للكاتبه ام رحيل ...ع م
-تعاي منا اخميسه من هذا الباب...
-نوارس اگو اچلاب خاف تاگلنه... ي نوارس، ..
-لا.. لاتخافين... اشبيچ جبانه وچماله اسمه اخميسه
-اي چا اسمي شله شغل...
-اي مو اسمچ اخميسه... والاسد نگول اعليه ابو اخميس... يعني انتي اسد بس مره مو رجال
-هاااا تگصدين اني اسده...
-اي... اسده... ياخميسه...
-ههههههههههه.... ههههههههه... راح اتصيرين خوش معلمه ي نوارس... هههههههههه...
-انت ريسان مو عصام الوگح... اني عرفتك من هذا الجرح على گصتك... اشو لسه ما راح... حتى بعد ما طاب...
-اي احسن حتى ما تشتبهين بيني وبين عصام... هااا وين چنتي كل هذا الوگت اميرة الباديه...
-جنت مريضه ومحمومه وتوني صرت زينه واجيت اشوفكم انت وزهراء...
-من هيچ لمن رحت اليم خيمكم وباوعت ما شفتچ ورديت...
-ليش ما صحت عليه واني اسمعك واچي
-يعني اشلون اصيح عليچ قابل اوگف ابنص الخيم واصيح...
-اي صيح نوارس الباديه.... ياهو ....واني اطلعلك من نص الخيم... واچيك
-وشنو عود ياهو.... نوارس الباديه واعرفه بس ياهو
ما اعرف شنو...
-ياهو.. وين انتي.. وين رحتي...
- خوش والله راح اتصيرين معلمه وخوش معلمه... هههههه... وهاي البنيه الوياچ منو...
-هاي اخميسه.. اختي..
-ادري.. اسده... هههههههه... ..
-اي اسده ليش تظحك.. چا مو ابو اخميس يعني الاسد وام اخميس اسده... اني اخميسه بتهم هم اسده مثلهم...
-يمكن.... ماادري ههههههههه... هههه
-نوارس اتگولين واحد حباب واحد وگح هذا ياهو منهم...
-هذا الحباب.. اسمه ريسان
-اشو ما امبين عليه حباب بس يضحك علينه..
-لا لا مااضحك اني اسف... لا تزعلين اخميسه...
-اسکتي اخميسه لو شايفه الثاني چا اسويتي والچلاب تاكل بيچ وهو شايل توثيه ايريد، يفشك راسچ...
-يايمه.. خلينه نمشي ي نوارس لا يطلعلنه...
-لا اخميسه لااتخافين ما يطلع ..هو وامي وزهراء
راحو للمدينه يشترون اهدوم... ويمرون على بيبيتي
ام خالد... يعني للمغرب ياله يجون...
-يا حرامات اني چبت ال زهراء ثوب امگان ثوبه خيطته على موده عد الخياطه جدايل بت عطشه خوش اتخيط اهدوم احنه ما نشتري مثلكم من المدينه.. احنه انخيط عده اهدومنه...
-زين ينوارس وانتي ابيا صف بلمدرسه...
-هههههه. ههههه. انت بطران.. والله بطران
-ها اخميسه ليش انتي مو بلمدرسه همين
-هاي يا مدرسه احنه ابمدرسة ترووو يع.. ترووو يع
-وهاي وين عدكم بلباديه يم البيوت مالتكم
-لا يلحباب.. هاي المدرسه تمشي ويانه وين ما نمشي وين ما انروح.. واذا ضاعت منك تروووو يع ...وحده
ام حمدان... تنطيک طاگ.. چلاق. وطاگ راجدي وتصخن وتنام...
-هاي معلمتكم قاسيه ام حمدان اشتكو عليه... شنو هذا اليضيع منكم وتضربكم على موده
-تروووو. يع..
-شنو هذا دفتر لو اكتاب
-اي نوبه دفتر نوبه اكتاب... يعني ترووو كتاب ويع دفتر...
-ولچ اخميسه عيب اتضحكين عليه مو هو ايصدگ حجيچ.. لا ريسان احنه مو بلمدرسه.. لا اني ولا اخميسه...
-ومدرسة ترووو يع... شنو هاي
-هاي اشبيك ريسان هاي اخميسه تضحك وياك... ترووو يع انصيح الطليان لمن نسرح بيه... مو مدرسه
-ههههه واني صدگته والله... زين ليش ما تسجلن بلمدرسه... هاي اختي زهراء بالثالث ابتدائي.. وروحن وياه ابنفس المدرسه...
-اني ما اروح للمدرسه... بس نوارس، تحبه. ...
