كريم قاعد في البلكونه سرحان وتفكيره مشغول ..تدخل عليه زينب..
زينب : مالك يابني .. قاعد كدا ليه ؟
كريم (بأنتباه) : هاا .. لا مفيش يا ماما
زينب : هو ايه دا اللي مفيش .. لا شكلك بيقول في وفي كتير كمان هو انا مش عارفاك !
كريم : بفكر في الشغل
زينب : شغل .. ومن امتاا الشغل بيعمل فيك كدا .. اوعى تكون يا كريم بتحب
كريم : بحب !!
زينب : يااريت يابني .. انا لو عليا نفسي افرح بيك النهارده قبل بكره
كريم : ربنا يسهل يا امي لسه شويه ع الموضوع دا
زينب : وشويه ليه .. تحب اشوفلك عروسه
كريم : عروسه ايه بس يا ماما
زينب : ايه يا واد وفيها ايه .. دا انا حاطه عيني على كام وحده انما ايه .. ستات بيوت بصحيح
كريم (بضحك) : وحده ايه وبيوت مين .. لا يا امي مش وقته
زينب : امال ناوي تفرحني بيك امتاا
دخل ابراهيم عليهم..
ابراهيم : تفرحي ب مين .. ب دا !!
كريم : الله .. وليه كدا بس ا حج
ابراهيم (وهو بيقعد) : يعني بذمتك وانا راضي بذمتك مين هيبص لـ واحد زي دا ؟
كريم : انا يا حج !
زينب : يووه .. دا كلام يا راجل .. دي الف وحده تتمنااه
ابراهيم : ولا الف وحده ولا الف نمله حتاا
كريم : نمل ايه يا حج هو انا بتاع قصب !!
ابراهيم : دا انت محصلتش كمسري
كريم : هى حصلت الغلط يا حج
زينب : يا خويا ماتقولش كدا ع الواد .. دا دكتور أد الدنيا كلها
ابراهيم : بلا خيبه .. دكتور ايه دا مش عارف يعالجلي سناني
كريم : لا اله الا الله .. هو انا بتاع سنان .. يا حج والله انا ما دكتور سنان
ابراهيم : اومال دخلتك الطب وصارف عليك دم قلبي عشان تمسكلي السماعه وفرحانلي بيها ..
كريم : فرحانلي !! طب يا حج تشكر لزوئك
كريم بيقوم وقفه صوت ابراهيم ..
ابراهيم : رايح فين يا واد !
كريم : رايح اجبلك معجون سنان عشان سنانك يا حج
زينب : كدا يعني يا ابراهيم تقول الكلام دا للواد
ابراهيم : هو بيحس ابدا
زينب : دايما قط وفار انت وهو .. بس هو يعزك اوي يا حج
ابراهيم : ولا انا عندي اغلى منه يا ام كريم
……………………………………………………………………
ملك قاعده في اوضتها سرحانه .. بتفكر في اليوم اللي شافت فيه عمرو اللي من بعده ماقدرتش تروح الكليه فتره.. مش مصدقه انه رجع تاني مش مصدقه انها هتشوفه كل يوم زي زمان .. زي ما هو ماتغيرش .. كل اللي كان بيشوفوا كان بيقول انه اتغير او بقا مغرور او احلو او او او .........
بس هى مافرقش كل دا معاها .. ماسمعتش كلام حد غير قلبها لما قالها ان قلبه لسه زي ماهو وماتغيرش .. شايفه في عيونه لمعه وكبرياء .. لسه زي ماهو كل حاجه فيه زي ما هى لون عينه البني فاتح اللي بتعشقه .. بشرته الخمريه .. وشعره لما بيرجعه ورا بايده لما ينزل على عنيه .. وضحكته اللي بتسحرها .. وحتاا قريفته الصبح زي ماهى .. فاكره كل حاجه ومقدرتش تنساا ولا حاجه سرحت فيه و ف ملامحه الهاديه وافتكرت وهم صغيرين لما كان بيدافع عنها وهم صغيرين وكلامه ليها وحتا خناقهم .. فاكره كل حاجه زي مايكون حصلت امبارح وابتسمت..
خرجت من سرانحها على صوت رنه موبايلها..
