.للكاتبه ام رحيل ...ع م
حمزيه بعد ما لمت افلوسه وذهبه وعافت حمدان وصافي وهادي من وراه يحامونه ويضربون الطلق على الزلم من وره سور البيت ...و هي لمت كل افلوسه ومن باب وره البيت مسويته ..شردت وعافت الي تسميهم ولده يحاموه ابدمهم ...بس هم چنهم مو ولده ..وبعد ما حاوطت الزلم البيت گسرت البيبان وفاتت والطلق يضرب عليهم من جوه البيت ...ودخلت الزلم بعد ما خلص كل الطلق. العد اولاد حمزيه ...وفات هدام ...وصگر ...وعساف ..وعزام ابن هدام
کمش اولاد حمزيه وحط التفگه ابراسهم وهو يگول اليوم اكتلكم واحرگ گلب حمزيه عليكم مثل ما حرگت گلبنه على امنه والدرب الغلط جرته..وصاح بيه...ابوه هدام..
-لا ...عزام لا ...لا تكتلهم ...
- اخذ الزلم والحگ ابحمزيه گبل ما تشرد
الذنب ذنبه مو ذنبهم...
-بس يبويه ...ذوله ولده ويحاموه وصوبو اهواي من زلمنه....خليني اگتلهم ...وحمزيه لا تخاف وديت كل الزلم ترکض وراه ..وين تروح البر ...ما يضمه...
-لا يبوي ...تذكر عدك عمام اثنين ماندري ...وين الوکت صار بيهم لا تخلي الغضب على حمزيه يعميك...تاليه تضر نفسك
ما تضره...
-زين يبويه ...وهسه شنسوي الولد حمزيه ...
-چتفهم وحط الزلم تحرسهم منا لمن انشوف حمزيه صارت وين...
يخوي يصگر خلي زلمکم ويه زلمنه ماتخلي شبر بلباديه الا وتگلبه وتدور..لن حمزيه ما بعدت بعده...
وهبت الزلم كله والطلق من كل کتر ثار وحته الي ابقرية السوالم ...سمعو الهوسه... واجتي الزلم ترکض... وصل الخبر للقصر للدكتور خالد
ومرته حوري... هاج الخوف بگلوبهم على اولادهم
وبتهم زهراء هم راحت وياهم وصارله يومين بلباديه ما ردت ودزت خبر للبيت لايقلقون عليهم لن عدهم شغل لازم ايخلصونه حتى المدرسه والمستشفه تكمل... وراح ايضلون بلباديه ليل ونهار.. حتى مشروع قرية نوارس،
يكمل.... وركب خالد سيارته ويه حوري ولوما
خوفه عليهم چا لا راحت ولا للباديه وصلت
...وهناك بلباديه... هجت الزلم اتدور على حمزيه... بس عساف ضل گاعد يم اولاد حمزيه المربطين...
-شوف يحمدان وانت يهادي والحچي الصافي
همين... حمزيه اخذت كل الذهب والفلوس وهجت وعافتكم ابحلگ الموت... وتدرون هي مو امكم.... وما يهمه ان ضليتو عدلين لو متو
-عساف لا تحاول اتخربنه على امنه... اذا هي مو ام حمدان... تره هي امنه وربته كل هاي السنين وربت حمدان مثل ابنه...
-اي يهادي ربته مثل ما ربتكم... تخدموه وتضحون ابروحكم علمود لمن يجيه الموت تشرد وتعوفكم...وانت يصافي وهادي... من يگول ولده الصدگ... يگلون حمزيه بايگه اولاد الشيخ صرگال بلموصل وهاجه.. ومسويه بيهم اشكال من العمايل... ويجوز انتم ذوله الولد..
-صدگ يعساف... احنه اولاد، شيخ... وانصير اشيوخ مثل ابونه...
