للكاتبه ام رحيل ...ع م
طلعت اخلاص اخميسه من بيت صگر... تشوف
نوارس ليش تأخرت ما فاتت للبيت وراهه اتشوف عمه صگر....
-نوارس.... نوارس انتي شسوين بره عمي صگر خايف ويسئل عليچ وين صرتي...
-اي اجيت وچانت نوارس بادي على وجهه الهم والحزن تفكر المن حبت كل هاي السنين الي حاماه ولبسه اگلادة امه .....لو الي كتب وياه عهد الدم ذاك اليوم وسمعه احلى گلام وطبع على خده اول بوسه
وب اول عمره ودگ گلبه ورامن ازيد... وره الاول... لو وره الثاني..
-نوارس اشبيچ صافنه.. يله نوارس صگر ايريد ايشوفچ..
ويريد يعرف منهو الزلم الساعدونه...
-اي اخلاص اخميسه جايه ...يله ريسان... عصام صگر يريد يشوفكم...
-يالله.... عصام فشگه من ابليس وريسان الحباب...ما ادري اشجابكم بعد هاي السنين وشلون دريتو حمزيه هاجمه علينه اليوم..
-حنظل وعساف اجوي ايرگضون ال عمي ابو منصور وابنه منصور ايصير صاحبهم وطلبو فزعة اهل القريه
ولمن عرفنه السالفه اني وعصام جبنه الزلم واجينه وياهم..
بس انتي مو بته الحمزيه.. .. اشو اشوفچ مو وياه ولا وي اخوتچ اشعجب يخموستي
-ماكو كل عجب اذا انت عصام فشگه من ابليس صرت هسه دكتور وحباب وگلبك على الفقره... والتواثي راحت والچلاب ماتت...
-لا والله خموستي الچلاب بعده ما ماتت... بس صارن عجايز واکبار واسنونهن اتشلعت... وخموستي صارت حلوه وجمال... ومعلمه...
-اگلك عصام ...اسمي اخلاص.. واذا ما يعجبك اخلاص وتريد اصيحني ...گول اخميسه لا اتگول خموستي... لان اني مو خموسة احد
-صار خلوصتي بس لا اتصيرين عصبيه تره احس گلبي... يرجف ويخاف... لان انتي من فصيلة ابو اخميس... بس حلوه.. صايره كلش اهواي وعيوني
وروحي مشتهيه تداهر وياج....
- يااااا. بله صدگ.... بعدكم مثل گبل تتشابهون بس صرتو اثنينكم حبابين هلمره ما بيكم لا ابليس ولا شيطان ولا وكح.... 😄😃
- شيطان اني وابليس... خليه بس وكح يمعوده
.... وانتي خلوصتي مو بس صرتي حلوه.. وصرتي غيرشکل لابسه لبس بنات المدينه شنو هذا التغير شنو الي صار وياج...
-صرت معلمه وادرس، بمدرسة القريه... اليمكم
-والله عفيه عليچ اخميسه...
-اسمي اخلاص ي عصام الوگح والملعب على الحبلين... اخلاص... اخميسه راح ويه ذيچ الايام الراحت...
-هاااااا.... مثل ما اني چنت وكح وصرت حباب...
-اي مثل ما اتگول... يله نوارس امشي،.... وفاتت نوارس والهم على وجههه وياه اخلاص... وريسان وعصام... ومن بعيد اجه عساف وحنظل يرکضون ويحودون ابحلال صگر الي تطشر بين العرب نهب وسلب...
-نوارس.... نوارس...
-هاااا... عمي صگر... اشلونك انشاله اصوابك ما يوجعك اهواي...
-نوارس... اني زين .
-حنظل وعساف اجوي لو بعدهم
-لا عمي اجوي شفتهم جايين علينه ويسوگون بلحلال بعد ما جمعوه...
-زين صيحيهم الي اريدهم ابشغله اجه وگته وچنت امئجله الهذا اليوم ...
-اني رايحه اصيحهم الك ....وراحت اهديل اتصيح اخوته حنظل وعساف.... واجتي هي وياهم...
- عمي صگر... تره الحلال كله رديناه وما راح منه ولا راس وكلشي رجع مثل الاول.. امرنه عمي واحنه انفذ
-عفيه ولدي... عفيه ابعساف وحنظل... بس رايد منكم مهمه ثانيه.. عندي اهم من الحلال... واهم من المال...
-شنهيه عمي صگر... انت تامر وعلينه انفذ...
-اشو انت طايحله عمي ما عمي... ليش هو مو نسيبكم ورجل اختكم بعد شنو... تگلوله عمي...
