ما اعرف شديسوي من ورايا خايفة علي و خايفة احجي وياه نظرتة دتذبحني مليانة شك و عصبية و عتب
جنت نايمة من اجة هو حسيت علي قريب مني
رجعت للبيت وجانت هي نايمة وجهها تعبان بس نايمة مثل الطفل تقربت منها هاي اخر مرة اشوفها بيها واكون قريب منها واتأمل وجهها واشم عطرها شكد حبيتها ...
كامت تكح وخرت من يمها حتى لا تشوفني الظاهر مريضة لان كحتها قوية
- اجيت حبيبي
-كومي غسلي وتعالي
- اوكي
- صحصحتي لو بعدج
- مجنت نايمة هيج غفيت
- اخذي هذا اتفرجي بينما اسبح
- شنو هذا
عافني وطلع من الغرفة انطاني الموبايل فتحت الفيديو شفت كل شي محمد امير وبنية بعدين افتهمت هي اختة وهذا صديقة طارق اعرفة مصدكت عيني ابجي واتفرج بين الفرحانة بين المشمئزة من محمد وبعد ما خلص الفديو شفت صور الة وهو مربوط ومشدود بمكان والدم معبي وجهة
وبعدين فديو دينجلد بي ويصيح من الوجع
تمنيت ابوس امير من راسة ومن ايدي حسيت نفسي عندي سند ومحد يكدر يسويلي شي او يفكر يسويلي شي
بعدها اجة جان مبدل وسابح كعد ع الكرسي
رحت كعدت كدامة ع الكاع واباوع بعينة لاول مرة من بعد ما اعترفتلة
- امير لو انطيك عمري كلة ما اوفي وياك
- شفتي كلة ؟
- شفتة الله يخليك الي وما يحرمني منك
- انت ليش تكحين هيج
- ما ادري
سامحني حبيبي
- غزل
- نعم
- قصرت بشي وياج؟
- لا ابد والله اني القصرت وياك بكل شي
- اذيتج بشي ؟
- لا والله لا
- ارتاحيتي من شفتي هالكلب بهيج حالة
- اي الله لا ينطي
- ابريني الذمة لعد
- شنو يعني
- يعني يا بنت الحلال انتهى كل شي بيناتنا وصار لازم كلمن يروح لحالة
- لاا امير مستحيل والله اقبل اعيش خدامة عندك
بس لا تعوفني
- انت طالك
عفتها وكمت و هي اتهسرت بالبجي وتصيح لا امير واني هم متحملت حبست نفسي بالغرفة الثانية وابجي عفت حبيبتي وروحي بس صعب نبقى سوة حتى اذا بقت وياية راح تبقى لان اخذتلها حقها مو لان تحبني
حسيت بيها طلعت بعد 3 ساعات رحت شفت كل غراضها موجودة بس مبدلة وطالعة
باوعتها من الشباج تمشي وهي مكسورة وتبجي وطالعة بلا اي شي
انقهرت عليها وعلى نفسي وعلى كل حلم حلمتة وياها مستحيل بعد يتحقق
رجعت اني هم ليم اهلي صارلي هواية مشايفهم جانت امي تصلي رحت نمت على رجلها ودموعي تجري وهي تقرالي ايات وتمسح على راسي
- شبيك يمة حبيبي ليش تعبان وشديصير وياك ؟
- يمة
- عيون امك
- طلكتها
- شنو ؟؟
- طلكت غزل
- اسم الله اتعوذ من الشيطان شنو هالحجي
- يمة اني طلكتها مو راح اطلكها وكل شي انتهى
- عزة بعيني شدتحجي ولك هاي غزل حبيبتك ومثل بنتي شون هيج تسوي بيها شنو اللي صار
- مدنتفاهم امي وماكو نصيب نكمل اي صحيح احبها بس التفاهم اهم وهذا اللي صار واثنينا مقتنعين بالقرار هذا
- عين وما صلت ع النبي على شنو انتو متعاركين بس فهمني
- ممتعاركين بس هالشي احسن النا وخلص اني كافي وما اريد اسمع بهالسيرة لا من بعيد ولا من قريب ولا بشين ولا بزين
- استغفر الله العظيم الله كريم يمة لا تنقهر وهسة هي وين
- ما ادري طلعت بس لبيت اهلها وين تريد تروح
- هسة عمك مسافر من يرجع شنكلة
- هي تحجي وياه
بعد شكد ويجي ؟
- تقريبا 10 ايام البارحة جنت احجي ويا امها و هيج كالت
كمت رحت لغرفتي اريد ارتاح وانسى كل شي
جانت يمي وهسة كل شي راح شبية منتظرت كم يوم اقلها اشبع منها شوف يا الله ريحني من عذاب حبها انشلع كلبي ما عندي غيرك اشكيلة الحال
مر اسبوع رحت لميت هدومنا والاغراض التخصنا وسلمت المفتاح لصاحب البيت حتى ارجع يم اهلي
خليت غراضها يمي خما انحرم منها ومن ريحتها وكل شي
كل يوم اسمع صوتها واشوف دموعها اكوم مفزوع من النوم اروح على البوم صور عرسنا اشوف عيونها صدك هيج صار بينا تاليها واتفاركنا
مراح اتحمل ابقى هنا بعد بس اختي و امي شلون عرضت عليهم فكرة نسافر ونستقر برة امي مقبلت واختي كالت عندي دراستي صعبة
رجعت امي كالت سافر اطلع انت كم يوم وغير جو وارتاح
طلعت لتركيا ارتاحيت شوية بس بعدني افكر بيها وما اعرف اي شي عنها
خابرت اهلي حجيت ويا امي فجأة بجت ردت افتهم شبيها سديتة منها ودكيت للجين
- لجين شبيها امي ليش تبجي
- ما بيها مشتاقتلك
- احجي شصاير
- ما صاير
- لا تخليني اتوسل بيج
- امير ما اعرف شكلك
- شصاير
- غزل
- شبيها دحجي عاد
- غزل شاكين بيها ذاك المرض
- ....