-اي يصافي.. ومو بس هيچ الشيخ صرگال عده حلال ماله حد، ولا اله عدد.. ويحكم عشيره اكبر عشيره بلباديه... واخوكم الشيخ هدام مريض وما ينعرف شنهو مرضه... بس اني وخبرتي.. بلطب والعشب.. عرفت... مرضه خبيث... وعن جريب ايموت... وان مات منهو يلزم الحلال. ويحكم العشيره... ابنه عزام،.. لو اولاد، الشيخ صرگال...
-ما ندري ...منهو... يحكم يعساف گول
-انتم اخوته... العشيره ما ترضه ابغير هيچ لو تروح الشيخه الغيرهم... والهذا السبب هدام يريد، حمزيه حتى ايعرف وين ودت اخوته
وهو يگول اخوي الچبير چان عمره ثلث اسنين وعده شامه ابزنده ....
-اي اني.. يعساف عندي، شامه ابزندي. شوف.. شوف. کشف زندي وشوف... وکشف عساف زند هادي وشاف ابزنده شامه چبيره چان گبل ايشوفه ابزنده من يصلخون ويسبحون من تمطر الدنيا وهمه ازغار يلعبون بلباديه ومزمز عساف ويه روحه وضحك. وعرف حيلته عبرت علئ واحد من اولاد حمزيه وهسه يدلونه على مكانه... ابدون ما يتعب ويدور بلبراري وراه...
-اي يهادي هاي شامه ابزندك.. صدگ وسمع عصام الحچي... وعرف خطة عساف.وراد يساعده...
-اگلك عساف...
-ها دكتور عصام... وغمز عساف العصام خاف لا يخرب عليه الخطه ما يدري، عصام يلگفه
السالفه وهي طايره...
- عساف... ما تشوف صافي... يشبه الشيخ هدام كلش اهواي حتى من يحچي...
-هااا يدكتور... شو.. اي.. صدگ يدكتور ..صدگ
اني اشلون غفلت عن هاي السالفه......چا هاي هيه چا همه ذوله اولاد الشيخ صرگال عرفناهم.... بعد لازم يتأكد الشيخ من حمزيه
حته ياخذ اخوته وياه ويصيرون اشيوخ ابعربهم... وياخذون حقهم من حلال ابوهم..
بس ما اضن العرب اتصدگ الا حمزيه تحچي
گدام العرب، وتسولف اشلون باگتهم. وحمزيه
هجت.. ومحد، يندله...
-لالا ...نندله ...احنه نندله...
-ولكم اسکتو ...ايچذبون عليكم...
-حمدان وليش انچذب احنه نحچي الشي السمعناه... ويگولون انت امك مو ميته امك عدله وحمزيه خلت ابوك ايطلگه وياخذك منه وينطيك الحمزيه.. ومن مات ابوك...امك رادت تاخذك منه... بس هيه اخذتك واخذت اولاد الشيخ وانهزمت... شنهو انت ما تريد تعرف امك خوالك عمامك... اتضل ابن رجل حمزيه
المگطم.وانت عدك ام واهل الهم كلام وصيت
بين عشيرتهم... هم هاي چذب..
اتريد اتظل ويه حمزيه الباگتك من امك اتريد اتروح اتعيش ويه امك الظلت عمره كله تدور عليك... وهيه هسه مره جبيره وعده مال وحلال ورثته من ابوه
روح وعيش وياه وفرحه بتالي عمره وتزوج وخلف... اشحصلت من حمزيه.. غير، تخدمه وتسمع كلامه..
-انتم ما اتچذبون علينه...
-لا والله يحمدان ما چذبت عليك والله شاهد
واحلفلك ايمان... الگلته الك كله صحيح....
-هاي شبيك عساف... اشلون تحلف چذب هاي صفه مو حلوه اكتشفه برجل اختي.... وچماله
توك بلطريق خطبته... وبينت چذاب وتحلف همين چذب...
-دكتور اسكت خلينه نشم هوه ونرتاح من حمزيه...
