.للكاتبه ام رحيل ...ع م
وقبل ما يهد الشيخ على حمزيه وريزانه.. وديتله الخبر ...وافلوس... وگتله تاخذ وياه ولد الشيخ صرکال وهمه ازغار ما يفتهمون وبلاخص عساف لن الثاني چان فرخ انفاس
وبعدنه حته اسمه ما نعرفه.. لن حور العين هيه... السمته وتعرف اسمه...
وبگتهم بليل وبدون ما احد يحس واحد اني شلته والثاني امي،... وهجت حمزيه بلليل.. وياه ثلث اولاد..... حمدان ابن رجله... وعساف واخوه... اولاد الشيخ صركال...
ريزانه... ما قبلت السويناه وعافتنه ودخلت عد شيخ عرب الجبور... والشيخ حماهه...
وحمزيه خذت المال والاولاد وشردت ابليل ما بيه ضوه... وجان ابيناتنه مرسال...ابنيه نوبيه من قبايل النوب البسودان تعرف حمزيه وحمزيه تعرفه اجتي من ارضه البعيده ويه رجله وتمرض ومات وعافه الوحده... سوده ابسواد الليل بس جماله فتان گويه وما تخاف من الباديه والصحرا..... وچانت المرسال ابيناتنه تعلم حمزيه بلاخبار وتوديله افلوس مني ومن امي... وخبرتنه النوبيه ...ان الاولاد عافتهم حمزيه بلصحرا... بين الموت والحياة.... وراحت العرب الباديه الغربيه وهناك تزوجت بحر... والاولاد ضلو.. بصحرا الباديه... وما نعرف مصيرهم... وبت عمكم حور العين... بعد موتت امه حزنت ودگت ولطمت... وگعدت تداري بخوته عساف والطفل لزغير...
وبيوم نايمه اخذنه الاولاد منه وهي ماتدري ابروحه بعد ما سگيناه عشبه تنومه وانطيناهم الحمزيه الهجت بيهم مثل ما سولفت... وبعد يومين علئ نومته الحور العين وچانت حزينه علئ موتت امه وموتت ابن عمه ورجله
الي ما عاشت وياه غير ساعات... والديره والعرب ماتدري ابهذا العرس الصار بسكوت...
والي حته هدام مارضه بيه وگال خلي اخوي يبره من المرض ياله تزفوه... بس محد اخذ كلامك ابذاك الوگت.. لن اني وامي حطينه ابراس الشيخ صرگال... انك تغار وتريد اخوك ايموت
حته تاخذ حور العين.. گعدت بعد يومين... من النوم دايخه.. وصاحت من ما لگت اخوته، يمه ورکضت ودورت ابكل البيت... وصل الخبر للشيخ صركال... اولاده الثنين ماهمه... وهبت العرب تدور وکلمن يگول شكل... بس الكل يصيح حمزيه باگتهم... وما لگو لا حمزيه ولا اولاد الشيخ... الي انباگو....
واني وامي صحنه صارله ثلث تيام من هچت حمزيه... وين چانت حور العين... ما فگدت اخوته وليش ما گالت... ودارت العيون عليه
والشيخ يسئله وين چنتي ثلث تيام.. يحور العين وهي ساكته... لن محد يصدگه من تگول نايمه... والشيخ سكت والعرب دورت وما لگت
ودار الشهر..... وراه گرب اربعين ابن الشيخ ويه اربعين ام حور العين...
وحور العين عمه حدد عرسه بعد الاربعين انت وياه يشيخ هدام والسويناه اني وامي... ما فادنه ابشي... وگمنه نخطط اشلون العرس ما انخليه ايصير... واهنا رحنه لام عواد مرت الشيخ الاوليه وچانت مريضه على افراش الموت... وعگب موتت ابنه زاد المرض عليه والکره ترس گلبه وحطينه ابراسه ان حور العين... عواد ما گدر يدخل عليه ويكون اله زوچ ابذيچ الساعات القليله گبل ما
يموت واحنه كل الوگت چنه داير مدايرهم... وما صار شي من الگالت عليه حور العين... واحنه سكتنه وگلنه مستحيه وتريد اتبيض وجه ابن عمه المريض..والايام ابينهم اهواي
ويصير الما صار اليوم...
-اي يسميه واني اذکر انتي وامچ بعد ماگالت حور العين انه حامل.... وفاتت اله ام الخير. و اكدت حمله... صحتن انتن وامي ان عواد ما جاز عليه... وهذا الولد موش ابنه وان هي عده رفيچ من الحضر اتريد تلزك ولده النه...
