زاوية منفرجة

٣

عارفه انه #للأسف ابونا 
انحنا حالنا كمان مع الناس حال ، حمدلله بس،
قومي اكلي هدي مسكينه ختت ليكي براا .. 
والله يا هند نفسي اتسدت ، اسمعي انتي حذيفه ما اتصل عليكي ؟
بري والله ، انا لو مكانو ما برجع البيت دا زاتو يا ريتني ولد ، وحات الله يا هدديل لو ما امي انا ما بقعد في البيت ، هي المصبرانا علي القرف داا ،
انا بكرة بشحن و بتصل عليهو ، انتي سامعة صوت رعد ؟ 
وووووب يا هديل وااي كان المطرة صبت الليله ، الله معانا 
ياخ يمكن ما تصب ،، ما تصب شنو من الظهر السما دي شايلا الله يستراا ، نسوي شنو اسي 
( انحنا بيتنا نصو مبني بالطين ، و الزنكي مخرم و نص الصالون شقف ، و ما عندنا عنبه من الحوش للغرف ، يعني عادي المويه بتخش لينا و عشان التراب بيبقي طين عديل ، فا المطر بالنسبه لينا كارثة )
عايني هند ، علي الضمان في شوالين في الزقاق بالكوريك نملاهم تراب من الحوش و نختهم عتبه ، و نسد الاخرام دي بالخرق ( القطع) ، والله يا هديل انا تعبانه وين الحيل للتراب ، بتهظري انتي ،ّ
يعني ننتظر لمن السيل يشيلنا ، من غير شي البيت ما ناقص عليكي الله قومي خلينا نتساعد ، اخير نتعب اسي تعب بي فايده ولا بكرة نغرف الموية من نص السراير ،، 
طيب يا هديل هي لسه ما مطرت ،، علي الصمان ، ننوم مرتاحين زاتوو ... المهم 
طلعناا كدا ، لقيت ابوي برااا ،، قالي تعالي هناا ، قلت ليهو نعم !
قالي جيبي باقي القروش 
قلت ليهو ياها الاديتا لامي ، لاني م اخدت راتبي كلو ، و غير كدا الباقي محتاجاهو مصاريف للجامعه ،، بس مسكني جراني من شعري ، قالي جامععه !!
جامعه يا بت الكلب ، انا مش منعتك منها شغاله بي راسك صح ، طااخ اداني كف ، قلت ليهو انا ما حملتك مسؤليه جامعتي ولا وحدة من اخواتي حملتك مسؤليتا 
انا جامعتي ما حخليها يا ابوي ، ياريتني لو جاريتو انا متعودة علي ضربو لي ،
لكن ما للدرجة دي ،، الصراحه انا بكره ابوي #شديد ،، اااي بكرهو ، بكرهو لدرجة  انتو ما تتخيلوها 
انا ما شفت منه حاجه حلوة طول عيشتي معاهو ، العادة الاولاد من يشوفو ابوهم جا من برا بيفرحو ، الا انا واخواني ، كنا بنكتئب ، لو الصحكة في وشنا مجرد م نسمع اسمو ولا صوتو ولا حتي قريب من البيت بنصر وشنا وكل وحدة بتخش غرفتاا ،،
انا عارفه ان كلامي دا غريب ، غريب شديد لكن دي الحقيقه ( ما حأسمح بتعليقات سلبيه او تدعو عليهو ف النهاية هو ابوي ).. 

هدي جات قالت ليهو ابوي ، صلي علي النبي ،، شنو يا غالي هديل دي عملت شنو زعجتك كداا ، و بقت تكورك فيني ،، ( يلا هدي دي الوحيدة البتفدر تتعامل مع ابوي بسياسه ، بتجاريهو و دايماً بتحسسو انها واقفه معاهو في اي كلام بيقولو بتأكد عليهو ، هي م مقتنعه بكداا بس شايفه ان دا حل كويس ، هي الوحيدة البتقدر تدخل في ابوي وتهديهو ، هسي من هي جات اتكلمت معاهو بسياسه وقف ضرب و سكت و بقا مركز في كلاما ،، من كتر ما بتجاريهو شويه شوية بقا بيسمع ليهاا ... ) ..
هند جرتني الغرفه وجرت جابت حلة التلج كسرت منها بيد الفندك ، و جابتا لي موية تلج كبتا لي في راسي لان نخرتي بدت ترعف .. 
( انا حكيت ليكم تفاصيل اليوم دا ، لانها دي بصراحه تفاصيل كل يوم ، كل يوم وحدة فينا ماخدة علقه من ابوي ، دا اذا ما كلنا..

