بعدت ليه ؟؟

الحلقه الثالثه عشر

كريم بيتابع حاله وواقف معاه لحد ما لؤي جاله..

لؤي : كريم خلصت ؟
كريم : الناس تقول صباح الخير .. صباح النور .. اي صباح يقابلك
لؤي : ماتهزرش يا كريم .. عايزك
كريم : خير في حاجه
لؤي : خلص الحاله اللي معاك وانا مستنيك في الكاڤتريا
كريم : خلاص تمام .. روح وانا جاي

مشى لؤي من غير ما يرد على كريم وكريم واقف مكانه مستغرب..

كريم (لـ نفسه) : هو ماله في ايه !!

وكريم واقف رن موبايله..

كريم : الو .. ايه يا محمد .. لا انا تمام .. ناوي على ايه يابني .. اكيد مصيبه من مصايبك .. يابن الايه وهتعمل كدا بجد .. خلاص انا معاك في الموضوع دا .. اشوفك على 3 كدا .. يلا سلام

وقفل كريم وهو مش مصدق فكره محمد ومستني يشوف هيحصل ايه..

محمد قفل موبايله وهو قلقان وخايف من اللي هيعمله بس شاف ان دي انسب طريقه يحل بيها مشكلته هو و سالي .. ودخلت عليه هَنا..

هَنا : الملف دا ناقص يا محمد
محمد : ايه يا هنا .. صباح النور
هَنا : انا بتكلم بجد .. الملف دا اوراقه ناقصه
محمد : ملف ايه دا !؟
هنا : ملف المشروع اللي كان عندك امبارح
محمد : ايوه طب هو ناقص ليه مـ انا متمم عليه امبارح

وجه فادي دخل المكتب شافهم واقفين بيتكلموا ملامحه اتغيرت شويه..

هنا : طب يعني الاوراق اختفت ولا ايه ؟
فادي : اوراق ايه اللي اختفت
محمد : الملف اللي كنت شغال فيه امبارح يابني
فادي : اه مـ الاوراق على مكتبي اهو
هنا : مكتبك !!!
محمد : بتعمل ايه عندك يا فادي ؟
فادي : تقريبا كانت مش جوه الملف .. يعني زي ما تقزل كدا وقعت
هنا : وقعت .. ايه اللي وقعت !!
محمد : ولا حاجه خلاص .. كدا الملف كامل تمام
هنا (بتاخد الملف من محمد) : تمام .. اه بالنسبه لـ اللي اتفقنا عليه !!
محمد : النهارده ان شاء الله وربنا يستر
هنا : ابقى طمني يا محمد .. انت عارف لولا اني عارفه ان وجودي هيسبب مشكله انا كنت هبقى موجوده
محمد : من غير ما تقولي انا عارف .. وهبقى اطمنك

ابتسمت هنا لـ محمد وخرجت وفادي مستغرب من الموقف..

فادي : اتفاق ايه دا يا محمد !
محمد : خليك في نفسك يابني .. وشوف شغلك
فادي : بس الانسه هنا مهتمه بشغلها اوي
محمد : اه طبعا .. وخصوصا الملف اللي اوراقه وقعت
فادي : يعني ايه ؟
محمد : يعني الاوراق اللي اخدتها حجه عشان تتكلم معاها وهى ولا حطاك في دماغها دا قديم
فادي : هو انا كنت مفقوس اوي كدا
محمد : يابني طبعا انا بس اللي مرضتش اخلي شكلك وحش قدامها
فادي : مش بتحب تتعامل معايا
محمد : عشان اسلوبك يا عم فادي .. غير طريقتك شويه وهى هتتعامل معاك
فادي : اغير طريقتي يعني ايه ؟
محمد : لا دا موضوع طويل خلينا في الشغل دلوقتي
فادي : تمام .. خلينا في الشغل