بعدت ليه ؟؟

الحلقه الرابعه عشر

محمد داخل المكتب وبيغني ومخدش باله ان فادي قاعد..

محمد : انا وحبيبي .. دُقنا حلاوه الحب كله في يوم وليله .. في يوم وليله
فادي : وكان طعمه حلو ولا مالح ؟
محمد : يا ساتر .. طب كُح ولا اعمل اي حاجه
فادي : يابني انت اللي داخل .. بس ايه الروقان دا
محمد : بس ايه رأيك ؟
فادي : في ايه بالظبط ؟
محمد : في صوتي
فادي : صوتك دا مايتسمعش اساساً .. بس ايه التغيير دا .. اللي يشوفك امبارح مايشوفكش النهارده
محمد : الحمد لله .. دا انا حاسس اني في حلم
فادي : خير قولي حصل ايه ؟

ويرن تليفون المكتب ويرد محمد..

محمد : الو .. ايوه يا استاذ رشاد .. تمام

وقفل محمد التليفون بأستعجال..

محمد : يلا قوم بسرعه
فادي : في ايه ؟
محمد : استاذ رشاد عايزنا
فادي : بخصوص ايه ؟
محمد : هنروح وهنعرف بس بسرعه

ملك صحيت من النوم حاسه بدوخه وماسكه راسها .. بتحاول تقوم مش عارفه .. حاولت تتساند على السرير لحد ما قامت وموبايلها بيرن بتحاول يكون صوتها طبيعي..

ملك : الو
سالي : انتي رخمه
ملك : ليه بس كدا
سالي : انا قولت انتي هتسألي عليا وانتي ولا معبراني
ملك : حقك عليا يا حبيبتي .. المهم اخبارك ايه ؟
سالي : انا تمام اوي .. وفرحانه اوي
ملك : ربنا يفرحك
سالي : مش متخيله اللي محمد عمله يا ملك
ملك : انا قولتلك انه بيحبك وقولتلك اصبري
سالي : يعني بمجرد ما يجي يحدد معاد الخطوبه مع خالتو هيكون كلها فتره وابقى مراته .  انا مش متخيله
ملك : يا حبيبتي انتوا الاتنين تستاهلوا كل خير
سالي : حبيبتي ربنا يخليكي ليا .. انا مش عارفه من غيرك كنت هعمل ايه !
ملك : ربنا مايحرمنيش منك ابدا
سالي : طب مش هنخرج بقا
ملك : عيوني يا حبيبتي
سالي : خلاص نززل على 2 كدا ايه رأيك ؟
ملك : تمام
سالي : يلا يا حبيبتي سلام
ملك : سلام

قفلت ملك مع سالي وحاطه ايدها على دماغها وتعبانه ومش عارفه ازاي هتقدر تخرج كدا..

ملك (لنفسها) : طب اعمل ايه .. لو كنت رفضت كان ممكن تجيلي وتشوفني بالحاله دي .. طب اعمل ايه ف الدوخه دي .. احاول اخد دوا واشرب حاجه ويارب افوق شويه..

قامت ملك تاخد دش وقالت يمكن دا يخفف من تعبها شويه

كريم قاعد في البلكونه وسرحان في ملك .. نظره الحزن اللي في عنيها مش بتفارق خياله .. نفسه يشيل عنها كل الحزن دا .. نفسه يدخل حياتها وتكون هى جزء من حياته .. افكار كتير شاغله باله ويقطع حبل افكاره دخول ابراهيم..

ابراهيم : قاعد لوحدك كدا ليه يا ولد ؟
كريم : اهلا يا حاج .. اخبار صحتك ايه دلوقتي ؟
ابراهيم : الحمد لله .. ماقولتليش قاعد لوحدك ليه ؟
كريم : لا عادي يا حاج
ابراهيم : ايه اللي شاغل تفكيرك
كريم (بأبتسامه) : ولا حاجه يا بابا
ابراهيم : ما تخلص وتقول في ايه يا ولد وانا هتحايل عليك ولا ايه
كريم : ما كنت كويس من شويه يا حاج انت بتقلب فجأه ليه بس
ابراهيم : قصدك تقول ان انا مجنون ؟
كريم : وانا اتكلمت
ابراهيم : ما هو دا اللي ناقص كمان تتكلم وانا قاعد
كريم : انا اسف جدا انا هسكت اهو
ابراهيم : ولما تسكت اقعد انا اكلم نفسي عشان الناس تقول عليا مجنون
كريم : لا اله الا الله
ابراهيم : كمان مش طايقلي كلمه
كريم : ايه يرضيك يا حاج .. قولي بس ع اللي يرضيك
ابراهيم : قالك القل .. انا قايم اروح اقعد مع زوزو .. هى اللي هتفهمني .. يا زوزو