زاوية منفرجة

٦

وصلتا بيت دكتورة مني .. عاينت لقيت في عربيتين برا ، بتاعت دكتورة مني انا عارفاها لكن التانيه دي لا .. 
المهم خبطت الباب فتحت لي خدامة ( هي عندها خدامة تانيه للاكل و كداا و بتجي ايام معينه في الاسبوع ومرات ما بتجي اساساً الا الدكتورة تطلبا ) ..
سلمت علي ، قالت لي ادخلي .. لسه م عتبت رجلي البيت سمعت صوت دكتورة منوو ،، بتقوليها منو يا زهرة ؟؟
قالت ليها هديل ، قالت ليها خليها قبلاا ّالوقت دا انا دخلت بس جمب الباب ،، و الجلوس الكانت قاعده فيهو في راجلا عمر اليوم داك شفتو و معاهم مرة كبيرة كدا غايتو حسب استنتاجي ام زول فيهم ، جاتني و ما يجيكم شر ... 
_ خير يا هديل عايزه باقي راتبك ؟
*ازيك يا دكتورة ؟ انا جيت شغلي البجيهو كل يوم 
_الشغل دا علي كيفك ؟
*لالا يا دكتورة التزام ، معليش انا ممكن اكون اتاخرتا دقايق لكن غصب عني كنت في الجامعه 
_ ( فجلة الصوت علا) مليون مرة كلمتك لمن انتي ما قدر الشغل ما تجي ، ودا شنو الابساه داا ( جرتني من ربطة البلوزة الفي صدري)
انتي جايه حفله ؟
*انا اسفه بس الوقت ضايقني و م قدرت ارجع اغير 
_ البلوزة دي شفتها وين قبل كدا ؟
* ............... سكتا 
_اها ههههههه دي مش بلوزتي ! دفعتها ليكي انتي و اخواتك هه حلوة عليكي لكن م بتاعت شغل 
*قمة الاحراج قدام الناس ، اي فعلا هي دفعت لي هدوم و شلتها عشان ف الجامعه بحتاج غيارات لكن البلوزة دي ما منهم .. قلت ليها لا 
_ (تعابير الغشب ظهرت في وشها ) قالت لي انا بتزكر هدومي كوويس ، و ثم تانياً امس مالك ما جيتي ؟
*اتصلتا بي حصرتك و رد علي زوجك و وريتو .. 
_انتي بتشتغلي معاي و لا مع راجلي ؟
هنا راجلا اتدخل .. قاليها مني ، كفايه بهادل في البت فيها شنو لو اتدخلت دقايق و هي حرة تلبس الدايراهو هي م داخله شركة عشان تلبس ليكي ينفورم للشغل ، و فعلا هي اتصلت و نسيت م وريتك ،، رفع راسو وقالي ااتفضلي خشي ... 
ابيت اخش عاينت ليها ،، قالت لي خشي ، حتي خشيت ، طبعا اشتغلت بملابس زاتها و ضاعفت لي الشغل ، و ملابس نضيفه في الدولاب نزلتهم لي غسلتهم تاني و بيديني في الطشت رغم انه في غساله فلو اتوماتيك ، بس .. وانا بغسل في الحمام مقعداني لانو دا م زي بيوتنا ما عندها حوس الا برا البيت و زاتا جنينه كداا ، المهم الباب فاتح 
انا ما عارفه عمر راجلا داا الجابو شنو في الممر دا و شافني ، جا علي قالي :
_ الغساله جمبك !! بعلامات تعجب في وشو
*سكتا ، لو قلت ليهو مرتك حتفهم زي البفتن او حعمل مشكلة ، قلت ليهو انا حابه اغسل علي يدي 
_ مشا طوالي ،، 
و فجاه اسمع الكوراك ما يديكم الدرب في نقاش حاصل لكن عن شنو م بعرف ، بس من مكاني م قمتا رغم ان الاصوات وترتني شديد ..
حسيت بهزاز صوت تلفوني .. عاينت للشاشه لقيتا هنده اختي ،، قفلت فيها ،رجعت تتصل تاني ،، رديت ليهاا 
*هندويه حبيبتي برجع ليكي بعدين انا اسي ما فاضيه 
_ عندي ليكي خبرين يجننو 
*خير في شنووو ؟؟ 
_م اسي لمن تجي ....... م تمت كلاما كدا سكتت ، لانو دكتورة مني فجاه جات و بقت تكورك فيني كوارك بكلام اصلا نصو ما مفهوم و قفلت الخط .. قالت لي :
_ فوق م انك جايه متأخرة ، ولابسه لبس كيف كيف و اشتكيتيني لي عمر و كمان ماسكة التلفون و بتتكلمي و سايبه الشغل !
*انا اسفه ، ديل ناس البيت 
_اهلك لو قلقانين عليكي ما بجدعوكي تشتغلي في البيوت 
* اهلي انا ادري بيهم منك ، والحاجه التانيه انا م اشتكيت لزوجك 
_م اشتكيتي ليهو ؟ هههه تكذبي علي انا !
*لا م بكذب بس فعلا انا ما اشتكيت 

بس في جردل جمبي فيهو موية صابون كنت بمصمص فيهو الهدوم ، من غير مقدمات شالتو و رشتني ب المويه الفيهو وانا قاعده ، من الخلعه لمن شهقتا و اتبليت تماماً بقيت بس مخلوعه فيها ، بعاين فيها لمن مشت ..

( دكتورة مني ، هي دكتورة اطفال عندها عيادة في مستشفي المبرء ، عمرها 30 يعني قدر هند اختي ، محافظه كدا ومهتمة بنفسها لدرجه مشنياها ، حلبيه كدا و رقيقه ،، مرات كتيرة بحس سبب تعاملا الحاد معاي هو اني اجمل منها .. م غرور بس شكلي عن شكلها زي الزاوية المنفرحة مستحيل نتلاقا في نقطه تشابه...

استككانة😣~

يتبع .....