قدري المتعب

بارت 1

مرحبا
بهذه القصه راح اتطرق بيها لاصحاب العقد النفسية بشكل خاص وبنفس الوقت راح تتعرفون بيها على بطلتنا والي راح تعاني
يمكن هواي منكم راح يكولون ماكو هيج شي او اكو احداث ميصدكوها طبعا الشي راجع الكم
كل الي اريد اوصله الكم هي احداث مرت بيها بطله القصة واتمنى اكدر اوصل ولو جزء صغير من معاناتها
متابعة ممتعة حبايبي

اسيل :احداث قصتي قبل ٥سنوات بوكتها جان عمري ١٨ سنه
اني جبيرة اهلي وعندي اخ اصغر مني حسين عمره ١٠سنوات وماما وبابا ،
نسكن بمنطقة من مناطق بغداد ،جانت منطقتي من المناطق المشهوره ببغداد وحالتة المادية كلش زينه الحمد لله بابا جان يشتغل تاجر اثاث وياه شركائه يجيبون اثاث من بلدان مختلفه ويوزعوهن عالمتاجر بالعراق ،
ماما جانت موظفة بس بعد ماحالتنه صارت زينه بابا رفض تكمل شغلها حتى تتفرغلنا وتراعي بيتها واطفالها وكالها مامحتاجين فلوس وماريد تتعبين بالوظيفه وبالبيت بنفس الوقت .
طبعاً اني البنت الوحيده الهم والجبيرة جانت كلمه مدللة قليله بحقي بابا جان مثال للحنان اذا اطلب عيونه ينطيهن الي وماما جانت الي اخت وصديقه بس بنفس الوقت جانت مسيطرة علينا وشخصيتها قوية ومن تكول الي كلمه وحده ما تتكرر دايما الجأ الها ،

ما جان عندي صديقه مقربه بسبب وجودها هي بحياتي ما دورت على صديقه كلشي يواجهني اروح احجي الها وتلكيلي حل وتعلمني الصح من الغلط .

بالمدرسة كلش جنت متفوقه ماخليت دلال اهلي ياثر عليه وما تكبرت بيوم رغم حالتنا المادية، جنت بسيطة جدا باسلوبي ويا البنات ابتسم واضحك ويا الكل ماخليت احد يكرهني بيوم ومدرساتي كلهن يحبني لان احترم الكل

جان حلمي اطلع معدل واروح صيدله وجنت رافضه فكرة الكلية الاهلية ردت كلشي يجي من تعبي لدرجة جنت اكسر ظهري عالكتب مثل ما امي تكول

ام اسيل :ماما كافي كومي من الملازم ضهرج انكسر
اسيل :ماما ماباقي شي عالامتحانات لازم اضبط المواد

ام اسيل :ميخالف حبيبتي بس شوي اكلي شي وريحي عيونج وكملي
اسيل :ماشي تأمرين امر ماما حبيبتي
ام اسيل:الله يسهلج بنيتي وتحصلين كد تعبج
اسيل :الله لايحرمني من دعواتج الحلوه
يلا صبيلنا الغدة جيت وراج

نزلت من الدرج اهوووو هم انت بس تكمز شوكت تكبر
حسين :ابقي بغرفتج مرتاحين جنا
اسيل :انجب كم اسوله عدكم
جريته من اذنه ...بطل هوسة فدوة راسي يأذيني
كملت دربي

شفت بابا راجع من وكت اليوم رحتله
بسته من راسه ..هلو بابا حبيبي

ابو اسيل:هلا ببنتي الگمر ،الله يحفظج بابا اريدج ترفعين راسي بدرجاتج انتي فرحتي بهالدنيا
اسيل :ان شاء الله ما اضيع تعبكم عليه وارفع راسكم
صبت ماما الاكل اكلنه ولميت ويا ماما المطبخ طبعا جانت متخليني اشتغل علمود دراستي

بس بنفس الوقت هي معلمتني كل امور البيت من تنظيف وطبخ
وترتيب ،بالعطله ماخليها تشتغل رغم بابا اكثر من مره طلب يجيبلها وحده تساعدها بالبيت بس هي ترفض تحب يكون كلشي بترتيبها هي وبيدها تشتغله ،خلصت لم السفره ويا ماما
ورجعت اكمل دراستي واستمريت على هالحال يوميه اكعد من الصبح دراسه واخذ ريست شويه واكمل الى ان
اجت الامتحانات ،

وبديت امتحن والحمد لله جنت اجاوب كلش زين ومرات اطلع ابجي اخاف عندي شي غلط .بس بالحقيقة مجاوبة كلش زين بس من خوفي هيج احس

خلصت امتحاناتي على خير واجت العطلة وضليت انتظر النتيجه على احر من الجمر متوترة بشكل ،وموترة كل اهلي وياي ،وكل يوم اخابر صديقاتي واسالهم اذا اكو خبر عن النتائج .وضاله هيج حالي.

ماما اهلها من غير محافظه جنه نزورهم بالمناسبات وبابا عنده بس اخت وحده تجينه كل فترة جانت كلش خوش مره وتحبنا لان ابويه كلش زين وياها وهي اخته الجبيره بمقام امه ، ابنها الجبير وبناتها متزوجين وبس اثيروياها بالبيت فتجي يمنا لان تضوج وحدها
بس جنت اتاذه بجيتها بسبب ابنها جان حاط عينه عليه ومزعج بشكل

هو جان طالب جامعة يدرس هندسه كهرباء شايف نفسه فد شوفه ومن يجينا انغث وانحصر كلش بسبب نظراته وهالشي كرهني بي احسه مايحترم
ولا مخلي اعتبار لاهلي لان بداخل بيتنا وهو هيج نظراته وكلامه بس اضطر اتحمله لخاطر عمتي ما شايفه منها بس الطيب
واكثر من مرة حاول يبين اعجابه الي بالحجي ،بس اطنشه وهالشي يخلي يموت قهر لان كرامته متسمحله وحده ترفضه

جان يوم جمعة بعد الغده كملت شغلي ورحت سبحت اندكت الباب العصر جنت هسة طالعة من الحمام....

يتبع