#مئةجلدة20
Shahd Alsalman
باوعتلها من شباج الغرفة ما اكدر اوصف حالتها اخذو منها عينات للدم الطلع منها وتحاليل حسب كلام عمي
ولحد هسة مديعرفون يشخصون الحالة كتلة لعمي راح اسفرها وسالت الطبيب كال ماكو مشكلة بس لازم تصحى ونعرف السبب من التحاليل
التحليل الاولي يكول انه هي عدها التهاب حاد
وديناه لطبيب ثاني كال تدرن
وكل واحد يحجي شكل بهالاثناء حجزت حتى نسافر اني وهي ورجعتها لذمتي حتى اكون وياها
متحجي شي من التعب وبس تنام وتصخن وتكح
اجة يوم السفر ودعنا اهلنا وطلعنا بالطيارة طول السفر هي نايمة على جتفي ولازمة ايدي
نومتها مستشفى من وصلنا وبلشنا بالتحاليل
كالو بعد 13 يوم يالا تبين
جنت انام وياها بنفس الغرفة برغم منعوني لان كالو احتمال المرض يكون معدي بس عاندت
- امير
- ها عيني
- طلعني منا
- مو هنا احسنلج حتى لا تتخربطين
- ما اريد هنا ضجت من المستشفى والادوية طلعني
- لا تبجين خليني اشوف الدكتور واجيج
رحت للدكتور كال اطلعو غيرو جو وخليها تحط جهاز التنفس مالتها بس ترجع تنام هنا
رجعتلها حتى احضرها ونطلع صدك محتاجين نغير جو
طلعنا نتمشى بس هي تتعب بسرعة كعدنا بحديقة حلوة كالتلي احجيلي قصة شالت ايدي وخلت نفسها بحضني حجيتلها قصة تضحك كأنما طفلة تفرح وتتونس وتضحك واني هم نسيت كل شي واندمجت وياها
ورة مخلصنا القصة
- شوكت حتسامحني
- الله يسامحنا جميع
- اريدك انت تسامحني
- غزل مو وكت هالحجي احنا مو اتفقنا نتعالج ونركز بهالشي
- صحيح بس
- خلص معناها ماكو شي اهم من صحتج
- خلينا نرجع
- تعبتي
-اي
- اكو شي يوجعج
- اختنكت
- يلة كومي
بعد كم يوم بينت نتيجة التحاليل وحسب رأي مجموعة الاطباء مصابة بفايروس نادر بس مو معدي ولا قاتل وهو اللي ديخلي المجاري التنفسية تلتهب بالعلاج يروح واكو عملية بس هاي اخر حل
بدينا بمرحلة العلاج وكامت تتحسن يوم بعد يوم
وورة فترة هم سوينا تحاليل والحمدلله طلعت نظيفة وتقريبا اختفى الفايروس
بعد ما الدكتور طمنا على صحتها وانتهى كورس العلاج رجعنا للعراق استقبلونا اهلنا وبيت جدي كلهم ذبايح على غدا ولمة جنا مشتاقيلهم كلش
بقت هي يم اهلها واني رجعت يم اهلي نمت ارتاحيت و بعد رجعت لشغلي هملتة بذيج الفترة ولو طارق مقصر
يعز علية يتعامل وياية على انه من واجبة يبقى يمي او يعطف علية بسبب مرضي
بعد ما طلكني تدهورت صحتي كلش بس كل يوم احمد الله واشكرة واكول بداخلي كون هالمرض والتعب كلة يكفر الذنب السويتة ويسامحني رب العالمين على كل شي
بس بقى امير مديتقبل الصار ولا حتى حيسامحني بعد اعرف من جما مسافرين حاولت وياه بس كأنما صار عندة برود تجاهي وما ردت احرجة اكثر ولو جنت مستعدة اسوي كل شي حتى يرجعلي
بقيت يم اهلي وهو راح لاهلة بعد ما رجعنا من السفر اتصالاتة ومسجاتة بس يسالني اخذت الدوة وعن صحتي وخلص مثل مجنا هناك يعني
- الو
- هلو شلونج
- مو زينة
- شبيج شتحسين
- احس مشتاقتلك هواية
- عبالي بيج شي
- ما بية اني زينة وصحتي الحمدلله بس اريدك
- غزل وبعدين وياج ما اكدر الصار مو سهل علية
- اعرف مو سهل ومكتلك انسى بس اريد نبدي من جديد وشوية شوية ننسى كل شي
- غزل
- خلينا نجرب صدكني اني الندم ذبحني والله مجان قصدي اغلط هيج غلطة
- لا نظل نعيد و نزيد بالحجي هذا مدا اكدر اقتنع خليني براحتي وخلينا ولد عم
- يعني
- اي يعني كافي ما اريد افتح هالجروح انت جرح بالنسبة الي
- ماشي مراح افتح اي جرح ومثل مترتاح راح اسوي
- شنو يعني
- يعني راح اطلع من حياتك وحاول تسامحني واني موجودة وعايشة بس انتظر هاللحظة
- ...
- يلة ما اطول عليك اشوفك بخير وسلملي على خالة ولجين انتبه لنفسك امير
- وانت هم
-باي
- مع السلامة
ما اعتقد بعد راح يصير بيناتنا شي او يجمعنا شي
كعدت ويا اهلي وكتلهم راح اسافر يم ريمة اختي واستقر يمها بالاول عارضو وبعدين قنعتهم واتصلت بريمة وكيفت كلش ودعتهم ورحت بنفس اليوم ودعت بيت جدي وحتى لبيت امير رحت وودعتهم خالة بجت علية هواية تمنيت اشوفة لاخر مرة بس اني اول وتالي رايحة فكرت اروحلة لمكان شغلة
وشفتة من بعيد بس واحد من العمال صاح تفضلي اختي وانتبه علية اجاني
- غزل شجابج هنا
- جنت مارة منا و..
- مارة منا ! ترة ماكو هنا غير بس الحدادين والفيترية يعني شون تمرين منا
- ليش عصبي
- مدشوفين شون ديتفرجون عليج
- اها يعني انت غيران علية ؟
- باعي مو وكت خبالج روحي منا يلة
- رايحة بس اريد اكلك شي
- شنو
لزمت ايدة وباوعت بعينة
- لا تشك فد يوم اني محبيتك مو كل بنية يكولون عدها فارس احلام انت جنت فارس احلامي من صغري مراح ابرر كل شي صار لان انت تعرفة بس خليك متأكد كلبي محب غيرك حتى محمد مجنت احبة جنت متأثرة بكلام امي وكلامة
سامحني حتى لو متريد نرجع سوة
و شكرا على كل شي سويتة الي
مع السلامة
رحت و هو منطق حرف بس يباوع بعيني واني غرغرت الدمعة بعيني شكد صعب الفراك
بس ما اريدة يتاذى بسببي اكثر واني هم لازم احاول اتأقلم ع الوضع الجديد المصايب اجت كلها وحدة ورة اللوخ علية وصلت المطار وتمنيت لو يجيني واحضنة لاخر مرة بس هو ميدري اني رايحة
سلمت امري لله وصعدت الطيارة و انتهى كل شي عشتة هنا دعيت الله يوفقة وينسى اذيتي الة
