.للكاتبه ام رحيل ...ع م
وحط ايده عساف بالاكل الجابه اله ابن الشيخ هدام.... وبعده ما اكل ولن الهوسه گابه والعرب تصيح انغزينه والطلق ثاير من كل مكان ....ونفض ايده عساف من الزاد وگام....
وسميه مرت الشيخ... تباوعله وتستعجله بينه، وبين روحه...
-يله اكل اشبيك دحط اللگمه ابحلگك... خليني اخلص وارتاح منك وبعدين اشوف يهو الادزه
الحمزيه يحذره... ويگله عرفو مكان العرب الانتي بيه... يله اكل... هاي شنهي الهوسه... يمه... شسمع
-يعمه... يعمه.... يگولون انغزينه... سلابه هادين علينه ابحصن وسيارات... ويضربون طلق... والزلم تلگتهم...
-يا... چا هو هذا وگته يغزون هسه وبهاي الدقيقه...
-هاي اشبيچ عمه... اگلچ انغزينه... سلابه چايتنه... شنهي هذا وگته... چا تردين السلابه
ينطونه خبر من يغزونه... هاي شلون سلابه
-امشي عابت هل وجه... بومه... ملفاچ ملف الشر... امشي...
-يع... چا اني شنو قابل السلابه گرايبي... هاي
شبيه عمتي اليوم اشو بس اتباوع للضيف ...
من وره الخيمه... چنه عاجبه... والله لو يدري،
بيه الشيخ... ينحره مثل النعجه ومشت مرت. ابنه عزام. ...وعافته اتباوع للضيف...
-انت منو عساف النعرفه لو اسمك يشبه اسمه
وهي تحاچي روحه... من وره الخيمه.. فاتت هوسة الزلم... وعساف نفض ايده وگام...
ودخل الشيخ هدام.. وصگر، وراهم حنظل وريسان وعصام وباقي الزلم ظلت بره يرکضون ويصيحون لا تاكل يعساف.. لا تاكل... ورکض هدام وگمش ايد، عساف الملطخه، بلدهن والمرگ بعد ما ذب اللگمه وگام ظل اثر الاكل
بيده... جيب الماي يصرگال... جيب الماي ابسرعه.... ورگض ولد ابو عشر اسنين... وجاب الماي... وبسرعه صب الشيخ هدام الماي وانطه عساف الصابون...
-اغسل.... اغسل يعساف ايدك زين تره من ريحته تظل مشلول اسنين...
-خير يشخ... عمي صگر.. اسجابكم اشلون وصلتو ابسرعه... ولحگتو بيه... هذا شي عجيب...
-مو اعجب من الچان راح ايصير الك لو ما لاحگينك...
-ليش حمزيه... وتحذرت منه لا احد لاحگني
ولااكلت ولا شربت ابمكان ولا نمت بفراش مثل ما وصتني حبوبه عذاب...
-وهذا الاكل الگدامك يعساف شنهو...
-عمي صگر... هذا اكل الشيخ هدام واني ابيته
واجيت ادليه على چتال اخوه حته ياخذ ثاره
قابل هو يكتلني، بدل ما يشكرني... شني السالفه يشيخ هدام...
-عساف ما ندري بعدنه... بس صكر والزلم يگلون حياتك ابخطر ...وگلنه خاف بلاكل سم ولمن کهبنه الخيمه اشتمينه ريحة السم
لن اني اعرف بلسموم واجمعه من الباديه واتاجر بيه وابيعه للمعامل بلمدينه.
-بس يشيخ هذا بيتك ومنهو اليريد يسممني
من بيتك...
-خلينه نتوگد گبل كل شي... اگعدو يوجوه الخير... وگعدت الزلم كله وعمي صگر وريسان وعصام وحنظل.... وراح الشيخ وجاب حليب
وصب الحليب على الاكل وبسرعه تحول الحليب ازرگ وطش على الاكل كله...
-يالله دخيلك... الحد هذا الوگت واني اتمنه اتكونون غلطانين انتم وعرافتكم ام الخير....
بس هسه بعد ماكو مجال للشك ...هذا سم كتال بلحظه والمكان واني عرفته من اول مافتنه واشتميت ريحته ...بس تمنيت روحي اكون غلطان.....
وطلع الشيخ هدام وگال للزلم
-يلربع، اجلنه روحتنه ....اليوم عدنه اضيوف
وعدنه سالفه نريد انحله گبل ما نروح الحمزيه ناخذ بلثار....
وتفرقت الزلم... ورد الشيخ للنسوان وصاح ابنه عزام وابنه الصغير صركال... ومرته سميه ... وهيفه مرت ابنه عزام...
-منهو الطبخت، اكل الضيف منچن... انتي لو مرت ابنچ...
-هيفه هيه الطبخت... ونطته العزام وداه للضيف...
-منهو منچن الحطت بيه السم للضيف وليش.
- مدري يشيخ.. وليش نحط للضيف سم...
-اني الاسئل ...يسميه... مو انتي...