-ي مهندس ريسان احنه رهمنه عليه من زغر نحترمه
ونصيحله عمي... مو بلكبر والزغر... ولا بلنسب
وچيه ماخذ اختنه انصيحله بسمه ما نگدر.. هو بعيونه چبير...
-اي خوش اتحچي يعساف... انت شدارس..
-اني بلمدرسه وصلني عمي صگر الله ايخليه للثالث متوسط، وعفته وادرس ويه عمي صگر طب اعشاب الباديه...
-ماگلتولي ....ذوله همه الزلم الساعدوني
-اي عمي هذا ريسان وعصام
-هله بيكم يعمي واني اتشكر منكم على هاي الهده
-لا عمي انت عمنه کلنه وعزيز علينه...
-انت ريسان...
-اي عمي... اني مهندس ري ....وهذا اخوي التوم دكتور عصام ..
-اگعدو كلكم لازم انشوف شنسوي ويه حمزيه... يومه گرب... وانت يعساف اريدك انت وتاخذ واحد وياك وترحون العرب بادية الموصل للشيخ صركال... وتگلوله هذا الگلام...
-اي.. عمي شنو الكلام..
-تگلوله... شباب وماتت من اسنين عشره
وسگنهم سحر من اسحار عشره
ماتو غدر مارادو... العشره
ويلتطلب الثار اتعالوا عشره
حمزيه اشردت ولفت بوادينه السوالم
حفضت عمي عساف الحچي...
-اي عمي حفظت وشوگت اتريد اروح البادية الموصل
-اليوم.. عمي حته ترد ابسرعه واخذ ازلمه وياك وحنظل خليك ويه باقي الزلم
-صار عمي صگر..... وطلع عساف وركب الفرس البادية الموصل... وحنظل طلع ويه الزلم
-اي. گلولي هسه انتو منو.. اشلون عرفتو واجيتونا
-عمي صكر ذوله...
اولاد الدكتور خالد عبد الرحمن... چنه نعرفهم اني واخلاص من چنه ازغار ونعرف اختهم زهراء... حنظل وعساف يعرفون ابن الفلاح اليشتغل عدهم وراحو يطلبون فزعتهم وعرفو واجوي همه والزلم
البل قريه...
گعد صگر على حيله... وجهه صار اصفر وعيونه انترست ادموع... وحط راسه ابين اديه.....
ضلو صافنين نوارس واخلاص... اهديل وامه... ريسان وعصام... الكل استغرب من حالة صگر وليش هيچ سوه... لمن سمع نوارس، تذكر اسم عصام وريسان...
-اشبيك صگر... اتحس ابوجع..
-لا اهديل ما بيه شي... بس الدنيه چاي تلعب وياي
لعبه ما عرف وين بدايته وين راح تنتهي....
اگعدو کلكم ما طول الدنيه جمعتنه ابغير موعد... خل اسولف قصة، صگر گبل ما اموت وتندفن وياي وتظل
ابهذا الصدر...
گبل سبعه وعشرين سنه چنت ابعمر ريسان وعصام
چنت ادرس طب اعشاب، وردت اسوي دراسه على طب الاعشاب بلباديه عفت البيت واخذت ادور بلباديات اتنقل واجمع اشكال من الاعشاب من اهل الباديه، الي يعرفون بلعشب ويداون اليتمرض بهاي الاعشاب وتعرفت على ابنيه من اهل الباديه اتعيش هيه واهله... ابوه وامه وعده اخت اكبر منه متزوجه ابغير عرب... چانت هاي البنيه اسمه حوري واخته جميله... التقيت بيه واخذتني الخيمهم منصوبه بلگرب من عرب الشيخ حمدان الصيهود... وچانو هي وابوه يعالجون الشيخ من مرض الفالج بعشاب يعرفه ابوه وعلمه عليه... عشت وياهم اتلث تشهر... حبيت حوري وبعد ما تعجبني ولا اشوف اي ابنيه غيره حلوه ابعيني....
-عمي صگر انت تقصد امي جميله وخالتي حوري
ابهاي القصه...
-اي ينوارس،... امچ وخالتچ.... خليني اكمللكم القصه
اتزوجت من حوري، ابموافقة امه وابوه عقد النه شيخ عايش ابعرب الشيخ حمدان... اسمه شيخ غازي
-يعني انت چنت تحب حوري مو جميله چاشلون حميزيه گالتلي انك عاشگ جميله وبنيت البيت حتى تظل يم گبره...
-لا يام اهديل احميزيه چذبت عليچ وما رادت من حچيه هذا الا تشوه صورة جميله بعيونچ وعيون بحر
الچان يحبه وما اخذ حمزيه على جميله الا بلسحر والمگر السوته حميزيه اله وهي تدري اني ما بنيت هذا القصر،الا حتى اصير گريب من گبر حوري مو گبر جميله...خل اكمل سالفتي...ونرجع الزواجي من حوري....
