زاوية منفرجة

٣٢

بقت حياتي عبارة عن كومة من المشاكل محل ما اقبل انا ما بلقا الراحه ،،
بس الشكلة مدورة تجهزي لي اكل م بجهز ليكي وررر ، النقه و الكوراك ، دخلتا ، قلت ليهم براحه في شنوو صوتكم عالي هدى في شنوو ، هند مالك واقفه كدا ، بس مرة ابوي قالت لي انتي لمي لسانك يا صايعة يا ضايعة .. ايوااااااا 
دي منو الصايعه والضايعه ،قالت لي عارفة نفسك ، قلت ليها ااااا ، انا يعني ؟
قالت لي ايوااا ، طيب ، وررررزع كفتها ، الصايعه والضايعه دي انتي ، بس قامت دفرتني ، امي بقت تكورك يا هديل يا هديل خليها ، هديل خليها .. 
بس دفرة منها و دفره مني و مسكنا في بعض ، و وقعنا دق في بعض واخواتي قامو بالازم م قصرو معاي مسكناها عجناها ،، قلت ليها كل يوم انحنا مستعدين نديكي الجرعه دي شكلك بتحبي المرمطة ، امي يعدت تبكي و ضغطها علاا ، و ابوي جا داخل .. طبعا استلمتو شكاوي وزادت وختت في الكلام ، ابوي المصون ، زي م متعود قلع الحزام وداير يدقنا ، قلت ليهو هه علي الاقل كان تسألنا ،كدا خلاص حسمتا الشغله بقينا انحنا الغلطانين ، بس وقع فينا دق انا زحيت هند مننا عشان م تضرب ، وانا اكتر وحدة كنت بتكلم عشان يركز فيني و ما يضرب وحدة من اخواتي ،، امي بقت تكورك وتبكي بصوت علي لمن وقعت ، وقعت اااااااااخ
الله ما يوريكم شين في امهاتكم وقعت قدام عيونا ، بكت كوركت لمن وقعت بي تقلها في الواطة ومافي زول كان جمبها عشان يمسكا ، مشكلتي لمن بتخلع بفقد التصرف وباخد وقت لمن استوعب ما نبيهه وذهني ما حاضر في المواقف دي عاطفتي بتتحكم فيني اكتر ، بس لمن لقيت هدي وهند جرو عليها انا هنا فقتا ،و جريت الشارع حفيانه ،لمن وصلت الشارع الرئيسي بفتش في عربيه ، بالقوة لمن لقيت امجاد وقفة لي جبتها للبيت ،وطلبت من الولد شاب ، قلت ليهو ساعدني في شيل امي عليك الله ،، والله مسكين جراا قدامي وبقول لهند وهدي زحوو ، شالها براهو وابوي ومرتو واقفين زي الما حاصل حاجه ، واخواتي اللي لبست عبايه واللي لبست توب ، بس جرينا ورا الولد ، ركبنا ورقد امي في الكنبه ،ومشينا اقرب مستشفي ..
والله ما قصر معانا شال امي دخلا لينا لحد الطوارئ ، استلموها ونهائي م خلانا ، اي شي يطلبوهو كان بجري يجيبو ، ما شال ولا قرش ، ولحد اللحظة ديك انحنا م عارفين امي مالها، جاتني هند قالت لي هديل ، اسي لو لا قدر الله امي محتاجه علاج ولا شي عمليه بعيد الشر حنتصرف كيف ؟
قلت ليها فال الله ولا فالك كدي بس نعرف في شنو ، ربنا م بيناسنا م تشيلي هم ، قالت لي الساعه 12 الولد دا من 10 معانا عطلناهو من اكل عيشو .. 
مشيت عليهو قلت ليهو ، انحنا م عارفين نشكرك كيف يا ... ، قالي ، حسام ، قلت ليهو يا حسام اعفي لينا عطلناك و م عارفه اقوليك شنو بالجد لولاك انحنا م عارفين كان ممكن يحصل لينا شنو بقيت لينا اخو في امس اللحظات صحي ربنا بيوقف الناس للناس انا شاكرة ليك شديد وجميلك حيفضل في رقبتنا ، حق الام بفضل دين طول العمر .. قالي خلصتي ؟ 
قلت ليهو ، عارفه قليل في حقك ،، قام قعد علي رجولو قالي انا ما ماشي مكان انا معاكم لمن يخرجوها لو حتقعد شهر كفى الله الشر انا حقعد معاكم ، منتهي .. طبعا انا واخواتي عاينا لبعض واستغربنا ، هدى جات قالت ليهو يا حسام انت ما قصرت معانا والله والعملتو لينا كتير شديد ، اكيد عندك عيله تقلق عليك ، دنقر كداا و قاليها ، انا فقدت امي من بدري و م قدرت اساعده ، اسي امكم زي امي وانا ما حأمشي الا تبلغ الصحه ، انا ماشي اجيب ليكم موية .. وقام مشاا .. 
هدى قالت لي في كدا في الدنيا ؟ 
قلت ليها اسأليني دبل نفس خلعتي ، هند قالت ايوة لسه الدنيا بخير حمدلله ،، جا الدكتور ، سالناهو ،، قال هي كويسه حمدلله بس عضله القلب تعبانه شديد ، الظاهر عندها ضغط نفسي ودا غلط حاولو تهيئو ليها جو مريح ولو لاقدر الله اتكررت الوقعه دي ، حنتطر نعمل عملية دعامة في القلب ،وان شاءالله م نوصل المرحله دي ، اسي حتقعد معانا يومين و ان شاءالله تبقي تمام ، بالجد حمدنا ربنا كتير انه شافا لينا ، رغم ان الموضوع مؤلم بس وقعه امي كانت مؤلمة شديد والله تحرق القلب .. 
جا حسام ، بيسالنا وريناهو الوضع والحاصل كلوو ، قالينا طيب هي حاليا في العنياة وقعادهم حيكون في الحته دي صعب عليكم انتو بنات خلوني اوصلكم وبكرة تعالو بدري انا ببيت هنا داا .. 
الزول دا امرو غريب شديد ، بكمية الكفوف اللقيتا في حياتي م متخيله يكون ف انسان بالشكل داا .. قلنا ليهو بنقعد ،، اصرينا علي راينا ، بس والله م قصر معانا نهائي ، ونهائي م حسيناهو غريب مننا ..