وبليل مالگينه حور العين... ابداره وهبينه بلباديه اندور بس ما لگيناه... شسويتن بيه يسميه.... وصحتن.. وصاحت النسوان وياچن
حور العين... انهبت... عده رفيچ...
-اي يشيخ صحيح التگوله... وبعد ما گلنه موش ابن عواد هذا الي ابطنه... وبليل وهي ماشيه الغرفته طحناله بلعمود على راسه كلمن تظربه بلعمود من كتر اني وامي وامك اعيونه تباوع النه وماتدري ابرضاه گتلت ابن ابنه... وما خلت ذكر ومات اثره...
وتدمت. وگلنه ماتت. ولفيناه ببساط وشلناه ومشينه بيه بره الديره وكل الي تلگانه نگله نريد انوديه للايتام بطارف عربنه اسمه ام اهديل توه لفت للديره بعد ما مات رجله... عده ولد وبت... فقيره. وما عده والي ...
-ام اهديل امي اني... تقصدين لو وحده ثانيه
-اي يعساف ام اهديل وما ادري هيه نفسه...لو غيره ،بس الاسم ما ضنه صدفه واضنه ام اهديل نفسه..ويمكن بعد تطلع هي موش امك.....
-اشلون يم عزام شتگولين..
-خليه تكمل يعساف.... خليه تكمل...
-حاظر يشيخ...
وتلگتنه رفيچتنه النوبيه وانطيناه حور العين تاخذه لاطراف الصحرا تدفنه......
وحطته النوبيه على چتفه.... واخذنه البساط منه لن چثير من نسوان العرب شافنه شايلين البساط اني وامي ....وگلنه نريده لام اهديل واولاده... وبعد ما وصلنه الخيمة ام اهديل..
ما لگيناه... اثاريه لمن شافت مصايب عربنه
خافت من الديره واهله وهدت اخيامه ونحرت العرب اخوه.. ورجعنه والبساط ويانه
ونسئل النسوان چا وين هاي الفت علينه ام اهديل... اشو...ماهيه وهاده اخيامه... والنسوان گالت ارحلت ما عجبته عربنه....
ورجعنه والصبح طشت بلديره حور العين شردت... هيه والبطنه للحظر لحگت رفيجه...
ودورت الزلم ومدري وين النوبيه دفنته... وبيا گبر حطته... لن الزلم کلشي ما لگت.. ورجعت .بعد ما دورت . وکلشي ما لگت چن الباديه كلته....
واخبارنه ويه حمزيه ومراسيلنه ويه النوبيه
گالت النه ان حمزيه .....الاولاد عافتهم بالباديه للسباع تاکلهم وما اخذتهم وياه لنهم يأخرونه بلمسير وخافت الزلم تلحگ بيه. ويلگونهم عده وانوب يصير کتلته ما منه مفر.. وانت عساف وتگول امك... ايصيحوله ام اهديل وهي ماعده من الاولاد، غير اوليد وبنيه وهسه انتم اولاد اثنين وبنيه اهديل وحنظل ...وانت يعساف...
من الاول اجو وياه بس اثنين ، انت يعساف موش ابنه... وشلون لگتك اوين... ما ادري، هذا ام اهديل هي التعرفه.. واخوك الزغير... الي ما عرف اسمه... وين راح ....هم ما ادري... وهسه لمن سمعت بيك چاي تخبر الشيخ عن مكان حمزيه... خفت على روحي واولادي لا حمزيه من تکمشوه تفضح سري... والهل سبب ردت موتك... وبعدين اخبر حمزيه... عن عربكم تشرد... وهاي كل السالفه..... وكل الصار.... اکتلني يشيخ بس اولادي مالهم ذنب لا تعاقبهم على عمايل امهم....
-اسكتي لابارك الله بيچ... من حرمه... فنيتي اديارنه وکتلتي زلمنه وضيعتي بزرنه... ولطختي نسوانه بلعار.... والله الموت اگليل بيچ يبت ابليس... وصوب التفگه عليه وداس علزناد... وما نحس غير صركال حاظن امه والطلقه طلعت... والعرب صاحت وهدام ابمكانه تبسمر...
فاتت الطلقه ابظهر صرگال ودخلت صدر اسميه الگلبه... وتمددت اجساد اثنين صرگال ابحظن امه..... وصاحت الزلم ..يالله دخلك... ياالله دخلك... ورکض صگر وجس نبض صرگال... ورکض عساف جس نبض سميه...
-يشيخ العوض بيك اسميه ميته...
-يخوي يصگر... گلي... صرگال.. ممم،،،
-وشال صگر صرگال ورکض بيه للفراش وطلع الجرح والدم ينزف... وحط العشبه عليه وسد الجرح... الحمد، لله يشيخ... الطلقه اخذت الجتف من بره وطلعت.. الصدر سميه وفاتت الگلبه... جرحه بسيط، لا تخاف.... رش الماي على وجه صرگال.... وفتح اعيونه... وصرخ وبچه...
