#مئةجلدة1
Shahd Alsalman
اني امير عمري 30 سنة خلصت اعدادية صناعة ومكدرت اكمل برغم جنت متأمل ادخل كلية هندسة ميكانيك او كهرباء لان معدلي يسمح وجنت متعمد ادخل صناعة علمود هالشي بس الله ما قسملي صارت عدنا ظروف بالبيت وتوفى والدي وصرت المعيل لاهلي والحمدلله
يجوز بعدين اكدر اكمل لان هالحلم ميروح من بالي واتمنى احققة
اشتغل بمعمل حدادة بالاول جنت صانع و هسة اني اسطة وفتحت محل خاص بية والله رزقني بي
عندي 3 خوات الاصغر مني بسنة متزوجة
والوراها مخطوبة والصغيرة بعدها اعدادية
والدتي معلمة واتقاعدت بس انكسرت هواية بعد وفاة ابوية
كدرت اربي خواتي واشيل هالمسؤولية و اخليهم يتخرجون من احسن كليات ومقصرت بشي وياهم
وبقت الصغيرة دائما اشد عليها حتى تطلع معدل وحتى توصل
هي شوية متدلعة زيادة ولو شاطرة بس اضوج من دلال امي الها البنية لازم تخاف من احد حتى لا تروح زايد وكلش جنت اخاف عليها
واحبها بس تضوجني بتصرفاتها الطفولية
وهالدلال كلة لان هي مشبعت من بابا ولا اخذت حنان منة مثلنا فنحاول نعوضها ولو هو لو يبقى كل العمر ويانة هم ما نشبع منة
سبب وفاتة جانت جلطة دماغية مفاجئة مجنا حاسبين هالحساب ابد جنا نكول نكبر ويفرح بتخرجنا ويخطبلي ويزوج بناتة ويبقون هو وامي فوك راسنا طول العمر ويربون ولدنا مثل مربونا لكن الحمدلله على كل حال الموت اقرب لكل هاي الامنيات وقضى عليها والحياة برغم ما ماشية ومتوكف بس تظل غصة بكل مناسبة و بكل مرة نحتاجة بيها
الله يرحمة و ينطيني هالقوة حتى اكمل باللي بديت بي ويعوضني خير ويخليلي امي شمعة البيت و ضوة عيوني كلمتها هي التمشي وما اخليها محتاجة شي لان ما قصرت بيوم صارتلنا ام و اب وصديقة و ربتنا احسن تربية
وما قبلت تتزوج برغم حلوة وصغيرة ومعلمة يعني مناقصها شي وبعز شبابها بس كضتة علينا وكسرت ظهرها حتى لا احد يكول جهال سالم ما عرفت امهم تربيهم او ينتقدها بشي ولا خلت احد يتمنن علينا بفلوس او لبس او اكل
تتضايق وتحصر نفسها بس في سبيل منحتاج لاحد حتى لاهلها
وما قبلت تطلع من البيت بقت ببيتنا اللي اشتراه ابوية بتعبة وشغلة وبمساندة امي طبعا وباعت الذهب و اخذت ورثها من اهلها وتداينو لموها منا ومنا حتى البيت يصير ملكهم وصار والحمدلله
عندي اصدقاء من المنطقة ومن ايام الدراسة وولد عمامي اني محبوب والكل يعتمد علية ويسموني
ابو الوكفات ورثت هالشغلة من ابويا الله يرحمة
فاتحة عرس حادث تبرع دم اي شي يحتاجو اكون اني اول الناس واخر واحد يطلع من يمهم الا اخلي الكل راضي يالا ومطالب من احد اي شي حتى ما اريد يردوليا
اهلي متكونين من 5 عمام و4 عمات كلهم احبهم وبيبي وجدي عايشين ما تخلى من المشاكل حياتهم طبعا بس امي ما خلتنا نكطع بيهم ونزورهم دائما وهم همين نفس الشي مناسينة ابد لا بمناسبة لا بعيد لا بزيارات ..