جا اليوم التاني الظهر ، تلفوني رنة اساسا في جيبي من امس من رجعتي ديك بملابسي ، لقيتا وجدان بتتفقدني ما جيت الشغل ،، وريتا ظرفي والحاصل كله ، وانا بتكلم لاحظت لحسام سارح في هدى ، والبقرة ما جايبه ليهو خبر ، المهم قفلتا منها .. 
وبعدها بساعه اتفاجأتا بي أ.عمر و وجدان جونا ،والله ما اتخيلتها نهائي ، سلم علينا ، وهند من شافتو الدم جرا في عروقا وابت تمد يدها وهد

ى نفس الشي ،، حمرو لي والله حسيتهم حيكفتوني ،، 
ناداني أ.عمر علي جمب كداا .. قالي : قبلي كداا ، اتفلت وراي ، قالي لا قبلي ضهرك علي اخواتك ، قبلتا ضهري ، اداني ظرف ، قالي لي ولا كلمة ، عشان اريحك دا راتب تلاته شهور مقدم ، حالياً
انتي في حاجه ماسه للقروش دي ، وامك واخواتك محتاجين ليكي ،، قلت ليهو انا اساسا كنت جاياك في خدمة لحد المكتب بس ربنا علام الغيوب جابك لعندي .... 
جا علينا حسام ...

استككانة🚴¢~

يتبع .....