روقتا شويه كدااا، و قمت عشان املا مع هند الشولات ، لقيتهم هي وهدي سغالين فيها ، جيت اساعدهم ، قالو لي عشان طويله اطلع اقفل فتحات الزنكي
.. اتساعدنا و أمنا قدرتنا علي البيت ،،
الساعه 10 بالضبط ، المطرة دي صبت ، رقدنا وبتقلب ، من صوت المطر النوم حلف م يجيني .. طلعت علي الحوش و رفعت يديني للسماء ، انه ييسر علينا و يصلح حالنا يا رب ..
و رجعتاا سريري لمن نمتا .. 
كان صباح الاربعاء ،، قمتا ، اول حاجه عملتها عاينت بالشباك علي الشارع كلو غرقان مستحيل نقدر نمشي ، شلت هم ،
كدا لا جامعه لا شغل ،، قلت شنو انا احسن اتصل علي دكتورة مني رغم انها شايفه الوضع بس لازم تعرف اني م حقدر اجي الليله ..
اتصلت عليها جرس كامل م ردت ،، استنيت شوية ، وتاني اتصلت قريب للاخر ردت .. 
*الو السلام عليكم دكتورة مني 
_ وعليكم السلام ( صوت جهور كدا ، صوت راجل) .. 
* اممم ااااااا انا اسفه شكلي اتصلت غلط
_لالا هو رقم دكتورة مني بس هي بعيده من التلفون 
*خلاص طيب بس استأذنك تقوليها هديل اتصلت و بتعتذر منك م بقدر اجي الشغل و اااااا ..... (سكتا ، سمعت صوتا بتكورك بتقول : ... شوف يا عمر انت راجلي ما قلنا حاجة بس دا ما بديك الحق تدخل في شغلي ، الناس دي مستواهم واو ، ودا اهم شي ، انا ما بقبل اشتغل مع ناس عادين حتي لو شغلهم احسن من ديل ، ديل صيتهم سابق و .. قاليها انتي عايشه حياتك دي غلط 
دا عالم وديل بشر ليه تحددي نوعيه الناس التحتكي بيهم ، و تتعاملي بالمظاهر يا مني و ..... 
استحيت صراحه الخط فاتح وشكلو م انتبه ، قفلتا انا من عندي ، و قعدتاا .. 

بعدها ، تقريبا بي ساعه ، امي قالت لي اللبسي حاجه انتي واخواتك ، طه جاي علينا ،، قلت ليها طه !! و جاي في

الجو دا ؟
قالت لي ايوة كان قريب مننا ، و ما قدر يرجع البيت الطريق واقف ، قلت ليها طيب ، اساساً
توبي جمبي .. 
اهاا بعدها بنص ساعه كداا ، جا
هديل و هند وامي مشو عليهم انا راقده في سريري بي توبي م اتحركتا ، جاتني امي ، قالت لي بدل راقده كداا ، تعالي سوي للولد دا شاي ، قلت ليها يمة هند و هدى جمبك ، تاني قلت ليها خلاص طيب بسويهو ( امي دي كان قالت لي قومي ولعي في نفسك بنفذ كلامها ، م بحب اتني ليها طلب ) 
م عارفه اليوم دا مالي كنت مسهية شديد كدا والمشكله سرحانه و م عارفه سرحانه في شنو ..
*كدي مسافه موية الشاي دي تغلي ، اديكم نبذه صغيرة عني* : 
بس في الحلقة الرابعه 👇

استككانة🍕~

يتبع .....