#مئةجلدة12
Shahd Alsalman
صارلنا اسبوع متزوجين بعدها تستحي مني ومصار بينا اي شي
صحيح اني اريد بس ما اجبرها خليها من هي ترتاح صبرت سنين حتى تكون يمي ما اجت على هالكم يوم مو مشكلة
مندمجة ويا امي ولجين هواية ومتقبل تاكل الا نلتم سوة ونتجمع وكضيناها طلعات هذا الاسبوع
ومر اسبوع ثاني جنت راجع تعبان بستها وفتت دا اسبح ردت بس انام
طلعت من الحمام بس وجه غزل ميتفسر وضايجة كلش
- غزول شبيج
- ما بية
- احجي شصاير
- هاي منو
- رشا
- ها رشا يعني تعرفها
- اي طبعا
- طبعا ! وعادي تدزلك هيج رسالة ؟؟؟
- شكاتبة ؟
اخذت الموبايل منها شفتها دازة
" هلو امير شلونك اني اشتاقيتلك هواية و صرت احس بملل بدونك صحيح اني طلعت من حياتك بس مدا اكدر انساك ان شاء الله تكون بخير "
استغربت من رسالتها وهي الي كالت منتراسل واحسن ليش هسة رجعت وتعرف الموبايل بيد غزل اني انطي الها شنو الموضوع
- تعالي حبيبي خليني احجيلج عنها
- امير ما اريد اسمع شي
- بس لازم تعرفين
تعالي اكعدي
كعدت وحجيتلها كل شي عن رشا من الاول لحد ما خطبتها ولحد ما هي كالت راح اتركك وحتى كتلها اني اعتبرها صديقة واخت ومشايفهة اصلا
ولا عندي شي يخصها جانت مجرد سوالف ودردشة وهي اول وحدة اتعرف بيها وتكون مقربة مني بس هي شكلها مصدكتني وحاولت وياها لحد ما شوي اقتنعت بس مسكتت وبقت دائما تشك بية وخاف جانت تستحي مني ومتقبل اتقربلها هسة لا متقبل لانه خايفة وشاكة بية
كتلها تكدرين تحجين وياها والتلفون بيدج لو فعلا اكو شي ما احطة عندج كامت تتعصب وتتوتر اكثر
يعني واجهتنا اول مشكلة لحد ما اجة يوم وصارت هي عصبية بس كانو عصبيتها وبجيهة مصطنع او مو حقيقي كانو بالغت هواية مدري هي هيج تتصرف من تعصب
المهم اللي صار انه رشا دزت رسايل تعترف بيها بحبها الي اني تخبلت حسيتها دتحاول توكع بيناتنا وهي تعرف اني احبها ومتزوج ليش سوت هيج
غزل مقبلت اصلا تبقى بس امي قنعتها تبقى جانت دنيا ليل ثاني يوم الصبح طلعت بدون متكلي لبيت اهلها اني تخبلت لان طلعت ولان مكالت احب احترامها الي وهي بهاي الحالة محترمتني بس ما الومها والسبب لانه اني من الاول مكتلها
رحت لبيتهم حاولت احجي وياها ومقبلت واهلها مفاهمين الموضوع شنو بس امها ساكتة يجوز حجتلها
عمي كال خليها ترتاح يمنا واهدو انتو الاثنين وبعدين نحجي
راسلت رشا اريد افتهم ليش هيج سوت
- رشا وينج
- باوع اعرف انت عصبي هسة بس
- ليش رشا تريدين اخسرها بعد ما حصلتها كوة مو انت تعرفين كل شي وتدرين بية احبها ليش هيج
- افهمك بس والله مو بيدي حبيتك ومن غبت عني حسيت بهذا الشي
- اي واني شلون اكدر احبج سيطري على مشاعرج هالشي مو ذنبي تدرين هي قرت كل شي وراحت زعلت
- صدك
- ليش مجذب اني قبل لوما انت اللي كتيلي حاول واخطبها و تعرفين هي شنو بالنسبة الي شون تسوين هيج شي
- زين تريد احجي وياها والله مو قصدي اسببلك اي احراج بس
- ما اريد شي و بعد لا تدزين شي اترجاج ولا توصلين يمها ولا تحاولين
- اوكي اسفة
- باي
