بعد مارجعنا للبيت الكل تعبان
خالاتي اثنين من اهل العمارة باتو يمنا هم يصيرون بنات خالة امي بس امي لان ماعدهة خوات عادتهم خواتهة وكعدو يحجون بالعرس والعروس ظلت وحدة منهم مركزة وياي وكل شوي تصخرني بشغلة واكوم اجيبهة اخر شي فرشتلهم وجبت بطانية اضافية جانت مرة جبيرة كالت فدوة حبيبة غطيني..
واني دا اغطيها باستني من خدي..
ربي يوفقج ويخليج ويرزقج باابن الحلال الي يهنيج كالتها بحسرة بس استحيت حيل منها وامي رأسا ردت
عيني ام حيدر يازواج خلي البنية مركزة بالدراسة مالتها اريدهة تكمل..
ام حيدر:ان شاء الله يحميها بحق الحسين ابو عبدالله.
نور:ها ماما.. محتاجة شي اريد اصعد انام..
ام نور:روحي ماما واخذي حسوني نومي وياج..
ام حيدر :يا جكداتها تكدر تنيم اخيها..
جا انتي شسوين..
ام نور:والله مجنت رايدة خلفة بس لما ابوها وهي جان ماجبتة عبالي تجي بنية اخت نور تالي اجة حسوني.. ومجلب بركبة نور ميهدهة..
نور:بكلبي كلت.. اني رايدتة اني لو بيدي اقفلج الخلفة لااريد لااخوة ولاخوات..
كافي جكد مختنكة بسببهم..
ومماخذة راحتي..
عفتهم يحجون وصعدت..
طلعت الورقة سويت ممة لحسوني وبدلتلة وحضنتة ونام بصفي.. اول مرة مااضوج من حسوني واحضنة حضنة ام لولدها..
حبيت هذا الاحساس وكعدت اسرح بخيالي وتهيئاتي..
اي.. اني ونوفل.. شجابة بالي هو مزوج وعندة ولد، زين ليش انطاني رقم بيتهم ميخاف زوجتة تعرف ترد بس إسراء كلتلي هو رح يطلك مرتة..
زين منو كال اهلي يقبلون..
امي تريدني اكمل..
واني هم اريد اكمل دراستي..
بس اكو تناقض داخلي ساعة اكول اكمل احسن وساعه اكول ازوج ويدلعني ويحبني مثل ماكالت علياء صديقتي متزوجة وداوم ويانا وزوجها يحبها..
اني هم.. ازوج واكمل دراستي واخلص من هذا السجن..
اوووووف.. شوكت..
قطعت سلسلة افكاري امي...
نور:هااا.. ماما تريدين شي..
ام نور:رح اخذ اخوج يمي ينام ابوج ميجي كال عيب نسوان بيتنا اخذ اخوتح وراح بيت جدج..
نور:ويعوفنا وحدنا..
كلتها بخووووف..
ام نور: وشكو بيها نسوان نايمات عيب قابل نطردهم وبيبيتج مابيهة حيل تخدم..
وام حيدر تعبانة..
نور:ماما شون استحيت تكلي يوم زواجج..
ام نور:خو انتي كيفتي علي سيرة الزواج خلي بالج متطلعين من هالبيت الا ورا متتخرجين..
يلا.. يلا.. نامي وخلصينا ملابسة بجامة..
نور:المن البس بجامة يوووم اخواني وابوية ماكو..
ام نور:عمود تتعلمين تلبسيهةمصير غريبة عليج..
نور:ماما شنو الهة داعي الدشداشة اشتريلي بجايم البسهم بالبيت..
ام نور:بجايم كصيفه ويبين تفاصيل جسمج واخوانج صارو شباب..
عيب تفترين بالبيت كدامهم..
نور:هم من ديفترون بملابسهم الداخلية مو عيب كدامي مو شابة اني..
ام نور:سكتي... هم رياجيل مينعتب عليهم لو مشو مصاليخ انتي بنية..
نور:كرهت هاي الكلمةبنية شنو بنية يخنكوني..
ثاني يوم الصبح تريكو خالاتي واجة بابا وصلهم للكراج سلمو علينة وحضنتني خالة ام حيدر.. صدمتني.. المهم رجعت للسكون العايشتة امي كالت رح اروح بيت جدج تجين..
تحججت كتلهة لا ماما البارحة تعبت رح انام عمود بالليل اسهر اقرا..
ام نور:عفية عليج سبعه ركزي بدراستج ميفيدج غيرها..
نور:ماشي ماما.. مع السلامة..
راحت امي والبيت فارغ الله شسوي هسة... فتحت التلفزيون وكعدت اكلب فتحت اغاني وعليت الصوت سديت البردات وقفلت الباب..
خاف يجي احد..
نزعت الدشداشة وضليت اركص لما انكطع نفسي رحت لعالم ثاني..
