انت هسة تحب
- اني من زمان احب مو هسة
- مدا افتهم قصدك
- باعي رشاوي احبها من طرف واحد هي متعرف شي ولا راح تعرف صعب نجتمع سوة
-ليش متحبك
- لان تقدمتلها ورفضتني
- هذي غبية اسمحلي يعني
- لا مو غبية بس الزواج قبول وهي ما عدها هذا القبول بعدين اني مو مرة وحدة طلبتها
- لعد
- طلبتها اكثر من مرة بس كل مرة حجة شكل الا ان اخر مرة امها كالتلي هي رافضتك
- بس هي اكيد متعرف انت تحبها
- احسن حتى ما اخسرها
- ويعني تبقى هيج بدون حب او زواج تبقى لوحدك
- ما اكدر انساها مو بيدي واذا تزوجت حظلم اللي اتزوجها اكيد
- زين انت منين تعرفها
- كرايبي يعني مو غريبة عني ورابين سوة
- ها هيج يلة الله يجعلها من نصيبك
- الله يسلمج امين
وانت ؟
- مثلك هم من طرف واحد ومصارت قسمة يعني اتقدملي ومن انخطبنا كالي ابويا جبرني عليج واني اللي فيخت هالخطبة حتى لا يعاركو اهلة وتركتة بس خليتة يخطب اليحبها وهسة خطيبتة صديقتي
- شون تحملتي ترة والله شي يكسر الكلب
- تتحمل مدام تحب لازم تتحمل بس حتى تشوف سعادة بعينة
- والله صحيح كلامج الله يوفقج رشاوي ويعوضج خير
-امين اجمعين ان شاء الله
- على هالحجي احنا بؤوساء ههههههه
- ههههههه كلش
ظلينا نحشش ونضحك وهي كلش حبابة اني بعمري محاجي ويا بنية بس هي حنينة وذكية من احجيلها ارتاح و همزين علقت فد يوم على شي حتى تدخل وتحجي وياية صارت صديقتي بشكل حتى تحس بية كلش ومع كل هذا ما طلبت اشوفها او شي لان ما اريد احرجها واني مو مراهق حتى ادور هيج امور
بس بقت علاقتنا طيبة
صرت اضوج اذا منحجي بس اغلب الوقت احسها تعبانة من شي
بيوم راحت وبقيت انتظرها ماكو هي ادزلها بس متوصلها وظل بالي عليها كلش مو عادتها وخفت لا صار عليها شي
رحت نزلت جوة وامي كالت جنت احجي ويا مرت عمك وكالت غزل مريضة كلش وصخونتها متنزل ابد وخايفين لا تنشمر كوم نروحلهم ولو من الباب نتطمن عليها
واصلا قبل لا تكول اني خفت عليها وردت اروح بدلنا ورحنة اني و هي ما كدرت افوت لان استحيت واهلها موجودين امي فاتت عليها بعدين عمي صاحني لكيتها نايمة بالفراش وخدودها حمر وتون من الصخونة كتلة لعمي نوديها كال وديناها وانطوها علاجات والله كريم
بقينا 10 دقايق يمهم وطلعنا ما حبينا نخبصهم بوجودنا وهم ملتهين
تقريبا يومين و نزلت الحرارة بس بعد تعبة المرضة بيها يكولون افلاونزة قوية بس مو موسم افلاونزة شعجب هيج
صديقتي رشاوي ماكو همين لورة يومين يالا ظهرت
ردت احجيلها لان صدك خوفتني غزل عليها
- هلو امير
- اشرقت وانورت وين هالغيبة
- اني اسفة كلش بس خلصان اشتراك النت ومرهمت نجدد يمنا خطار
- يلة سهلة بس لان ظل بالي عليج
- لا الحمدلله ماكو شي
- عساج دايم بخير رشاوي
- تسلم والله اشتاقيتلك ههههه
- اي والله اني هم هههههه
- شكو ماكو
- سلامتج بس غزل مريضة
- منو غزل !
- غزل حبيبتي الحجيتلج عنها
- اسم حبيبتك غزل ؟؟
- اي ليش شنو الغريب ؟
- مجنت اعرف بالعكس اسم كلش حلو المهم شبيها خير
- والله افلاونزة قوية ورادت تنشمر من الصخونة
- يااا سلامات
- رشاوي مشفتي منظرها شكد متوجعة حتى ليلي ما نمتة
- خطية وهسة شنو وضعها
- والله كالو صحت الحمدلله وماكو صخونة
- حمدلله على سلامتها
- الله يسلمج وانت شنو اخبارج
- خطار على هوسة جهال بس تونسنا كلش غيرنا جو
- بالعافية الله يديم اللمة
- الله يخليك يا رب
وكالعادة كضيناها سوالف وغيرنا جو احنا مو هواية نحجي او كل النهار بس من ارجع من شغلي او يكون عدها مجال ونسولف بس يومية يعني مننكطع
فد يوم جنا نسولف وطرحت علية فكرة
- امير اكو شغلة ببالي
- اي شنو هي
- انت مو كتلي غزل على وجه تخرج ما باقيلها بس الامتحانات
- اي
- ليش متحجي وياها وتتقدملها
- لا رشا همين ارجع انصدم وانرفض
- ما اعتقد ترفضك هالمرة اصلا اني اشك انه اهلها اللي قررو عنها وهي متدري بشي
- عود ليش
- اني اكلك ليش انت كلت تصرفاتها بعد ما رفضتني عادية ولا كانو صاير شي وانت مسمعت الرفض منها حتى امك سمعتة من امها وبقت هي برغم هذا قريبة منك
- اي صح هذا الصار
- اي فمعناها هي متدري شي عن عدد المرات التقدمتلها بيها وبعدين وحدة بمواصفات امها وحسب كلامك اذا هي طيبة بس شوية متسلطة اكيد مراح تخلي بنتها تعرف بشي
- اممم والله ما اعرف
- حاول متخسر وخليها بيناتكم انت وهي صدك هي خما متقدملها احد
- اللي اعرفة لا مصار هيج شي
- حاول والله بلكت هالمرة تقبل هي محاولة اول تالي اذا رفضتك حتتزوج غيرك وتنساك او تلتهي بحياتك خليها تطلع من نفسك مو بلة
- والله رشاوي شجعتيني وراح اسوي الكلتي علي ادعيلي
- الله يوفقك بس ها ترة اني الي البشارة اول وحدة ههههه
- تدللين بس كون تقبل علواه
- ان شاء الله
كعدت افكر بكلام رشا صدك حجيها اني ما حللت الامور هيج بوقتها وهي تحليلها منطقي كلش اني هسة احاول ما اخسر شي اذا قبلت كان بها واذا لا هي رافضة بعد شكو
