بعدت ليه ؟؟

الحلقه الخامسه والعشرون (الاخيره)

سالي داخله من باب الكليه .. لابسه تيشيرت كحلي وبنطلون اسود وطرحه سودا ولاول مره ماتهتمش بنفسها وكان وشها حزين وباين عليها الزعل..
شافها عبد الله .. ناداا عليها اكتر من مره ماردتش عليه استغرب من اللي هى عملته وراح الترابيزه بتاعه الشله..

محمود : مالك يا عبد الله ؟

وقبل ما يرد عبد الله جيه عليهم عمرو وكان شكله متغير ومتضايق..

محمود : مالك يا عمرو انت كمان .. هو انتوا النهارده مالكوا في ايه !!
عمرو : تعالى ا عبدو
عبد الله : في ايه ؟
عمرو : تعالى يا عم عايزك

ومشي عمرو وعبد الله راح وراه..

عبد الله : مالك يا عمرو في ايه ؟
عمرو : مخنوق يا عبدو .. مخنوق اوي
عبد الله : طب اهدا بس وتعالى نقعد في اي حته

عبد الله اخد عمرو وراح قعد على ترابيزه بعيده عن صحابهم..

عبد الله : قول بقا في ايه ؟؟
عمرو : ملك
عبد الله : ملك !! مالها ؟
عمرو : مابتجيش بقالها كتير والامتحانات قربت
عبد الله : وانت من امتاا مهتم بـ ملك بتيجي او لا او بتحضر ولا مابتحضرش !! .. وكمان انت مش مرتبط بـ مريم وهتخطب !!
عمرو (بتنهيده) : مريم مش بتحس .. حاسس ان ناقصها حاجات كتير
عبد الله : والحاجات دي موجوده في ملك مش كداا

سكت عمرو وماعرفش يرد .. حاسس ان كلام عبد الله صح وفي نفس الوقت مش قادر يحدد هو عايز ايه ولا عايز مين..

عبد الله : عمرو انت مش بتحب ملك ولا بتحب مريم
عمرو : لا ماتقولش كدا انا بحب....
عبد الله (بيقاطعه) : اسمعني يا عمرو .. انت حبيت في مريم دلعها وجمالها وانوثتها .. مش هنكدب على بعض .. لكن ملك انت عاجبك اهتمامها وانها بتستحملك وقلبها عليك ومكلفتش نفسك انك تتعب شويه وتشوفها بنظره تانيه .. انها بتحبك وعندها استعداد تيجي على كرامتها اكتر من كدا علشانك .. مش بقولك الكلام دا عشان تحبها عشان انا واثق انها بالنسبه ليك ولا حاجه
عمرو : آآ .. انا مش عارف اقولك ايه .. يمكن يكون كلامك صح بس انا مش عارف
عبد الله : انت مش مش عارف انت تايه .. مش عارف انت عايز ايه .. مش قادر تحب مريم وهى ناقصها الاهتمام بيك ولا قادر تتقبل ملك وهى من غير جمال من بره .. انت عايز كل حاجه ومش قادر تتقبل حد وهو ناقص .. بتدور على حاجه كامله ودي استحاله تلاقيها يا عمرو
عمرو : انا اخدت قرار واستحاله ارجع فيه خلاص..
عبد الله : وايه هو ؟
عمرو : مش مهم دلوقتي .. بس انا عايز اعرف ليه ملك مابتجيش .. انا حاسس ان فيها حاجه
عبد الله : والله ماعرف .. انا حتاا شوفت سالي ناديت عليها ما....
عمرو (بيقاطعه) : بتقول مين .. سالي .. شوفتها فين !!
عبد الله : عند باب الكليه بعدين شوفتها رايحه مبني شئون الطلبه .. ماعرفش مالها
عمرو (بيقوم) : طب يلا قوم تعالى بسرعه

قام عمرو راح ناحيه المبني ووراه عبد الله دور على سالي شافتها واقفه عند جدول الامتحاانات راح ناحيتها ..