سالي ومحمد قاعدين في كافيه..
سالي : يااه يا محمد .. بقالنا كتير مخرجناش مع بعض
محمد : وانتي بقالك كتير وحشاني
اتكسفت سالي وحطت وشها في الارض..
محمد : ووحشني كسوفك
سالي : محمد بس
محمد (بيقلدها) : محمد بس
سالي : بلاش رخامه وقولي .. ايه الموضوع اللي عايزني فيه ؟
محمد : النهارده في حفله عاملها صاحب الشركه عندي
سالي : وفيها ايه .. جاي تقولي انك هتروح يعني .. عادي على فكره مافيهاش مشا...
محمد (بيقاطعها) : بس بقا افصلي شويه .. ايه راديو
سالي : اصلك بتتكلم في موضوع غريب
محمد : هو انتي سمعتي باقي الموضوع عشان تقولي غريب ولا مش غريب
سالي : طيب .. كمل
محمد : عايزك معايا
سالي : معاك فين ؟
محمد : معايا في الحفله
سالي : بصفتي ايه ؟
محمد : يعني ايه بصفتك ايه ؟
سالي : يعني ايه صله القرابه اللي بينا .. هدخل معاك ولما حد يسألك عليا هتقوله ايه ؟
محمد : مالك يا سالي .. انتي ناسيه اني بحبك
سالي : واي حد هتشوفه هتقوله دي اللي بحبها ! .. شايفها مقنعه
محمد : قصدك ايه ؟
سالي : قصدي انه مش هينفع يا محمد .. احنا قدام الناس مافيش بينا حاجه .. وصدقني مش هينفع
محمد : ماينفعش ليه بس ؟
سالي : تحب اعيد كلامي تاني ؟
محمد : مالك مقفلاها ليه ؟
سالي : انا مش مقفلاها .. انت قبل كدا لما كان بيحصل بينا مشاكل كنت بتقول ان عقلي صغير دلوقتي انا بكبر عقلي وبتصرف بحكمه والعقل بيقول انه مش هينفع
محمد : وانتي مفكرتيش فيا
سالي : مين قال كدا .. انا رفضي اجي دا عشانك .. عشان محدش يحرجك .. وصدقني لو كان بينا حاجه كنت هوافق
محمد : بسيطه .. تحبي نلبس دبل دلوقتي
سالي : محمد متهزرش
محمد : انا مابهزرش تحبي تشوفي
سالي : ماتنساش اني ليا اهل و على الاقل تطلبني منهم .. ولا انت فاكر ان بعد اهلي ما ماتوا ماليش اهل
ودمعت عين سالي ومقدرتش تمسك نفسها وابتدا صوت عياطها يعلى..
محمد : بس يا سالي اهدي .. كل دا عشان قولتلك على حفله .. تغور الحفله وماشوفش دمعه في عنيكي .. مابحبش اشوفك كدا .. مع اني بحبك في كل حالاتك
ضحكت سالي من بين دموعها..
محمد : خلاص ياستي .. هتنازل انك ماتجيش معايا الحفله دي .. وهستنى لحد ما طنط فاطمه تيجي بالسلامه عشان اطلبك منها ومش هسمع صوتك تاني في انك ترفضيلي طلب
سالي : نفسي ابقى معاك علطول
محمد : هيحصل صدقيني .. بس قولي ان شاء الله
سالي (بأبتسامه) : ان شاء الله
كريم قاعد في مكتبه وعينه في اوراق قدامه سمع الباب بيخبط وفي حد بيدخل..
لؤي : صباح الفل يا كيمو
كريم : صباح النور
لؤي : اخبارك ايه ؟
كريم : انت كويس يا لؤي؟
لؤي : مـ انا تمام قدامك اهو
كريم : لا يابني انت اكيد مجنون .. اللي يشوفك قبل كدا مايشوفكش دلوقتي .. ايه سر التغير المفاجئ دا ؟؟
