#مئةجلدة11
Shahd Alsalman
جنت كاعدة برة دا انتظر الخط واجة امير سلمت علي وحجينا وكالي اتصلي بابو الخط اني ارجعج بعدين بالطريق كالي عادي نكعد بمكان اريد احجي وياج بشي كتلة ماشي وصلنا لمطعم طلبنا عصير وكعدنا ندردش شوي بعدها انكلب الحجي جديات
- غزل شنو رأيج بية
- من اي ناحية
- كل شي اخلتقي شكلي حياتي بصورة عامة
- ما تتعيب ولد ذهب ومو مدحا بيك ولا كدامك بس انت اسم على مسمى
- يعني اذا اتقدم لاي وحدة ما ترفضني
- حتتزوج !
- اي نويت بس اذا هي قبلت
- ومنو صاحبة الحظ السعيد
- يعني هي محظوظة برايج
- اكيد طبعا هي تطول ههههه
- هههه تسلمين يعني اتوكل بالله
- اي اتوكل على الله
- نسوي بروفة لان اني اريد اخذ رايها بالاول قبل اهلها ؟
- ههههه ماشي
- تقبلين تتزوجيني ؟
- لا طبعا ههههههه
- تقبلين تصيرين مرتي ؟
- اممممم افكر عود
- تقبلين تغيرين حياتي وتسويها جنة وتكملين وياية باقي العمر ؟
- اممم
- تقبلين تكونين ام اولادي وبناتي وسعادتي و من يصيحوج يكولون مرت امير
- امير
- تقبلين ؟
- ...
- غزل اني كلش احبج واريدج على سنة الله ورسولة ومجنت ناوي اكلج هالشي واعرف انت رافضتني بس بصراحة تعبت من هالحب الشايلة الج وما اكول بي تعبت اخاف عليج واحلم بيج و اشتاق وانت مو يمي ولا كدام عيوني يمكن اني صدك مو كد المقام ولا من مستواج العلمي والاجتماعي بس والله لوما ظروفي وانت تعرفيهم اني جنت غير حال لكن العيشة صعبة وحياة اهلي اهم وخواتي مسؤولين مني واوعدج بس ازوج لولة الصغيرة واتطمن عليها اكمل دراسة وما اضيع ولا فرصة تجيني حتى ارفع راسج
- امير صدك دتحجي بس اني مرفضتك
- اتقدمتلج اكثر من مرة وانت رفضتي وهاي جامت اخر محاولة على امل تقبلين بية وتفرحيني وبدون اي ضغط معليج بمشاعري تجاهج
- اني موافقة
- شنووووو
- موافقة والله موافقة وما عندي اي اعتراض ومجنت ادري انت متقدم اصلا
- من كل كلبج هالحجي لو خجلتي مني ومتريدين تفشليني
- امير اكو وحدة يحبها واحد ويخاف عليها مثلك وترفضة او تفكر اصلا تكول لا انت اقرب شخص الي واني امنيتي رجال يسترني ويصوني وانت هذا الرجال
- تدرين راح ابجي من الفرحة بالقران ممصدك انت شدتحجين والله انت موافقة !
- هههههههههه اي اي اي موافقة وقابلة وراضية
اليوم فرجت علية ومدام هي موافقة لو اعرف ابوكها من اهلها راح ابوكها كل شي حسوي حتى يقبلون حسوي لخاطرها اي شي ممكن يسعدها
من كد فرحتي بيها امشي واحجي ويا نفسي ورحت بشرت امي ولجين وطارو من الفرح وكتلها روحي وخطبيها باجر كالت انتظر كتلها ابد وصار بعد رسمي
بعد ما خلصت من اهلي رحت بشرت رشا وجه الخير ولولاها ما جنت حتشجع ولا اسوي هيج ابد
وهي كلش كيفت وفرحتلي وتباركلي
الحمدلله اللي الله خلاها بطريقي و لا اني ايست بعد وكلت ما بيها امل
صليت ركعتين شكر لله وطلبت منة يوفقني ويسعدها وياية
وبثاني يوم رحنا وخطبناها وعمي جان موجود بس هالمرة احس بقبول خاصة من امها
كالو كم يوم و نردلكم خبر والحمدلله صارت موافقة ولبسنا الحلقات وكطعنا مهر سيد بالاول وكلنا محكمة على راحتنا صارت مرتي مو بس خطيبتي مدا اصدك والله هيج الله يفرح عبدة سبحانك يا رب
كمنا نطلع سوة وفرحانين ايدي متفارك ايدها وهي هم فرحانة بس بعدني اشوف الحزن بعيونها مدري اني من هوسي بيها كمت هيج اشوفها اخاف عليها من النسمة
قررنا بعد الامتحانات باسبوعين نتزوج طبعا رشا وياية على طول الخط وكل شي احجيلها و هي دائما فرحانتلي
بس اني ما حجيت لغزل عنها ما اعرف كلت خاف تغار وتشك بيها او بية فما حجيتلها شي واساسا رشا كالتلي بس تتزوج اني اتركك لان متريد تسويلي مشاكل وياها وهي متفهمة كلش حاولت اكللها لا واخليها صديقة الج بس هي مقبلت واتفقنا على هالشي لان كالت اذا اني تزوجت قبلك انت هم حتسوي هيج وصدك خما اخليها تفضلني على زوجها قنعتني يعني
كملت غزل امتحانات وما انتظرنا النتيجة اسبوعين مثل ما اتفقنا واتزوجنا جان احلى عرس وهي طالعة تجنن الابيض بس الها مخلوق واني ركصت ركص مصاير من الفرح
من كملنا وزفونا شفتها خجلانة ومرتبكة ومتوترة كلش بس حضنتها مسويتلها شي اول مرة احضنها وابوسها بخدها نزلت دموعها وكتلها مراح اتقربلج ولا تخافين اذا ما تريدين مو الا المهم انت كدامي وهذا يكفي هي ابتسمت وراحت تبدل وسبحنا صلينا واتعشينا وكضيناها تحشيش وسوالف اريدها تخفف من توترها بس نعسنا من التعب ونمنا ..
