للكاتبه ام رحيل ...ع م
-بس عمي صگر اني بتك لو بت بحر... اني بت جميله
لو بت حوري.... دخلتني وياك بلحيره.. وچنت اعرف اني منو وبت منو هسه ما ادري، اني بتمن....
-نوارس، اني دايما اعتبرتچ بتي حتى واني ما متئكد من هذا الشي، بس ما همني، ان چنتي بتي... اني قمت وياچ ابواجب الابو ويه بته واذا چنتي، بت، بحر... فاني رديت الجميل للانسان الساعد مرتي وهي حامل او. وحيده..... بس حمزيه وسمه وغدره
اني متأكد هي السبب ابموتة حوري... وطفلي... ولازم
يجي اليوم الاعرف الحقيقه كله من حمزيه لو من غيره... وهذا اليوم صار قريب.... وحمزيه گرب يوم الحساب وياه...
-عمي صگر لازم ابويه يعرف انت عدل مو ميت... لن ابويه چان ايسولفنه اهواي عليك ...وما چان امصدگ
انك متت ابحريق المستشفى حتى بعد ما جابوله الخاتم والساعه مالتك... وگال ايجوز منطيهن الواحد من المجانين... لان صگر دايمن چانت ايده مو اله
والعنده ايحب ينطيه الغيره.... وظنه طلع صحيح
وطلعت مو ميت... ولازم يعرف حتى تاخذ حقك من املاك جدي...
-لا ريسان هذا مو مهم وما اريد هسه احد يدري الى ان اعرف الحقيقه كله...
بس اريد اعرف اخباركم منو عدل منو مات... هم صار عدكم اخوه لوبس انتم وبيبيتكم ام اسماء بعده عدله لو ماتت...
-لا عمي بيبيتي ام اسماء بعده عدله وصارت تحچي ساعات ماما بابا... وساعات حلوه وتعرف كلشي وتترحم على امنه وتگول الله اخذ مني بتي اسماء بس عوضني ابرجله خالد صار هو ابني امكانه.... وخلت الوادم كله تصيحله ام خالد وتگول انتم مو
بس اولاد بتي اسماء... لا.. انتم اولاد ابني خالد همين... ومن ذاك الوگت گمنه انصيحله بيبي ام خالد.
وجدو عبد الرحمن من زمان مات واحنه ازغار ويگول ابويه ....جدي مات وره امي ابسنه..
وابويه اتزوج حوري وعدنه اخت اسمه زهراء وهسه هي ابكلية طب الاعشاب ..ههههههه... طالعه على عمي صگر... اتحب الاعشاب...
-اي بس مامتك حوري اتضوج من البدو والباديه وما تعتبرنه ناس مثلكم..
-هههههههه... نوارس انتي لسه ماخذه منه موقف... لان اني هديت عليچ الچلاب وهي وگفت وياي وضاچت منچ... مو ايگولون من حبك لاشاك...
-يا...من حبك لاشاك.... لو هديت عليه الچلاب حتى تاکلني...
واجيتني بلتوثيه اتريد اتفشگ راسي وتموتني...
-شسوي عقلي چان اعمى... وعمى گلبي وعيوني وياه
نوارس متگدرين بعد اتعيفيني عهد الدم صار بيني وبينچ للموت....
-عصام بلايه شقه، تره لا الوگت، ولا الضروف امناسبه للضحك والهزل مالتك...
-ريسان منو گلك اني اضحك لو اهزل... اني احچي صدگ وهذا عهدي ويه نوارس، دگيته على زندي وعلى گلبي من عشر اسنين.. صارت مرتي ابعرف اهل الباديه والغجر...
-بس انت لا من الباديه ولا هي من الغجر ومن دگت عهد الدم وياك دگته ويه ريسان حبيبه مو ويه اخوه عصام اليكرهه...
