زاوية منفرجة

٢١

قاعده في ركن كداا و خاته راسي في رجولي , جاتني وحده قالت لي شكلك كداا بيقول انك مستجدة في الموضوع داا ، كدي وريني داا شنو الابساهو داا ، خبطتني في صدري لمن قمت ناطه ، لزيتا مني ، بس كيف و كيف الذها و وقعو فيني ضرب ساعتين وزياده ضرب و اسوء الالفاظ اللي ممكن تتخيلوها ، انا حأسوي شنو في حاله زي دي ؟ 
م لي غير رب العالمين ، اصبح الصباح واسوء صباح يمر علي ،، زي الساعه 10 كدا جو كروني ، قلت اكيد حياخدو لي حقي من الضرب الاتعرضتا ليهو ، بعد دخلوني غرفه التحقيق الاولى ، الزول البيحقق معاي طبعا قاعد وفي كرسين جمب مكتبو دايرة اقعد نهرني ، قالي اقيفي مكانك .. و جات دكتورة منى داخله و معاها وحدة م عرفتها .. تعاين فيني وتضحك ، قالت لي احسن تعترفي ولا عاجبك حالك ، والله دمي فار و بالجد انا في اللحظة دي كان ممكن اخنقا وانتهي من امرها للآخر .. قام قاليها ، مصرة ما تعترف شكلها عايزة زيادة علقه ، عاينت ليهو يعني الضرب دا كان متعمد ، 
قامت دكتورة مني فتحت شنطتا و طلعت موبايلي بلهفه دايرة امد يدي عليهو ضربوني في يدي ، قالت ليهو دا دليل طبعا لقيتو واقع في غرفتي جمب الدولاب ، قلت ليها انتي دايرة توصلي لشنو بالبتعملي فيهو داا ؟
اذا خايفاني اتكلم اطمني انا م ح اتكلم عن الشفتو بس طلعيني من هنا ، و وشي دا ما حتشوفيهو تاني ، قالت لي جدا بس بعد ترجعي الدهب ، قلت ليها انتي تكذبي الكذبه وتصدقيها !! ي دكتورة انتي مفروض تتعالجي ، تصرفاتك ما طبيعيه ، طبعا كلام زي دا مافي زول حيتقبلو و حتعتبرو اهانه رغم انه صح ، شالوني بالجر انتو متخيلين رجعوني نفس المكان و لنفس الناس ، لاحظو ان الكلام دا الصباح ، مسكوني دق تااااني 
، لمدة تلاته يوم انا محبوسه زي الكاتله رقبه ودق بعنف لدرجة ملامحي اتغيرت و لكم ان تتخيلو ،، تلاته يوم انا محبوسه لمن حيلي مات الموية بشربوني ليها بعد طلاع الروح ، يعني فوق وضعي وعيشتي تجي الانسانه دي اللي خجلانة اقول عنها انسانه ، تسوي فيني كدااا .....

( في جانب بيت د.مني)
زهرة جات قالت ليها ي دكتورة تلفونك كان جواا و رديت داا المحقق قال ضروري تمشي ليهو(ردت م بتقدر تقوليها ليه تردي و تبهدلا زي م بتبهدلني ) .. للحظ الجميل ، عمر كان قاعد بيشرب ف الشاي جمب دكتورة مني ، قال لزهرة محقق لشنو و دا منو ؟
زهرة قالت ليهو بخصوص هديل واللي حصل ، مني قامت هايجه في زهرة ، قالت ليها انتي منو اداكي الحق تواجي ( لانها عارفه عمر ما حيسكت ) .. و لمن انتبهت لنفسها انها كوركت في زهرة ، طوالي اعتزرت قالت ليها معليش دهرة اعصابي تلفانه الايام دي بسبب شغلي البقا شبه معدوم و ماف زول بجيني العيادة ،، عمر قاليها هديل وين ؟ 
سكتت .. قاليها يا مني هديل وين ؟ م تكوني عملتي الفي راسك يا مني ؟ ررردي م تسكتي كدااا ، البت دي مسكينه حرام عليكي ياخ ، انتي اليدخل حياتك الشوم دي تدمريهو ياخ انتي ليه قاسيه كدا ليه كعبه كدا ليه بتعملي كدا ياخ فارضة سلطتك علي اي زول ، كفايه انا لحد الان م قادر انسا #اليوم_داك ..
اسمعي وريني في ياتو قسم ردددددي علي ، ّقالت ليهو في (..) ..

طلع و ما اتفاهم معاها .. فعلا ساعتين او اقل عمر داا كان واقف مع المحقق .. 
طبعا نادوني وانا واقفه وراهو ما شايفني و مسنودة علي الحيطة ، سامعه كلامو ، قاليهو انت عندك دليل واضح يدل علي صحة كلام دكتورة منى ؟ قاليهو دا حسب طلبا و كلاما و دا امر جاي من فوق عن طريق الدكتورة ، قاليهو انحنا متنازلين عن القضيه الاصلا م بعتبرا قضيه ، و دار نقاش بينهم ،، 
قاليهو انا متاكد البت دي ما عملت كداا و من جواي كانت محيراني ثقتو الكبيرة فيني ، 
لدرجة قاليهو ممكن تحلف قسم ، لقيت نفسي بقوليهو ايوة بحلف، في اللحظة دي هو عاين لي وشاف منظري و الكدمات و وشي المورم،
وقف مخلوع في منظري ، قاليهو دا شنو العملتو فيها داا ؟ ّ
قلت ليهو انا دايرة اطلع من هنا ، طلعني نن هنااا ، انا م عارفه حال اهلي كيف وخصوصا امي لي اربعه يوم انا في المكان داا .. م دايرة حقي بس دايرة امشي عليك الله طلعني .. 
عاين للمحقق كدا بتوعد ، وكتب ليهو تنازل بدل د. مني .. ساقني طلع بي براا 
ركبني العربية ، وهو محتار بالحد منظري مقرف و مغزز شديد زي المانا ، البيقرف ما بيعاين لي شكلي دااا ..
قالي شوفي حسالك سوال ، قلت ليهو انا م شلت حاجه ، ومرتك عملت كداا عشان تتخلص مني و م عندي كلام زياده عن داا ، وديني البيت .. قالي م حقدر اوديكي البيت اهلك حيتخلعو ، امشي وين يعني ؟ 4 يوم م عارفين عني حاجه وحالتهم حتكون حاله ، قالي لو شافوكي كدا حيتخلعو زيادة .. قلت ليهو يتخلعو ويشوفوني حية احسن من يكونو فاهمين اني مخطوفه ولا ميتة ، يا استاذ عمر بالله عليك وديني انا قاعده بالقوة ضهري من الالم م قادرة ..
دور العربية و سايق حسب وصفي ليهوو 
قبل نصل البيت ، وقف العربيه و نزل جمب ماركت كبير ، نهائي م سألتو وانا شايفه الدنيا كلها طشاش في طشاش .. 
رجع شايل بارد و م عارفه كيس ملان

حاجات فتح لي علبة و اداني ليها ، دي م حاله اقول فيها لا المهم اصل بيتنا بأسرع وقت .. 

عشر دقايق بالساعه انا كنت في حلتنا ، فجأة وقف العربية ، قالي هديييييييل!!
بخلعه كداا ،، قلت ليهو نعم ! قالي انتي ساكنة في الحلة دي ؟ 
قلت ليهو ايووة ، خيييير .. و ياااادابك فهمت وحسيت بحجم الورطة الانا واقعه فيها ..

استككانة😣~~

يتبع .....