عالمي.. حريتي.. سعادتي جنت اركص واضحك.. من السعادة راسا سمعت صوت التلفون..
وخفت خوفة قوية.. كلت امي هاي اكيد لبست دشداشتي من الخوف وفتحت الباب.. واخذت نفس ورديت عبالك رح تكشفني من التلفون شلابسة..
المهم رديت..
الو.؛
الو...
هلا بهالصوت الحلو..
نور:منو حضرتك..
هاي شبيج هاي اني نوفل..
نور :بس كالي هالكلمتين سديتة ورجلي ترجف من الخوف..
رجع دك التلفون.. مشلته.. خفت..
ظل يدك.. كلت احسن اشيلة لاتجي امي وظل تسالني.. سين وجيم..
الو...
الووو.. نعم.. تفضل.. نوفل شتريد..
نوفل:ليش مدكيتي علية..
نور:وليش ادك..
نوفل:مو انطيتج رقمي..
نور:شكيتة وذبيتة بالزبل..
نوفل:"هيج صار الحجي..
نور:انت متستحي دك ع بنات الناس وانت عندك مرة وطفل..
نوفل:انتي لسانج يحتاجلة كص ع فكرة..
اما عن زوجتي فهي كلها ايام ونتطلق..
نور:ليش خطية شنو ذنبها وذنب ابنك..
ليش تبهذلهة لو ذيل ال....
نوفل:حدج.. نور.. لاتتجاوزين..
اني مااحب البنية الجسرة..
اني دكيت عليج لان حبيتج..
نور:ظلت ترن بااذني كلمة احبج.. حبيتج.. سكتت مااعرف تلعثمت بالحجي..
انت شتكووول..
نوفل:نور.. اني احبج.. من اول يوم شفتج وصدمتج واني احس كلبي طار يمج..
نور.. انتي.. وياي..
نور.. نور..
نعم.. نوفل..
والله نور.. اني ومرتي مكعدنا اسبوع بنفس المكان وسالي علية اذا مصدكين اثنينا مجبورين على هالزواجة بس هسة هي رايدتني.. واني مارايدهة اني لما اعرف بيهة حامل ماارجعها؛ بس هي مرة صعبة وصوتها عالي عالكل وَمتحب اهلي..
مع العلم اهلي يحبوهة ويدافعون عنها..
نور.. نور.. انتي وياي..
نور:وهسة شتريد مني..
نوفل:اني حبيتج.. ومستعد يكون هذا الحب واقع ومستمر.. بس قنعي..
نور:اسفة.. نوفل.. اني مااكدر اوعدك بشي اني اريد اكمل دراستي..
وماافكر بالزواج وافضل ترجع لزوجتك وتتفاهم وياها.. اني ماعندي غير هالكلام..
مع السلامة..
نوفل:نور انتظري..
سديت التلفون.. وجريت الفيشة عمود لايدك بعد..
وصعدت نمت واني خايفة.. مااعرف.. اني سويت الصح..
اني مااقبل اهدم بيت..
نمت وكعدت ع صوت امي..
نور.. نور..
كعدي ولج هاي من رحت وانتي نايمة كعدي يمعودة كعدي اقريلج كلمتين..
نور:حاضر.. ماما.. كعدت..
كمت غسلت وجهي..
المغسلة كدام المراية حاطين عليها التلفون.. صير مقابيلها..
دا اغسل.. جان امي تكلي.. هاي منو جر الفيشة..
مال تلفون..
اويلي صار ساعة..
انتظر يخابروني..
عمود سبعة خالج..
خل اشكلها اول مشكلتها دك التلفون وانخطف لوني ميتة خوف..
َلا هو يدك..
الو... ها خير تحسين.. ان شاء الله وياك لاتشيل هم. يمة صدقة منو ساعدني دومهن يجن خطار.. واني اخدم عليهم..
عالعشا رجعو اخواني وابوية..
واحنا كاعدين..
امي دتسولفلة..
شفت بلة ابو نور..
ابو نور:ششوف.. ماعدكم غير القشب..
لك ياقشب.. هذا نوفل صديق تحسين..
غير ديطلك مرتة..
جنت دا اكل وغصيت باللكمة..
ابو نور:صمالله بابا صمالله...
ام نور:لج شبيج ماما شبيج هاج مي شربي..
نور:ضليت كاعده واسمع..
امي تسولف..
مرة خالي تكول عاساس نوفل كاللهة لمرتة اني عندي وحده رايدها واحسن نطلك..
هي هم عوبة ساكنة بيت اهلها وعايفة الرجال وهو شاب وحلو وينات حوالي هواي...
بس والله كوية هاي الي تخلي رجال يطلك مرتة ويعوف ابنة..
رجعت اختنكت باللكمة.. وكحيت..
هالمرة كمت..
نور:الحمدلله..
ام نور:ولج شااكلتي.. كعدي..