-شوفو عمي... انت عصام وانت ريسان... احنه تعبانين واليوم سمعنه اهواي قصص وهواي سوالف
خلو سالفت عهدكم ويه نوارس، البعدين هي اتقرره
وانتم روحو البيتكم هسه ابوكم وامكم قلقين عليكم
ولا تحجون شي ال اخوي خالد عني منا لمن ايصير الوگت المناسب واگللكم...
-زين عمي صگر راح انعيف اربع زلم ويه غانم وسرحان.. يصيرون سته ايكفون لحراستكم وحراسة الحلال...
-شكرا... ريسان..
-لا عمي چان هذا واجبنه النوارس وهسه صار واجبين الك وانت عمنا، والنوارس...
يله ..عمي احنه رايحين وباچر اجي اغيرلك على الجرح...
-زين عصام ...تعبتك وياي عمي ...
-تعب العم واجب مو تعب... يله مع السلامه...
ومشه ريسان وعصام ويه باقي الزلم وبقه اربعه ويه غانم وسرحان.
...... ......
-اگلك خالد ...عصام وريسان وين لمو الزلم وابو منصور وياهم واخذ واسلاح وراحو...
-ما ادري يگلون اگو حراميه هجمو على حلال الفلاليح... وراحو ايساعوهم.... ويه الزلم... ويردون الحلال....
-وهمه شلهم شغل بلحلال والفلاليح... واذا صار عليهم شي ابيش ايفيدونه الفلاليح...
-ريسان وعصام زلم واحد دکتور والثاني مهندس مو جهال ونضمهم بلبيت... وهاي القريه اباسم جدنه السويلمي... والگاع كله النه اشتراه جدي وانطاه للفلاحين ايزرعون ويعيشون بيه...
- هاي خوش والله اكو واحد عاقل ينطي گاعه للناس
وين صايره... ابدون ما ياخذ منهم ثمن الگاعل لو ثمن المحاصيل الي يزرعوه...
-والله هذا مو شغلچ... حلال جدي وانطاه گبل ما اصير اني واجي للدنيا وابويه عبد الرحمن بلرغم من انو چان تاجر وما يهتم للمشاعر بس ما اعترض ولا
غير شي من الي سواه جدي. ...سوالم البزاز... والقريه اعتراف منه بلجميل سمت القريه على اسمه
-هي بهي... اخذو گيعان واراضي واسعه ابلاش وسمو القريه على اسمه... هنياله... بعد اكو احسن من هيچ...
-شوفي حوري... الحلال حلالنه واحنه قابلين انتي شكو وعليمن هذا الحچي...
-لا خالد... مو بس حلالكم... هذا حلال صگر وحلال مرته وبته... لو اني غلطانه...
-لا انتي مو بس غلطانه انتي متوهمه... نسيتي حوري... الي سويته علمودچ وهسه بعد هاي السنين جايه اتدورين گيعان وحلال... نسيتي لمن لگيتچ بلصحرا والدم ايسل من راسچ وجسمچ.. وانتي شايله ابحظنچ طفله عريانه والمسر. امعلگ بيه... وانتي وياه تركضين بلهيمه ما تدرين وين ترحين وزلام اثنين يرکضون وراچ يردون يکتلوج او وگفت سيارتي وشلتچ انتي والطفله... وخلصتچ من الموت
وجبتج للبيت... واعتنيت بيج وبلطفله... لمن صرتي زينه وتقويتي... وما قصرت وياج حتى قبل ما اعرف انتي منو... وبعد ما سولفتيلي، سالفتچ وعرفتج...
عقدت عليج وبتج كتبته اباسمي...
-لا... ي خالد صحيح انت انقذتني اني وبتي بس هذا مو جميل سويته الي هذا واجبك البت اخوك او. مرته..
وچان لازم اتسوي هيچ واكثر... واني چنت ما اعرف
نتيجة الي سويته. بس بعدين عرفت هذا الشي غدر حقي وحق بتي بلورث... ومكان ما تنطيني ورث رجلي الي والبتي... انت اخذته من عدنه وانطيته الولدك وهي تاخذ حصه حاله حالهم... وهي لازم اتكون شريكتهم.. بلورث... يعني ريسان وعصام اثنينهم ابحصه وهي وحده ابحصه...