-يمه... يمه... امي ماتت... امي ماتت... ليش يبويه کتلته... هاي امي حته لو موزينه.. احبه
وگعد صرگال ينتحب ويبچي على الجثه المدده...
-يله يحاكم يليث شيلوه.... ادفنوه... وبعد عدنه وحده... هم لازم تندفن مثله بس لازم نعرف اخوتي وين صارو... من حمزيه گبل ما تموت... وگامت الزلم بسلاحه ركبت الخيل
وطارت بيه الديرة حمزيه ... وعساف
ركب سيارة زهراء وريسان وصگر وياهم.... والافگار تاخذه وتوديه. العساف.. عمره كله ماتوقع ام اهديل مو امه
معقول يطلع ابن الشيخ صرگال واخو الشيخ هدام... والثار اليطلبه هدام من حمزيه
هو ثاره.. گبل ما يكون ثار هدام... لا.. لا... مااصدگ... مااصدگ... كون ارمالچ ياباديه تطوي،... اطوي،... يارمال الباديه اطوي...
وعساف... ساعات ويهل اعلينه...
وام الخير... تطوي برمال الصحرا... وتستعجل حضور عساف....
ام الخير بلدرب گاعده وبنات الباديه وياه يتنطرن جية الزلم.. وعساف وياهم يهل...
-اسباع الباديه... رملچ خلص الغرض منه ذبيه من ايدچ وگومي...
-حبوبه ام الخير... افك ايدي واذب الرمل
-اي ياخلاص ماتسمعيه شتگلچ
-زين يزهراء... وذبت اخلاص الرمل من ايده
وگامت من يم ام الخير... وراحت يم اهديل بلبيت....
-وانتي نوارس بت صگر من يومچ ابحظنه
تعيشين شيلي رملچ وفوگ رمل اختچ حطيه...
-ام الخير منهي اختي.حته احط الرمل مالتي،
فوگ رمله...
- صار الوگت. ينوارس انكمل حچينه والسالفه وصلت للنهايه والقدر والمكتوب ما منه مهرب... الا العجن بلخير دمه وتطيب... لا قدر يمضي اعليه والجرح،
يلتم... شالو... حوري ازلام... حمزيه اجرتهم واخذت طفلته ومشت يم سباع الباديه حطت مهده..
شالوه الزلم... اطراف الباديه يردون دفنه وما درو حوري... اردود ينبض گلبه... وبداخل الارحام ربچ خلقه ابنيه بيه لا... متوم رحمه
وحده... حمزيه خذته.. والثانيه اتحركت... وتقدم طلگه... وي الطلگ... والالم رد الحوري نفسه وبذاك الهيم نزلت زهرهم... من حوري اخذت روح...وماتت لجله
-يعني حبوبه اني بت حوري وبت صگر واني ونوارس توم.... اخوات... صدگ حبوبه ام الخير...
-حطي نوارس رملچ فوگ رمل اختچ وگومي
الدرب هذا اليوم اختچ تكمله... لن ابگلب عساف حبه تحنه...
وحطت نوارس صم الرمل البيده فوگ الرمل البيد زهراء... وصمت زهراء الرمل ابقوه...
وگامت نوارس يم اخلاص وهديل ابيت صگر...
-يزهرة الروح اسمچ عرفتيه .. روح الحواري راح وانتي الاخذتيه...
-حبوبه يعني ابسببي ماتت امي لن اطتني الباقي من روحه وقوته وطلعتني للدنيه وماتت...
وصهيل الخيل... وصوت السيارات من بعيد بده يگرب..
-وصاحت ام الخير... يزهره ....الرمل طشيه... ارمال الباديه تريده... طشيه ابسرعه. الامر
منه صار... وعدنه انتهه... والغايب النه حظر... الرمل رديه...
وذرت زهراء الرمل ويه هوه الباديه... ومن وراه
بان وضهر عساف.... والزلم وياه......
حوطت الزلم بيت حمزيه... وهاي المره ما فاده لا حمدان ابنه ولا هادي ولا صافي... ودخلت الزلم ...وكمشوحمزيه وجروه بلحبال
والشيخ هدام.. يضرب بلفشگ ويصيح اليوم يوم الثارات اتحرکن يعظام اهلنه...
اليوم يوم الثارات اتحركن يعظام اهلنه...
☠☠☠☠☠☠☠
أنت تقرأ
نوارس الباديه ياهو ..للكاتبه ام رحيل ...ع م
ChickLitكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
