للكاتبه ام رحيل ...ع م
-صدگ ماما يعني اني ابويه خالد وعصام وريسان اخوتي....
-هاااا...
-بابه انت گلت راح اتجاوبني على كل الاسئله... واني هذا الحچي الي اتگوله ماما حوري ما يدخل ابعقلي
اني متذكر كلش زين مثل ما عصام متذكر وره ما ماتت امي ابفتره قصيره... اجتي ماما حوري وياه طفله زغيره.. منهي غير زهراء...
-ريسان شنو قصدك اني الطفله.. واني مو اختكم
-زهراء ما ادري ابوي هو الي ايجاوب... وماما حوري وين اهله ... ليش كل هاي السنين معرفنه اله احد من اهله.. واذا رادت اتروح... اتروح البيبيتي ام خالد
يعني البيبيتي ام امي. اسماء... مو ال امه هي...
-ريسان لا اتسوي من لاشي مشكله ايجوز امه وابوه ميتين وما عده لا اخوه ولا خوات... والگرايب ...منو يسئل على الگرايب ابهاي الايام...
-عصام خل ابويه لو ماما حوري هي التحچي. مو انت... اني اريد اعرف شي چاي ايدگ ابراسي.. واريد اعرفه صدگ لو چذب...
-ريسان بابه ڭول شنو هذا الشي الي ايخليك بعد هاي السنين... كله جاي تسئل هاي الاسئله وشنو فايدتك...
-بابا انتم تره جاي اتلاوعون بلحچي... زين اني راح اسئل حتى اسهل الموضوع وما انظل للصبح.. اندور... واندور.. ابنفس الحچي... ماما حوري چانت مرت عمي صگر قبل ما تتزوجه...
-هااااا... ريسان منين جبت هذا الحچي.. وحتى لو صحيح شنو الغلط بيه...
وچانت حوري ساكته وگام وجه ينطي الوان..وماطلع منه ولا کلمه... وزهراء اتباوع بلوجوه وما تدري شنو القصه...
اي ريسان صحيح حوري چانت مرت عمكم صگر وبعد ما اتوفه اني رحت جبته... وبعدين اتزوجنه..
-وزهراء... اختنا لو بت عمنا...
-عصام ادور انت صفيت ويه ريسان هاي اشبيكم
زهراء اختكم اجتي للدنيا وره ما اتزوجنه... وعمره وتاريخ زواجنه يشهد ابهدا الشي...
-يابه ارجوك اليوم يوم الحقيقه... ما انريد چذب بعد هذا اليوم... الطفل العمره خمس اسنين اذا صار شي مرعب ويخوف گدامه تره ما ينسه واني اذكر
چانت الدنيا ليل وگعدت ابجي وخايف لان مالگيت يمنه احد نايم بس اني وعصام ... وام منصور ما هيه يمنه راحت بعد ما نيمتنه... وگعدت خايف وابچي وفچئه انفتح باب القصر ودخلت انت ...وياك وحده امدمايه وگوه تمشي وانت تسنده ابئيدك
وشايل لفة اشماغ بلئيد الثانيه... واني خفت وختلت
جوه الدرج ابزاويه ظلمه... وظليت اباوع ودموعي نشفت علئ خدي..وبعد ما دخلته للحمام وجبتله من اهدوم امي... رحت فكيت الشماغ واذا بيه طفله ازغيره والدم عليه وشي طويل يدندل من جسمه
ابذاك العمر چنت اتصوره ذيل مثل ذيل الچلب بس ما بيه شعر... وگمت انت وگصيته بلمگص.. وخرت الشماغ البيه دم وجبت جراجف بيض ولفيته بيه...
وبعد ما طلعت من الحمام المره وچانت لابسه ثوب مامه اتخيلته امي وردت ارکض عليه واحضنه... بس انت اخذته للغرفه فوتته هي والطفل وسديت الباب
گمت اني رحت للشماغ چان هديه من ماما الك گالتلك اتلف بيه راسك من تطلع للمرضه بلليل البسه حتى ما تبرد... اني کلش انقهرت لمن شفتك لاف بيه الطفل واشماغ کله دم... گمت رکضت واخذته
وصفطته وفتحت سحاب الفراش مالتي وضميته بيه
والصبح ضهرت ماما حوري ابثوب ماما اسماء... واختلط علينه واحنه اطفال وحبيناه مثل ما حبينه
امنه.... بس اريد تفسير الكل الي شفته قبل اثنين وعشرين سنه...
-بس ريسان انت وين چنت خاتل ومحد شافك وليش ما سولفتلي عن الشفته...
-عصام... ماكو شي يتسولف... عد طفل.... عمره خمس اسنين.. ولمن گعدنه...لكينه ماما حوري ولگينه، زهراء وگال بابه
هاي اختكم.. وهاي ماما حوري ....وگمنه.... انام... ونگعد...، ونبچي ابحظنه
وگبرنه وماما حوري مرت ابونه الربتنه ......وزهراء اختنه... بس هسه الامور اختلفت... وهسه انريد نفهم
ونعرف.. لان هاي الاسرار الضاميه ما تتعلق بس بيكم انت وماما حوري...... هاي الاسرار تتعلق ابغيركم... هم.. الهم الحق يعرفون..وگام ريسان وفتح باب مخزن ازغير بيه العاب وغراض قديمه وفتح سحاب دوشگ ازغير وطلع منه اشماغ صاير مثل العظم بعد ما يبس عليه الدم كل هاي السنين ....شوفو هذا هو الدليل على انو كلامي صحيح مو احلام طفل عمره خمس اسنين واختلطت عليه الامور وهسه اليوم انريد الحقيقه كامله ابدون ما اتضمون منه لو اتغيرون شي...... 😩😩
-اي... كلام ريسان صحيح... واني همين اريد اعرف الحقيقه.. لان اني جزء من هاي الحقيقه..لا اني مو الحقيقه اني الچذبه الچبير... الي عاشت بين اب وام واخوه... بس الظاهر الحقيقه غير شي.. واريد اليوم اعرفه مهما يصير...
-حوري... حوري...
-هااااااا.. خالد
- حوري.. بعد ماكو داعي انظم الحقيقه وخلينه انسولفلهم ...
وسكتت حوري... ما قبلت ولا رفضت بس سكتت ودنگت راسه بعد ما باوعت الخالد وباوعت الزهراء
أنت تقرأ
نوارس الباديه ياهو ..للكاتبه ام رحيل ...ع م
أدب نسائيكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
