للكاتبه ام رحيل ...ع م
- و دارت السياره بلجه الثانيه واريد ابعد عنهم كلهم
وسمعته تصيح من بعيد..
-اني عرضك يبن العرب لا اتعيفني لذياب الباديه اني وبتي ...
وکلامه سره ابجسمي مثل المنتول ابكهرباء هزت كل
جسمي وكلمة ..بتي رجعتني العقلي.. اني شريد اسوي شلون ادير وجهي وما اعرف اشراح ايصر وراي... هاي عده طفله... زغيره شايلته ابحضنه... يعني هاي اللفه البحضنه ..طفله... مو سحر وهاي من يگول نفس السحاره الي ايدورون عليه عرب الشيخ صركال... ورجعت النفسي والمهنتي الي تفرض عليه
اساعد كل محتاج للمساعده... وگفت السياره... وصحت بيه...
-يله ابسرعه گبل ما يلحگون بيچ... ودرت السياره وتلگيته... وبدون ما اباوع الوجهه لو اسئله..
-مدي ايدچ ابسرعه... ومدتلي ايد وايد کامشه بيه اللفة ...وسحبته ابقوه الداخل السياره وسقت السياره مثل الريح... بعيد عن الزلم الثنين... ومشيت ابدون ما التفت لو اباوع الهم لو اباوع اله... جنت خايف اباوع عليه لن چانت امدمايه وبكل مكان من جسمه بيه دم
واللفه ابحضنه تتحرك بس بلا صوت والمسر طالع من وره اللفه ...
-هذا شنو مسر الطفل انتي توچ جايبه
-اي اني توني جايبه ...والمسر بعده ما مگصوص...
...وبعد ما بعدنه عن الباديه مسافه طويله وقربنه من المدينه والبيت مالتي، وبمكان قريب من البيت وگفت السياره وفتحت اللفه مال الهدوم الي ابحظنه
وشفت الطفله چانت حلوه وبيضه ومبتسمه مع انو هي انولدت ابظروف صعبه وبابشع واخطر مكان
وبعد ما اطمئنيت على الطفله وسئلت امه اذا چانت بيه اجروح غير الجرح الي ابراسه...
-لا مابيه اجروح بس هذا الدم لان توني جايبه...
-شگد صار الوقت من جبتيه
-اليوم... قبل ساعات قليله
وبعد ما سئلته هذني الاسئله... سكتت وهي هم سكتت وحركت السياره واجيت للقصر... والباقي سولفه ريسان لمن طبينه وگصيت مسر الطفله وبعد ما غسلته من الدم.... فوتته للغرفه هي وبته حتى لا احد ايشوفه... وهناك بلغرفه سئلته عن قصته وليش الزلم ايركضون وراه ...وهسه السالفه صارت يمچ حوري انتي اسولفين قصتچ الهم.... وباوع خالد الحوري وسكت.... وهي هم ظلت ساكته وبعدين اتنهدت... وگالت...
-اني چنت حاسه انو فرحتي ما تكمل لان عمر الفرح
ما صار من نصيبي ولا مشه وياي ...مده طويله وحتى لو افرح دايما فرحتي ناقصه... وگصيره...
-لا حوري... مهما صار ويصير راح اكون وياچ وبجانبچ وابد ما اخلي الفرح ايفارگ هذا الوجه... وانتي ما مسويه ذنب ولا متهمه ابشي سولفيلهم قصتچ مثل ما سولفتيلي... ولا تهتمين...
-اي خالد... راح اسولفلهم القصه مثل ما سولفته الك..
بعد ما سئل ابن عمي بحر على صگر بلمدينه وگالوله
دخل للمستشفه وصار حريق ومات بلحريق... رجع والاخبار المشؤمه ابموتت صگر وياه.... وگالي يبت عمي بعد ما الچ ضله وحدچ ابهاي العرب ويله امشي وياي العربنه.... ولم حلالنه وجابني واجه العربهم
وبحر چان ماخذ مره على اختي جميله اسمه حمزيه
ولمن جابت اختي ابنيه وماتت ظلت البنيه عدي وبحر عافنه وراح للبصره يشتغل بلطير والسمچ
وگالي گبل ما يروح...
-شوفي يبت عمي انت هسه ارمله وحبله وهذا شهرچ واني عدي هاي طفله عمره شهرين وتريد من يربيه
وانت احن عليه من حمزيه مرت ابوه... ولازم يحوري
اذا ردنه نعيش سوه لازم يبت عمي نتزوج.. شتگولين...
-شگول يبن عمي.. واني ارمله وحبله ابشهري ولا ابو عندي ولا ام ولا اخت كلهم ماتو وعافوني... وضعيفه
الگول الك... ما بقه الي والي غيرك...بس اريد اربي بتي ابعز مو ابمذله...
