#مئةجلدة21
Shahd Alsalman
الحياة حلوة هنا كل شي بنظام ومرتب والناس كل واحد ما يتدخل بحياة الثاني بس كلها تتعاون ويا اي احد محتاج للمساعدة
شغل و دراسة وحياة ماشية الوقت عدهم مثل السيف واللي ما يلحك بي مستحيل يتقدم
صحيح اشتاق لاهلي بس مرتاحة هنا كل يوم اتصل بيهم ويتصلون بينا واختي ورجلها كلش حابين وجودي وياهم هم بغربة ويحتاجون احد يمهم مرات اشوف اسامة زوج ريمة يباوعلها بنظرات كلها حب وحنية حتى هي تحبة وادعيلهم دائما بالسعادة بس اشتاق لامير هواية صارو تقريبا عندي 5 مفكرات فوك القديمات اكتب بيهم كل شي امر بي واتمنى يكون امير بي وياية او اكتب خاطرة تمر على بالي لمن اتذكرة ولو اني ما انساه لحظة
اول فترة حيل تعذبت وتاذيت بس بعدها تعلمت الزمن كفيل بكل شي بس اكيد مراح ينسيني حبيبي
كالعادة كل يوم الصبح نكعد من وكت وريمة تحضر جهالها للمدرسة واسامة يطلع نظل نتناكر اني وياه ونتداهر ونتشاقة و يودع اختي ويروح
لو ابقى يم ريمة لو اروح لمحاضراتي حاولت الهي نفسي بالدراسة
جنا مكسلين بذاك اليوم والجو ثلج ينزل سويت كهوة وكابلنا الشباك نتفرج منة
- غزول تدرين حتطبين بالسنة الثالثة وانت هنا
- اي مثل لمح البصر بسرعة
- مشتاقيتي للعراق
- مرتاحة هنا بس يعني احن مرات
- باعي جاية عطلة واعياد واني كلش مشتاقة لاهلي خلينا ننزل للعراق اجازة شكلتي
- روحي انت والجهال واسامة
- لا نروح كلنا عاجبني نرجع نلتم كلنا مثل قبل
- ريمة ما اكدر
- علمود امير
- اي
- بس يعني مو ضروري تشوفي
- ريمة يكفي هو موجود وما اكدر اشوفة او اعرف بي يتنفس نفس الهوا الاتنفسة وما نكدر نتلاكى هالفكرة تذبحني لوما هالشي ليش اتغرب واطلع
- لشوكت تبقين هيج لو رايدج مو جان سامحج او جان اتصل بيج كل هالسنين
- السويتة وياه مو شوية
- لو حاطلج عقاب جان هسة خلص عقابج مرو سنين على هالموضوع اصحي على نفسج اصلا حتى تلكي متزوج وعايش حياتة
- ريمة ليش تقهريني
- غزولة مو اقهرج بس انت مدتشوفين نفسج شلون صايرة وشكد دتعزلين روحج عن هواية ناس وحتى مو مثل قبل لا ضحكتج لا فرحتج كل شي عندج ناقص
- مو بيدي اني احبة
- حبج هذا ما من وراه فايدة هو شاف حياتة وصار دورج انت هم تشوفين حياتج
- ريم انت تعرفين شي ؟؟
- شي مثل شنو
- امير تزوج !
- لا والله ما اعرف شي بس اكول ليش يعني ما حجة وياج ولا اهتملج كل هالفترة
- ما ادري
- لا تبجين غزولة اني مو قصدي اضوجج والله بس خايفة عليج والعمر يمشي وتبقين لوحدج منتظرة شي مجهول
- تدرين شكد مشتاقتلة كون هيج احضنة وما اعوفة ابد يا ريت مصار كل هذا
- خلص كافي حياتي مسحي دموعج
بقيت ابجي بحضن ريمة هي الوحيدة الفهمتني وحست بية بس دائما تكلي امير كلبة اسود اعرف هي تحاول تقسيني حتة انساه وكلما تكلي هيج ازيد بحبي الة مرات تكلي هالحب لعنة عبالك كلة بالعكس عندج يمشي ينساج وتذكري يكرهج وتحبي ممسامحج وتتمنين رضاه
بعد ما اجة اسامة تناقشنا بموضوع الاجازة واقتنعت انه انزل وياهم للعراق والجهال هم كيفو كلش رتبنا وضعنا و حجزنا بس مكلنا لاهلي اي شي
وحتى لا يظل بالهم واحنا بالطريق كنالهم عدنا صيانة للانترنت بهاليوم ومراح نكدر نتصل بيهم
وصلنا للمطار والحمدلله كملنا كل الاجراءات واخذنا تكسي هم جان الجو بارد بالعراق
والله ثاري الة وحشة العراق ولو ما تغير بي شي بس هو يبقى حلو
دكينا الباب على اهلي امي بعدها على نفس العادة تصيح منو مجاوبناها
بس اسامة كاللها خالة عدكم زبالة كالتلة لا رجعت اني دكيت الباب وهم عادها 3 مرات نسويها بيها تالي زهكت وفتحت الباب انصدمت وعاطت بين البجي والحضن والضحك كضيناها
جان بابا طالع فتنا كعدنا هو اجة سكتنا كلنا فخلينا امي تسوي نفسها تحجي ويانا بالتلفون هو اجة كال هاا ام ريمة تحجين وياهم من فات هم نفس الصدمة ركضنا علي وبوسناه هم خطية مشتاقلنا وكام يبجي رجعنا التمينا من جديد
كضينا اليوم كلة سوة رجعت لغرفتي القديمة باوعت كل شي بمكانة شلت مفكراتي الجديدة حطيتهم ويا القديمات هواية صارو شفت صورة الي والة من جنا مخطوبين وتذكرت شلون اخذناها ولان حلوة طلعناها مطبوعة دمعت عيوني ...
كالت امي روحو وسلمو على بيت جدكم اني مقبلت وراحو لوحدهم وكتلهم لا يكولون انه اني هنا بابا ما قبل كال عيب فاضطريت اروح سلمت ع الكل وكعدنا وياهم ايهم ابن ريمة قفل الا يريد يشتري كالتلي امة دخذي عليج الله واشتريلة كتلها اوكي اخذتة هو جان الصغير واني كلش احبة بي شبه مني هواية
رحت اخذتة وهو ديختار اليعجبة
طلعت من المحل طبكت سيارة مقابيلة جان لونها حلو فلفتت انتباهي نزل منها طفلة صغيرة و رجال
فجأة تذكرت كلام ريمة من جانت تكلي عاش حياتة واكيد تزوج او كون عائلة حسيت برجفة وكوة اجر انفاسي معقولة امير انت اتزوجت وهاي بنتك ما كدرت انتظر اكثر رحت قبل لا ينتبه علية بس واحد يطخني اطك بجي شلت ايهم وطرت بسرعة لبيت جدي سمعت اسمي جمدت
- غزل !!
انداريت و كوة لازمة نفسي ما اريد اشوفة يا الله وعيني على بنتة ردت اشوفها هم تشبهة بس اكيد تشبه امها لان ماكو شي منة بيها
- هلو امير