-نوارس اني اسجلچ بلمدرسه واشتريلچ كل الي تحتاجينه... واذا امچ اتريد افلوس اني انطيه.. هااا
شتگولين اتسجلين..
-وانت ليش مهتم بيه وتخسر هاي الفلوس عليه واني
راعية غنم فقيره..
-لا.....انتي ....نوارس اميرة الباديه...
-والله اذا صحتلي،هيچ الف مره ما اعرفك اتصيح عليه.... اني مو اميره... اني نوارس الباديه
وجبت هذا ثوب بت الباديه هديه ال زهراء امكان ثوبه..
-ميخالف.. اني انطيهيا من تجي من بيبيتي. واگله جابته الچ نوارس...
-خاف امك ماترضه ....امك ما اتحبنه ما ادري ليش
همه البدو شمسويله...
-ايگول ابويه همه السبب ابموتة اخته ...من چان عمرهن اخمسطعش سنه. لگاهم ايرگضون وراه بلصحراء... وهو جان مار ابسيارته رايح ايداوي بت شيخ عرب بلباديه ولگاه تركض، وميته من العطش..وبحظنه طفله زغيره لافته من شمس الباديه،وترابه . وصعده ابسيارته واخذه وياه...
-هااااا وبعدين وداه الاهله.. وخطبه منهم واتزوجه
مو بالله...
-يعني مثل هيچ شي،...
-يعني اشلون مثل هيچ شي... لمن گلت اسده ضحگت عليه... وهسه انگلك تزوجه من اهله، تكول هيج شي... زين مايخالف... والبنيه وين صارت وهي بته لو بايگته...
- لا اخميسه ما بايگته البنيه اختي زهراء.....
-اختك زهراء موش زغيره نوارس گالتلي ازغر مني ومنه... وانت شحط وطويل اكبر منعدنه اشلون خلفت زهراء گبلك وگبل اخوك الوگح....
-اي والله اخميسه اثاريچ کلش ذكيه وما امبين عليچ
-ليس عيني من گالك احنه هوايش ما انعرف.. اصلن اني اعرف اعد البعرور الحد العشر بعرورات...
-شاطره اخميسه اشو بالله عديلي للعشره..
-هي هي عباله اچذب صحيح امي احميزيه اتچذب بس اني مو مثله ما اچذب، لو يموتوني....
-زين اخميسه عدي خل انشوف..
-اححححح... اي.. بعروره.. وبعروره ...بعرايتين..
بعروره.. وبعرايتين... اتلث بعرايتين...
-ههههههههه.... ههههههعع.. اسده ما يصير امكان البعرور اتعدين ب الحصو...
-چا هو ابکيفك.... لو على خاطرك الحساب.... وانت شمعرفك.. چا جدايل بت عطشه ..هچي اتعلمنه الحساب.... واحنه امنين عدنه حصو بلباديه... هو بس رمل وبعرور... چا اتريدني احسب بلرمل شنهي اني سحاره مثل حبوبتي ريزانه...
-اسکتي اخميسه شگد تلغين خلينه نمشي اشوف امك واخوك الوکح اجوي ابسرعه ما تاخرو للعصر مثل ما گلت...
-ها ايجوز ما راحو البيبيتي... واجوي ابسرعه لا اتخافين... اني وياچ نوارس ما اخلي احد اياذيچ
-قابل انت شسوي ال امك ما تگدر تجسر عليه. لو اتعارضه...
-لا اگدر لان هي، مو امي هي مرت ابوي... ولو اني احترمه وما احب اجسر عليه بس راح ادافع عنچ نوارس الباديه.... يا... شنو نسيته الكلمه..
-هههه ياهو... نوارس الباديه.... ياهو.. هههه خوش طلعتلي اسم... حلو
-مثلچ لان انتي حلوه... بس خوافه صيري مثل اخميسه... اسده...
-لو نوارس مثل اخميسه چا ماگلتله حلوه. ..هي.. هي
-لا...لا.. اخميسه انتي هم حلوه ...بس ابغير شكل..
-چا هاي اشلون.. غير شكل يعني اني حلوه ابين الحواوين... ونوارس حلوه ابين الطيور.. لان اني اخميسه من عشيرة ابو اخميس... وهي نوارس، من عشيرة بحر...
-هههههه... هههههه.. هاي اختچ حچيه ايضحك ههههه
-اي هي حبابه وتحبني مو مثل مرت ابوي... تدري اني راح اخش للمدرسه واتعلم واصير معلمه مثل ما اتگول... (انتي خوش معلمه)...
- اي عفيه عليچ نوارس بس، مرت ابوچ تقبل..
-اي تقبل لان عمي ابو اصبيح راح هو ايسجلني وانطاه اهواي افلوس حتى تقبل...