-هاااا اشوفكم تتحاچون اتبسبس ابيناتكم انت والدكتور..
-حمدان ابكيفكم النعرفه گلناه الكم... واحنه انريد، نگمش حمزيه گبل هدام لن حالف اذا گمشه ابئيده ما ايخليه عدله دقيقه... وحده
خايف لا تشرد من ايده مثل كل مره... واذا کتله هدام اتضلون اولاد، بحر الفگر... غنامه ورعيان... مو اولاد، اشيوخ...
-واني يعساف صدگ امي عدله...
-والله يحمدان والله امك عدله... وتتنطر جيتك... وهذا كل، امله...
-اقسم ابذاك القران الي هناك.. امي عدله وتوديني اله..
-وگام عساف، واخذ، القران من على الف ابيت حمزيه وحلف الحمدان عليه....
-واحنه هم احلف، النه يعساف....
-شنهي عمي انتم طالبيني، بطلابه وكل ساعه
احلف الكم مو توني حلفت... خليه يكتله الشيخ هدام... ونخلص...
ايطبكم مرض مثل اخوكم هدام وتموتون مثله
يله امشينه يدكتور عصام... نکتله وي اليکتلوه... وخليهم ايضلون رعيان وغنامه...
وعافهم عساف وعصام ومشو عنهم خطوتين
-لالا يعساف تعال راح ندليك بيه وين...
وبانت الضحكه على وجه عصام وهو ايباوع العساف... وردو الهم...
-هاااا... ماعندي وگت اضيعه وياكم... گول هادي... حمدان..
-احنه راح اندليكم ابمكانه...
-يله گول هادي، وينه... خلينه نخلص وانتم همين...
-شوف عساف اتروح الذاك التنور الي ابنص البيت امنصب اتباوع داير مدايره وتوخر الرمل... تطلع جوه التنور باب حديد... بس تسحبه من جوه التنور... وتباوع ابنص التنور
اتشوف ابطن التنور درج فوت بلتنور وانزل الدرچ تلگي ممر... وهذا الممر ايوصل ابنص بيت ابقرية السوالم ...عايشه بيه نوبيه سوده
تشتغل بلقريه.. بلطب والعشب والحجامه... وهي، خاتله عده... منا لمن اتئيسون وبعد، ما اتدورون... تطلع وتروح الغير عرب... وبعدين توديلنه مرسال ايدلينه بيه...
-وهسه هي خاتله عد النوبيه
-اي يعساف منا لمن اتئيسون منه...
ورکض عساف وعصام... ودو على الزلم...
هدام وصگر اجوي يركضون...
-ها يخوي يعساف... وينه حمزيه اجانه منك مرسال يكلون اندليته...
-عساف صفن على كلام هدام.. من گاله يخوي... وبسرعه انتبه من تفكيره ...لمن هزه عصام... اينبه لن عرف عساف عليمن صفن..
-يشيخ اهنا... واشر على التنور... ومثل ما گاله هادي، سحب باب ازغير من جوه التنور وباوع ابنص التنور هو وهدام وصگر والزلم كله وشافو الدرج.. ورادو ينزلون بيه... وعساف صاح بيهم...
-وين اتريد، يشيخ... مو من الحكمه والعقل انفوت ابهذا النفق الجوه الگاع ونحبس روحنه بيه وما ندري... اشحاطه بيه حمزيه من حيله ومكره...
-والراي شنو يخوي يعساف...
-يشيخ الراي قسم تحرس التنور... ونرد الباب مثل ما جان...
وقسم تمشي القرية السوالم البيت الحجامه النوبيه... وتدخل عليه وان فاتت حمزيه للنفق وما گدرنه نكمشه اهناك يدخلون قسم وراه ويحاصروه بلنفق وقسم يبقه ابيت النوبيه وان طلعت من التنور يكمشوه الزلم من هاي الجهه...