- امير تسمعني الووو
امير حبيبي التحاليل بعدها مثبت شي بس ديشكون
- يا سرطان منهم
- بالقصبات الهوائية واحتمال الرئة
- شوكت صار هالحجي
- قبل يومين عرفنا امها كالت عبالنا كحة عادية بس كامت تذب دم ويا كل كحة رايحين والتحاليل الاولية بينت شك بسرطان
- وين هي هسة
- بالمستشفى اليوم تطلع
- امير تعال وكون يمها اكيد هي محتاجة الك لا تقسي كلبك يا خويا ترة غزل متستاهل وطيبة وحنينة وما اذت احد فد يوم
- باجر راجع ابقي يم امي ولا تخليها تبجي خاف يرتفع ضغطها
- توصل بالسلامة ان شاء الله
سديت التلفون منها وانفجرت بالبجي لشوكت اظل اتعذب يا ربي لا تخليني افقدها مثل ما راح ابويا مني رحت حجزت رجعة للعراق عيوني مشافت النوم ما ادري شسوي ارجع وياها لو اعوفها خلص تواجه هالشي لوحدها كلبي ميت عليها بس عقلي يكلي لا كرامتك اهم
وصلت رحت سلمت على امي ولجين جانت بالدوام حجتلي كل شي صار ويا غزل اجتي لجين على صوتي ركضت وحضنتني جنت مشتاقلها هواية
مرحت لغزل مكدرت ما اعرف شبية
يمكن خايف لا انصدم بشي يخصها
اختي وامي يمها كل يوم اوديهم ويروحون تحاول لجين وياية حتى ماخذتلها صورة بدون ما تدري بس مشفتها لان اعرف راح اضعف اذا شفتها
رحت لشغلي ولطارق وكعدنا نسولف
بعد كم يوم جنت توني راجع من شغلي سمعت اكو احد يمنا بس معرفت منو يمكن الجيران يم امي
فتت اروح لغرفتي وصاحتني امي جانت ام غزل
- امير ابني شلونك
- الحمدلله شلونج
- الحمدلله
- اني اعوفكم على راحتكم
- غالية ام امير
- شلونة عمي
- زين عمك
- خير ان شاء الله
- مراح تسال عن غزل ؟
- من رخصتج عمة
- ابني اعتبرني دا اترجاك الوكفة الوكفتها النا ما اقدرها بجبل ذهب والله غزل تحبك ومن حبها وثقتها بيك سوت هيج وهي معترفة بغلطها بس اني السبب اني لازم اعتذر منك ومنها الي حصة جبيرة بالصار لوما تدخلي بكل شي جان هسة هي عندك وجان تارسين البيت جهال سامحوني انت وهي
- شنو اللي يتغير
- هي محتاجتلك صعب علية اكولها بس يمكن هاي اخر ايام الها الله اعلم
- خالة يكفي تبجين بس مدا اكدر اعذريني
عفتها ورحت لغرفتي لفيت راسي اريد انام من قهري وتعبي والنار الجواية تاكل بية
بين افكاري وخوفي عليها و قساوتي سمعت صوت امها تصيح وتبجي وامي وياها بعد رجلي متشيلني
كلت هاهية راحت وبعدني محاجي وياها
كمزت من فراشي ركضتلهم
كالتلي امي الحك لغزل متخربطة وحالتها خطرة
ما ادري شلون وصلت ليمها عمي جان يمها باوعتلها من شباج الغرفة
