#مئةجلدة24
Shahd Alsalman
رحت لبيتهم واخذت كرزات وكم شغلة لغزولة الصغيرة
تعشينا وشربنا جاي وراحت مياسة تنوم غزل وتجي
بس الظاهر نامت بسرعة ومياسة سمعتنا من جنا نحجي
- ولك طارق شكد محظوظ مرتك طباخة درجة اولى
- اي والله هي بس بالطبخ بكل شي درجة اولى فدوة لعينها الله يرزقك بمثلها
- وليش يرزقة ما هي موجودة اصلا
- منو تقصدين حبيبي
- حبيبي غزل موجودة ومرتة بعدها
- اي والله صدك بس
- لا بس ولا شي
خويا انت خوش رجال وتستاهل كل خير اعذرني دا اتدخل اني بس غزل خوش بنية والصار صار وهي لوما صافية ونظيفة مجان كلتلك وجان سوت اي شي بدون ماتضطر تحجيلك شي
- صحيح كلام مياسة ترة
- بعدين لا تنسى اخويا هو السبب مو هي هي كل ذنبها رادت تعيش حياتها ويا انسان عود تحبة بس هو مصانها مجانت مخططة لكل هذا
لا تظلمها اكثر
- امير مياسة دتحجي عين العقل وهي تغربت علمودك وبسبب قساوتك هسة حتى المحكوم هم خلصت محكوميتة وانت بعدك تعاقبها بغيابك شفت شلون تصرفت من شافت بنتي بيدك اني متاكد انحرك كلبها
- اكيد حبيبي
انت يا خويا حتى على نفسك دتقسى صدكني الحب هو التسامح وهي اكيد تعلمت وتعبت من هالغلط اخذها ورجعها الك انت تحبها و هي تحبك لا تخسرها ولا تخليها عايشة ع الامل عيشو الجاي سوة العمر يركض وانتو بعاد واحد عن اللاخ
- الله كريم
- فكر ترة اي كلام تكولة ام غزل اني موافقها بي بس يرادلك شوية شجاعة حتى تسامح واعذرنا اذا تدخلنا بحياتك هيج بس انت اخوية واخوها و نحبلك الخير وغزل هي الك ما انكتبت لغيرك
- بالعكس اني ارتاحيت لان حجيتو وياية واني هم تعبت بدونها احتاجلها هواية ومو سهل علية 3 سنوات لا نحجي ولا اشوفها ويوم الاشوفها تنهزم مني
- ان شاء الله ترجعون سوة
- اشكرج ام غزول
كملنا سهرتنا واني دا افكر بكلامهم رجعت للبيت كتبت اخر ورقة عنها وسديت هالمفكرة
وفتحت وحدة جديدة على امل انه نكتب بدايتها سوة اني وهي وقررت ارجعها ما اكدر بعد اكثر وسامحتها من كلبي ..
التهيت ويا اختي رادت تسوي حفلة خطبتها ومهرها بقاعة فكمت اجهزلها كل شي وطبعا هي قدمتها علمود البنات والحمدلله ما خليت شي ينقصها بس مكدرت احجي ويا غزل بعد لان كلش مشغول ..
صارلي هنا اسبوع وما اجة ولا حتى حجة وياية بعد مشتاقة احجي وياه هواية محتاجتلة وما بقى شي وارجع اسافر
كالت لجين حتسوي حفلة كتلها اذا تحتاج شي تكول بس كالت متقصرون بس اريدكم تحيولي الحفلة وتنوروني
ما اكدر اروح اصلا لان اكيد حشوفة هناك صح الحفلة بس نسوان بس اكيد يبقى يمهم برة وما اريد افشل اكثر كدام اهلنا فقررت اتعذر بأي شي وكتلها لريمة كليلهم افلاونزة ومكدرت تجي وهاهية
امي ظلت تحجي علية بس اني ما اكدر بابا كاللها خليها براحتها وطلعو كلهم وبابا اخذ اسامة والجهال كالو نوديهم للالعاب حتى يلتهون
بقيت لوحدي اكتب واشكي الوجع البكلبي على اوراقي ودموعي تنزل بقيت هيج ساعة تقريبا كلت خلي اكوم اكلب بالتلفزيون طلعت اغنية انذليت وانت ماكو نوب هيجت المواجع علية عليت الصوت كلة وباوعت من الشباك وهمين الدموع تجري لوحدها بس هالمرة بشهكة ...