-خوش راي يعساف يخوي..صگر وعزام والزلم
يظلون يم التنور من هاي الجهه... واني وياك انروح للقريه... انت تندل بيت النوبيه يعساف
-اي اندله كلش زين... علطول اروح احجم عده...
-خوش... تعال ويانه يريسان.انت وعصام
وهبت الزلم وتلگاهم الدكتور خالد ومرته حوري... وطاحت العين بلعين... وحوري تبدلت الوانه وجهه صار اصفر چن الموت اجاه ايريد
ياخذ روحه...
-هااا بويه ريسان وين رايح ويه هاي الزلم.. وانت همين عصام... اختك وين... بويه بلقريه... روح گدامنه تلگيه... واکو مفاجئه حلوه تنتظرك اهناك... گلهم ودوني البيت صگر وهمه ايودوك
-زين وانتم...
-عدنه شغله بلقريه انسويه ونلحگكم...
ومشه ريسان وعصام وهدام وعساف وفاتو البيت النوبيه... ماگامت ظلت على مچانه واشرت على التنور... ..وعرفو الزلم... قصده...
ركضو للتنور.. وسحبو الباب، مثل باب ذاك التنور وطبت الزلم وراه هدام وعساف وريسان، وباقي الزلم ظلو يحرسون ابيت النوبيه... گاعده ابمكانه وتنفست وچنه حمل وانشال عنه...
لحگته الزلم بلنفق وحمزيه شارده هي وذهبه وافلوسه وما وصلت للطرف الثاني من النفق
الا وصگر وعزام فوگ راسه.... وردت ترگض مذعوره للنفق... اتريد اترد، بلگي من بيت النوبيه ما اندلو الباب بلتنور... وتطلع منه بسکوت وتشرد... ومن ردت، اتلگاه هدام وعساف وريسان... بلتفگ وتلگوه... وهدام ايصيح...
-ديرو بالك... لا تكتلوه.... بعد يوم موته ما اجه
اريده تتنفس الهوه... ديرو بالكم... يلزلم... ديرو بالكم يلزلم....
-حاضر يشيخ.... حاصرناه... ماله مفر... كمشناه
...حمزيه هاي يلشيخ اهنا...
والنفق اظلم وشعلت الزلم مشاعل حمزيه امحظرته بلحيطان حته تشوف الدرب من تروح وترد للنوبيه ومحد يشوفه...وهذا النفق
من زمان اندلته حمزيه من ساعة من هجت من بادية الموصل... وسكنت يم عرب بحر
ونصبت اخيامه يم عاگوله چبيره بطراف العرب ....
وعرفت بلصدفه جوه هذا العاگول، ممر يودي، النص ارض بور بلقريه... وعرفت المهربين يستعملونه يهربون بيه الناس والسلع من اطراف الباديه للقريه ابدون ما احد يشوفهم
ولمن اجوي البدو وحطو ابهاي الجه من الباديه والقريه انبنت وانسكنت... عافو الممر وهجروه... وحمزيه لمن لگته....
وخرت العاگول ونصبت فوگه التنور... ولمن اخذت بحر وماتت جميله هدت اخيام بحر ونصبته يم اخيامه... والممر ظل، جوه التنور.
...... .......
راح توصل قصتنه النهايته... بس بعد نعرف حمزيه اشسوت من مكر... ابهذا زمنه...
💥💣💥💥💣💥💥💥💣💥💥💣
أنت تقرأ
نوارس الباديه ياهو ..للكاتبه ام رحيل ...ع م
Chick-Litكلمة... ياهو.. يستعملها اهل الباديه... ينادون بها من بعيد لمن الواحد ايدور على الثاني ....... فتاة من الباديه ومهندس ري ... اتعارفوا من همه ازغار... وفرقتهم باديات العراق... هو ابن حظر وهيه بدويه.. راعية اغنام... بس الحب.. مايعرف... لاراعي ولا ابن...