-يعمي اني طبخت وعمتي سميه گالت روحي صيحي عزام يودي الاكل للضيف... وتعجبت ليش عزام يوديه وصرگال واگف بره الخيمه
ليش ما انطته الاكل يوديه... وخفت اگله لا تصيح بيه... وطلعت اصيح عزام وضليت واگفه بره اشويه اباوع عليه ليش رادت تطلعني وتبقه وحدهه... واني شكيت انو هي تريد توديله الاكل... وتگول محد اجه يقدمه للضيف ...لني شفته من اجه الضيف وهي تباوع عليه من وره الخيمه... وچنه تعرفه
وظليت اباوع عليه... وشفته طلعت شي من جوه اهدومه لافته ابوصله... وخرته لنه شيشه لافته بنايلون... وبطراف اصابعه گمشته ودارت على الاكل.... وتصورته سحر
حاطتله ما تصورته سم... وهاي كل الشفته يعمي واني ادري ان هيه راح تشد ويايه العمر كله... اذا ما طلگتني، من ابنه عزام.. بس يعمي.. هاي تهمة الچتل ما اتحمله.....
-وهسه يسميه شتگولين ابهذا الحچي...
-يشيخ انت تصدگ كلام هاي الچلبه.. تريد، تخلص مني حتى يضل البيت اله وتصير هيه ام البيت ..
-يصركال بويه ليش انت ما وديت الاكل للضيف مو اني گتلك تضل اباب الخيمه لمن يصيحنك وينطنك الاكل... خاف عزام اخوك ما يگدر... يروح ويظل، يلم بلزلم...
-اي يبوي واني ظليت اهنا واگف اباب الخيمه هاي... وامي وهيفه يطبخن.. وطلعت هيفه وظلت امي وحده... واجه عزام واخذ الطعام للضيف... وگلت بعد احسن يستحون من صركال ويودون بيده الاكل للضيف... شنهي اني زغير... وخليت ومشيت اشوف الزلم وهيه تلتم....
-زين يصركال.... وانت يعزام... وديت الاكل للضيف... منهو. الگالك...
-هاااا... هاااا... يبوي.. واجه الراجدي على وجه عزام من ايد الشيخ هدام...
لا تههي مثل النسون... ولك امك اهم من شرف ابوك وسمعته گدام العشاير... يدور الصيت عليه الشيخ هدام سمم ضيفه...
-لا يبوي.. بس اني صاحتني هيفه من بره واني، الم بلزلم وگالت تعال ودي اكل الضيف
وهذا الي اعرفه وما ادري ياهي منهن الحطت، السم بلاكل...
-اي يعزام هسه اني اعرف، من حطته... ومد، الشيخ هدام ايده ابزيچ مرته سميه وبعد ما تلاوت وياه،.. ظربه راجدي على وجهه خلاه مثل المصطوره لاتاخذ ولا تطي... وطلع من زيجه الشيشه الملفوفه بلنايلون والوصله...
هااا يسميه ما لحگتي تضميه ابمكان... ولفه الشيخ هدام ابعباته وجره لارض الباديه
ملفوفه... لا ينشاف منه لا ايد ولا رجل
واولاده يرکضون وراه...وابوهم الشيخ هدام
حط الحبل ابرگبته ويجره...
وبچت ... وجه صار اصفر، چن الموت اجاه
-دخيلك يشيخ.... اني مرتك وام اولادك يشيخ
لا تهيني ابين العشيره والناس الغرب... تتفرج عليه... وهب كل الگاعد بلمضيف الساحة ارض
الباديه يشوفون الشيخ هدام شيسوي ...
ورگض صكر وعساف والربع كله للشيخ. .
-لا يشيخ... لا يشيخ... احنه امسامحين، لا يشيخ... وعساف كمش ايد الشيخ وهد الحبل
الرابط، سميه بيه... لا يشيخ اجينه نردلك سمعتك وتاخذ ابثارك ما اجينه ..نهد بيتك ونفلش اعيالك...
-يعساف الخير صار اسنين وجسمي نار وشابه بيه انحرمت من اخوتي وبوي وتشوهت سمعة، بت عمي... من وره هاي الحيه ال الله،
بلاني بيه.... وهسه تريد، تسمك وتشوه سمعتي بين العشاير ..ويمكن باجر تسمني الي، ولازم اعرف ليش... وشنهو السبب....
وخر يعساف... وخر... هذا حكم عشيرتنه.
اليکتل واليبوگ واليهتك عرض حره... نربطه
بلشمس الحاره لا ماي ولا اكل منا لمن يموت
لو يعترف ابذنبه ونقيم اعليه الحد.. ميت جلده..... وربطه عساف بلرمل والدنيه ليل وسميه ما اهتمت... وگالت هسه ولدي
يخلصوني....
-تعال.. يحاكم.. وانت يليث، واختارو عشر ازلام وياكم يحرسوه... وان تگرب منه، اي واحد حتى لو عزام لو صركال اكتلوه ابمچانه
ولا تخافو.. واسمعي. يسميه الچ... هذا سواد الليل... ان ما گلتي... كل التعرفيه... كل هاي السنين... راسج الصبح ويه طلعة الشمس
يدهده على، هذا الرمل.. وكبل ما امشي ويه الزلم الحمزيه اگتله واخذ ثاري منه. يكون راسچ گبل حمزيه تشرب ارمال،الصحرا دمه .. وانتي فكري....
أنت تقرأ
نوارس الباديه ياهو ..للكاتبه ام رحيل ...ع م
ChickLitكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
