فـ اليوم التالي:
محمد صحي على صوت منبه..فتح عينه وقام دخل الحمام وطلع لبس واخد
مفاتيح العربيه ونزل..
*************************
كريم صحي دخل الحمام ..اتوضا وصلي ولبس وخرج..لقى ابراهيم قاعد فـ البلكونه بيقرا جرنال وبيشرب شاي بحليب..دخله كريم..
كريم:صباح الخير يا حاج
ابراهيم:صباح الخير يا شملول
كريم:حتى عالصبح غلط بردو يا حاج
ابراهيم:غصب عنك يا واد
كريم (بضحك):ايه دا؟؟ شاي بحليب
ابراهيم:ايه ماله مش عاجبك
كريم:بص بقا يا هيما انت لازم تشربها كلها علشان تكبر بسرعه
ابراهيم:وحياه ابوك
كريم:بهزر يا هيما..اومال ايه انا شباب وكنت بشرب 5 قهوه فـ اليوم
ابراهيم:دا كان زمان.. لما الواحد كان شباب
كريم:ما انت لسه شباب يا هيما
ابراهيم:كيمو حبيبي..عايز منك حاجه
كريم:قول يا والدي
ابراهيم:عايزك تجبلي شيكولاته بس من غير ما امك تعرف علشان هتقول السكر والحاجات دي غلط..بس دا سر بيني وبينك
كريم:ااااه..بس كدا من عنيا يا حاج
ابراهيم:بس اوعى تقولها وتعمل نفسك ناسي..حاكم انت شبه امك مسطول
كريم:الله الله..هنغلط تاني يا حاج..طب ايه رأيك بقا هقولها
ودخلت عليهم زينب..
زينب:تقول لمين يا كريم؟
ابراهيم:جاوب يا فالح
كريم:اسألي بابا يا ماما
ابراهيم(فـ سره):بقى بتدبسني يا ابن الـ...
زينب:ما ترد عليا يا ابراهيم
ابراهيم:ابدا يا ام كريم..دا انا كنت بقوله يجيبلي دوا صداع وقولتله ميقولكيش علشان متتخضيش عليا
زينب(بلهفه):طب انت كويس دلوقتي؟؟
ابراهيم:اه الحمدلله ..متتخضيش
زينب:طيب..انا هروح اشوف الي عـ النار..احضرلك الفطار يا كريم؟
كريم:لا شكرا يا ماما..هفطر هناك علشان اتأخرت ..يلا سلامو عليكو
زينب وابراهيم:وعليكو السلام
**************************
محمد دخل المكتب لقى فادي..
محمد:ازيك يا فادو؟
فادي:تمام..وانت ايه اخبارك؟
محمد:لا انا تمام اوي النهارده
فادي:احسن من اخر مره شوفتك فيها
محمد:اه الحمد لله
فادي:اه صح..المدير سأل عليك
محمد: هو المدير هنا ؟؟
فادي:ايوة
محمد:المفروض انه مش هيجي النهارده !
فادي:اهو اللي حصل .. يمكن جاي يخلص حاجه مهمه
محمد:ماعلينا .. بس عايزني ليه ..خير؟؟مش انت قدمتله ملف المناقصه بتاعه الشركه
فادي:اه..بس يمكن يكون عايزك علشان حاجه تانيه
محمد:يمكن ..هدخله
وراح محمد مكتب المدير..
**********************
محمد دخل على رشاد وقاعد بقاله كتييير..ورشاد كان معاه تليفون...
رشاد:اه تمام..خلاص خلص كل حاجه..مش مهم..اه بس مش عايزين خساير..ان شاء الله..مع السلامه
رشاد لـ محمد:اسف يا محمد سيبتك كتير
محمد:لا ابدا يا فندم..بس فادي قالي ان حضرتك عايزني
رشاد:اه فعلا..بص يا محمد..في سفريه طالعه لـ شرم الشيخ
محمد(بتعجب):شرم الشيخ!!!
رشاد:اه..هناك في افتتاح قريه..واحنا شركتنا ليها دور مهم هناك
محمد:يعني شريكه؟؟
رشاد:شبه كدا..هتعرف كل حاجه فـ وقتها..المهم انت لازم تطلعها
محمد:اطلعها؟؟انا!
رشاد:انت من اكفأ الموظفين هنا يا محمد
محمد:والله يا فندم شهاده اعتز بيها..بس مينفعش استاذ فادي يطلع مكاني
رشاد:استاذ فادي اعتزر مش هيقدر يطلع..لازم حد منكم وبما ان هو اعتزر فـ متضيعش فرصه زي دي يا محمد
محمد:طيب ينفع اخد وقت افكر يا استاذ
رشاد:براحتك..قدامك يومين ..علشان نلحق نظبط كل حاجه
محمد(وهو بيقوم):ان شاء الله يا فندم..تؤمرني بحاجه تانيه
رشاد:لا ..اتفضل على مكتبك