شجاها هاي رشا شنو مسلطة علية شراح يخلصني وشلون اكدر ارضيها حتبقى تشك بية ومراح تسامحني اني غلطت جان المفروض اكللها كل شي مجنت اعرف حيصير هيج
حاولت وياها كم مرة وادكلها بس صدمتني بقرارها انه لازم نتطلك
كانو جانت تنتظر شي يصير حتى تكول هالشي تعاركت وياها لاول مرة بحياتي وطلعت دا احس اكو شي مو طبيعي بس ما اعرفة
تالي بعد كل شي كالت تريد تطلك زين اني مغلطان ومبين من كلامها ما عندي شي وياها وهي مجرد اعترفت بمشاعرها
امي تكلي من حبها الك وغيرتها عليك تسوي هيج
رحتلهم للبيت وكعدت احجي وياها جانت كاعدة بغرفتها وسادة الباب وجو الكأبة مو طبيعي
- اكدر ادخل
- دخلت انت بعد
- ليش هيج مسوية بنفسج
- لعد شسوي اركص
- باوعيلي غزل لا تديرين وجهج عني اني امير
- عوفني امير اني ما اكدر اعيش وياك
- زين يكفي بجي بس اسمعيني وانطيني فرصة
- امير افهمني ما اكدر لا تضغط علية
- يعني اني بنظرج هسة خاين ؟
- لا مو خاين بس اني ما اتحمل حتتحول حياتنا جحيم ونخسر بعض
- ليش كل هذا علمود وحدة هي اعترفت بمشاعرها اني شنو ذنبي انحرم منج غلطت اي اعترف من محجيت بس لا تعاقبيني ببعدج عني
- كافي تعذبني الله يخليك انت دتذبحني
- غزل شجاج اني امير شون اعذبج حياتي كلها كضيتهة احبج وما كدرت احب غيرج او اشوف غيرج
- خلص يكفي يكفي اطلع برة
- غزل !
- اطلع الله يخليك ما اكدر اتحمل صوتك اطلع
طلعت مصدوم من تصرفاتها معقول هيج اذيتها صدك يعني تريد اتركها طلعت من الغرفة بسرعة اجتي امها على صوت بجيها وطبت يمها اني رحت دا اطلع وانتبهت سويجي وموبايلي مو بجيبي نسيتهم ع الميز بغرفتها رجعت ليمها
واسمع صوت حجيها هي وامها
امها تبجي ومتكدر تحجي وهي منهارة كلة بسببج وكلة منج وانت صوجج انت اللي وصلتيني لهنا اني غلطت بس غلطي بسببج اني اكرهج من سمعتها تحجي ويا امها متحملت هي عن شنو دتحجي وشلون تحجي هيج ويا امها
صحت بيها غزززززل
بهتو اثنينهم ما عرفو شيحجون وامها تحاول تسكت من البجي
غزل بقت صافنة ودموعها تنزل وترجف من عصبيتها مشايفها هيج ابد
- خالة شصاير
- ماكو شي
- هو شنو ماكو شي غزل شجانت تحجي وليش تعاملج بهيج طريقة
- ماا...
- لا تكليلي ماكو جاوبونييي
لا تخلوني اهجم هالبيت على راسكم احجي غزل
شنو السويتي ؟؟؟
وامج شبيها وياج
غزل بقت ساكتة وجامدة بمكانها وامها ظلت تبجي نوب زادت واني اعيط واصيح واضرب ع الميز راح اتخبل
رحت لغزل ولزمتها من ايدها اريدها تحس كانو هي بغير عالم اهزها واحجي وياهة واصيح عليها
فقدت وعيها ووكعت بيدية
نقلناها مستشفى والتشخيص جان حالة انهيار عصبي حاد
بقيت كم يوم ويا مداراة الممرضات والطبيب يالا شوي تحسنت بس بعدني منسيت الصار ومفتحت الموضوع مرة ثانية كلت خل تكوم بالسلامة وكل شي سهل طبعا عمامي وعماتي معافونا وبقو ويانة كل الوقت ماكو شي يخليها مرتاحة وتتصفن والصدمة بوجهها واضحة
من طلعناها وتحسنت شوي رجعتها وياية للبيت وكاللنا الطبيب ممكن تنتكس حالتها وتحتاج لعناية وراحة نفسية وتبتعد عن اي توتر و كتبلنا ادوية وعلاجات واقترح انه نسافر ونغير جو