-اليوم انتي غريبه وكلامچ غريب ما سامعه منچ كل هاي السنين... شنو الغير الامور... من اجينه من فرنسا وانتي متغيره وبعد ما عرفتي بلهوسه عد ذوله البدو وانتي احوالچ متغيره... انتي تعرفيهم... احد منهم شافچ لو تعرف عليج...
-شوف خالد اني لا شفت بدو ولا اعرف احد منهم
واني ما امسويه شي وما خايفه وهمه لازم ايخافون مني على الي سوه بيه... بس اني گتلك ما اريد اظل
ابهذا القصر ولا ابهاي القريه... وگتلك خلينه اروح القصرنه البل مدينه بس انت ما رضيت وسمعت كلام
ولدك ريسان وعصام... واني ما الي، راي... وقبل اثنعش سنه گوه خليتك اتعيف هذا المكان ونلحگ الولد الفرنسا... وهسه لمن ردينه هم جبتنه ال اكثر مكان اكرهه ابهاي الدنيه...
-وانتي منو ايعرفچ لو يگدر يتعرف عليچ ابهذا الشكل ومنو يتصور حوري بت الباديه قبل عشرين سنه هي نفس حوري اليوم...
-اني مو بت الباديه وابويه چان يشتغل بلطب والعشب واني مثله... احنه مو غنامه ولا بدو... لا اتظل اتعيد... هذا الكلام... حوري بت الباديه... هذا الكلام ايخليني اكره هذا المكان اكثر واكثر...
-حوري... انتي ليش منفعله وتصيحين شنو التردينه
-اريد حقي وحق بتي... اخذه وامشي من هذا المكان
وبس...
-واحنه وين مكانه عدچ ... بس انتي وبتچ..
-خالد انت شتحجي... تدري عمري من جبتني اشگد
....سطعش سنه.. وهسه عمري سته وتلاثين سنه ..
يعني لگيتني طفله ما شافت من الدنيه والفرح شي
ومرت اسنيني وياك واني ما شفت من عمري شي
كل يوم ايمر اگول باچر احسن من اليوم وانت ولا انت... عشت من اجيت وياك .. وابوك چان عاجز ومشلول داويته وخدمته وغسلتله ....وكلته.. ونيمه..
ولبسته... وكل شي قدمتله... وداريت ولدك... اطفال عمرهم خمس اسنين ازغار... بلايه ام... ماتت وكل يوم يبچون يردوه واحطهم واگعد ابنصهم اسكتهم وامسح ادموعهم ...احطهم على رجليه ريسان. على هاي الرجل... وعصام على الثانيه... الولي واهود واسكت وامسح ادموع وثوبي ينترس من ماي حلگهم وادموعهم... وصياح بتي من بعيد، يوصل الاذاني
ويلوج گلب بت سطعش سنه... بين النايمين ابحظنه
وبين الدر عليه صدره... واظل گاعده وابچي وهي تبچي ابغرفتي بعيده عني... وانت ابشغلك.. لا تسأل
ولا اتفكر.. تعبتي لو لا... دبرت.. وربيت... اطفال اتلاثه...
والزواج الي عقدته عليه چان علمود بت اخوك مو الي... ومرت الايام وتلته اسنين وكل سنه اتجر وراه سنه... لشوگت ابقى... تعبت... وهذا القدر الي.. انكتب عليه اريد اغيره... وانت هم اتغير قدرك وحياتك... بس کافي.... اتقيد روحك بيه.... شوف حياتك وخليني اشوف البقا من حياتي...
-شتقصدين... تردين اطلگج وتاخذين رجل وتكملين حياتج وياه...
-هذا حقي الحرمتني منه من عشرين سنه... وهيچ زواج ..چذبه ولازم يجيه يوم وينتهي...
-حوري... اني ما حرمتچ من شي اني صنتچ وحافظت عليج وعلى حب اخوي ابگلبچ... وحرمت نفسي من كل حق الي علمود ما افرض نفسي عليچ...