كملي.
نور:شبعت ماما رح اصعد اقرا..
حضرت كتبي وظليت صافنة بالكتب مالي واهس اقرا يعني نوفل صدك الي كالة.. بس ياويلي..
اذا عرفو اني وين اطي وجهي..
والله يموتوني كتل والله..
هذا هو اني طيت كلمتي ورفضت نوفل..
ارجع لقرايتي احسن..
ظليت الليل كلة سهرانة ولا كلمة فاتت بالي.. وكعدت متكسرة.. ورحت للمدرسة ومجاوبت بالامتحان او بالأحرى بدا مستواي ينزل ويومية امي جايبة حجي ع نوفل ومشاكلة وعركتة ويا اهله.. وبالسبعة.. جتي اخت مرة خالي مجتي بنتها..
وتكللها اريد اعرفها منو هي بيت ابو رافت عرس ابنهم شاف بنية.. وهي سبب خراب وهجمان بيت بنتي..
اني ارتبكت وكعت الصينية من عندي..
والكل صاح الله.. الله...
كعدوني عالقنفة ورفعو رجلي كتلهم هبط ضغطي..
جنت ميتة خوف واني ممسوية شي لو مسوية لعد شون..
امي كالتلي روحي للبيت.. احسن هي الحفلة خلصت..
خالي تحسين كالي ابقي نامي بغرفتي.. خما ظلين وحدج.. بس امي اصرت ترجعني وكالت هسة ادز عمر وراهة..
طلعت واني ايدية ثلج.. الغريبة نوفل مكطع علاقتة بخالي وخالي هم متعاطف ويا..
طلعت وجان يصير اكثر شي اخافة..
طلب من نوفل يوصلنا..
واني ميتة خوف لاخالي يعرف ويكول لاامي ونوفل كل شوي يخطف بنظراتة علية.. يعاتبني..
واني منزلة راسي..
وصلت نزل خالي صعد وفتح السركي من جوا...
ابقى وياج..
نور :لا خالو رح انام..
امي كالت.. شوي وتجي..
راح خالي.. ورا شوي دك التلفون وصارت دكتة مثل القدر المستعجل..
رفعت السماعه بخوف..
هااا.. سلامات حبيبتي بية ولابيج..
شبيج..
نور:نوفل الي بية بسببك..
انت شون تكللهم اكو بنية اريدهة شلون هيج تخلي الكل يحجي علية..
نوفل:انتي شعليج.. اني طلاقي من مرتي من زمان.. بس كل يومية مقنعيني وراجع بس هسة.. خلص مابيهة مجال وماكو احد يوكفني.. خصوصا بعد َماشفتج.. خلص متاكد اني رايدج نور..
كلها ايام وصيرين الي..
نور:انت.. مسالتني رايي شنو..
نوفل:اعرف رايج.. وحتى لو متقبلين اخليج تقبلين..
نور:مين طلعتلي انت..
نوفل:لااغازلك غصبا عنك ترضى ما ترضي واصالحك وازعل منك ترضى ماترضى...
نور:ههههعه..
نوفل :فدوة للضحكة وصاحبتها..
نور.. احبج والله احبج ومحد يكدر ياذيج لاتخافين..
اني مرتب كل شي.. وشتردين اني حاضر..
اني اعرف عنج كل شي.. صار فترة مراقبج..
نور:ليش تشك بشي..
نوفل:مو شك.. حب.. اني احبج واخاف عليج..
نور كولي انتي تحبيني..
نور:نوفففل... اكو احد اجة.. مع السلامة..
ام نور:هاي ويامن تحجين ولج.. جانت عصبية خفت..
واضطريت اكذب عليها..
حجيت بتعب عود.. سويت روحي دااوكع.. جنت دا اخابر عليج ماما كلش تعبانة وسويت روحي تخربطت..
للحكاية بقية
🌺🌺🌺🌺🌺
اول خطا ترتكبة الامهات توجه سوال منو شنو ليش مدا اصدك.. كلها أسئلة تخلي المراهق يظطر للكذب.. او نتيجة يحس انو انتي شايفتة جذاب.. وهاي اول خطوات الانهيار بحياة المراهقين بس يتعلم يكذب.. كل شي يصير سهل بالنسبة الة يمكن حتى يحضر جذبات محضرة يستعملها عند اللازم..
الافضل نراقبهم من بعيد ونخليهم كدام عينة.. مو بعيدين.. ونفسح المجال لحدوث الخطا ونحاسبهم علي..
متعة القراءة ارجوها لكم..
لاتنسون تصوتون عالبارت اذا اعجبكم فضلا وليس امرا....
أنت تقرأ
حكاياتي(حكايا بنات+18)
Short Storyمجموعة حكايا تناقش المشاكل والتغيرات في جسم المراهقات والتحديات التي يخوضها الاهل حتى يتجاوزون المرحلة هاي
