سالي وملك قاعدين فـ الكاڤيتريا ..
سالي: فاضل كتير على المحاضره
ملك(وهى بتبص في ساعتها): حوالي نص ساعه
سالي: طيب..
ملك: مالك يا سالي؟
سالي: مـ انا تمام اهو يا لوكه
ملك: لا يا سالو مش تمام .. احكيلي مالك في ايه؟؟
سالي: والله مـ انا عارفه محمد ماله
ملك: ماله محمد يعني .. تعبان !
سالي: مش عارفه يا ملك مش عارفه
ملك: يابنتي انتو متكلمتوش ؟
سالي: لا بنتكلم عادي
ملك: لا اله الا الله .. طب فين المشكله؟
سالي(وهى بتعمل حركات عشوائيه بأديها): مش عارفه اوصفهالك ازاي .. يعني بحسه كدا دماغه فـ حتة تانيه خالص .. وبقا بينسى كتير .. دي وصلت لدرجه انه ينساني انا
ملك: ينساكي ازاي يعني !!
سالي: يعني مره يتفق انه هيجي ياخدني من الكليه وينسى ومره يقولي هيخرج وبعدين يقولي لا ومره يقولي لما اروح هكلمك وميكلمنيش .. (وعنيها دمعت) انا ابتديت احس انه مش بيحبني زي الاول
ملك(وهى بتطبطب على سالي): لا يا سالي ماتقوليش كدا .. دا انتي حياة محمد اللي ميقدرش يعيش بعيد عنها
سالي: طب اومال في ايه بقا ماله ؟
ملك: طب محاولتيش تعرفي او تسأليه ؟
سالي: حاولت كتير وكل ما اسأله يقولي شغل
ملك: طب ما يمكن شغل بجد وانتي فاهمه غلط
سالي: طب وقبل كدا مش كان بيشتغل نفس الشغل .. ايه اللي جد عنده
ملك(بـ حيرة): والله مـ انا عارفه اقولك ايه ؟
سالي(وهى بتمسح دموعها): ماتقوليش حاجه ويلا عشان نلحق المحاضرة
ملك: طيب يا حبيبتي واستهدي بالله كدا .. واكيد محـ....
سكتت ملك فجأه عن الكلام وعينها ثبتت فـ مكان ومش قادره تتحرك..
سالي : مالك يا ملك ؟؟
ملك : ........
سالي : يا ملك في ايه متنحه ليه ؟
ملك : مش عارفه .. حاسه كأني شوفت حد اعرفه !
سالي : طب مـ احنا شوفنا ناس كتير هنا نعرفهم ايه الجديد ؟؟
ملك : بس اللي حاسه اني شوفته مش اي حد
سالي : مش فاهمه .. انتي شوفتي مين بالظبط
ملك : ولا حاجه .. تلاقيها تهيؤات .. يلا احنا عشان نلحق المحاضره
سالي : يلا
…………………………………………………….
محمد قاعد فـ مكتبه وسمع الباب بيخبط وبيرفع راسه يشوف مين وقبل ما يتكلم ..
هَنا : ازيك يا محمد ؟
محمد : انسة هَنا !!
هَنا : ياريت تبطل " انسه " دي وتقولي هَنا زي مـ انا بقولك يا محمد
محمد : انسه هَنا انا مقدر....
هَنا(وهى بتقاطعه) : تااني .. انسه تاني
محمد:.....
هَنا(وهى بتقعد) : عموماً انا مش هاخد من وقتك كتير .. (وهى بتمد ايدها لـ محمد) الملف دا انا مش فاهمه فيه حاجه .. تقريبا الاوراق اتلخبطت !
محمد : طب استأذن حضرتك فـ الملف كدا
هَنا : استأذن حضرتك !! على فكرة انا مش كبيره اوي كدا
محمد : دا احترام لـ حضرتك
Oh my god هَنا:
محمد سكت ومش عارف يرد فـ اللحظه اللي دخل فيها فادي المكتب..
فادي : وانا اقول المكتب منور ليه
محمد : في ايه يا فادي
فادي(وهو بيبص لـ هَنا ) : مفيش .. بقول ان المكتب منور بس
محمد : طيب هدّي الڤولت شويه عشان ماتضربش .. وحضرتك يا استاذه هَنا سيبيلي الملف هراجعه وابعته لـ حضرتك