... الزواج عدهم بلباديه قبول اهل الابنيه وموافقة الرجال بلبنيه. وتصير زفته ويعرف العرب العايشين وياهم بلزواج... وتزوجنا ومرت على زواجنه اربع اشهر... خلصت دراستي وردت اروح للمدينه اقدمه للجامعه حتى اخذ شهادة الطب بلاعشاب....
وردتهم يرحلون وياي للمدينه.. وبذاك الوگت جانت امه مريضه وابوه رجال چبير بلعمر ساعه يعرف الوادم وساعه مايعرف احد.... حتى بته حوري، ومرته... نوبات ما يعرفهم...
-عمي صگر... مرت ابوي اسمه حوري...
-لا ...ريسان اكيد، مو هي نفس حوري العرفته اني واتزوجته لان زوجتي حوري ماتت من زمان...
-زين صگر كمل قصتك اريد اعرف اشسوه بيك الوگت...
-اهديل.... اني اسف لن ما سولفتلچ قصتي من زمان
-مايخالف... صگر... كملنه السالفه..
-عفت حوري وامه المريضه وابوه الرجال الچبير والمريض... ورجعت للمدينه اقدم دراستي للكليه واخذ شهادتي وارجع ابسياره اخذ، حوري واهله... وبنفس الوگت... اگل الابويه ابزواجي واخذ موافقته
مع اني چنت خايف لن هو تاجر غني وصاحب مرکز وصيت بلمدينه ..وامي چانت متوفيه وتركتلي اني واخوي خالد الي چان دكتور وجراح شاطر املاك واموال اهوايه اباسمنه ورثته عن ابوه لان امي چانت بتهم الوحيده ...
رجعت وقدمت دراستي وناقشت رسالتي... اعشاب الباديه بين الحيات والموت.. وشلون انکثر هاي الاعشاب حتى لا اتموت وتنقرض وتاكله حيوانات الاغنام والماعز... التسرح بلباديه.... ونجحت بمتياز واخذت شهادة الطب بلاعشاب....
ورجعت للبيت واني فرحان ابنجاحي... وفاتحت ابويه... التاجر عبد الرحمن السوالمي..
-هذه جدي... عمي صگر. يعني انت عمي وعم ريسان.
-اي عصام اني عمكم ..ازغر من ابوكم خالد ابخمس اسنين ...
-بس عمي صگر ابويه ايگول عمكم صگر ..چان.. چان
-چان امخبل مو هيچ گللكم... ريسان...
-اي عمي وگال المستشفئ ال انت چنت تتعالج بيه احترگت وهواي من المرضه اختنگو وماتو وهواي احترگو بلحريق... وانت چنت من بينهم...
-صحيح... ريسان... وهسه جايك بلسالفه اشلون صارت...
بعد ما خبرت ابوي ابزواجي من حوري بت الباديه التعرف بلعشب والطب مثلي بس اني عدي شهاده وهي بلايه شهاده... ثار وزبد.. وصارت الدنيه ابيناتنه،
نار واجه هو ما يريد البدويه المعيديه واني اگله مرتي اتزوجته واحبه واريده... وخالد چان ابيناتنه ما يدري
شيسوي... وهو حاير ابمرته مريضه وگلبه ضعيف وعده اثنين اطفال توم عمرهم اتلث اسنين. ريسان وعصام....
-هاي احنه عمي،...
-اي.. انتم عمي... ريسان...
وبعد ما اتعاندت ويه ابوي ولميت كل العندي من افلوس وخليتهن عد صديق الي اسمه كمال نصر چان ويايه من ايام الثانويه هو راح كلية اعلام قسم تصوير فوتغرافي... وچان يمشي وياي بلصحرا والبوادي ايصور... حيات البدو واني ادور العشب والدوه...
وبيوم قررت الم اهدومي واطلع من البيت وامر على صديقي كمال اخذ افلوسي وسندات الاراضي ورثي من امي الضميتهن عده قبل مده.... چان ابويه امدبر الي امر ما چنت حاطه ابالي ولا بحسابي...
واذا سيارة المستشفى واگفه بلباب وياه اتلث زلم جتفوني بعد ما ظربوني ابره تخدير... وما فزيت الا واني ابمستشفى المجانين مربوط ابسنسله ما تسمحلي امشي غير متر واحد خارج سريري... .....
😱😱😱😱😱😱😱
أنت تقرأ
نوارس الباديه ياهو ..للكاتبه ام رحيل ...ع م
ChickLitكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