ولا فكرت ابنفسي وبحقي بلزواج من اي مره ثانيه حتى... اصون كرامتچ... وهسه بعد صبر كل هاي السنين... واني اگول اليوم وباچر... وبعد سنه... بلگي
اتحس تجاهي ولو اشويه من المشاعر... اتبادلني بيه
واني راضي حتى لو بلقليل.... صحيح داريتي ومرضتي وربيتي... وسويتي كل الگدرتي عليه وازيد
بس دائما بعيد عني ومو الي الغيري، حتى لو چانو ابويه... لو .. ولدي... بس ظليت اني ادور ....وادور..
والسنين تركض.. وتعودت اتكوني بعيده يمهم كلهم بس مو يمي... شگد اتمنيت... اعيونچ اتباوعلي وتنتبه الي بس حتى وانتي اتباوعيلي... احس بعيونچ ضياع... ولغز... وخوف... اتحاول تبتعد وتشرد
اتباوع ابوجه غيري... تضحك.. وتغمض... وتنام... بس مو ابحظني... ابحضن خيال بعيد ما بيه شبه مني
ولا صورته مثل صورتي... وشگد ردت اگلچ... احبچ
حوريتي... وحياتي انتي....... الدخلت البسمه الي ول اولادي..
بس خفت.. صدچ... وتعوفيني وترحين مثل ما هسه
تردين ترحين وتعوفيني... هلگد اني انسان مااگدر احصل ولو قليل من حبچ ما اطلب گلبچ گله... اشويه. منه حتى، لو مكان ازغير... اتحطين اسمي بيه مثل ما حطيت اسمچ ابكل گلبي من اسنين
صدگ تردين ...افلوس وگاع واملاك... وتمشين عني
انطيچ كل الي تردينه حتى كل ما املك من مال وحلال.... بس كلمه وحده اسمعه منچ...
-خالد... خالد... انت صعب... صعب... ماشفت ولا راح اشوف رجال اصعب منك...
-ليش حوري... اني اسهل من السهل نفسه مطالبي بسيطه... واحلامي، ابسط... الدنيه كله ابيعه ابكلمة
احبك واريدك... هذا صعب عليچ... لو ما تردين تگليه
الي...
-اووووووفففف.. خالد... لا اتزيدني الم وهم...
-ليش حوريتي اني سهل وبسيط، وانتظرت اسنين
گلبچ يحبني ولو اشوية حب مو هوايه اني قابل...
-ههههههه... هههههههه...
-ليش اتضحكين... كلامي ميضحك...
-ادري بس ردت اعذبك اشويه بعد .. مثل ما عذبتني كل هاي السنين ...وانت ساكت وعايفني احترگ مثل الشمعه... بس گسرت خاطري...
-صدگ حوريتي... يعني ڭلبچ ايدگ ال خالد... وما يعوفه.. ابد،..
-گلبي من اسنين طويله فرغ من كل رجال وما سكنه غير بس خالد.. وتمنيت خالد ايحس بيه ويحبني مو بس زوجته على الورق..... ونذرت اذا هذا اليوم صار واجه... لاعيش عمري كله
جوه رجليك وما يفرگني عنك حتى الموت..
-حوريتي.. حوريتي... وضمه خالد ابحظنه ودفن وجه بين خصلات شعرها الاحمر.... وبعد عشرين سنه من زواجهم صارت حوري وخالد اليوم عرسان وما يدرون بالدنيا اشصار بيه من احداث وخاصه ابادية صگر ونوارس.....وعبالهم الدنيه فتحت الهم اذراعه وطعمتهم اليوم فرحة الحب والزواج....... بس الخافي ابعلم الغيب... والاحداث بدت تظهر. والمستور من اسنين راح ايبان....
........❤ ........... ❤ ..........💕😍😍
أنت تقرأ
نوارس الباديه ياهو ..للكاتبه ام رحيل ...ع م
Literatura Femininaكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