-خوش والله هذا عمچ خوش عم... واخميسه ما يسجله وياچ...
-ما ادري هو بس گالي الي...
-اي چا اني مو ابحلاته.. واسمي هم مو حلو. اخميسه
مادري ليش امي احميزيه ما سمتني اسم حلو ....
-انتي تگدرين تغيرين اسمچ.. اي اسم يعجبچ
-صدگ يلحباب.. اشلون عود... اغيره ...واخلص من هذا الاسم.. ومن الحواوين كله...
-اي تگدرين غيريه من يگلچ لع اشو انتم لا جناسي ولا شي..
-اي والله احنه ما عدنه جناسي... ما انطلع جناسي لمن انريد انعرس، لن الحكومه ماترضه انعرس ابدون ورگة محكمه وتحبسنه... انگوم ذيچ الساع انطلع جنسيه... ونعرس... وينطونه ورگه ثانيه بيه اسم العريس والعريسه... ونصير امعرسين....
-وانتي اشمدريچ ابهيج حچي اخميسه...
-سمعت عمي ابو اصبيح ايگل ال امي هذا الحچي علمود جنسية نوارس...
- هااااا. اي علمود ايسجله بلمدرسه....
-ولچ اخميسه يله نمشي اشگد تحجين...
-اي.. اي نمشي لا تخافين اخميسه موش امگلگله بس
هم اتريد چنسيه مثلچ ابو صبيح ايطلعلي علمود المدرسه... اهااا... موش العرس ...العرس موش لخميسه...
-اخميسه انتي بعدچ زغيره على العرس...
-اي ادري... اني زغيره ونوارس چبيره..
-لالا نوارس هم بعده زغيره عل عرس لمن تكبر راح اتصير احلى عروس... ابديرتكم...
-چا هي هسه احلى عروس ابديرتنه... يلحباب.
گلي واذا طلعت جنسيه وگلتلهم اسمي موش اخميسه... ايصير..
-لا لازم تگليلهم الاسم الترديه.. شنو اتحبين ايصير اسمچ.
-اسمي... اخخخ... اخمممم. ماادري لازگ بيه ما اخلص منه...
-زين ما طول مايرضه ايعيفچ ال، اخخخ... سمي روحچ اخخل... اخلا.... اخلاص... اي.. اخلاص.. احلى من اخميسه... هااا..
-اخلاص واخلص من اخميسه وحي وحي وحي هو .اخميسه صارت اخلاصو..وحي. وحي. وحي هو.
-هههههههه.... هههههههه
-يا اخميسه اشبيچ تخبلتي... اتگمزين مثل الصخله
-اسکتي نوارس... خل الخير ايعم اشويه على اخمممم... لالا اخلاص.. چا بس الخير الچ وال حميزيه...
-ريسان.... ريسان...
-هااا زهراء تعاي هاي نوارس اتصيحج..
واجتي زهراء ترگض من القصر الباب الحديقه... وين ما نوارس واخميسه وريسان واگفين...
-ها نوارس اشلونچ... ما شفناچ من زمان..
-اي زهراء اني اجيت وجبتلچ ثوب امكان ثوبچ خيطته الچ جديد..
-الله هذا كلش حلو هسه البسه بحتفال المدرسه واگلهم هذا زي بدوي...
-انتي ابيا صف رحتي
-اني نجحت للثالث ورحت اشتريت اهدوم اني وماما
للمدرسه وشرطان حمر...
-واني هم راح اسجل وياچ بلمدرسه هم اشتري اهدوم بيض وزرگ مثلهن وشرطان حمر..
-اي بس لا تشترين شرطان حمر... انتي بل اول تلبسين شرطان زرگ.. مثل لون اعيونچ الحلوات..
واني بل ثالث البس حمر....
-واني هم البس سود.. لون اعيوني سود،
-انتي منو..
-هاي اختي اخميسه...
-اخلاص... اخلاص ينوارس...
-شنو اختچ وما تعرفين اسمه
-لا هي اسمه اخميسه بس ما اتحب اسمه وتريد اتغيره وهي وريسان غيروه وسمت روحه اخلاص
-ها اسمچ اخلاص اخت نوارس ...اي احلى من اخميسه اخت نوارس انتي هم اتلبسين شرطان زرگ... كل بنات الاول يلبسن شرطان زرگ
-چا خوش زرگ... خل انشوف يهو اليچيبلي الهدوم ياله انحصل الشرطان الزرگ.. يله ايسهله ابو اصبيح چا احنه . تفاحه وبيتنچانه ابزبيل... بلبله واغرابه ابقفص واحد..
-اي يعني شتقصدين...
-هااا يلحباب... نوارس اتگلك... شقصد،..