-شوفي ي حوري... انتي حامل هسه وارمله والارمله
يگول الشيخ حمدان، لازم تلزم عده گبل ما تعقد عليه
وعدة الارمله اربع تشهر وعشر تيام.... بس انتي غير شكل...
-اشلون يبن عمي بحر..
-يگول انتي عدتچ تنتهي لمن تولدين الطفل واني رايح للطير واظل لو ثلث تشهر لو اربعه واجي تكونين ولدتي وخلصتي عدتچ واعقد عليچ وتربين البطنچ وبت اختچ سوه...
و يوم الراح بحر للبصره حمزيه شاوفتني الويل والضيم
وبيوم ما حسيت على روحي الا وشي نزل على راسي والدنيه اظلمت بعيوني. والالم اخذني وهيست الطفل ايريد يطلع للدنيه... واني الدنيه نفسه گام تفتر بيه... ومن الالم وعصرات الطلوگه الاجتني اتمددت علگاع وبنص الالم بعد ما ادري بلدنيه... وما حسيت غير اني ابنص الباديه ملفوفه ابجرجف ومشدود بحبال والدم يكت من كل مكان والالم ماخذني والطلگ اجاني واني ابنص الجرجف المبروم بيه ومشدد ...وصارعت حتى افك روحي واطلع راسي واشتم الهوى... والالم يعصرني وينطيني قوه حتى افك روحي... وبنفس الوگت ايهد حيلي ويتعبني ابكل طلگه اطلگه... وما حسيت... الا والطفل طالع... واني ابنص الحماد والدنيه ظلمه وليل اسود ما ينشاف البشر من الحيوان وهو مجبل عليك وما هيست غير حسفة ازلام اثنين... من بعيد يحچون ويتجادلون ابيناتهم واحد منهم اسمه ابو سرحان والثاني ابو غالب...
-اگلك.. ابو سرحان خلينه نحفر اهنا وندفنه... ونرد للعرب وانكل الحمزيه دفناه بعيد گلش عن العرب وهي اشمدريه اشگد المسافه...
-ول... ول... ابو غالب شتگول... اگلك المره اهيس بيه نفس... وحميزيه تگول ماتت وهي تطلگ.. وتگول غسلته وجفنته... واني اشوف الدم يزخ منه واذا ٠اهي..ما مذبوحه... امين هذا الدم يزخ...
-وع.. وع... ما تعرف تحچي وچماله صار عده ولد واسمه سرحان... سرحت انت وياه بلبراري ...ولا اندليتو دربكم... لن ما بيك فايده... وابنك يطلع اعليك...
-چا وانت ابيش زايدني ابنتك هيله... هي بهي.. هم عدك بس غالب وهيله بنت والبت ما معدوده لنه
تروح البيت رجله. من تكبر... يعني انت ولد واحد واني ولد واحد...
-ماعلينه... بس انت ما تفکر زين...
-،اشلون يبو غالب شتقصد..
-موش حمزيه مرت بحر گالت هاي الحرمه بت عم بحر رجله مات وعافه حبله ومريضه ولمن اجاه الطلگ ماتحملت وعسرت وماتت هي والفرخ... والمطلگه يطلع منه دم چا اشيطلع منه ماي...
-هاااااا اي والله صدگ... اثاري المخلف اثنين يعرف ازيد من المخلف واحد... بس انت هم اشمدريك چا قابل انت المخلف يو مرتك ام غالب..
-اشششش اسكت انت اغبر بعدك... اشمدريني اشلون اشمدريني... چا موش من تولد النعاج يطلع منه
اشكال والوان... شنهي انت اعمه ما تشوف...
-اي ما اشوف يبو غالب... لن اني اشتغل ابصيد الحمام والفخته بلبر ...وانت تشتغل راعي واتشوف النعاج من تولد وشيطلع منه. ومدردح وتعرف امور
النعاج... بس المره مثل النعجه... يبو غالب..
-اي چا شنهي اليفرق ابيناتهن غير بس الصوفه...
-لا يبو غالب حته صوفه عدهن
-يا ولدهر.. دهرك .. فضحت مرتك يمطگطگ...
-وداعت ابنك غالب وابني سرحان ما اچذب عليك
هيه هم تخاف من الحسد وما تگول اشكبره الصوفه
مالته... اگلك صدگ الحسد يضر بلنسوان وهي تگلهن
اني ما اگدر مريضه وصوفتي ازغيرونه....
-اسواد وجهك اسكت خايب وخلينه ندفن المره ونرد
للنساوين..
