#مئةجلدة16
Shahd Alsalman
ومنا اجتني فكرة انه اكون صديقة لامير و بعد توسلات امي بية ومن خوفها علية واني كلبي مينطيني اوجعها اكثر حجيتلها ولنور جانو كاعدين
- اني سويت حساب جديد وراح ادخل لامير منة
- ليش
- ماما امير مو لازم يعرف شي عن اللي صار وما اريد انفضح لازم استر نفسي
- غزولة مفتهمت شتقصدين
- راح اكون صديقة امير بالفيس وبما انه اعرف بي يحبني راح اخلي يتزوجني عن طريق هالصداقة
- وبعدين ؟
- بعدين نتزوج وادزلة رسايل من هالحساب علساس انه خيانة واخلي يطلكني
- بس هو حيتزوجج يعني ..
- مراح اخلي يتقربلي وحظل اتحجج كلها اسبوعين او شهر واخلي يتركني
- وليش هاللف والدوران
- لان اذا امير عرف حيكرهني واكيد راح ينتقم من محمد لشرفة
- يمكن هذا احسن خالة
- ما اعرف اني دماغي وكف شلون صار هيج بينا
اسفة حبيبي اعرف اللي دا اسوي احتيال بس اريد احمي نفسي و على كلامك وحجيك اني اجيت واسنجدت بيك محد حيحميني مثلة
كمت اتذكر كل شي بيناتنا و اربط الاحداث جنت غبية لان مشيت ورة كلام امي وخفت منها جان لازم اتمسك بي لان اعرفة هو شنو وزدت الطين بلة وغلطت غلطة العمر وسلمت نفسي لواحد منحط
جنت انقهر على وضع امير ومن يحجيلي عن مشاعرة عني واني اكذب علي
جنت مضطرة بس اتمنى يسامحني كل يوم جنت اتعلق بي اكثر واقارن بينة وبين محمد الحقير خلاني شكد جنت رخيصة وياه وشكد امير مخليلي قيمة ومكانة عندة وصاين حبة الي حتى وهو ممعترفلي
شكد تمنيت نكون واحد ويا اللاخ بغير ظروف وشكد ردت ابجي واحجيلة من تمرضت شفتة فوك راسي اني مصخنة ومغمضة بس دا احس بلهفتة علية ومن رجعت احجي وياه بصفتي رشا كعد يحجيلي شون هو متوجع على مرضي وهي افلاونزة عادية
بديت اكره كل شي حواليا واحس بالخسارة والمرارة
حاولت ما اخلي اي بنية توكع مثل وكعتي لهذا رحت لمحمد حتى اهددة اذا ما ترك البنية اللي يعرفها اني حكوللها كل شي هو جان متخيل غيرانة علي واني من بعد الصار كمت اعرف اللي احسة تجاهة مجان حب جان تعلق بوهم وبشي غلط وواحد عديم انسانية
بس هددني وكالي عندي فيديو من نمنا سوة وعندي صور الج اخذتهن واني متاكدة ماكو هيج شي بس خفت ما اريد انفضح تركتة و من بعيد لبعيد خليت البنية تنتبه كلت الحكلها قبل لا توكع بشباكة ويسوي بيها نفس السواه بية
جنت اكره نفسي على كل مرة ذليت نفسي الة بالصلح او الغيرة او مبادرة بكل مناسبة او تغليس عن اهمال او خيانة اشوفها بعيني واكول لا هاي هن البنات يتحارشن وميسويها هو
كرهت نفسي عن كل مرة نمت بيها ويا بالتلفون او طلعت وياه او نطيتة نفسي بدون ما اقاومة ولا ارفض
واجة وكت انه اتزوج امير وفعلا عرضت علي انه يخطبني ويحاول
ومن طلعنا وحجالي عن حبة وخطبني تمنيت اصرخ بنص المطعم وابجي وابوس ايدي يسامحني لان دا استغل حبة الي ولان دا العب بي بسبب الغلط السويتة وهو ميستاهل هيج ابد
بس هذا شرفي وشرفة هسة وعيت ورة ما وكع الفاس بالراس بس ما يصير انه اسكت لازم اسوي شي ولو جان استغلال لازم يسامحني فد يوم واذا مسامحني اعرف بي مراح يفضحني وحيستر علية اعرف اخلاقة ورجولتة وادري بي من يحب احد ما ياذي حتى لو يتاذى منة
اتزوجنا بس كمت اموت كل دقيقة تمر علية وياه مدا اتحمل كل الصار اجة فجأة وما لحكت اخذ انفاسي ومدا اسيطر على شي
من اتهمتة بالخيانة ردت كون بس الله ياخذني وارتاح من هالعذاب العشتة واللي ديدفع ثمنة امير
يوم عن يوم انهار اكثر واكره امي اكثر واكره نفسي اضعاف كرهي لمحمد
اني غلطت بعد متحملت الصار كلة وامي بعدما طلع امير من عندي وهو مقهور حجت علية وكالتلي ارجعي وياه وخليج وياه و اسويلج عملية نطلع برة اني وياج بحجة علاج الي وترجعين بنية من جديد م
من سمعتها هيج تحجي انهاريت اكثر لهاي الدرجة صرت اني كذابة واستغلالية وانانية
و الاتعس من هذا كمت احس نفسي مثلي مثل اي ساقطة او بنت شارع او بنت ليل ليش هيج كلها شهور الجنت وياه خسرت حياتي ونفسي وشرفي ومشاعري وضميري وحتى امير راح اخسرة
ظليت اعيط واصيح ورجعت لنفس النقطة انه هي السبب بكل شي
من صار عندي انهيار عصبي و بعد ما كمت اتحمل اي شي صار فراشي هو حضن امير كل ما يتحرك او يروح احس نفسي طفلة وفقدت ابوها واتهستر بالبجي فكرت هواية شأسوي اني عالجت الغلط بالغلط غلطت ويا محمد وردت اصلحة رحت استغليت امير
لازم اتحمل نتيجة كل شي اسوي حتى لو كلفني حياتي اذا اني خسرتة لامير فشنو تسوة حياتي بعد ما بيها نفع ولا معنى ولازم يعرف كل شي خلص مااتحمل اعيش بالظلام اريد ارجع مثل قبل صادقة وصافية وما اخاف من شي
اشرتلة حتى نروح للكاظم وبعدما خلصنا كدرت انطق وطلبت من الله يسامحني على كل السويتة بجاه الكاظم
وكعدت حجيتلة لامير عن كل الصار وياية يسمعني وهو مصدوم والدمع بعيونة ممصدك اني كل هذا اسوي ولا مصدك هو وكع ضحية غلطة اني سويتها