-اخميسه انتي مثل امچ احميزيه حياله وطماعه...
-لا والله ينوارس، الوادم کله تاكل وتهبش.. واني اخميسه اريد اعظيمه وحده منچ ينوارس اتمرمحه اخميسه... متنطينياه...
-انطيچياه العظمه يخميسه واشبعچ... يله نمشي.. هاچ هذا الثوب زهراء...
-اي شكرا اشوگت اداومين وياي بلمدرسه...
-واني اخلاص هم اداوم وياچن...
-اي بس لازم. اطلعين جنسيه انتي ونوارس ياله ايقبلوچن بلمدرسه...
-اي.. ابو اصبيح ايطلعنه... اني ونوارس، مو بله نوارس،
-اي... اگله ما يخالف... يله انروح... مع السلامه
-نوارس..
-ها ريسان..
-اشوگت تچين
-ما ادري
-اذا سجلچ عمچ تعاي يوميه مري على زهراء وروحن سوه للمدرسه... هااا شتگلين
-اني اجيبه واجي لا اتخاف يلحباب... اعتمد على اخميسه... اهووووو اخلاص.... اخلاص....
-زين اخلاص اعتمد عليچ...
-ريسان.... ريسان...
-ها عصام شتريد...
-يله انروح ي اخميسه اجانه الوگح...
-يابويه... يايمه ولچ نوارس، انطيني، العوده اچانه الوگح ابن ابليس ...لا تخافين ينوارس اني اختچ احاميچ...
هى انت يلوگح تره اذا انت شيطان تره اني اخميسه
امرعدك واذبك بلگاع مو عبالك...
-هاي منو الجايه ويه حبيبتك المعيديه وتحچي
-هاي اخته اخميسه وعيب عليك تحچي هيچ..
-شنو شحچيت چي گلت حبيبتك..لو على امعيديه يهو الزعلتك
-اسكت نوراس صديقتي ..وصديقة زهراء... عيب هذا حچيك...
-هههههه.. زين، احنه مو توم لازم انصادقه اثنينه... هاا... شتگول. (اخذ عصام يغمز الريسان بعيونه )
-عصام هسه انت شتريد،...
-هاااااا نسيت امي حوري اتريدك... علمود اتگدر ملابسك....
-زين روح چاي وراك
-زين رايح... باي باي نوروستي حبيبت اخوي التوأم
باي باي.. اخته شسمچ گلتي...
-اححححح... اخخخخخممممييييسسسسه...
-باي باي خموستي الحمشه
-يله انروح اخميسه....
-مو گلنه اخلاص... اخلاص...
-اي مو توچ اتگليه اخخخخمممميييسسسه
-اي چا غير اريد اخوفه واخميسه اسده اتخوف واخلاص ما اتخوف...
-يله مع السلامه ريسان مع السلامه زهراء....
-نوارس مو ما تجين تره اروح العربكم واصيح،
نوارس الباديه..... ياهو... ريسان ايريد، ايشوفچ..
-ههههه. زين اجي... اجي...
وراحت نوارس واخميسه الديرتهم واخميسه راح يصير اسمه اخلاص، منا وهيچ وما يرجع اسمه اخميسه الا لمن اتريد هي وتوخره لمن اتريد همين...
-سمعتي الوگح اشگلي... خموستي... هيسته حلوه واول مره احس اسمي حلو... بس الگبله بي بي ماعرفته..
-مو بي بي... باي، باي.. ذيچ المره ريسان گاله الي.. يعني بلنكليزي... هي مع السلامه..
-ها...چا زين يعني ما شتم عليه... يعني يگلي مع السلامه اخميستي...
-امشي... امشي ولچ هذا ابليس ما تعرفيه امحيل مثل حية الصحره الي انشوفه عدنه... تتلبد النه بلعاگول حتى تلدغنه....
-اسگتي نوارس... اذا هو حيه اني اخميسه وابويه ابو اخميس...
-ديله... نمشي هسه گمتي اتحبينه اسم اخميسه وصار حلو....مو.
-اي اذا ايحبه ازود من اخلاص ميخالف... بس بلمدرسه اني اخلاص لن البنات ايضحكن عليه اذا المعلمه صاحتلي اخميسه...
ومشت نوارس وکلام عصام اخو ريسان ايدور افكره
وينعاد عليه... ها هاي نوارس حبيبتك... ها هي نوارس، حبيبتك..... وگلب بت العشر اسنين دگ اول
دگاته.... وفرح اول فرحه ما يعرف معناه....
..... ...... ....
أنت تقرأ
نوارس الباديه ياهو ..للكاتبه ام رحيل ...ع م
ChickLitكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