-اي اشعليه المره هي ميته... ميته.. قابل تموت بعد
اگلك صدگ صوفة ام غالب اشكبره من الصبح لليل
شو تگل ل ام سرحان صوفته بيه حگه من الصبح لليل.. يمكنه تچذب... على ام سرحان...
-ولك انت ليش امگلگل وشلك بسوالف النسوان ما تستحي ما عدك حيه يلهامل...
-واني اشگلت... وما عدي حيه... وکورة الغزل مال الصوف اشبيه... مرتي تغز اهواي صوف وتگول للنسوان اغزل اشويه ايدي يوجعني ومرتك تگول تغزل صوفه مگدار حگه... وچنه تچذب لن.ام سرحان تگول هي ما تعرف اتغزل گلش ..وتچذب..
-هه وانت تحچي على صوف الغزل اليغزلنه بلمغزل..
-اي چا عليمن على الصوف اليغزله العاگول...
-يله... خبلتني ابسوالفك چنك رگيه فطيره ما بيه كل حلاه...
-اي چا وينه هي امخره مخر...
وبين ما همه يسولفون ويداهرون ابيناتهم وعيت على روحي والجاهله جواي والمسر امعلگ بيه والطفله ساكته وعيونه اتبلبص ابنص الظلمه... سمعتهم يردون يدفنوني ....وسمعت ابو غالب يگول لبو سرحان...
-چا وين المساحي... النحفر بيه الگبر... وين حاطه
-هاااا... ماجبت... مسحا... گتلي امش ندفن مره ميته
وحمزيه انطتنه كروه الي والك... هذا الگلته الي
-چا ولك ابيش نحفر الگبر بظافرنه... من كون ادفنك انت بلگبر موش ادفنه هي... يله امش رد جيبلنه مساحي نحفر بيه...
-ارد الوحدي.. وهذا عوي الذياب... اتريده تاكلني..
لالا ما ارد...
-زين اروح اني وانت ظل يمه... خاف الذياب تشتم ريحته.... خطيه تاكله...
-يابويه يايمه... لالا ماظل الوحدي وتاكلني الذياب وياه.. اهي ميته ما تهتم بس اني عدل بعدني وتوني
عدي ولد...
-زين... زين امش يذيب الباديه... انروح اثنينه انجيب المساحي ونجي...
-ولمن سمعتهم مشو عني لميت روحي ابسرعه ولفيت بتي بلچرچف الچانو لافيني بيه وچان كله دم
بس ما عدي حل ثاني... وتحملت على روحي وگمت وركضت ..والگاع ادور بيه وارگض واوگع.. واگوم وسمعت من بعيد صوت شخيط... قوي... وعرفت هذا صوت سياره تمشي بلباديه وبنص الليل... شي غريب ما كو اغرب منه... بس دعيت ربي... يخلصني... وربي استجاب دعوتي... وباوع الخوفي وضعفي وذلت حالي... وركضت عليه وشفته من بعيد، واهيس شي يرکض ويه رجليه واتعثر بيه واوگع بلگاع واتلمس
واگوم اخاف اباوع خاف اشوف شي يرعبني وما يخليني اركض ابكل قوتي... وباوعت وراي واذا همه
يرکضون وراي والمساحي علئ اجتافهم ويصيحو اوگفي... اگلچ اوگفي وين تردين.. واني خفت وزاد خوفي... لا يگمشوني ويدفنوني اني وبتي عدلات
بلگبر... وتنبهت وشفتك ومديت ايدي الك وتنخيتك لمن شفتك تريد اتعوفني... ونخيت وبجيت.... وربي خلاك ترد وتشيلني ابسيارتك بعيد عنهم وعن الموت
الچان گريب مني ومن بتي... ولمن صعدت للسياره وگعدت يمك... باوعت الي وگتلي هذا شنو هذا مسر
ولمن گلتي.. ياله انتبهت وعرفت الچان يرکض وياي وبين رجليه... اي هذا مسر
-وهاي اللفه الي ابحظنچ طفل عدل لو ميت..
-اي طفل ...اي... عدل... يمكن عدل... وفتحت لفة الچرچف.الملطخ بلدم... وبنصه اعيون حلوه ضاويه
ولا اتگول صار ساعات من اجتي للدنيه..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
ونزعت اشماغ راسك وانطيتنياه
-هاچ وخري هاي ذبيه وراچ بلسياره.. لا اتشمريه بلباديه... ويلحگونه عليه ويندلون.. ولفيه ابهذا الشماغ.....
والباقي شافه ريسان وهو عمره خمس اسنين
وعرفتوه.... ....
😫😫😫😫😫😫😫
أنت تقرأ
نوارس الباديه ياهو ..للكاتبه ام رحيل ...ع م
Chick-Litكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
