ملك قاعدة بتفكر .. حاجات كتير شاغله تفكيرها .. مشاكل سالي مع محمد اللي لسه متخاصمين .. وتعب والدتها اللي بقا بيكتر الايام دي واهمها احساسها انها بتلمح حد تعرفه وبيختفي فجأه..
سعاد : ملك .. يا ملك
ملك (بتقوم من مكانها بسرعة ) : ايوة يا ماما .. اعملك حاجه
سعاد : لا يا حبيبتي .. كنت جايه اطمن عليكي
ملك : يا حبيبتي انا كويسة .. ارتاحي انتي بس بقيتي تتعبي كتير الايام دي
سعاد : لا يابنتي .. انتي مابتروحيش كُليّتك ولا بتذاكري وقاعدة معايا علطول .. كدا ماينفعش لازم تشوفي مستقبلك
ملك : يا ماما اطمني انا كويسة ومذاكرتي تمام المهم اشوفك بخير
سعاد ( بتكح ) : ربنا يكرمك يابنتي
ملك : ماما انتي بتاخدي الدوا فـ مواعيده وشكله مش بيجيب نتيجه
سعاد : لا انا بتحسن
ملك : مش باين يا ماما .. طب اعملك حاجه ؟
سعاد : لا انا داخله ارتاح شوية وهبقى كويسه
ملك : طب اجي اساعـ..
سعاد ( بتقاطعها ) : لا خليكي انا هقدر
قامت سعاد وملك قلقانه عليها وحاجات كتير شاغله تفكيرها و فـ وسط تفكيرها رن موبايلها..
ملك : الو .. انا تمام انتي عامله ايه ؟ .. لا انا صوتي عادي .. صدقيني يا سالي تمام .. ماما بس تعبانه شوية .. تمام مستنياكي .. سلام
قفلت ملك مع سالي وحاولت تذاكر وترتب ورقها وقبل ما تبدأ راحت تطمن على مامتها .. خبطت محدش رد دخلت الاوضه لقت مامتها عـ الارض..
ملك (بخضه) : ماما .. يا ماما فوقي يا ماما
سعاد مش بتتحرك ولا بترد قلق ملك ذاد حاولت تفوقها اكتر..
ملك (بعياط) : يا ماما قومي فيكي ايه ؟
جريت ملك على اوضتها خدت موبايلها واتصلت ب سالي..
ملك : الحقيني يا سالي .. مش عارفه ماما مالها !!
محمد قاعد فـ المكتب ومش مركز فـ حاجة ولا مركز مين دخل المكتب وقعد قدامه..
هَنا : هفضل قاعدة وانت مش واخد بالك كتير كدا
محمد (بأنتباه) : أنسه هَنا !
هَنا : مش كل مرة هقولك اسمي هنا بس .. وبعدين مالك كدا بقالك كام يوم مش تمام
محمد : وعرفتي ازاي اني مش تمام
هَنا : باين عليك يا محمد .. قولي بجد مالك في مشاكل عندك ؟
محمد : لا هو بس الشغل كتير
هَنا : لا مش حكايه الشغل الكتير .. اكيد في حاجه تانيه
محمد (حط ايده على وشه بتعب ) : لا مفيش حاجه
هَنا : طب جرب واحكي يمكن تلاقي حل لمشكلتك
محمد : مشكلتي .. عملتيها مشكله خلاص
هَنا : يبقى خلاص استنى معاد الغدا ننزل البوفين نتغدى وتحكيلي .. هستناك
وخرجت هنا من غير ما تسمع رد محمد وهو مستغرب ورجع لـ حيرته تاني وبيفكر فـ مشكلته مع سالي..
كريم فـ البيت بيلبس ونازل شاف ابراهيم قاعد..
كريم : تصدق واحشني يا حاج
ابراهيم : وحش لما ياخدك يا واد
كريم : هو انت مش ابويا وانا ابنك .. انا ابتديت اشك فـ الموضوع دا
ابراهيم : ابو مين وابن مين .. دا اللي يشوفنا يقول ان انت اللي ابويا
كريم : هذا الشبل من ذاك الاسد يا والدي
ابراهيم : قصدك هذا الارنب
كريم : لا حول ولا قوه الا بالله .. طب انا نازل رايح الشغل بقا وابقى صبحلي على ماما
زينب (جايه من المطبخ) : صباح النور يا حبيبي
كريم : صباح الخير يا ماما .. انا رايح الشغل
زينب : طب مش تفطر الاول
كريم : معلش يا ماما مستعجل .. سلام
زينب : مع السلامه يا حبيبي
ابراهيم : حبيبك
زينب : هتفضل ناقر ونقير انت وهو
ابراهيم : بس بالرغم من دا بحبه .. دا ابني الوحيد .. ربنا يعينه
زينب : انت كويس يا ابراهيم !
ابراهيم : كويس يا ام كريم .. ماتقلقيش
زينب : طب ادخل ارتاح شوية
ابراهيم : حاضر .. هدخل ارتاح
